بیز الینه اولموش مانقوردلامی یئق؟

 من ایستردیم بو هفته "الیناسیون" و "مانقورد" یا "از خود بیگانگی" حاققیندا گوناذ تی وی ده دانیشیم آمما واختیم اولمادی. پلاسکو منه ثابیت ایله دی کی بیزیم بیر چوخوموز دوشمانیمیزا اوزوموزدن چوخ اونم وئریریک. دوشمنی منیمسه ییریک. دوشمنین دردین، اوز دردیلریمیزدن بئله چوخ منیمسه ییریک. دوشمانیمیزدان چوخ ناراحات و غمگین اولوروخ. ایله گوسته ریریک کی دوشمنین ایقتیصادی و آداملاری ائولمئیب، بلکه بیزیم وطن و میللت سئورلریمیز آرامیزدان کوچوبلر.
بو روحیه و حال احوال، دقیقن موستعمیرهلیک و الینه اولموش بیر جامعه نین روحی نشانلاری و خسته لیکلری دیر.
قاراداغ زلزله سینده دوشمانلاریمیز اوزون زامان بیزیم اولنلریمیزی، یارالانلاریمیزی، ائولری یئخیلانلاریمیزی، ... گورمه دی. اونلاری دوشونمه دی. حتتا گولمه سین و بیزی تیلویزییونوندا گولونج گوسترمه سین دایاندیرمادی. شهرلرین، خیابانلاری، بیزیم وطنداشلاریمیزا قارا رنگه بویامادی. بیزه بیر قورو باش ساغلیغی وئرمه دی.
من دئمیرم کی دوشمانلاریمیزین اولومونده بئله قاوال چالیب اوینایاق. آمما فارثلار دئمیشکن، "چیزی که عوض داره گله مداره" کیمی ده رفتار اده بیلردیک.
بیز فارثلاردان داها چوخ ناراحات اولماقلا، دوشمانیمیزی هموطنیمیزدن داها یاخین گوروروک. بو اینسنلیقدان و میللتچیلیکدن اوزاق دیر. بعضی لری ائوزلرین "انسان" و "انسانیت" دییه تاولاییرلار و بو شیرین تاولایئجی شوعارین کولگه سینده، الینه اولماقلارین، مستعمیره اولماقلارین گیزلتمهگه چالیشیرلار. بو "مانقورد" اولمامیزین آن درین نشانی و گوسترگه سی دیر.