ایچه ری و دیشاری میللی حرکتچی لرین فرقیله ری

دوستوم!

هئش بیر آغاجی کوکوندن قوپاریب، باشقا یئرده اکمکله، همن آغاجی و همن باری اوندان آلانمازسان! اویله بیر بکلنتی دوغرو دا دئییل.

هر آغاج ائوز یئرینده، گوجلو اولار و بار وئرر.

بو نه دنله، خاریجده یاشایان لارین هامیسی، کوکلریندن اویولوبلار و خاریجه ده "بیتمه مه گه" چالیشیرلار. خاریجه نین قارشیسیندا دایانماغا و اونلا همن اولماماغا دیرنیرلر.

بونون اوچون ده، خاریجه اونلارین گوجله رین اللریندن آلیر. خاریجه بیزیم کیمی کوچورولمه گه مجبور ادیلن لری، گوجسوز ادیر. خاریجه بیزلری که خاریجه نی سئچمه میشیک، گوجسوزلوگه محکوم ادیر. بیزلری ائوزوندن بیلمیر و بیزلری منیمسه میر. خاریجه ده یاشئرسان آمما اونون بیر پارچاسی دئییلسن.

خاریجه ده بیر مملکتین یا بیر سیاسی-حوقوقی قورومون "عوضوو" اولورسان آمما وطنداش دئییلسن. ائوزون ائوزونو جیددی وطنداش بیلرسن و اعلان ادرسن. وطنداشلیقینا جیددی غورورلا باخارسان و اونو خاریجه لی یانیندا گوجلو دیله گتیررسن آمما بو ایصرار سنین ایچینده کی قورخونو ائوزه وورار.

سنین بو ایصراری نین قئراغیندا، خاریجه لی، سنی "موسلمان"، "قاچقین"، "تازا موهاجیر"، "ایشچی و فهله"، خاریجه لی لرین ایش لرین غصب ادن و اللریندن آلان و اونلاری ایش سیز قویان و ... بیلر و حساب ادر.

سن اورانین ایش ماشینینین بیر موهره سی سن. سنه وطنداشلیق وئردیک لری اوچون میننت قویولار. داییما میننت داشیرسان. سن، بو وطنداشلیقی اینسان اولدوغون اوچون "حاق" اتمیرسن. "وطنسیز" اولدوغون اوچون او وطنداشلیقی "دیله نیرسن". وطنداشلیقی "گئری آلماق ایمکانی" شرطی ایله سنه وئریلیر.

بو سیاسی-حوقوقی وئریلگه نین میننتین داشیرسان. سنه "سیاسی نه دن لردن" دولایی "وطنداشلیق" وئریلیر آمما هر آن اونو سندن گئری آلابیلرلر.

خاریجه ده، خاریجه لی لر، سنه "همیشه" بیر "تازا موهاجیر" گوزی ایله باخیرلار. حتتا اونلار کی سندن بیر نئچه ایل قاباق موهاجیر اولموشلار ، ائوزلرین سندن داها چوخ اورانین ضاحیبی بیلیرلر. سنه زورلا قبوللانیرلار.

سن خاریجه ده وطنداشلیق آلارسان آمما سنی هر ایشه بیله آلمازلار. بیر ایش اوچون مین دره نین سویون بیر بیرینه قاتارلار. آن آشاغا ایشله ره مجبور قالارسان.

بو همن "سیاسی و پولیتیک "دئشلاماق" دیر. بو جور دئشلاماغی کیمسه یا هئش بیر قوروم قئناماز. بو دئشلاماغی سنین ائوز باشئوا و خاریجه نین دیل، قانون، کولتور، ایداره، ... سیستیمین بیلمه مه گیوین باشینا یئخارلار. سن "بیلمه مک له" سوچلانارسان و "دئشلانماغین" سنین بوینوون وبالی گوسته ریلر. دئشلانماق حیسس ادیرسن سه، سنین گوناهین دیر، دئییب، سنی گوناهکارلیقیوا ایناندیرارلار.

سن خاریجه ده و بیر بویوک شه هر و میلیونلار اینسان ایچه ریسینده یاشارکن، بیر آدا یا جزیره ده یاشاماق حیسسی آلارسان، تکلیگه محکوم اولارسان.

خاریجه بیزلری، بیر بیریمیزه "غریبه" ادیب. هر کس، بیر یئرده تک دوشوب. سن، بیر یئرده، بیر باغدا، بیر داغدا، بیر دره ده، بیر کتده، بیر شهرده، رابینسون کوروزو اولارسان. بلکه بونو بیلرسن بلکه بیلمزسن!

هه، "بیرلیک اولمایان یئرده دیریلیک ده اولماز!" دئمیش لر. خاریجه یه کوچدورولموش اولان بارلی آغاجلاریمیز، یئنی دن، بار وئرمک سوره سینه چتین گلر. اولار، اونلارین ایچلرینده بیر نئچه سی، یاخجی دا بار وئرسین آمما اونلارین سایی بارماقلار ساییئندان بیله داها آز اولار.

خاریجه ده کوسوز اولان هر بیر آغاجین، او بیری آغاجلارا دایاق دورماخ ایمکانی یوخ دور.

نیه؟

ایسته میر دئلل ها! ایمکانسیز گورونور. اوول گرک هر کیمین ائوزو تازا توپراقلاردا کوک سالسین!

نیه کی هامی ائوز کوکوندن، ایجتیماع سیندان، خالقین دان، وطنین دن، توپراغیندان، و ... قازیلیب. کوکسوز دوروما سوخولدوروب.

هامی بیلیر کی خاریجه ده بو راحاتلیقلا کوک سالماق اولماز. خییالیندا کوک سالماغی راحات گوررسن آمما عملده اونلار ایل بلکه عومورلر بویو زامان آپارار. یوزلر بلکه مین لر ایل سورر، بیر ده، وطنده کی کیمی کوک سالاسان.

بو اوزون زاماندا دا آزلیقدا اولدوقونون اوچون، ارییب آرادان گئدرسن. بونون اوچون دور کی ایچه ری "وطن" دیر. بونون اوچون دور کی وطن آنلامی، حیات داشیر و کیملیک دیر. وطنسیزلیگی چکمه ین، بونو بیلمز و حیس اتمز.

ایچه ری "کوک" دور. ایچه ری "دوغما" دیر. ایچه ری "دیریلیک" دیر. ایچه ری "بیرلیک" دیر. ایچه ری "جریان" دیر. ایچه ری "حرکت" دیر. ایچه ری "اینانج" دیر. ایچه ری "مئیدان" دیر. ایچه ری "موباریزه" دیر. ایچه ری "دوشونگه" دیر. ایچه ری "وطنداش" و "هموطن" دیر.  ایچه ری "هر شئی" دیر. ایچه ری "وارلیق" دیر. خاریجه "یوخلوق" دور.

اشیکده کی میللی حرکت ده کی دوستلارین یوکو، وطنده کی میللی حرکت ده چالیشانلاردان یوزلر قات آغیر دیر. چون خاریجه ده کی میللی حرکتچی بیر اینسان، یوزلر مئیداندا موباریزه آپاریرکن، ایچه ریه ده فیکیرله شیر و الیندن گلدیکجه، قول وئرمه گه و دایاق دورماغادا چالیشیر.

خاریجه ده کی میللی حرکتچی بیر فععالیمیز، تکلیکده، کوکسوزلوکده، وطنسیزلیکده، کیمسه سیزلیکده، دستکسیزلیکده، یالقیزلیلیقدا، وطن و موباریز قارداش باجیلارینین حسرتینده، آتاسیزلیقدا، آناسیزلیقدا، باجیسیزلیقدا، قارداشسیزلیقدا، کیمسه سیزلیکده، بیلمه مه زلیکده، تجروبه لرین هامیسی نین هدر اولماسینده، ساوادین هده ر اولماسیندا، پولون هدر اولماسیندا، ایجتیماع دا تانینماغین هده ر اولماسیندا، ایجتیماع دا ایللر بویو قازالندیقین اعتبارین هده ر اولماسیندا، و ... چالیشیر.

بو بوشلوقلارین هامیسی ال اله وئریر و خاریجه ده یاشایان بیر میللی فععال حرکت پارچاسین ایچه ریدن و اینانجدان بولمه گه و حرکتدن اوزاق توتماغا چالیشیر.

بو بوشلوقلار ال اله وئریر و خاریجه یه کوچورولموش بیر وطنداشی بیر موحتاج اوشاق یا بیر موحتاج یاشلی آدام دورومونا سالیر. فرض ایله کی سنین 50 یاشین وار آمما بیردن بیره بیر موعجوزه اولوب، بیر سئحر اولوب، بیر جادئ اولوب و سن اوشاق اولموسان یا بیردن بیره یاشین چوخالیب دئر.

هامی سنی 50 یاشیندا، ساوادلی، پوللو، ایش صاحیبی، تجروبه لی، هامینی تانییان، هامییه ال وئرن و یاردیمجی تانیرلار و هامینین سندن بکلنتیسی وار آمما سن بیر دیل بیلمز، یول بیلمز، یونتم بیلمز بیر اوشاق، بیر ... دورومونا دوشموسن. کیمسه ده اینانماز بو دردله ره.

بو دردی هئش کیم بیلنمز ایللا بو کی ایللر بویو یاشایا! چون تجروبه اتمه ین، اینانماز! او دوروما دوشمه ین قبول اتمز. اونو تفسیر ادر و باشقا یوللارا یورار.

نئجه کی هئش بیر قیز و اوغلان، آتا یا آناسینا اینانماز. اونلارا و اونلارین تجروبه لرینه عوصیانچی اولار. حتتا خور باخار آمما زامان گئچر، سین یوخاری گئتدیکجه و هر شئیین ائوز زامانی گلدیجه، آتاسین یا آناسین دوشونمه گه باشلار. آوندا دیر کی "جان آی آتا!" یا "جان آی آنا!" دییر. همده اورک دن دییر.