حق آدلی بیر وارلیق یوخدور ایللا کی گوجلو اولوب، حاقی تعریف ادیب، گوجسوزله‌ره قبول اتدیره‌سیز
حق آدلی بیر وارلیق یوخدور ایللا کی گوجلو اولوب، حاقی تعریف ادیب، گوجسوزله‌ره قبول اتدیره‌سیز
بو دانیشیقدا، فیکیریمی گیزلتمه‌دن، پولیتیک اولمادان، آیدین آشکارا دوشونجه‌می اورتایا قویدوم.
منیم "حاق" قاورامی حاقدا دوشونجه م، اوز تجروبه‌مه دایاناراق اورتایا چیشخمیش.
حاق سوزو و دوشونجه‌سی دین‌لرده، دوشونجه لرده، فلسفه‌لرده، و ... سیاستده بئله اونملی یئر آلمیش.
هر بیر دین، مذهب، مرام، ایدئولوژی، سیاستچی، حاکیمیت، دوولت، میللت، بیرئی، جینایتکار بئله، اوغرو، روشوتچی‌لر و ... اوزون حاقلی بیلیر.
نییه؟
چون، هر بیر اینسان وارلیقی، حاق قاورامینا، ائوز چیخاری گوزوندن باخیر. حاقی اوز گوزوندن گورور و آنلیر و آنلاتیر.
من بورادا، فلسفه‌لرده، دین‌لره، مذهب‌لرده، سیاستلرده، مملکت‌لرده و ... حاقی نئجه تعریف ادیب، آنلادیبلارا باخمادان، "حاق نه دیر؟" قونوسونا گئچیم:
منجه، حاق گوجلو اینسانلارین، توپلوملارین، لیدرلرین، پوللولارین یاراتدیقی بیر سیاسی دوشونجه و قاورام دیر.
گوجلولر حاق قاورامئندان بیر سیلاح کیمی ائوز چیخارلاری یولوندا فایدا گوتورورلر.
اصلینده، حاق قاورامی، گوجسوزلری، ضعیفلری، مغلوبلاری، و ... ایداره اتمک سیستیمی و اونلاری گوجلولرین یولوندا، ایشلتمک یول یونته می دیر کی گوجلولر یاراتمیشلار، دیللره سالمیشلار.
بو قاورام ایله گوجسوزلری، اولمایان و ایمکانسیز بیر وارلیقا ایناندیرمیشلار تا کاسیبلار، فقیرلر، ضعیفلر، گوجسوزلر او اویوندا یئر آلیب، گوجلونون ایسته دیگی کیمی اویناسینلار و گوجلونون چیخارلارینا خیدمت اتسین لر.
آنایاسا، مدنی حاقلار، اینسان حوقوقو، اولوسلار آراسی حاقلار و یاسالارین هامیسی، ائولکه ایچره یادا اولوسلار آراسی گوجلولرین الینین سیلاح دیرلار.
اگر بو حاقلار و قانونلار ضعیفلرله گوجسوزلره فایدا‌سی اولسایدی، گوجلولر اونلاری یازیب، یایمازلار، اوستونده تیبلیغات اتمزلر دی.
اگر اونلارین اوستونده جیددی تبلیغات وارسا و اینسانلاری، توپلوملاری اونلارا ایناندیرماق ایستیرلرسه، اونلاری اینسانلارا و توپلوملارا تانئدیرئرلارسا، بس اونلار گوجلولرین منفعتلری اوچون مهندیسلیک اولوبلار.
کافی دیر، دونیا سویه‌سینده، گینیش میقیاسلی جورملره، جینایت‌لره، قانونسوزلوقلارا، حاقسیزلیقلارا و ... باخاسینیز.
نه گورورسونوز؟
تامام سویقئریملار، جینایت‌لر، ایشغاللار، سومورگه لر و ... هامیسین دوولت‌لر و ان گوجلولر یاپئرلار. هر نه‌قه‌در دوولتلرین یا شیرکت‌لرین یا مافیالارین یا بیرئی‌لرین و ... گوجو چوخسا، او قه‌در جینایت‌لری ده چوخ آغیر و گئنیش دیر. عاینی حالدا او .جینایت‌لره قارشی اعتیراضلاردا آز دیرلار
نییه؟
چون هر توپلومدا ان گوجلو و قانونلارینا دایاناراق، ائوز قورقولادیقلاری قانونلاری و حاقلاری سئندیرانلار گئنه‌ده همن دوولتلرین ائوزلری دیر.
ضعیفلر، ضعیف و قورخاق اولدوقلاریندان دولایی، قانونلاری سئندیرمایا جسارت اده مزلر.
ایندی کی قانونلاری و حاقلاری گوجلولر تعریف ادر، ایراندادا تورک‌لر یوخ، عرب‌لر، بلوچلار یوخ، قشقایی‌لر یوخ، تورکمن‌لر یوخ بلکه فارس آدلی توپلولوقلارین دوولتی تعریف ادر و ائوزو ده اونلاری هئچه سایار.
بونون ائوچونده، آدی چکیلن میللت‌لرین، نه قانونلاردا، نه ده یاشاملار دا حاقلاری یوخ دور.
نییه؟
چون، اونلارین گوجو یوخ دور. اونلار ضعیف دیرلر. گوج ایسه فارسلاردا و اونلارین دوولت لرینده دیر.
اونون اوچونده، فارسلار، پانفارسلار و اونلارین دوولت‌لری تورک‌لری، تورکمن‌لری، عرب‌لری، بلوچلاری، و ... تعریف ادر و اونلارین حاقلارین کی همن حاقسئزلیق دیر، بللندیریر، قانونلاشدئرار.
بو اوزدن دیر کی آدیچه‌کیلن میللت‌لرین هئش بیر حاقلاری یوخ دور، اولابیلمزده.
البته کی ایران-فارس سیستیمی او میللت‌لرده بیر نئچه حاق تعریف اتمیش.
فارسلیق سیستیمی اونلارین حاقلارین بئله سادیلاماق اولار:
تورک، قشقایی، تورکمن، بلوچ و ... آدلی بیر میللت و توپلوم یوخ دور. اونلار "قوم"لار و باشقا بیر جوغرافییادان بورایا کوچموش، مهاجیم‌لر، اجنبی‌لر، وحشی‌لر، و ... دیرلر.
تورک، قشقایی، تورکمن، بلوچ و ...لرین دیلی، تاریخی، سیاسی گئچمیشی، میللی حاکیمیت‌لری، وطن‌لری و ... اولمامیش.
تورک، قشقایی، تورکمن، بلوچ و ... لر، فارسلارین و ایران آدلی قورقونون عسگرلری، ایش گوجو، وئرگی گوجو، و سومورگه لرییندن باشقا بیر هویت و کیملیک داشیما حاقلاری یوخ دور.
اگر تورک، قشقایی، تورکمن، بلوچ و ... توپلوملاری ایرانلیلیقدان و فارسلیقدان باشقا بیر کیملیک داشیمایا جهد ادرلرسه، ان آغیر شکیلده جزالانمالیلار.
ایندی و فارسلارین بو حاقلاری تعریفی ایله، آزربایجان تورکلویو، قشقایی تورکلویو، تورکمن تورکلویو، الاحواز عربلیگی، بلوچیستان بلوچلویو و ... نه اتمهلیلر؟
اصلینده تورک، قشقایی، تورکمن، بلوچ و ... توپلوملارین و میللت‌لرین هئش بیر حاقلاری یوخ دور.
نییه؟
چون بو تورک، قشقایی، تورکمن، بلوچ و ... ضعیف، گوجسوز، یوخسول دورلار.
ضعییف و یوخسولون حاقی اولماز و حاقدان دانیشاماز.
چون گوجسوزلر، حاقی تعریف اده مزلر. اده بیلسه‌لر بئله، اونو کیمله‌ره و نئجه قبول اتدیرمک گوجلری وارکی؟
بو تورک، قشقایی، تورکمن، بلوچ و ... میللت‌لر، حاقی و حاقلارین تعریف اتمک اوچون گوجلنمه‌لری گره کیر.
گوجلنمک ائوچونده، بیر چوخ ساحه‌ده، چوخلو فداکارلیق و قوربانلیق وئرمک لازیم دیر.
بیر چوخ شئیلردن واز گئجمکلری لازیم دیر.
ان باشدا، بو عآجی حقیقتی بیلمه‌لری و ضعیف اولمالارین آنلامالی، قودرتلی اولمالارین ایسته‌مه‌لی و اونون اوچون جاندان، مالدان، باشدان گئچمه‌لی لر.
او میللت‌لر، اوزلرینه حاق تعریف اتمه‌لی، لاییق اولدوقلاری حاقلاری تانیمالی و ان اونملی حاقلار ایله ان آز اونملیلری بیربیریندن آیئرت اتمهلیلر.
اونلار بیلمه‌لی‌لر کی ان باشدا دوران حاق، باتیلی مسیحیلر یازدیقلاری "اینسان حاققی" دئییل، بلکه "میللی حاکمیت" حاقی دیر.
نییه کی توم قالان حوقوقلار، میللی حاکیمیتین ایچینده یئر آلیر.
چون میللی حاکیمیت اولمازسا، توم قالان حاقلارین هامیسی گوجلولرین سیاسی و تاولاماق اویونو دور.
بونون اوچون، اینانمالییق کی بیزیم میللی حاکیمیتیمیز اولسون آمما دیکتاتور اولسون.
اینانمالییق کی باشقا میللتین حاکیمیتی کولگه سینده هئش بیر حقین آنلامی دوغرو اولماز و کولگه ده اولان و یاشایاق میللته یاراری و چیخاری یارتماز.
ایکینجی ان اونملی حاق، "میللی وطن سرحدلری" حاقی دیر. میللی حاکیمیت، میللی وطن سرحدلری ایچینده معنالانار.
حتّا اگر میللی وطن، بیر قارئج اولسا بئله و اورادا میللی بایراق عرشه گئده‌رسه، بیر گون گلیر، او بایراق، دوشونجه‌لرده کی وطنه کولگه سالار.
میللی حاکیمت و میللی وطن حاقلاری، توم باشقا باشقا، ایچده و دئشدا اولان حاقلارین آناسی و آتاسیلار.
بو ایکی قاورام اولماز ایسه، هر شئی یالان دیر.
اوچ و دورد اینجی ان اونملی حاقلار ایسه دوستو، دوشمنی و حتا رقیبلری یاخجی تانیماق و اونلارین هر بیرینه قارشی درین دوشونجه و داورانیشلارین تعریف اولماسی لازیم گلمه‌سی دیر.
گوج و گوجلو اولماق، بیر میللتین آز چوخلوقونا باخماز. گوج، ایراده‌یه، جسارته و ریسک اتمه‌یه، فداکارلیقا و میللی چیخارلار یولوندا اولومه و اولدورمه ایسته‌گینه باغلی دیر.
بو دانیشیقدا، بیر چوخ مثل چکیب، قونونو ساده و ایدارکی قولای اولمایا چالیشمیشام.
توم دوستلاری، باخانلاری، گورونلری، اوخویانلاری، توم صمیمی قلب ایله منیم دوشونجه‌می حاللاجلیق اتمه‌یه چاغیرئرام.
دوشونجه لرین حاللاتجلیقیندا، رحیمسیز اولماق لازیم دیر.
حورمتلریمله
انصافعلی هدایت
Comments
Post a Comment