محکوم و ایشغال اولونموش میللت لرین دورومو
ایشغال، قورخو، دیلنچیلیک و اردم‌لرین توپلومداکی یئرلری
یازدی:
سالام لار سایقی لار هیدایت بئی : اولای لاری چوخ دوغرو و دوزگون ایضاح ائدیب سینیز ، سیزه تشککور ائدیرم ، آمما مسئله نین بیر اوزون یازئب سینیز و اصلی و پرابلم لی اوزوندن واز کئچیب سینیز ! تورکلرین اثاث پرابلمی کولتور و اخلاق‌لارین‌دا دیر کی بیر بیری ایلن اجتیماعی روابیط لرین‌ده چوخ پیس و اخلاق سیز و تربیه سیز و حرمت سیز داورانیرلار ، و ایکنجی سی تورکلرده ظرفیت دوزوم منطیق تفاهوم تعامول انتقاد پذیری دیالوگ حورمت احترام یوخ دور ! اصلین ده تورکلرده نمونه اوچون تکجه بیر موثبت (مثبت) حوسن (حسُن ) یوخدور ! عکسینه یاخشی چوخلو منفی و پیس پیس خصوصیات وارلاریدی ، و بو منفی صیفت‌لر تورکلرین میللی بیرلشمه‌سینه و هیملیک‌اینه ان بویوک مانع دیر.
یازدیم:
دوستوم،
سیز بویوران سوزلر دوغرو دور. ایسته‌میریم کی توپلوموموزون اوزو قارالیقلارینین اوستون اورتم. پیسلیک‌لری اورت باس اتمک، هر کسه و توم توپلوما ضرردن سئوای بیر شئی وئرمز.
بونلان بئله، بیر چوخ شئی‌لر، بیر میللتین ایچینده، سئویملی، ایستکلی و اردملیک‌له‌رین جوجرمه‌سینه-گوللنمه‌سینه یئر سالار.
او یئر حاضر اولمازسا، او اردملیک‌لر فیلیزله‌نیب، بار وئرمزلر. چون شورلوقدا، هئچ بیر شئی گویه‌رمز.
اولاناقلی باخارسلق، اردملیک و اخلاقلی ببر توپلومون یارانماسی اوچون، ایستیقلالی (باغیمسیرلیقی)، وارلیلیقی (ریفاهی)، اینانجی، دوولتی، ائوز گوونی، امین آمانلیقی ایله قورخمامازلیقی (قورخودا یاشاماماقی)، دینی، اخلاقی و دیلی کیمی قاوراملار لازیم دیر.
بو ده‌یرلی قاوراملارین قارشیسیندا دوران پیسلیک قاوراملار؛ سومورگه‌له‌شمک، کاسیبلیق-یوخسوللوق، کوفر-اینانج یوخسونلوقو، میللی روحسوزلوق، دوولتسیزلیک- حاکیمییت‌سیزلیک، ائوز گوونسیزلیک، قورخو-قورخاقلیق، دینده باغلیلیق (دینده تقلید)، اخلاقسیزلیق (اردمسیزلیک) هابئله دیلسیزلیک کیمی قونولاری قویماق اولار.
گوزل، ایستکلی و توپلوپون چیخارلارینین اولماسی ائوچون، توپلومدا او پیسلیک‌لر اولمامالی دیرلار.
بو ایکی دسته قاوراملاردان هانکیسی اولورسا، او بیریسی یوخ اولار.
چون، بو ایکی موثبت و منفی قاوراملار، ایشیق ایله قارانلیق کیمی دیرلر. بیری اورتایا چیخیرسا، اوبیریسی، اورتادا اولابیلمز. بونلار قارشی دوروملار و قاوراملار دیر.
بیرده، هر دسته‌نین ایچینده کی قاوراملارین هامیسی، بیر زاماندا و بیر بیرینه باغلی و ال اله وئره‌رک اورتادا گورونرلر. یانی، اونلار بیربیرله‌رینه باغلی زنجیر حلقه‌لری کیمی دیرلر. هر سالخیمین هامیسی بیرلیکده، یادا بیربیرینین آرخاسیجا اورتایا چیخارلار.
یئر، زامان و توپلوم، اویقون شرطلرده اولورسالار، بو ایکی بوقچالی قاوراملارین هر بیرینه اوزل مئیدان یارانار.
هر بیر بوقچاداکی قاوراملارین هامیسی بیرلیکده مئیدان تاپیب، آتلارین چاپارلار. یادا هامیسی بیر بیرینین آرخاسیجا یوخ اولماق زوروندا قالارلار و یئرله‌رین، قارشیلارینداکی قاوراملارا ویریرلر.
یانی، هر توپلومدا، بیر قاورامین یاواش یاواش گوجله‌نمه‌سی ایله، قارشی و ضید قاوراملارین یاواش یاواش گوجله‌نمه‌سین گوروروز.
بونلارین آچیقلاماسینا باشلامادان اونجه، سورمالئیق؛ بیر توپلومون باشینا هانکی اویون گله‌ر کی پیس و منفی قاوراملارین دورومونا دوشه‌ر؟
نییه او دورومدان چیخاماز؟
نییه او دورومدان قورتارماسی زور اولار؟
او زامان کی بیر توپلوم، توم ساحه‌لرده ان زیروه‌‌ده و گوجلو اولور، او توپلومون، توپلومون بیرئیلرینین اوز گوونی اولور، اوردوسو اولور، وارلی-ماللی اولور، دوشمن‌لرینین جانینا قورخو سالمئش اولور، و ... اوندان دولایی‌دا موثبت توپلومسال قاوراملاری یاشار.
ایر او توپاوم تهلوکه حیس اتمزسه، اوردوسو ساواشا حاضیر اولمازسا، ساواشا حاضئرلیقی آرادان گئدرسه، هر شرطده صولحو ساواشدان اوستون توتارسا، پول-مال توپلاماقی اردمله‌رین اوستونده سایارسا، یالان‌لار و تغللوب‌لر باش آلیب گئدرسه، قوروملار و بیرئی‌لر ایشله‌رین دوغرو دوزگون یاپمازلارسا، توپلوم و بیرئی‌لر پیسلئقلاری گورمه‌دیم توتارلارسا، و ... پیس و منفی قاوراملار حاکیم اولار.
کوتو قاوراملار حوکم سوررکن، اوغورلوقلار باشلار، فساد باشلار، هر ساحه‌ده پیسلیک‌لر باشلار، اخلاق و اردملر آرادان گئدر، اینسانلیق قییمتدن دوشر، شرف-ناموس، اوز گوون، آزادلیق‌لار، گوزللیک‌لر و ... محو اولار.
او زامان بو سورج هیز بولوبان، توپلومون زورلولوقونا چئوریلیر کی توپلومون اونده گئدنلری سس‌سیز قالیر، الیت‌لری، دوشونجه صاحیبله‌ری توپلومون اونملی و موثبت قاوراملارینین گیری گئتمه‌سینه ایلتیفات امزلر، دوشونورلر توپلومون منفی یونده یورومه‌سینه گوز یومارلار یادا گورور آمما توپلومولا لیدرالرین اوزونه چالمازلار.
اوندا دا او توپلوم، ایچی-ایچدن بوشالیر یادا اشیکدن گلن قورخویا، دوشمه‌نه، رقیبه تسلیم اولور، داغئلیب، گئدر.
ایر بیر توپلوم قورخویا، رقیبه یا دوشمنه تسلیم اولورسا، او دئمک دیر کی او توپلوم، بوتونلوبونده اوزون آشاغا، رقیب یا دوشمنی اوستون یادا اونلاری داها لاییق گورور. بئله‌لیک‌له ایشغالا بویون اییر.
ایر بیرئی‌لر و توپلوم، هر نه‌دن دولایی ایشغالا قارشی آیاقلانمازسالار، ایشغالا قارشی اولومو و اولدورمه‌نی قبول اتمز یاشامازلارسا، ایشغال سورجی هیزلی اولاراق منفی دئییشیمله‌ری یارادیر و اویقولار.
ایشغالین ان اونملی سورجی، توپلومون و بیریله‌رین بئیینله‌رینین ایشغال اولونماسی و یئخانماسی دیر.
اوزللیک‌له توپلومون و بیرئی‌لرین بئیین‌لری ایشغال اولور-یئخانیرسا، پیس قاوراملارا یونه‌لیک بیر سورج باشلار و او توپلوم، هر گون، گوزللیک‌لردن، پیسلیکله‌ره گئری‌لر.
ایشغالچی گوج، ایشغالی باشلارکن، گوجونه دایاناراق، بیر سورو آداملاری، همده توپلومون گوزو اونونده اولدورور.
ایشغالچیلار، تسلیم و سینمیش توپلومدا، اولوم، ایشکنجه، حبس قورخوسون یارادیر، یایئر و اونلارین ذهین‌له‌رینه پومپالار. قورخونو داها درنلش‌دیریر. بو یول، هر تورلو تسلیم و قبوللانماق اوچون لازیم دیر.
تا کی ایشغالچی، ایشغال اولموش توپلومون، اونون بیرئی‌له‌رینین ایچ دیره‌نیشین، دوشونجه دیره‌نیشین، ایراده دیره‌نیشین ازیب، سیندیریر.
ایشغالچی ایستیر، سینمیش توپلومون و بیرئیلرینین روحونا-جانینا، قورخونو، ان کیچیک ذرره‌له‌رینه دک ایشله‌سین.
اونون ایچین ده، داییم مغلوب توپلومو قورخودا ساخلار. اونلارین هر تورلو وارلیقلاری ایله مزاح ادر. اونلارا گولر. اونلارین کیملیک‌له‌رین تحقیر ادر. اونلارین اینسانلیقلارین لاغا قویار. دیل‌لرین کوتولر. تاریخ‌لرین دانار و پیس‌لر. اینسانلیقلارین آشاغالار. اونلارا حئیوان آدی وئریر. اونلارلا، حئیوان کیمی ایمیش‌لر دییه داورانیر.
لاغا قویولان توپلوم‌لا بیرئی‌لر، داها اوزون ساوونابیلمز یادا ساوونماسی چوخ زور اولور. او بیرئی‌لر و توپلوم ساواشا‌بیلمز. ساواش گوجو اولماز.
بیرئی‌لر، امین امان‌دا قالماق اوچون دوشمنه-ایشغالچینین اوردوسونا، سیستیمینه، محکه‌مه‌سینه، ایداره‌له‌رینه و ... قوشولار.
او بیرئی‌لر، ایشعالچینین قوللوقچوسونا چئوریلر. دوشمانلا بیرلیکده، اوز میللتین، ائوز توپلومون، اوز اینسانلارین، اوز دیلین، مدنییت‌لرین، اویقارلیقلارین، تاریخین، گئچمیش‌لرین، دوشونجه‌لرین، و ... تحقیر ادر.
دوشمان-ایشفالچی‌لار، اونلارا گولدوکجه، اونلاری تحقیر اتدیکجه، اونلارا توهین اتدیکجه، اودا عاینی‌سینی اوزونه و توپلومونا یاپار.
ایش اورادک اوزانا بیلیر کی او بیرئی، او آشاغالامالاری، او توهینله‌ری، او اله سالمالاری، دوغال تاپار.
او بیرئی، ایشغالچی دوشمانین آشاغالایئجی ایشله‌رین حقوقی-آخلاقی یوروملار. او ایشله‌ری، اوزونه و ایشفالچیلارا بیر حاق تانیر.
بئله بیر ارکک یا خانیم، هر گولدوکجه، تحقیر اولدوقجا یا تحقیره شاهید اولدوقدا، توهین ادر یا اشیدرسه، اوزون و توپلومونون اسگیک اولدوغونا داها بیر آز چوخ اینانار.
او اوزدن ده، هر ساحه‌ده، اوزون و میللتین گوناهکار تاپار، محکوم ادر. نئجه کی اوزونون و توپلومونون لیاقتسیزلیگینه داها دریندن اینانار.
میثال ائوچون، ایسپانیانین ایشغال ائگتدیگی توپراقلارا باخالیم. خاچلی ایسپانلار، گوجلو ایسلام خلافه‌تینه زور گلدیلر. "آندولوس"و ایشغال اتدیلر.
ایشغال ادرکن، قئردیقلارین، قئریب، قالانلارا "یا جهنم اولون بو توپراقلاردان گئدین یادا ایسلامی ترک ادیب مسیحی اولون" دئدی‌لر.
قاچابیلن‌لر، وار یوخلارین، مال مولک‌لرین، کوک‌لرین، تاریخ‌لرین و ... قویوب قاچدیلار.
وطن‌لرین یوخ، جانلارین قورتاردیلار. دیری قالدیلار. ایر او یاشاما، دیریلیک دئمک اولورسا.
قالانلار، مین اومود ایله قالدیلار آمما اونلارین گونله‌ری داها قارانلیق اولدو.
آندولوسلو موسلمانلار، دینله‌رین دئییشدیریب کریستییان اولماق زوروندا قالدیلار. آدلارین دئییشدیلر. دیل‌لرین دانئب، ایسپان دیلینه گئچدی‌لر. اوزله‌رین، گئچمیش‌لرین، تاریخ‌لرین و توم کیملیک‌لرینه آرخالارین چئویردی‌لر.
ایسپانلارین ایسته‌یی، گوسترگه‌سی و ایراده‌سی یونونده، اینسانلیقلارین ترک ادیب، دانیب، یئنی بیر اینسان وارلیقی اولماقا چالئشدیلار. اولابیلسه‌لر البت. بونلان بئله، نه اونجه کی اینسان قاردیلار، نه ده ایسپانلارین ایسته دیگی وارلیق اولابیلدی‌لر.
داها اونلاردان بیر ده "ابن رشد" کیمی فیلسوف چئخمادی. فیکیر، دوشونجه، فلسفه، منطیق و علم‌لر ده ایشغال آلتیندا توکه‌نر. داها بیر ده توره‌مز یادا چوخ چتین بیتر.
ایسپانلارین ایسته‌گی، اونلارلا بیتمه‌دی. ایسپانلار، موسلمانلارین دین، دیل، دوشونجه، کیملیک و ... دن دونوبن آیاقدان باشا ایسپان-کریستییان اولمالاریندان شوبهه دویدولار، اینانمادیلار.
بو شوبهه، بو تئزلیکده گئچمه‌‌دی. بئش یوز ایل، آشاغا یوخاری ایگیرمی بئش نسیل سوردو. سونوندا دا یاسلارین‌ین سورمه‌سین دایاندیردیلار. بلکه هله‌ده کوشکولاری یئرینده قالیر.
ایسپانلار، آندولوسلولاردان "گئجه-گوندوز، هئش بیر قاپی کیلیتلنمه‌مه‌لی دیر. توم قاپیلارین، حتتا یاتاق اودالارین بویرو آچیق قالمالی دیر" ایسته‌دی‌لر.
ایشغالچی دوولتین ""تفتيش عقايد" مامورلارینین حاققی وار، هر زامان ایراده ادرلرسه، گئجه اولسون یا گوندوز، یوخودا اولسونلار یا آییق، اونلارین ائوله‌رینه و یاتاق اوتاقلارینا گیرسین و اونلارین ناماز قیلیرلار یا یوخ، هانکی دیلده دانیشیرلار و ... تفتیش اتسین‌لر. حتتا شئویشیرکن بئله.
بوردان دیر کی اورتا و قارانلیق عصیرلرینین "عقیده تفتیش محکه‌مه‌لری" باشلاندی.
ایشغالچی مسیحی ایسپانلارنین، آندولوسلو موسلمان بالالارینین، اوشاقلارینین، گنجلرینین، قورخاقلارینین، ساتقینلارینین، و ... ائولرده، محلله‌لرده، مئیدانلاردا، کیلیسالاردا و ... زورونلو تعلیم‌لرده، بئیین یئخامالاری باشلاندی. هئش زامان بیتمه دی.
مسیحی‌لر، ایله بیر روح یاراتدیلار و قورخو حوکومتی سوردوردولر کی هر بیر آندولوسلونون ائوینده، بیر نئچه جاسوس اولدو.
ایله بیر دوروم یاراتدیلار کی هر کس، ائوز چیخاری اوچون، باشقالارین ساتیر.
بیر ائوده، بیر عاییله‌نین عوضولری، بیر بیریندن قورخدولار. بیربیریندن اوشن دیلر. عاییله ده، توپلومدا، گوون اورتادان قالخدی. بیربیرلرینه گووه‌نه‌مه دیلر. حتتا دوشمان اولدولار.
هر آندولوسلو موسلمان، هم وطنینده، هم ائوینده، هم دیلینده، هم دینینده، هم تاریخینده هم مدنییه‌تینده، هم کولتورونده، هم هر کس اوز ایچینده، همده اوز بئینینده بئله زیندانا دوشدو، حبسه محکوم اولدو.
بئله‌لیک‌له، توم بیر میللت، بیرلیکده، گوز آلتیندا، گوونسیزلیکده، قورخودا، سئخینتی‌دا، یوخسوزلوقدا و ... یاشاماقا محکوم قالیب، محکوم یاشادیلار.
آندولوس توملوموندا بیر موسابیقه باشلاندی. هر کیم داها چوخ جاسوسلوق ادیرسه، داها چوخ ایمکانا مالیک اولدو.
هر کیم اوز میللتینه و توپلومونا، اینانجینا، وطنینه، دیلینه، تاریخینه و ... قارشی داها چوخ و داها جیدی چالیشیرسا، داها چوخ خیانت و دوشمانلیق گوسته‌ریر ایسه، اوز میللتین داها چوخ اله سالیب، تحقیر ادیرسه، اونلارا داها پیس توهین ادیرسه، حتتا اوز توپلومونون اویه‌لرین داها آجیماسیز موجازات ادیرسه، اوز آداملارین محکوم و اعدام ادیرسه، اونلارا، داها گوجلو و داها قولای یاشامی حاق ادیلیردی.
آندولوسلولاردان دولایی، ایسپانلار و ایتالییانلار، دینچیلیق، عقیده و اینانج محکه‌مه‌له‌رین (اینانج تفتیش محکه‌مه‌له‌رین) یولا سالدیلار.
بو باسقیلار، بیر ایل، اون ایل، یوز ایل یوخ، بلکه بئش یوز ایل جیوارئندا داوام اتمیش.
ایسپانلارین دوولتی 1990 اینجی ایلله‌رده، رسمی اولاراق، او یاسانی، ایشدن چکمیش.
ایسپانلارین او گئنیش و اوزون سورن، تایسیز زیندانلاری، تکجه آندولوس موسلمانلارین ایچینه آلمامیش، بلکه گونئی آمریکا ائولکه‌لرین و میللتلرین‌ده عاینی گونه قویموشلار.
هم آندولوس، هم گونئی آمریکا میللتلرینین هر شئیی دئییشمیش آمما دونیانین ان گیری قالمیش میللت‌لریندن بیری دیرلر.
چون، ائله بئیین‌لری یئخانمیش ایدی، اینانمادیلار، اوزلری باشقا بیر میللت دیرلر و ایسپان دئییرلر.
اینانمیردیرلار، باشقا بیر میللت و وطن صاحیبی دیرلر کی توپراقلاری ایله عاینی زاماندا بئیین‌لری ده ایشغال اولونموش.
بونون اوچون‌ده، ایستیقلال‌لاری ایله موخالیف ایمیش‌لر. اونون اوچون‌ده چوخ گئج ایستیقلال آلدیلار.
آمما ایستیقلال آلسالار بئله، بئیین‌لری، دونیا گوروش‌لری، و ... ایستعمار دئورینین میراتی دیر کی اونلارا میراث قالیب. هله‌ده اونلارین بئیین‌لری، موستعمیره‌لیکدن و ایشغالدان بوراخیلمامیش.
گوروندوگو کیمی، بیر توپلوم، ایشغال اولاندان سونرا، اونلاری قورخودماق، قورخودا ساخلاماق، اوز بیرئی‌سل و توپلومسال گوونلرین اللریندن آلسالار، ایش‌سیز، گوجسوز بوراخیب، موحتاج ساخلایئب، اسیر-یئسیر، دیلنچی گونونه سالسالار، دیلنچیلیگه عادت وئرسه‌لر، و ... هر شئی ایستعمارچیلارین ایسته‌دیگی کیمی گئدر.
بئله بیر توپلومدا، هئش بیر اخلاق، اردم، اینسانلیق، دیرنیش، وطن آنلایئشی، وطن سئوگیسی، میللت دوشونجه‌سی، میللت سئوگیسی، بیرلیک، بیر بیرینه دستک وئرمک، بیربیرینین اللریندن توتماق، یاردیملاشماق، آزادلیق، و... اولماز. اولاماز. یاراناماز. چون بونلارین یارانماسینا یئر و شراییط موساعید دئییل.
ان اونملی‌سی، اونلارین عاغیل گوجو گئریله‌مه‌سه، سومورگه و ایشغال داوام اتمز. بونون اوچون، اونلارین دویغولارینا یول یونتم آچمالی و عاغیل قاپیلارین باغلامالی. اونلاری یونلندریره‌جک‌لر کی درین تاریخدن قالان اوچ بئش داشا فخر اتسین‌لر. اونلارین عاغیل گوج‌لرین، او یونده قورمالی دیر.
بو توپلومون، دیلی یوخ دور. اگر دیلیندن بیر ایزلر وارسا، او دیل، او توپلومون ده‌یرلرین داشیماز. او دیل، دوشمه‌نین، ایشغالچینین ده‌یرله‌رین، دوشونجه‌لرین، دونیا گوروشون، تعریف لرین، و ... داشیر.
او توپلومون، داها اوزونون تاریخی یوخ دور. تاریخین دوشمن دن، ایشعالچینین الیندن، گوزوندن، باخیشیندان آلیر.
او بیرئی و توپلوم، دونیایا، چئوره‌یه، و ... اوز وطنی، میللتی، تاریخی، دیلی، دوشونجه‌سی، دینی و ...ملی گوزلویوندن یوخ، دوشمان و ایشغالچینین گوزلویوندن، منفلت‌لریندن و تعریف‌لریندن باخار. دوشمانا قازاندیریر. دوشمانین چیخارلارین قورور.
ایشغال اولموش توپلوم و بئیین، اونون هئش بیر میللی حاققینین اولدوقونا اینانماز.
اوندان دولایی دا هر نه میللی ده‌یرلر، حاقلار، گلیرلر، منفعتلر وار ایسه، ایشغالچینین اولابیلیر.
آجلیق، فقیرلیک، دیلنچیلیک، گوونسیزلیک، قورخو کیمی قاوراملار یاشاما حاکیم اولان و ایشغال اولونموش توپلوم، دیرچه‌له‌نه بیلمز.
بئله بیر توپلومدا و روحدا، اردملر و اخلاق اولماز.
اینانجلارین نئجه‌لیگی و کیمه خیدمت، کیمه خیانت اتدیگی، اینسانلارین بئینینه یوخ، قارینلاری ایله بوغازلارینا، یاشاملارینین سوییه‌سینه باغلی اولار.
موحتاج توپلوم و اینسانلاردا، فیکیرلرله دوشونجه‌لر، حتتا داورانیشلار، قارینلا بوغازلاردان اوته‌یه گئچه‌مزلر.
ایشغال اولونموش توپلومدا، بیرئی‌لرده و بئیین‌لرده، اخلاق، تربیه، ادب، و ... ان آشاغی سوییه‌یه دوشر.
ایشغال آلتیندا اولان اینسان و توپلومون، یارادیجی اولمایا ایمکانی، زامانی، بئینی قالمامیش. توم گوجو دیری قالمایا گئدیر.
چون، اینساندا و توپلوملاردا، یاشام و دیری قالماق ان اونملی ایستک دیر.
ایشغال اولونموش توپلوم و بئیین، دیلنچیلیک دوشونجه‌سینین قولو اولموش. او توپلومون اینسانلارینین الی، گوزو، فیکیری، داییما یاتاق یئرینده، یئمده، سک... ده اولور و اونلاری نئجه الده اتمک ده اولور. اونلارین تامینی اوچون، اونا هر شئیی و هر یول حلال دیر.
ایشغال اولموش تورکلر ایراندا، ایشغالی، قورخونو، گوونسیزلیگی، یوخسوللوقو، دیلنچیلیگی، دیلسیزلیگی، دوولتسیزلیگی، حاکیمییتسیزلیگی، دین‌سیزلیگی، امین آمانسیزلیقی، و ... ، روحون و فلسفه‌سین یاشامیشلار. ایشغال ایله عاینی و بیر اولموشلار.
دیرنیش، اخلاق-اردم، دوزلوک، میللتچیلیک، دوولتچیلیک، غورور-باشی اوجالیق، آلنی آغ آچیق اولماق، ال توتان-دستک ویریجی، گوونن، اینانجلی، فداکار، دیلسیز، تاریخسیز، دین‌سیز و ... ایراندا، یوز ایللیک بیر سورجدن گیچیر.
تورکلهرین جانینا، ائله بیر قورخو، دین، دیل، باخیش، دوشونجه، تاریخ، میللت معناسی، وطن آنلایئشی، سوخوبلار کی، اوندان قورتارماق مومکون گورونمور.
ایللا کی یاشایان بئیین‌لری چالینمیش نسیل‌لردن بیر نیچه‌سی اولوب گئدیرسه، بلکه یئنی میللتچیلیک توخوملاری فیلیزله‌نیر و دیلنچیلیک، ایرانچیلیق، آذریلیک، فارسلیق، شعوبیه‌چیلیک، شیعه‌چیلیک کیمی قاوراملارین زیندانیندان دئشاری چئخئ‌بان، دونیانی بیر تورک کیمی، آزاد اینسان کیمی، وطن پرور کیمی، میللتچی کیمی، گونئی‌لی کیمی، آزربایجانچی کیمی، دیلچی کیمی، کیملیکچی کیمی، فداکار کیمی، گورمه‌یه باشلار.
اوندا دیر کی میللی منفعتله‌رینین نه اولدوغونو، بیرئی‌سل و توپدومسال گوونی، بیرلیکده ایشله مه‌یی (امکداشلیقی)، توپلانمانی، اخلاقی، اردمی، اینسانلیقی، گله‌جه‌یی، دیلی، تاریخی و ... ائوز گوزوندن، ائوز گوزلویوندن گورور. یازیر. آنلیر، آنلادیر.
یوخسوللوق، قورخو و ایشغال، بیر توپلومون هر بیر وارین الیندن آلیب، هئچه چیغاردان بیر اوچگن دیر.
تورکلر، اوزللیک‌له آیدین تورکلر، بو اوچگنین ان قورخونج سوره‌جین ایراندا یاشایاراق، یولا دوشوب، بو گونکو دوروما گلیب، چاتیب‌لار. چاتدیریب‌لار.
ایندی ایسه یول آچیق، اونجول‌لر یولدا، فداکارلار اونده، آیدینلار میللی دوشونجه یاراتماقدا دیر.
اخلاق و اردملر ایسه، اکونومییه باغلی دیر. اکونومی، ان اونملی و آلت یاپی آدلی وارلیق دیر کی اوزرینده اوتوران اوست یاپیلارین نئجه‌لییین و یول یونته‌مین شکیللندیریر.
ایسپانیا و آندولوسون دورومون اونوتمامالییق.
حورمتله
انصافعلی هدایت
