انصافعلي هدایت کیم دیر؟
انصافعلی هدایت؛ 1344 فروردینین 20 سینده قاراداغین "کالان" (فارسجا: کلان) کندینده دوغولموش آمما سیجیللیسینده فروردینین 10 یازیلمیش. ایکی دوغوم تاریخینین آراسیندا قالمیش.
7-8 یاشیندا "تربیز" (تبریز) شهرینه کوچموشلر. 18 یاشیندا ائولنمیش و دورد اوشاقی اولاندان سونرا، 1370 ده تهراندا و علامه طباطبایی دانیشگاهیندا "روابط عمومی و روزنامه‌نگاری" اوخوماقا باشلامیش. همن ایل قازته‌چیلیگه گیرمیش و "سلام" گونده‌لیگینده ایلک باشلادیقی گون توتولموش.
اونون قازته‌چیلیگینین بونووره‌سین توتوقلانماقلا قویموشلار. اوندان دولایی، ایشی توتولماق اولوب.
او، ساواشچی روحونا صاحیب اولدوقو اوچون، قورخولو قونولارا بارماق اوزالتمیش و مافیا گوجله‌ری ایله قارشی قارشیا گلمیش.
اوندان دولایی دا دفه‌لرجه خیابانلاردا، کوچه‌لرده، داغلاردا، مئشه‌لرده دویولموش آمما بیر دامجی آزادلیق قازانماقا گورا ساواشمیش و دالی اوتورمامیش.
سونوندا، تهران و قوم شهرلرینین "انصار حیزبو اللاه"نین اونا قارشی اون گون اعتیراضیندان سونرا و گونلرجه "اولوم اولسون هیدایته" شوعارلاربتدان سونرا، "سلام"دان ایخراج اولموش.
او، تبریزه دونمه‌دن ائونجه، تهرانین فارس قازتلرینین بیر چوخوندا قلم وورماقا و معاشین قازاماقا چالیشمیش آمما او گونده‌لیکلرین هئش بیری اونا اوده‌مه یاپمامیشلار و دئمیشلر کی "الین هارا چاتیر، قوی اورا." اونوندا الی هئش بیر یئره چاتمامیش.
مجبور قالیب، آنا شهری؛ تبریزه دونموش. تبریزده، تهراندن گلن ایصلاح طلب گونده‌لیکلرده چالیشمیش. سونرا "شمس" هفته لیگینین باش یازاری اولموش آمما شمسین مودورو، اونا دئمه‌دن، باشقا بیر دوستو باش یازار ادرکن، شمس‌دن "احرار" هفته‌لیگینه کوچموش.
اوچ-دورد آیدا اوردا چالیشمیش. احرارین مودورو کی عدلیه اووکاتی (وکیل) دیر ده اونون معاشین وئرمه‌میش. او، شیکایت اتسه ده، او رئژیمده کی گیزلی دوولت و مافیالار قرار قویموشلار، بیر کیمسه‌نی ایشسیزلیک و پولسوزلوقلا موجازات اتسینلر ده، هئش شیکایته یئر یوخ دور و سونوج وئرمز.
خاریجی رادیولارلا امکداشلیقا باشلامیش. بو سفر، اونون توتولمالاری داها آغیر، ایشکنجه‌لی و اوزون سوره‌لی اولموش
هدایت، ایکی ایل دن چوخ زینداندا قالمیش. زینداندا اولارکن، اونون جیسمینه و روحونا گئدن ایشکنجه‌لر حاقدا، پرئزیدنت سیدمحمد خاتمی-یه خیطاب شیکایت‌لر و آچیق مکتوبلار یازیب و یایمیش.
اونون تبریز زیندانیندا کی آجلیق آکسیالاری گونده‌مه اوتورموش و سونوندا ایکی ایل حبسیدن سونرا آزاد اولموش آمما سون اون گون ایچینده، بیر نئچه کره توتوقلانمیش و اونا هده‌حربه کسیلمیش‌لر کی خوردادین اونوندا کلیبرده کی "بئز قالاسینا" گئتمه مه‌لی دیر آمما او کی ائونجه‌دن بابک قالاسینا گئتمک اوچون یازی یازمیش و بیلدیری یایمیش، میللی فعاللارلار بیرگه اورایا گیتمیش.
قالادا اولارکن، تبریزدن گلن دادستان چادیرلاردا اونا آختارارکن، خانیملارین چادیریندا گیزله دیلمیش. صاباح تئزدن، آراز چایی یولو ایله، نخجوان کوپروسونه گلیب، اوردان، نخجوانا و نخجواندان تورکیه‌یه گیچمیش.
هدایت-ین پئلانی وطنه دونمک اولسادا، "کیهان" گونده‌لیگینده یازیلان بیر خبر، اونون فیکرین دئییشدیرمیش و سورگون یاشامینا زورلانمیش. بیر ایل، قاچقینلار کمپینده یاشامیش.
2006 ایلینده کی تبریزده گئچن بویوک اعتیراضلارین خبرلرین گونده‌لیک اولاراق رادیولاردان یایاندان سونرا، کانادایا یئرلشمیش و حالا کانادا دا یاشیر.
هدایت-ین بیر چوخ اونملی آرزئسی وار: " او گون اولسون کی وطن و میللتیمیز موستقیل اولسون! میللی حاکیمیت-دوولتیمی تیکیلسین! بیزده آزاد وطنده یاشاماق و اولمک اوچون آزربایجانیمیزا قایئداق!"دییه دوعا ادیر. آمین.
انصافعلی هدایت
hedayat222@yahoo.com
No comments:
Post a Comment