تاریخی نقد ادک: هر یازیلان تاریخه اینانمامالییق

ایسلامدا و تورک شیعه چیلیگینده، اینسانین اتین یئماخ حارام دیر. 
  فرق اتمز کی آدام دیری یا اولو اولسون. 

بیر باشقا طرفدن،اولو یا دیری هر بیر آدامی و اینسانی - موسلمان اولا یا کافر- تیکه تیکه بولمک و پارچالاماق، ایسلامدا هم حارام دیر و همده "موصله" آدلانیر و موئککد اولاراق، آدامی "موصله" و تیکه پارچا اتمک، نهی اولونوب و مشدد حارام دیر. 

بیر باشقا طرفدن، شاه اسماعیل تکجه معمولی بیر شاه دئییل، بلکه ایسلام دونیاسینا خلیفه لیک ایددیعاسین دا دیر. یعنی ایسلامین ایجراسینا هیممت قوی و جهد گوسترن بیر ووجود دور. یعنی ایسلامین حالالین، حالال بیلن و حارامین دا حارام بیلن بیر شخص دیر.

عینی حالدا، او، بیر شیعه دیر کی اینسان اتین یئماغیدا حارام بیلیر. چون تورک شیعه چیلیک تاریخینده، "آدام یئماق" رسمی یوخوموش و ایماملاردان دا بیله بیر ایش گورسن مئییب دیر. 

صفویلرین ایددیعاسی وار کی ایسلامی، داها دوغرو و محمد حضرتله رینه یاخین ایجرا اتمه گه جهد ادیرلر. 

بونون اوچون دور کی هئچ بیر حارام ایشه و موصله یه ال وورمازلار. 
چون اوندا، هم تامام سوننولری و همده شیعه لری ائوز قارشیلارینا آلارلار.

اگر صفوی شاهلاری امری ایله موصله اتمگ گورونسئیدی، اوندا آدام یئمک و دوشمنی موصله اتمک بیر ساواش رسملرینه دونر و بیر رسم اولاراق، تاریخیمیزده باقی قالاردیر آمما آزربایجان تورکو اوردوسوندا بیله بیر رسم و روسوم یوخوموش.

بیر آیری طرفدن ایسه، صفوی لر، عوثمانلیلارلا ساواشدئیمیشلر کی عوثمانلیلاردا 
ائوزلرین یئر ائوزونده آللهین خلیفه سی بیلیر میشلر و اونا اویغون داوانیرمیشلار. 

ایسلام خلیفه سی، صفوی اولسون یا عوثمانلی، چالیشیر کی ایسلامی ظاهیرده ده اولموش اولسا و اورکدن ده اینانماسا، دوز ایجرا اتسین و موخالیف له رین اللرینه باهانا وئرمه سینلر.

اگر صفوی اوردوسوندا بیله بیر سفاهت ائوز وئرمیش اولسایدی، عوثمانلی شاهلاری، او حادیثه نی بیر اونملی فاکت اولاراق صفویلر ضیددینه اله آلاردیرلار و اونلارین موسلمان اولمادیقلارینا داها بیر جیددی و ایسلاما اویغون اولمایان بیر ده لیل گتیریب، موللالاردان صفویلر ضیددینه و اولو یا دیریلری موصله اتمک ایتتیهامینا و اولن لری یئمک آدیندا فتوا آلاردیرلار. 

منجه، بو یازیلان تاریخ لرین 99 فایئزی یا یالان دیر، یادا "تحریف" اولونوبلار.

 بیرده، بو وار کی بیز تورکلرین دیلینده "یئمک"، "دیشله مک"، "چیی یئمک"، "گه میرمک"، "چی چی یئمک"، "اتیوی دیشمه چه گه رم" و ... کیمی سوزلر "ایغراق" اوچون و عصبانییتی و ناراحاتلیقی گوسترمک اوچون چوخ ایشله نر آمما مجازی آنلامدا اولار و دوغرو اولماز.
بیر موضودا وار: اولا بیلر کی تورکونو فارسجایا چئویرمک ده بو جور سوزجوکله ره فارس موعادیل و قارشیت تاپمامیشلار و تورکجه نی ان ساده شکیلده فارسجایا ترجومه اتمیش اولالار.


ساغ قالین

انصافعلی هدایت
تورونتو
مای آیئنین اوچو 2017


...