سیاست نهدیر و گونئی آزربایجاندا سیاست نئجه گئدیر، گئتمهلیدیر ده؟
قوزئی آزربایجاندا گئدن سئچیملر، پرزیدنت ایلهام علییئفین یئنیدن باشقانلیقا سئچیلمهسی، پارلماندا آنایاسایا و قورآنا ال باسیبان میللتین حاقلارین قورماسینا آند ایچمهسی و آزربایجانی تورک دونیا عاییله سیندن اعلان اتمهسی، چوخ اونملی سیاسال قونولار و خبرلردیر.
گونئی آزربایجان اوچون بو سیاسال خبرلرین نه اونمی وار؟
او سیاسال داورانیشلارین یئری هارادیر؟
او سیاسال داورانیشلارا نئجه باخمالییق؟
ائونجه، خبرین و سیاسال خبرلرین آنلامی نهدیر و اینسانلارین یاشامیندا نهقدر اتگیسی وار، اونی آچیقلاماق گرکیر.
خبر و سیاسال خبر، هر او بیلگی دیر کی سیزین، یاخین یا اوزاقدا گیدن قونولار و حادیثهلر حاقدا ایلگینیزی چکیر و بئلهلیک ایله، سیزی اونلارا، اونلاری دا سیزه باغلیر. هابئله، سیزین یاشامینیز، بو باغلیلیقدان و او بیلگیدن، دوز یادا دولایی اتگیلهنیر.
هر نهقدر خبر و او ایش یا حادیثه، هم روحسال همده فیزیکسل باخیمدان سیزه یاخین یا اوزاق اولورسا، سیزین دویغولارینیزدا، ایشلرینیزده و یاشامینیزدا، یاخشی یادا پیس اتکی بوراخئر.
عاینی زاماندا، او خبرین یئری و روحسال ایلگیسی، هر نه قدر سیزله یاخین اولورسا، اوقدراونون اتگیسی سیزین اوزهرینیزده چوخ و درین اولور. هر نه قدر اوزاقدا اولور ایسه، او قدر اتگیسی ده آز اولور.
قوزئی آذربایجان، گونئی ایله هر آچیدا قونشو دور و روح بیردیر. گوجلو دوولتلر اونلاری بیر بیرلریندن آیئرسالاردا، اونلار، ایستر ایستهمز بیردیرلر. اوندان دولایی، اوتایدا گئدن ایشلر، سیاستلر و دوشونجهلر، بو تایدا دا اتگیسینی بوراخیر.
آذربایجان جومهوریّتینده بیر سیچیم ائوز وئریب. بو بیلگی و او ایش، گونی آزربلایجانلیلاری دا، ایستر ایستهمز باغلار.
چون بو ایکییه بولونموش آزربایجان، بیربیرلریندن روحسال و فیزیکسل اتکیلنیرلر. چون، ایکیسی، بیر وارلیق دیرلار. عاینی حالدا، فارس و ایران قونوسو، باخیشی و توتومودا، بو اتگیلری داها درین و داها گئنیش بیر سوییهیه گوتورور.
پرزیدنت ایلهام علییئف جنابلاری اعلان اتدیب کی او، تکجه قوزئی آزربایجانین اون میلیون نوفوسونون پرزیدنت دئییل، بلکه دونیانین هر بیر یانیندا اولان اللی میلیوندان چوخ آزربایجانلیلارین پرزیدنت دیر.
او، ایرانا ایشاره ادهرک، آزربایجانلیلارین دیلینین رسمی اولوبان اوخونماماسینا اعتیراض اتمیش و آذربایجانی تورک دونیاسی عاییلهسینین بیر عوضوو سایمیش.
بو قونولار، گونئیله ایلگیلی، ایران- فارسلاریدا باغلار. فارسلاری دوشمنلیک یولوندا، تورکلری ایسه قارداشلیق یولوندا اتگیلیر.
بوندان یانا دیر کی ایستر-ایستهمز، هم گونئلیلر، همده ایران-فارسچیلار، قوزئی آزربایجاندا کی توم گئدیشاتا داها درین باخماق زوروندا قالیرلار.
قوزئی آزربایجاندا سیاست و سئچیملر، گونئیلیلرین اوستونده، بیر چوخ آچیدان اتگی بوراخیر. اتگیلهرین ان باشیندا، سیاست و سیاسال اتگی دورور.
هر سئچیم و سئچیمله ایلگیلی داورانیشلار و دوشونجهلر سیاستین بیر پارچاسی دیر. اوندان دولایی، قوزئیده گئدن سئچیملر و ایلهام علییئف جنابلارینین یئنیدن سئچیلمهسی، قوزئی آزربایجان خالقی و گلهجه ایله یاناشی، گونئی آزربایجان، ایران، بولگه میللتلر، تورک دونیاسی، هابئله اوروپا، آمریکا و … نین سیاستلرینین نئجهلیگینده و شکیللنمهسینده درین یئری اولاجاق.
دوغال اولاراق، گونئی آزربایجانلیلار بو سیاسی داورانیشی گورمهدیم توتامازلار. توتسالار بئله، سیاست اوزون اونلارا زورلا سوخار.
عاینی زاماندا، سیاست، گلهجگی گورمک دیر. ائرمنی ایشغالی صولحه و سونا چاتمامیش. ایران، روس، فئرانسا و هیندوستان ارمنستانی دستکلیرلیر و سیلاحلاندیریرلار.
اولابیلیر، ایران، هیندوستان و فرانسالئلار گلجکده، ائرمنی الی ایله یئنی بیر ساواش چیخارسینلار.
بو احتیمالدان دولایی، هر ایکی آزربایجانلئلار و اونلارین سیاسال، اوردوسال و … گوجلری هر احتماللا قارشیلاشمایا حاضیر اولمالی دیرلار.
گونئیلیلر، بیر چوخ توپلومسال مسئلهلرده قوزئی ده قورولان دوولت-میللتین گوجونه، تجروبهسینه، اوردوسونا، و … اومود گوزون تیکمیش.
بولگهده، ایرانلا باشقا دوولتلر آراسیندا، کوردلر ایله تورکلر آراسیندا و … هر هانکی بیر چاتیشما و ساواش چیخارسا، یادا ایراندا بیر آنی دئوریم اولورسا، آزربایجان جومهورلوقونون دوولتچیلیک، اوردوچولوق، حوقوق و ایدارهچیلیک تجروبهلرینه دایانماق و قوزئیدن کومک آلماق گرکیر.
گونئی آزربایجانلیلارین، ایران و قونشو میللتلره قارشی میللی حاقلاری، منفعتلری، ریقابتلری و دوشمنلری وار. اونلاری الده اتمک، قوروماق و دوشمنلیکلرین ضرر زیانیندان قورونماق اساسدیر.
بو منفعتلری الده اتمک و ضررلری آزالتماق اوچون، قوزئی آزربایجان، تورکیه جومهورلوقو و تورک دونیاسی ایله یاخیندان ایلگیلنمک، چوخ اونملی دیر.
بوندان دولایی دیر کی آزربایجان جومهورلوقوندا و تورک دونیاسیندا گئدن هر بیر سیاست، گونئی آزربایجانین میللی منفعت و ماراقلاریله اوست اوسته دوشور.
بونلان بئله کی اوکراین و روس، گونئی آزربایجاندان اوزاق گورونور آمما اورادا گیدن ساواش، توم میللتلر ایله بیرگه، گونئی آزربایجانلیلاریدا اوز پیس اتگیسینه آلیب.
روس-اوکراین ساواشین بیر ترهزییه قویوب اولچسک و باشقا احتیماللارلا دارتساق، گورهریک کی فارسلارین، ارمنیلرین عربلرین، تورکلرین، کوردلرین، یهودیلرین و … هر گئدیشاتی، گونییده باغلار.
اونون اوچون، گونئی آزربایجانین سیاسال دوشونورلری، بولگه دوولتلرین هر بیر گیدیشاتین گوز آلتیندا توتمالی دیرلار.
اگر ایران، بیر ساواشا گیریر ایسه، کوردلر داها چوخ سیلاحلانیرسا یادا کورد تیرورچولاری بولگهدن گیدیرسه یا کوردلر سیلاحسیزلانیرسا، فئرانسا-هندوستان و ایران، ارمنیلری بیر یئنی ساواسا ایتهلرلرسه، فیلیسطین-اسرائییل ساواشلاری یئنی بیر سیاسی سیستیمین یارانماسینا یا یئنی بیر سیاسال-اوردوسل قورومون یارانماسینا گئدیرسه، گونیی آزربایجاندا نهلر اوز وئرهبیلیر و نهلر دئییشمهلی اولاربیلر، دییه سورمالی، جاوابلار تاپمالی و هر جور شراییطه، حاضیرلیقدا اولمالی دیر.
بونون اوچون بولگهده و حتّی بولگه ایله ایلگیلهنن دوولتلر ایله گوجلهرین، سیاسال، توپلومسال، تکنولوژیسل، سیلاحسال، اوردوسال، تیجاریسل و … اینکیشافلارین، بیرلشمهلرین، آیریلیشمالارین گوز آرد اتمک بویوک یانلیشلیق اولار.
بو یانلیشلیق، مینلر بلکهده یوزلرمین آزربایجانلی تورکون جانینا مال اولابیلیر. گونئی آزربایجان دوشونور و سیاسیلری، مینلر جانی یانلیشلیقدان دولایی وئرمهمک اوچون سیاسال و ایستیخباری گوزلرین، دورد گوزلو آچیق توتمالی دیر.
گونئی آزربایجاندا یاشایان دوشونورلرین، چئورهدکی قارداشلار، دوستلار، رقیبلر و دوشمنلرین ایندیکی و گلجکدهکی ایستیراتئژی و تاکتیکلرینه ماراقسیز و توتومسوز قالماق حاقلاری یوخ دور.
بئله بیر لوکس باخیش، گونئی آزربایجانی ایله اونون خالقین، بو کره، یخلوقا سوروکلر. دونیادا، یانلیش یاپان اینسانلارا و توپلوملارا رحم و ائورک یانماق یوخ دور.
یعنی، رئال دونیادا اینسانلیق دییه بیر قونو یوخ دور. هم گوجسوز اولوب، همده اینسانلیق کیمی گوزل و آغزی دولدوران سوزلهره اینانیب، تهلوکهلری سایمایز اولورسانیز، گوجلولر، بیر آندا سیزین وطنی ایشغال ادیب، سیزی سویقیریملا یوخ ادرلر. بو، آجیدا اولسا، حیاتین و سیاستین ان دوغال ایشی و یاپدیریمی دیر.
تاریخ بویو، خوش گورو یوخوسونا گیرن میللتلردن، یانلیش یاپان میللتلردن، خوشگورو اساسینا داورانان میللتلردن، گوزل سوزلهره اینانان میللتلردن، ساواشا حاضیر اولمایان میللتلردن یئر اوزونده بیر نشان یوخ دور.
تاریخده، بویوک اینکیشافلی تمددونلر، خوشگورولره دایاناراق، یئنی گلمیش و گنج گوجلره یئنیلمیش، محو اولوبان آرادان گئتمیشلر.
یانلیش یاپارسینیزسا، دونیا سیزین سوقئریما گئتمهنیزه، گوزلرین یومار. یانلیش یاپانلار، جزالارین چکیرلر. سیز، قئرقینا گئدندن سونرا، بوتون دونیا های کوی سالسین، سیزه نه یئترکی.
نئجه کی قاجار تورکلویونون سونوندا، تورکلر خوشگورو، دیموکراسی، آزادلیق، مشروطه، فارسللرا داها چوخ حوقوق، اینسان حاقّی و خوش نیّتلره آللانیب، بو خستهلیکلره توتولاراق، حاکیمیّتلرین، دوولتلرین، گوجلرین، اوردولارین، ایدارهسیستیملرین، دیللرین، تاریخلرین و … الدن وئریب، کوکسوز فارسلیقا اودوزدوقدان سونرا، ایکی-اوچ کره قئرقئنا معروض قالدیلار.
قاجارلاردان سونرا، تورکلر، وطنلرینده، وطنسیز، دوولتسیز، حاقسیز، حوقوقسوز، دیلسیز، آغیزسئز، دئموکراسیسیز، قانونسوز، مجلیسسیز، مشروطهسیز، رهبرسیز، وطن بویدا فارس زیندانیندا قالماقا محکوم اولدولار.
دونیا، بیر اینجی دونیا ساواشیندان بو گونه دک، تورکلرین سیندیریلماسیندان، تیکهتیکه بولونمهسیندن، کیملیکلرینین دانیلماسیندان-دئییشیلمهسیندن، حاقلارینین یوخ اولماسیندان، تورکلوکلرینین و آدلارینین دئییشیلمهسیندن، تاریخلرینین دانیلماسیندان و … سئوینج ایچینده اولاراق، لال قالمادی بلکه تورکلویو سیلمهیه، پوزمایا چالیشدی. تورکلرین بئینین یودو، یئخادی.
تورکلر ایسه خوشگورولری، دیموکرات اولمالاری، آزادلیقا ایچدن اینانمالاری، قانون، مجلس و مشروطهیه اینانیبان ایشلمه قویمالاری، مسیحی دونیاسینین و اونلارین ال آلتیسی اولان فارسللرین خوش امما ایچی بوش سوزلهرینه اینانمالاری و … ایچین چوخ شئیلرین ایتیریب، الدن وئریبلر. توپراقلار، حاکیمیتلر، دوولتلر، جانلار، ماللار، کیملیکلر، … الدن وئریب، هئچ نه آلمامیشلار.
توپلومسال یاشام دئدیکلری وارلیق، هر بیر شئیدن اونجه، سیاسال وارلیق دیر. اونو، سیاسال وارلیقدان قئراقدا گورمک، ان بویوک و گری دونولمز یانلیشلیق و سیاستی دوشنمهمزلیک دیر.
توپلوم اینسانی ایسه، بیر سیاسال جاناوار وارلیقی دیر. ایکی اینسانین بئله، بیر یئرده گلمهسی، سیاسال داورانیش دیر، منفعت اساسلی و ضررلرین دفعی اوچون بیر سیاسال داورانیش دیر.
بوندان دولایی، هر بیر بیرئیین و توپلومون، گوجونه، ثروتینه، سایئنا، توپراقئنین آز چوخلوقونا باخمایاراق، داورانئشی سیاسال داورانیش دیر، سیاسال موحاسیبه دیر.
ائولیلیکلر، اوشاق(لار) صاحیبی اولماق کیمی قونولار بئله سیاسال قونولاردیر و سیاسال حساب کیتاب اوزینه یاپیلیرلار.
بوندان دولایی، تورک و گونئی آزربایجان اینسانی دا، او قدرده گئری قالمیش دئییل کی سیاسال داورانماسین. چون اونون هر داورانیشی، سیاسال بیر داورانیش دیر.
سیاسال داورانیش، جیوارداکی، یاخین یا اوزاقداکی سیاسال وارلیقلارین داورانیشلارین و گلجک اوچون یاپئلانارین، دوشونجهلرین اویرنمک، ائوز کونتورولونا (ایختیارینا) آلماق یادا ان آزی، گوز آلتیندا توتماق، منفعتلرین چوخالتماق، زیان ضررلرین ان آزا ایندیرمک دئمک دیر.
خوشگورولو و آحماق بیر سیاسال توپلوم و اینسان ایسه، باشقا سیاسال وارلیقی، ائوز گوزو و اختیاری آلتیندا توتماق یئرینه، باشقاسینین گوزتیمی آلتیندا اولمانی سئچمیش اولابیلن بیر وارلیق دیر.
بوندان دولایی، دوشونمک اولار کی هر بیر سیاسال وارلیقین و مدنیّتین، سیاسال رقیبی، سیاسال دوشمنی ده وار.
بوندان دیر کی قوزئی آزربایجان ایله تورکیّه جومهورلوقلارینین سون سیاسال، اکونومیسل، تکنولوژیسال، تورک دوشمنلرین پوسگورتمک، هر جور اینکیشافلاری، تورک وطنین دوشمن ایشغالیندان آزاد اتمک، دوشمنی گئری اوتورتماق، تیرورچولاری اتکیسیز اتمک کیمی سیاسال تورک-میللی داورانیشلار، هم گونئی آزربایجانلیلارا و همده بوتون تورک دونیاسینا، یئنی بیر میللی روح، تورک روحو و ائوزگوون وئرمیش.
یعنی گونئیلی آذربایجانلیلار کی یوز ایله یاخین ایران-فارس باسقیسی و سومورگهسی آلتیندا قالمیش، ازیلمیشدیرلر، قوزئی آزربایجان و تورکیّهنین سون گلیشمهلری و گوج قایناقلارین الده اتمهلرینه دایاناراق، اینانیبلار کی هر بیر ایشین و آشامانین عوهدهسیندن گلهبیلیرلر.
چون، اونلار اوچون سیاسال ایراده، قاراباغی آلماقلا، تورکیّهنین هر طرفلی اینکیشافی ایله یئنیدن معنا اولدو.
انصافعلی هدایت
