آشاغالیغی منیمسه‌ین میللت، شیشیرتیلمک ایستر
آشاغالیغی منیمسه‌ین میللت، شیشیرتیلمک ایستر
مهدی پرپنجی‌نین بیر قیسّا یازیسی، دفعه‌لرجه، تورک دوستلاریم و آزربایجانچی میللی فعاللار طرفیندن منه ده گونده‌ریلدی.
ایله بیل کی اوندان، اوز مظلومیّتیمیزه و حاقلیلیقیمیزا گورا بیر سند و تصدیق‌نامه آلمیشیق. سئوینیریک. سونوندا، یورولدوم و بیر دوستوما بئله یازدیم.
مهدی پرپنجی‌نین بو سوزلرینین "ترک‌ها تنها لایه اجتماعی عمده غیر فارس‌اند که در ۷۹ سال گذشته، صرفا با اتکا به گفتگو و فعالیت مدنی صلح آمیز، مطالبات خود را مطرح کرده اند و می‌کنند ولی غالب انتقادات و حملات متوجه همین فعالان مدنی است." آنلامی بو دور کی بیز تورکلر، تکجه میللتیک کی ایران-فارسلارین یاراتدیقی "فعالیت مدنی" تریاک و افیونی یا باشقا آدلا "آغلاماغا و سدقالاماغا" همده دوشمنه یالوارماغا اینانمیشیق.
اوندان دیر کی هله ده کی وار، دوشه‌من ایسته دیگی کیمی داورانیریق و دوشمه‌نین امنیّه‌تین تامین ادیریک.
بیزده یارادیلمیش بو اینانج و داورانیش، ایران-فارسلاری، سیلاحلانمیش و ایران-فارسلارا قارسی ساواشان میللتلرین تهلوکه‌سیندن قورور.
یانی کی بیز تورکلر، دیلده یوخ، ایشیمیزده و داورانیشیمیزدا، فارسلارین، هم امیرله‌رینده‌ییق، همده اونلارلا بیرگه حرکت ادیریک.
بونون آنلامی بو دور کی سیلاحلانمیش میللتلرین یانیندا یوخ، فارس-ایرانچیلارین یانیندا دایانمیشیق.
لاپ آچیقی بو کی بیز تورکلر، فارسلارین "مدتّه‌حیدی‌ییک". بیتدی.
نییه؟
چون، هامی میللت‌لردن داها چوخ، بیز تورکلر، فارسلارا و فارسلیقین وئردیگی دوشونجه‌له‌ره اینانمیشیق. فارسلارا بنزه‌میشیک. فارسلاشمیشیق.
آزربایجان شیعه تورکلریندن باشقا توم میللت‌لر، دیللرین، دین‌لرین، تاریخ‌لرین، پال‌پالتارلارین، عنعنه‌ارین، و … قورویوب، ساخلامیشلار. بیز ایسه، او وارلیقلاریمیزی ایتیرمیشیک.
ان ساوادلی اینسانلاریمیز، او آداملاردیر کی داها آز تورکجه سوزجوک ایشلتسین لر.
بیر نئچه کره، یاری میللی دوولت قورما چابالاریمیزا باخمایاراق، هله ده‌کی وار فارسلیقدان و ایرانچیلیقدان، دوشونجه اولاراق قئریلمامیشیق.
هله‌ده‌کی وار، فارسلیقی و ایرانچیلیقی اوزوموزه، میللی تهلوکه گورمه‌میشیق. اونلارین وارلیقین، اوزوموزه میللی تهلوکه آنلامامیشیق.
یانی که بیز هله میللی تهلوکه نه دئمک دیر، بیلمیریک، آنلامیریق و میللی تهلوکه‌نین وارلیقینا اینانمیریق.
عاینی زاماندا، باشقا توم سیاسال قاوراملاری‌دا، ایران-فارسلارین گوزو و میللی چاخارلاری یونونده گورور، آنلیریق.
بوندان دولایی، او گونه‌دک کی بیز تورکلرده‌کی بو باخیش دئییشمزسه، بیز تورکلرده، یئنی و میللی دوشونجه، ایران-فارسدان سربست دوشونجه یارانیب، یایقین اولمازسا، بو دوروم داوام اده‌جک دیر.
بیز تورکلر، فارسلارین ایکی سوزو ایله "اشّک" دورومونا گله‌جه‌ییک. مدنی فعال دییه، قولتوغوموزا قارپیز وئریب، بیز تورکلری فارس-ایرانین یانیندا ساخلایاجاقلار.
سایقیلارلا
اینصافعلی هیدایت
22 /اوکتوبر/2024
Comments
Post a Comment