هر باغدان بیر آلما
دیلسیزلر-ایشسیزلر اوچون میللی مدرسه
سونرا، بایرام اوچون جوجرتدیگیمیز بوغدانی و مرجیمه یی حیط ده اکمه یه باشلادیق.
سونرا دا بیر نئچه ایش حاقدا دانیشدیق. دیدیک کی بیر میللت او زامان سومورگه اولماقدان قورتارار کی بیرینه و خوصوصی ایله دوشمنه و سومورگه چییه باغلی اولماسین.
اگر بیر میللت یا آدامین گوزو باشقاسینین الینه باخیرسا و اونا اومودون تیکمیشسه، او میللت آزادلیقا چاتماز، او میللت ایستیقلال آلاماز.
چون او میللتین بئینی باغلی دیر. دوشونجه سی باغلی دیر. دونیا گوروشو باغلی دیر.
، سوز سوزو گتیردی و بیز اینگیلیس سومورگه سی، کانادانین دورومو، هیندوستانین دومورو، مدنی موبلریزه، گاندی آدینا یایئلان یالانملارادا ایشاره اتدیک.
بونلاری، باهانا ادیب، سوزون سونون "دیلسیزلر و ایشسیزلر اوچون میللی مدرسه"یه گتیردیک.
دئدیک: آماجیمیز بیر آنلاین میللی مدرسه آچماق و میللتیمیزین یاشامینا یاردیم اتمک دیر.
بو یاردیملار ایکی جوره اولابیلیر: بیرسی سی بودور کی اونلاری تورک دونیاسی، تورک دونیا ایکونومیسی، تورک دونیا تیجارتینه باغلایاق. بودا تورک دونیاسینین دیلی، یازئسی و اوخوماسی ایله باغلی دیر.
ایکینجیسی سه اونلارا ساده ایش قورماق یوللارین آنلاتماق دیر. اونلارا ایش فورصت لرین گوسترمک دیر. ایش لری تانیتماق، ایشلرین آدلارین بیلمک و اونلاری تانیماق، ایشلرین بازارین آختارماق، ... کیمی قونولار، بیزیم بئینیمیزی آچار. اوزوموزه تازا یوللار آچار.
نه دن تهران دا، یا فارسلار اوتوران بولگه لرده فارسلارین الینه باخاق؟ یاشامیمیزی چوخ زور آپاراق؟
بونو دوشندوک و نظریمیزه گلدی کی بیر "میللی مدرسه" آچیلمالی دیر. بو مدرسه ده، بیزلره ایش بازارین تانیتمالی دیر. اونا دایاناراق، وطنه دونوب، زحمت چکیب، ایش قوروب، وطنی ده قورومالییق.
شوعاریمیزسا "میللی مدرسه: دیلسیزلر- ایشسیزلراوچون" دور.
اوماریق دوستلار و میللتچی لر، بو دوشونجه نی و شوعاری خالقیمیزین آراسیندا یایسینلار. تانیتسینلار.
چون، فیزیکی و ساختیمانلی مدرسه چاغی گئچیر. دونیا دئییشیر. بیزده دئییشمه لییک.
ایران-فارس دوولتیندن مکتب، مدرسه و اونیوئرسیته ایسته مه مه لییک بلکه اوز میللی مکتب-مدرسه میزی قورمالییق. بودا، تکجه بیزیم الیمیز ایله اولمالی دیر.
حورمت لریم له
انصافعلی هدایت
01 اپریل 2024
No comments:
Post a Comment