منه پول لازیم دی، پول
فامیل‌لردن بیر خانیملا یازیلاشیردیم. بیز ماراقلی حیکایه اورتایا چیخدی:
یازدیم: چوخ گوزلسن. همه‌شه بئله ایدین یا سونرالاردان بئله اولدون؟
یازدی: یوخ. ائونجه، قاشلاریمی ته‌تو اتمیشدیم. قاش اکدیرسم، داها گوزل اولارام.
دوران کیمی اولدو. ائله بیل، درین نفس چکیب، یازدی: ایندی قاش اکدیرمک مود اولوب. پول تاپسام، طبیعی قاش اکدیره‌جه‌یم.
یازدیم: یانی قاشلاریوی قئرخمیش‌ایدین؟
جاواب یازمادی. بلکه، منیم یازیمی اوخور. بلکه‌ده یازیملا اونو سانجیمیشام. بلکه‌ده اورگین سیندیرمیشام، کوسوب.
یازدیم. آللاه آللاه. گور، مود سنین باشیوا نه‌لر گتیریب.
جاواب یوخ.
یازدیم: مود، سنین او گوزل، طبیعی قاشلارئوی آلیب، یئرینه، رنگ ووردوروب.
اوندان سس چیخمادی.
یازدیم: ایندی‌ده، مود، سنی قایتاراجاق، توک اکدیره سن. هه؟
اویاندا سوسقونلوق سورور.
یازدیم: سیز خانیملار، مودون بازارچئلارینین الینده، موم اولموسوز. مودلا، سیزی، ایسته‌دیگی کیمی اللرینده شکیللندیریر. اوینادیر.
سس یوخ.
یازدیم: مود، بیر شئی‌لری سیزدن آلیر، بیر شئی‌لر وئریر. ایله‌کی او مود کوهنلدی، تازا مود یارادیر کی سیزین الیزده‌کی مالی- پولو، چیغارتسین. بو، بیر تورلو، گوز گوره گوره اوغورلوق دور.
سس گلمیر.
بوش بوغازلیق فورصتی الیمده ایکن یازدیم: بیلیرسیز، مود سیستیمی کیم‌لرین الینده دیر؟
جاواب یوخ.
بلکه، منیم سوزله‌ریمی دوشونور دییه یازدیم: مود، چوخ منفعتلی بیر تیجارت دیر. گوجلو تاجیرلرین الینده دیر.
مارا قین چه‌که مه‌دیم. حالا سوسقونلوق حاکیم دیر. ...
بلکه بو سوزله‌ریم، اونو دوشوندورور، دئدیم ائوز ائوزومه.
داها جسارت ایله یازدیم: بیلمیرسیز کی بو تاجیرلر ارکک دیر. مود تیجارتینین پرده‌سی آرخاسیندا، ارکک‌لرین اللری وار. یانی، کیشی‌لر، خانیملارا مود یارادیر، مود ساتیرلار.
بلکه ماراقین چه‌کمه‌دیم کی بیر سورو بئله گلمه‌دی.
سوراراق، اونو، هیجانا گتیرمک، هابئله، دانیشیقا سوخماق ایسته‌دیم:
هئش سورمورسونوز کی بس نییه کیشی‌لره مود چیخمیر؟
گئنه، هئش سس چیخمادی. گوره‌سن، بو سوزلر، اونا ماراقلی دئییل می؟
ائوزوم سوردوم: نییه؟
جاواب گلمه‌دی. کندیم، کندی سورومو جاوابلادیم:
چون، ایندی، خانیملار ایش‌له مشغول اولوبلار. پول- پارا قازانیرلار. جیب‌له‌لری، چانتالاری پول گورور.
گورونور کی اونون ماراقئنی بو بحثه، چه‌که بیلمه‌میشم.
یازاراق، آرتیردیم: خانیملارین پولو پاراسی اولورسا، ارکک‌لردن موستقبل اولورلار.
ائوز ائوزومه دئدیم، قوی اونون دویغولاریندان بیر چیمدیک گوتوروم. بلکه دانیشدی.
اونو، بئله چیمدیکله‌دیم: خانیملارین ایستیقلالی اولماماسی، عاینی زاماندا، ارکک‌لره باغلی قالماسی ائوچون، مود اولمالی دیر کی خانیم طایفاسینین الینده پول-پارا قالماسین. ارکک‌لره باغلی قالسین.
اوندان بیر جوزولتو‌ده گلمه دی.
دوشونجه‌می درینله‌دیم، دییه یازدیم: بوندان بئله، توکه‌تیم بازاری (مصرف) اکونیمیسی، خانیملارا باغلی دیر. خانیملار توکتیجی اولمازلارسا، اکونومی یاتار. ایشسیزلیک اولار. ارککلر اودوزار.
هئش جیققری بئله چیخمادی.
سون قورشونومو آتدیم: ارککلر، خانیملارا قوجامان بیر شئی بوشلودور. ارککلر، بازاری خانیملارا ساتیر. خانیملارین قازانجین اللریندن آلیر. بو ائوزدن‌ده، ارککلر، هم ایش، همده پارا قازانیرلار. بیز، سیزله‌ره بوروجلو دئییلمییک؟
هئش ایشق وئرمه‌دی. گورونو کی تک جانینا یازیشیرام. سوزون قورتارماسی لازیم دیر.
یازدیم:
آی خانیملار، نه یاخجی کی وارسیز. بیز ارککلر، سیزین کولگه‌نیزده، ایشلیر، پول قازانئریق.
سون، بیر سئوز دئییب، قاچیم دئدیم: سیزی الده توتماقدان اوتورو، پول-پارا لازیم دیر. یوخسا، سیز ...
... گلدی. همده ساواش طبیلین چالا چالا:
گئت گده. بولار نه‌دی یازیرسان؟ منه پول لازیم‌‌دی، پول. پول وئر قاش اکدیریم باااا. ناغیل دئمه.
قویروغومو ایکی باجاغیمین آراسینا قئسدیریب، یازاراق، قاچدیم:
"ساغ قالین."
انصافعلی هدایت
No comments:
Post a Comment