گونئی آزربایجاندان باخیش پروقرامینین 98 - ب
گونئی آزربایجاندان باخیش پروقرامینین 98 - ب -سینین قونوسو خبر دئییل بلکه دوشونجه اورتمک و توپلومدا یئری بوش گورونن بوشلوقو دولدورماقا بیر چابا دیر.
دوشونجهنین آنلامی، همن فلسفه، همن فیکیر دیر. آمما گوندهلیک فیکیر و دوشونجهدن بو فرقی وار کی بیر پارا قونولاری درین دوشونمهلی و هر طرفلی باخمالی دیر.
دوشونجه بولومونون بو هفته کی قونوسو "ایچه دونوک زوراکیلیق" اولدو.
اوغوز بی تورک، قونونون دیبینه جومدو و تاریخیسل اولاراق اله آلدی. او دئدی کی اینسانین ذاتی حیئوانلاردان داها یئرتئجی دیر، دییه، بو حاقدا سوزه باشلادی.
سونرا سوزو اورا گتیردی کی اینسانلار توپلوم و توپلولوق قورما دورومونا گلندن سونرا، مجبور قالدیلار، ائوز حاقلارین قئسئتلایئب، و بیر سئرا یئرتیجی حاقلارین ان زورلو توپلومون لیدئرینه کی دوولت آدلاندی وئرسین لر. بئلهلیک ایله موقاویله یا قرارداد حاقلاری چاغیندا یاشاسینلار.
بو زاماندان سونرا، ایشغال اولموش اینسانلار، ایچلرینده کی او زوراکیلیقی، عوصیانی، یئرتئجیلیقی دوشمنه قارشی، ایشغالچییه قارشی یوخ، ائوز ایشغال اولموش توپلومونا ساری یونلتدی.
ایشغال اولموش توپلومون اویهلری، ائوزلری۱ن تحقیر اتدی. ائوزلرین ووردو.
نییه؟
چون ایشغالچییه زورو چاتمادی. دونوب، اوزون ووردو.
انصافعلی بی هدایت ایسه قونونو "گوجلو و گوجسوزلویه" باغلادی. گوجلولر، گوجسوزلرین توپراقلارین ایشغال ادرسه، توپراقلار ایشغال اولموش آمما آزادلیق و اوزگورلوک ایمکانی وار. اونلار ایشغالا قارشی عوصیان ادیب، بیرله شیب، وطنی و میللتی ایشغالد ان آزاد اتدهبیلرلر.
آمما اگر ایشغال اولموش میللتین بئیینلریده ایشغال اولورسا، ایشغال اولان میللت، ایشغال ادنلرین الینده کی سیلاحا، عسگره و قوللوقچویا دونوشور. ایشغالچیلارین عسکری اولار، ائوز میللتین قتله یئتیرر و بونا ایشینهده فخر ادر.
وطن لری و بئیین لری ایشغال اولان میللت و توپلوم، بیلسه، بیلمهسه بئله، دوشمن او میللتی و توپلومو تانیر.
دوشمن و ایشغالچی اونو تانیدیقیندان، او میللته و توپلوما داییما، جور به جور باسقی آلتیندا توتار. او توپلومو و میللتی و اونلارین دیلین، کوکون، تاریخین، لیدرلرین و ... تحقیر ادر.
تامام چیخیش، اینکیشاف، گلیشمه، آزادلیق، اوزگورلوک، وطن و میللت آنلامین، و .... اونلارین اوزونه باغلار.
او توپلومدا یوکسلمک اوچون، قازانماق اوچون، جانین-مالین، ناموسون، آدین، توپلومداکی یئرین قوروماق اوچون ایشغالچییه باغلانماقدان باشقا چارا بوراخماز. بو توپلومون آداملاری و بیرئیلری، ایشغالچییه وفاسین گوسترمکدن باشقا یول یولاغا بولاماز. دوشمنه قول اولور و ایشغالچینین چیخارلارین تامین ادر. اونون امیرلرین یئرینه گتیرر.
آمما عاینی زماندا، ایشغال اولموش توپلومون ایچینده، توم ساحهلرین باعلانماسیندان و باسقیلاردان دولایی، عوقدهلر توپلانار. عوصیان دویغوسو، اینتیقاد و قئناماق دویغوسو قالخار، توپلانار، داع اوسته داغ اولار.
بیرئیلر و توپلوم، بو عوقدهنی، بو عوصیانی و قئناماقلاری جان قورخوسوندان دولایی ایشغالچینین باشینا توکهبیلمز ایسه، قایئدیب، ائوزونون توپلومونون، میللتینین باشینا توکر. دوشمنی و ایشغالچینی ووراماز ایسه، دوشمنه و ایشغالچییه زورو چاتماز ایسه، قایئدار اوزون، اوز توپلومون، اوز میللتین، اوز آداملارین، ائوز یولداشلارین و ... وورار.
بو دورومدا، بئینی ایشغال اولموش بیرئ و توپلوم، دونوب اوز میللتینه، توپلومونا ضرر وئریر. اوز توپلومونا و میللتینه خیانت ادیر. اوز توپلومونا و میللتینه دوشمنلیک ادیر. اوز توپلوم و میللتینه جینایت ادیر. اوز میللتین و توپلومون تحقیر ادیر. اوز توپلوم و میللتینه ادبسیز اولور.
نییه؟
چون، هر بیر اینسان یا زورلویه و گوجلویه تسلیم اولار یادا زورسوز و گوجسوز بیرئیلردن و میللتدن بیر زورلو و گوجلو توپلوم و میللت یاراتمایا چالیشار. بو سئچیمین ان زور و چتین طرفی زورسوزلاری آیئلتماق و اونلاری بیرلشدیریب، اونلاری ایناندیرماق و اونلاردان بیر گوجلو میللت یاراتماق دیر.
جان، مال ، ناموس، توپلومداکی یئر قورخوسوندان
ایشغال اولموش توپلوم و بیرئی، دوشمن و ایشغالچییه تسلیم اولار، ایشغالچینی بیر میللت بیلر، اوزون ایشعالچییه یاپیشدیرماقلا اوزون، مالین، ناموسون و یئرین قورور.
بئلهلیکله ده، ایشغالچینین یالانلارینا اویاراق، اوزون ایشغالچی توپلوموندان سایئر و ایشغالچینین دهیرلرینه صاحیبلانئر. ایشغالچینین دهیرلرین توپلومدا یایار. ایشغالچینین دهیرلرین، اوز میللتینین دهیرلریندن اوستون توتار.
یادا چون بعضی بیرئیلر گوجلو روحا صاحیب اولار، ایشغالا و ایشغالچییه تسلیم اولماز. بو یوکسک روحلو لیدر اینسانلار چالیشارلار، ایشغال اولموش توپلومون، اینسانلارین ایشغالدان خبردار اتسین، اونلارین سینمیش روحلاریندان، جانلاریندان یئنی و گوجلو بیر میللت و دوولت یاراتسینلار.
بو کسیم، ایچینده کی عوصیانی، توپلانمیش دویغولاری، عوقدهلری هم اوز الینده توتار همده دوشمنه و ایشغالچییه قارشی یونلدیر.
بویو روحلو بیرئیلر، ایشغالچینی و دوشمنی بوراخیب، دوستو، قارداشی، ائوز توپلومون و میللتین وورمازلار. اونلارین عوصیانئنا، اینتیقادینا دوزلر و اونلارین روحون بیرلشدیمهیه و دوشمنه قارشی حرکهته یونلتیرلر.
انصافعلی هدایت
No comments:
Post a Comment