عشق، اسکی آللهی اولدورمک، یئنیسین یاراتماق دیر

عشق، اسکی آللهی اولدورمک، یئنیسین یاراتماق دیر

ای لب لرین غونچه

ای قاشین یای

باخیشین اوخ

وورما اوره گیمه

رحم ایله

سالما آیاغا منی

ای جان

جانیم سنه قوربان.

عشق، هورمون گوجو

عشق، تکلیک یالنیزلیقی

عشق، سکس احتیاجی

هئچ بیری دئییل، هئچ بیری.

عشق وارسا اگر

دوداقلارین تبی دیر

جانئن گیزیلتی سی دیر

گوزلرین فریادلا گولمه سی دیر

قلبین دویونمه سی، هوووشنه شی دیر

عشق اوزاقلیقدان بئزمک

عشق اللرین بیر بیرینه داریخماسی دیر

عشق تلکلیک دن جوتلوگه قاچماق

عشق زامانین قیسیلماسی دیر گوروش چاغیندا

عشق زامانین گئچمه مه سی قراره قدر دیر

عشق، زامانین الدن وئزیب گئتمه سی

هر گوروش گولونده

عشق، کوچه لرله، پارکلارلا دردلشمک

عشق، آغاجلارلا، دیوارلارلا، دانیشماق دیر، یازیشماق

عشق یعنی دولانماق، گولمک

عشق، اینانماق دیر

عشق، هامیدان کسیب، بیریسینه توتولماق

عشق، دونیادا گوزللیگین آنلامین بیریسه ایله آنلاماق

عشق، ائوز معناسین معشوقه دن آلیر

عشق، دونیاسین لیلی دن، مجنوندان

عشق، معشوقون دونیاسین عاشیقه وئریر

عشق بیر اوتانقاج باخیش دیر اوزاق دان

عشق، تکینه دولانماق، یازماق، دانیشماق دیر

عشق، چتینی قولایلادان

عشق، چیرکینی گوزللدن

عشق، آجئنی دادلی

عشق، زهری باللی ادن

عشق، هوسی اویخولادان

عشق، هر سیللولو دیلله دن

عشق بیر تلاش، بیر عوصیان دیر

فامیله، دوستا، آتا-آنایا

عشق، بیر باشقا اینسانلیقا اینانج دیر

عشق، بیر دئییشیک

بیر تازا یاشام

عشق، ایچ ده بیر اینقیلاب دیر

عشق، گوذشت، باغیش، بیر عفوی دیر

عشق، بیر الله دیر،

حلالی حارام

حارامی حلال ادیر

عشق، بیر آخار سودور

کور دور

یویان دیر هر بیر گوناهی

عشق، بیر گوناه دیر

عشق، بیر عوصیان دیر،

بیر اینقیلاب دیر

بیر گوناهلا، بیر گوناهلاری یووان دیر

عشق، بیر خالیق دیر مخلوق ادر کندینی

کون، فیکون دور عشقین آنلامی

عشق، گئجه نی گوندوز

گوندوزو آخشام ادیر

عشق، اوزاقی یاخین

یاخینی اوزاق ادیر

عشق، بیر آلله دیر کی سیلر گوناهلاری

گوناهکارا عیصمت وئریر

عشق، ائوزون ترک ادیب

سئوگییه، سئوگیلیگه دونمک

عشق، چئویریلمک دیر، بیلیرسن یا بیلمزسن

دئییشه رسن ایچدن اشیگه

تقلیددن، تعلیم دن، آنادان، آنادان

مکتبدن، کیتابدان، موعللیم دن

دوستلاردان، قارداشدان، باجی دان

عشق، آلار سنی هر کیمدن هر کیمسه دن

عشق، آلار سندن گئچمیشینی

وارلیقینی آلار سندن عشق

یارادار سنه یئنی آنا آتا، موعللیم

کیتابلار، اینانجلار ...

هر شئی ترسینه دونر

عشق، ایجبار دیر بیر آللهی دانماغا

عشق، ایلزام دیر یئنی بیر اللهین خلقینه

عشق، بیر تمننا دیر ویصال اوچون

عشق، بیر آتش دیر جان و روح اوچون

عشق، بیر صحرا دیر، کویر اولار

گئچمیشدن

عشق، بیر باغ دیر یارانار چوللوک دن

آچار تیکانلاردان بیر جننت

عشق، تیکانلار یئرینده بیتن گوللر دیر

عشق، دوزدان بیشن یئمک دیر

عشق، سحرین تئزلیگینده سپه له نن شئه دیر

عشق، بیتن گولدور حیاتا

عشق، دامجیلارین بیرلشمه سی

عشق، گوزلردن آخان شورلوق

عشق، اورگلرده دئییلن نوحه لر

عشق، گیزلینده یاشانان عومور دور

عشق، بیرلیک بیر آلله لیق

عشق، یوخلوق، عدم دیر

عشق، بوغلانیب، یوخ اولماق

عشق، وارلیقلا، عدملیک، یوخلوق، محو اولماق دیر

عشق، گوناهلاری بویونلانماق دیر

عشق، اولومو طلب اتمک

اولومه گوزو آچیق قاچماق دیر

عشق، دیلسیزلیک، لاللیق دیر

عشق، سوزلرین قوریان گوزلری

عشق، جان و جیسمی آتماک

عشق، وحدت دیر ایکیلیکده

عشق، وورولماق دیر ایسته مه دیگی حالدا

عشق صیدلری، ترسه لرین یاشامی دیر

عشق، سنلیگی بوراخماق، معشوقلانماق دیر

عشق، عاشقین اولن آنی، فناسی

عشق، معشوقون گوجلو آنی، آلله لیق زامانی دیر

عشق، عاشیقی لالی دیللندیرن

عشق، معشوقی بللندیرن

عشق، آغی قارا، قارانی آغ ادن  

عشق بیر خالیق دیر، هم خلق ادر

عشق بیر مخلوق دور محو ادر

عشق بیر دین دیر، عیبادت دیر، اولوم دور،

عشق بیر اینانج دیر بیر معادا

عشق بیر ابدییت دیر

عشق نور دور

ایشیق دیر

ایستی دیر عشق

عشق دلیلیک دیر

عشق عاغلی الدن ورئمک

دلی دیوانه لیک دیر عشق

عشق هورمون دئییل، هوس دئییل

 گئچیب گئده

عشق، آغیر یوکلری یوکلنمک

یارالاری باغلاماق

زهرلری درمان ادر

درمانلارا شفا وردن دیر عشق

عشق، تک دیر، درین دیر

دایاز اولابیلمز

عشق، ضد و نقیض دیر

هر یئرده اولابیلمز

عشق، بیرچکیش دیر، گوجلو

عشق، موجود و وجودون آراسیندا اولان جاذیبه دیر

عشقی علمه چکه بیلمز آدم اوغلو

آدام، عشقه قانون یازانمادی

تکجه عشق دیر هر قانون و حلال و حارامدان اولان آزاد

عشقه آلما ایله دوشمه دی گویدن یئره

تاپیلماز اونا بیر علمیده بیان

هر کیمسه دوشه رسه عشقین اودونا

یاندیقی اوددان بیر آلوو

ادر معنا اونون عاشقینا

سوزلر، تصویره چکمز عاشیق داستانی نی

قلملر یازابیلمز سیماسینی

عشق، هر اورکده فرقیلی آتش دیر دوشه ر

عشق روح دور وئریلن جانا جان

جانا عشق اودو دوشمز ایسه، بیر هیکل دیر یالان

عشق بیر شعردیر، چکمه سه نظمه

یالاندیر اینانما اونا

عشق دوشور ایسه قورموش جانا

مین یئردن، گول بیتر، اینان اینسانا

عشقین معناسی سن ایله منده دئییل ایسه دئسم

اینان، حئیوانلار ایسه بیزدن عاشیق دیرلر

باخارسان آچیق گوزله عشقیه عیان

عشق دیر یا حی و یا قیوم دیین

عشق دیر اول الاولین، آخر الآخرین

عشق دیر حیات، عشق دیر ممات

عشق دیر جومله خلقته حق ذات

عشق دیر گلنی گتیردن، گئدنی آپاران

عشق دیر ثیروت، عشق دیر حیات

عشق، سوزسوزلوقدا، ایکی دوداقین هیجانی دیر سویا

ایکی گوزون فیرتیناسی

ایکی روحون باغلانماسی

عشق دیر داماردا آخان یاشام

عشق دیر دیلدن چیخان کلام

عشق فریاده گتیرر بوتون لاللاری

عشق سوسدورار تامام دانیشانلاری

عشق گیزله نیرسه سونر آتشی

اولر آللهی

عشق گرک فریاد اولسون هر آن هر زمامان

عشق گرک یاغسین باهاردا یاغان بولوتلار کیمی

عشق بیر هوس دیر اوچماغا قانادسیز قوشدا

عشق یومورتادا جریان تاپان بیر قیمیزی لکه دیر

عشق آنا بطنینده کی گوروش دور باشلانیر

عشق ایکی موجودون آراسیندا یارانمیش

گورونمز بیر کندیر بیر کمند بیر ایپ دیر

عشق بیر تعللوق بیر تمایل دور

عشق بیر جاذیبه دیر، دوشر جانلارا

عشق حرکتلری مداریندان آتار

عشق ایسنانلاری یولوندان قازار

عشق دیر الهی کی دییر لا اله الا الله

عشق وارلیقین واریلماسی دیر

عدمدن یارانماز عشق

عشق بیر چیمدیگین آغریسین، دادلاندیرار سنه

عشق بیر دیشین یاراسین، شادلاندیرار سنه

عشق هوسی آلار قیناقینا

هوس عشق دئییل اینانما اونا

صوبحی کاذب دیر هوس

عشق گلیرسه، هوس گئتمه لی

هوسدن بیر ایشارت آلیرسان عشقه مگر

گئتمیرسن دوغرودان یالانا، یول بیله گئدر

عشق بیر یول دور، هامی گئدر

بیری تئز گئدر بیر ایسه گئج یئتر

بیریسه قیسسا گئدر، باشقاسی ایسه اوزون

عشق بیر درد دیر توتمایان اولماز

توتان بیلمزسه، اوندان دیری اینسان اولماز

عشق آنلامین هر نه یازیرسا قلم

آزدیر، وار باشقا آنلامی هلم

من انصافام عشقه دوشدوم

 آمما هلم، یئتیشمه میش بیر کلم!

انصافعلی هدایت

تورنتو – کانادا

2 اوکتبر

2016