دی ان ای بیر سوز، میللی قورخو و منفعت لر باشقاسین دئییر

  

منده "دی ان ای" تستین وئرمیشم. من ده میلیاردلار اینسان کیمی آفریقادان دولانیب، گونئی آزربایجانا گلمیشم.

 بلکه منیم ده 20.000 ایل بوندان قاباخ، ده ده لر و نه نه لریم بیر آیری یئرلرده یاشارمیشلار آمما یوزلر ایل دیر آزربایجاندا یاشیرلار.

من ده بوردا دوغولموشام. گوزومو بوردا آچمیشام. بوردا یئکلمیشم.

منیم ده آرزوم وار بیر گون گلسین، اینسانلیق آراسیندا هئچ بیر مانع و دیفار (دیوار) اولماسین آمما بو ایستکدن، یوزلر بلکه مین لر ایل اوزاغیق.

واقعییت بودور کی دونیا، من و سیز، ایسته دیگیمیز کیمی دئییل و گئتمیر.

چوخ فرقیلی دیر.

نه لر بیزی فرقیلی ادیب؟

ایله بو توپراقلار و اوردا یاشایان اینسانلارین بیرگه و موشته رک آلین یازیلاری، منفعت لری، ضررلری، سئوینج لری، دردلری، کدرلری، قورخولاری، و ... اونلارا شکیل وئریر. اونلاری "میللتلش" دیریر.

ایستر ایسته مز اینسانلیق بویله بیر منفعت لر، قورخولار،  ایستک لر، آرزولار، آلین یازیلاری، سئوینج لر، دردلر و قوصصه لر اساسیندا توپلانیب لار.

ایله بونلار، بیزلری، اوبیری عمی اوغوللار و عمی قیزلار یا دایی اوغوللاری و دایی قیزلاری قارشیسیندا آیاغا تیکیب.

ائوز منفعت لریمیزدن دیفاع اتمیشیک و ادیب لر. گله جکده ده دیفاع اده بییک و اده جک لر.

اینسانلار ائوز وطن، توپراق، میللی، ایجتیماعی حاقلار، ایستک و آرزولاری یولوندا جانلار وئریب و جانلار آلیب لار.

بو شهامت، جسارت و شوجاعت اورا چاتیب کی ائوز میللتی و توپراغی یولوندا اولن لره، "شهید" و قارشی طرفی ائولدورن لره، میللی "قهرمان" دئییب لر.

تاریخ بویو، هم دین لر، هم بویوک سیاستمدارلار و فاتح لر، بیر منعت لردن دولایی، اینسانلیق بیرلیگی آرزوسونون پئشینه دوشموش لر.

وطن لریندن دیفاع ادن میلیونلار قهرمانی، توپراقلاریندان مودافیعه جورمونه، قتله یئتیرمیش لر. بویله بیر آرزو اوچون، اینسانلاری قتلی عام بئله اتمیش لر و قتلی عامی جاییز گورموش لر تا دونیانی، رنگلی و جوره به جوره، سیاست و منفعت لرین الیندن قورتاریب، آزاد اتسین لر.

او دین لر و فاتح لر چابا آپاریب لار تا بیر مملکت، سرحدسیز بیر انسانییت یاراتسین لار آمما همن بو اینسانلیق، ائوز منفعت لرینه گورا، او بیرلیگی قبول اتمئییب.

فاتح لر، بیر توپراغین و خالقین، میللی "قهرمان لاری" دیرلار آمما مغلوب وطنداشلار، اونلاری "قهرمان یوخ، "ایشغالچی" و "قاتیل" آدلاندیریب لار.

او قاتیل دوشوندوک لری فاتح لرین ضیددینه ساواشیب و ایستیه رک، وطن و وطنداشلاری یولوندا جان وئریب لر و سونوندا (قیسسا یا اوزون بیر قانلی ساواشدان سونرا) ائوز وطن و خالقلارین ایشغالدان آزاد ادیب لر.

نیه بیله دیر؟

مگر اینسانلار بو گون و "دی ان ای" ایله، بیلیرلر کی بیر کوکدن دیرلر؟

یوخ!

اینسانلیق آدم دان بو گونه دک، بونو بیلیب کی بیر کوکدن دیرلر آمما گئنه اورتادا "منفعت"لر، اونلاری دوستا و دوشمنه بولوب.

بو گون "دی ان ای" وار باشقا بیر گون، باشقا بیر شئی اولاجاق.

مگر دونه نه جان، دین لر، پیغمبرلر، اینسانلیغی بیر یئره چاغیرمیردیرلار؟

مگر ایسلامین آللهی دئمیردی: من، سیزی بیر ارکک و بیر دیشی دن یاراتمیشام؟

 حتتا ایسلام دها ایره لی گئدیر و ایددیعا ادیر کی اینسانلاری بیر ارکک و بیر دیشی دن ده یاراتمایئب بلکه اونجه بیرکیشی یارادیب. سونرا اونون بیر نده سیندن بیر دیشی خلق ادیب. یانی ارکه گین ائوزوندن بئله دیشینی یارادیب.

همن دین لر بئله، ائوزلرین و او دین لره اینانانلارین منفعت لرین "اصیل" توتوب لار. اونلارا اینانان اینسانلاری، اینانمایان قئسمئن قارشئسیندا بیرلشدیریب لر.

نه له ره گورا ائوز طرفدارلارین بیرلشدیریب لر؟

او دینه لره اینانان لاری، دوشمن لری و منفعت لری قارشی سیندا، ائوز طرفدارلارین بیرلش دیریب و دونیانی تسخیر اتمک ایله، تامام انسانییتی بیرلشدیرمه گه چالیشیب دیر.

گئچمیش آجی تاریخی واقعییت لر گوسته ریر کی هئش بیری موطلق موظففر اولمئییب.

ان سون دینین آدی "سوسیالیسم" یا "کومونیسم" میش. اودا وعده وئریر دیر کی اینسانلار موشترک و بیرگه منفعت لرینه خاطیر بیرله شه جک دیر آمما گون گلدیگینده، زورلا ایشغال اتدیگی توپراقلار و اینسانلار و حتتا کومونیسم و سوسیالیسم یولوندا جانلا باشلا فداکارلیق ادن اینسانلار، همن "سوسیالیسم" یا "کومونیسم" منفعتله ری ضیددینه آیاغا قالخدیلار.

ائوز خالق و میللی منفعتلرین، کومونیست لر دونیاسینین منفعتیندن اوستون و ایره لی گوردولر. سوسیالیسم یا کومونیسم ایشغالیندان، میللت لرین و وطن لرین آزاد اتمک اوچون و ایستیقلال آلماغ اوچون، جسارت و عوصیان اتدی لر.

بو گونکو سیاسی و خاریجی-واقعی دونیایا خریطه سینه باخارساق، دوننکی یئکه و بوللو اینسانلی ایمپیراطورلوق لار، کیچیک پارچالارا و آز آداملی بولگه لره، بولونورلر.

گله جکده ده بو تازا بولونموش توپراقلار، عاینی منفعت لره اساسن، یئنه ده کیچیک تیکه لره بولونجک لر. بیر آووج مملکتدن، 200 مملکت دوغولوب دور. هله گئنه ده دوغولاجاقدیر.

هر بیر سیاسی بیرلیک، گله جک ده، دیل (اونوتولموش دیللر بئله)، تاریخ، بولگه، دین، قان، قبیله، آداب و روسوم اساسیندا دئولت قورماغا چالیشاجاق دیر. ائوزونه عایید کیملیگی و استتیقلالی آریه جک دیر. کیچیکلشمک (مینیمالایزلاشماق) داها درین لره گئده جک دیر.

بلکه بیر گون گله، اینسانلیق داها کیچیکلشمکدن یورولا. داها کیچیک سیللول لارا بولونمک ایمکانی اولمییه.

سونرا بو "تک سیللوللار" کی هر گون بیر بیرله ریندن آیرئلیر دیلار و بیر بیرلریندن، بیر آز فرقیلره گورا اوزاقلاشیر دیر، یئنی دن بیرلشمه گه باشلایالار.

 بو سفر، همن "تک سیللوللار"، بیر بیرلرینه یاخینلاشیب و بیر داها بویوک و واحید تیکه لرقورماق اوچون قان توکه لر. بلکه بیر گون گله کی بیر بوتونلوگه چئویریله لر آمما اوگون، چوخ اوزاقدا گورونور.

نییه کی بوگونکو اینسان، "تک سیللول لاشماغا" ساری بیر موسابیقه و یاریش دا دیر.

اینسان تاریخینه باخساق، بیر زامان "عاییله" نین معناسی، منفعت لردن آسیلی اولاراق، ده ده، نه نه، باجیلار، قارداشلار، باجی اوشاقلاری، قارداش اوشاقلاری، گلین لر و نوه نتیجه دن عیبارتی دیر. هامی بیر یئرده قالیر دیر و بیر منفعت و قورخو اوزرینه، بیرله شیردیرلر.

همن منفعت و یا قورخو، اونلاردان، قهرمان یا شهید یارار دیردی. اونلاردان بیر موتته حید ایجتیماع و توپلوم یارادیر دی.

عجبا بو گون، همن دوروم وارمی دیر؟

عاییله، او بویوکلوکده، او الوانلیقدا و او زنگینلیک ده داوام دیرمی؟

ترسه سینه.

بوگونکو دونیا گئدیشاتینا اساسن، عاییله "تک سیللول" اولماق اوزه ره دیر.

یانی منفعت لر دئییشیب. قورخو فاکتورودا دئییشیب.

ایندی، قورخو قارشیسیندا بیر دئولت وار کی عاییله ایشیندن ده داها چوخ ایش گورور.

بونون اوچون ده، عاییله ده، بیر ائوده یا بیر یئرده قالماغین آنلامی دا گئدیب. داها او نئچه نسلین بیر یئرده و موشترک یاشاماسی آنلامسیز و حتتا راحاتسیز ادن بیر دوروم گورونور.

داها هئش گلین، قایئن آتا و قای نه نه یانینا سیغینمیر. هر گلین، ائوز ایستیقلالین قورور. ائوز منفعتین قورور.

ایجتیماع و وطنداشلیق آنلامی دا، بویله دئییشیر.

عاییله ده هله تک سیللوللوق بوردا دا قالمئییب، ایره لی گئدیب. بیر زامانلار، بیر چوخ یئرلرده، عاییله، "ار، آرواد و اوشاق" دان عیبارت دیر آمما بوگون منفعت لر داها دا ایره لی لئیب و "عایله دوشونجه سین، فیکیرده و عملده، دئییشدیریب و داها دارالدیب دیر.

ایله کی "عاییله" سوزو آنلامسیز اولوب دور. ارکک لر، گئچیجی اولاراق، دیشی دوست توتور، دیشی لرده ارکک دوست.

عاییله دوشونجه سی، عاینی اسکی و شیکارچیلیق دئوری کیمی، قوندوم-گئچدیمه دونوب دور.

هم ارکک، همده دیشی، ایش دالیسیجان و ایش آوچیسی کیمی کوچمک ده دیر. هر بیر قیسسا زاماندا، بیر یئرده قالیر. سونرا کوچمه گه مجبور اولور. گوچونجه ده، ارکک یا دیشی، توتدوغو دوستون و بلکه ده اوشاغین ترک اتمه گه مجبور قالیر.

 یئنی یئرده، یئنی بیر دوست توتور و هر یئرده بیر اوشاق بوراخماغا مجبور قالیر. قادینلار، تک باشینا اوشاقلاری بویا باشا چیخارانمازلار، ایشله رین یئتیرنمزلر دییه، اوشاغی نه ایله سین. اوشاق اولان یئرده، ائولیلیک و موشترک منفعت لر و ایشلر اولار. اوشاق اولمازسا، ائولیلیک و عنعنه یه احتیاج دویولماز.

 بونون اوچون ده ایجتیماعی و دینی ائولیلیک عنعنه لری آرادان گئتمک ده دیر. بیله گئدیرسه، گلر او گون لر کی آنالاردا، آتالار کیمی ایسته مه دیک لری اوشاقلارین بوراخیب و تک سیللول اولاراق کوچمه گه مجبور قالسین لار.

اوشاقلاری "دئولت" یا اونا بنزر بیر سیستیم ساخلاسین و اونلاردان ائوز منافعی یولوندا قهرمانلار و شهیدلر یووارلاسین!

بو قارانلیق باخیشین سونوندا، اینسانلیق گئنه ده، دونوب، دولاشئب، عاییله سیستیمینه دونه جک دیر. بلکه تکنولوژی اینسانلارا، ایستیراحت زامانی وئره جک، آوچیلیق دئورانین اینساندان آلاجاق، اینسانلار فورصت تاپئب، ایش سیز قالارکن، بیر بیرله ری ایله واخت گئچیرمه گه مجبور قالاجاقلار. فیکیر و محببت آل وئر اده جک لر. عشق باشلاناجاق.

بلکه بیر گون گلر کی اینسانلار داها بیر بیرله ریندن قورخمازلار، اورتادا تکجه بیر منفعت: "اینسانلیق منفعتی" اولار و قالار. اینسانلار او منفعتین اوستونده، بیله شرلر. سرحدلر توپراقلاردان گوتورولر. بیر توراق گوره سی و بیر اینسانییت وطنی و بیر آداملیق وطنداشلیغی اولار. آمما او گون، بو گون دئییل.

اینسانییت وطنی و آداملیق وطنداشلیغی گونلری، ایندیلیک، "آرزولار ایل لری" دیر. کیم قالا، کیم گوره!

بو گونکو دونیا، باجی- قارداش اولاراق منفعت لر و قورخولارا بولونوب و اونون اساسیندا، مملکت لر قورولوب.

من ده بو قورخو و منفعت لر اساسیندا، گونئی آزربایجانلیام و بو وطنین منفعت لرین هر شئیدن اوستون توتورام! اونا اولان هر تهلوکه، منه تهلوکه دیر، دوشونورم.

بو واقعی حیاتدا یاشارکن، اینسانیت و آداملیق وطنداشلیغی اوچون اولان آرزولاریمی دا بوراخمیرام.

بلکه بیر گون دونیا منیم ده بیرلیک و برابرلیک حاقلاریما و اینانجیما حورمتله باخارلار و منیم ده یئریمه او آزادلیغی: حقیقی آزادلیغی، یاشارلار.!