بابک زنجانی دن دیفاع لازیم دیرمی؟

بابک زنجانی دن دیفاع لازیم دیرمی؟

عزیز دوستوم، باباک زنجانلی مسئله سینه قیسسا زامانلی باخمامالییق. بابک، ائوزون آزربایجانلی و تورک بیلیر یا بیلمیر، موهوم دئییل.

موهوم بودور کی فاسلار رضا پالانی دن باشلایاراق، بیزی محو اتمک اوچون، چالیشیرلار. بیزیم محویمیز اوچون، ان باشدا دیلیمیزی آماج توتوبلار آمما ایکینجی هدفلری، آزربایجان ایقتیصادی و ثروت صاحابلاری دیرلار.

فاس سیاسی و ایدئولوژیک سیستیمی ایستیر، بیزیم گووه نی میزی و اعتیمادی میزی آزربایجان و تورک سرمایه دارلاریمیزدان کسسین. آزربایجان و تورک سرمایه دارلاری بو توپراقلاردان قاچیرسینلار.

بو گونکو دونیادا، سرمایه دارسیز بیر میللت، اولو و آرادان گئتمیش بیر میللت دیر. میللی حرکتیمیزین یاواشلاماسی نین بیر سببی، میللی سرمایه داریمیزین اولماماسی یادا بیزه و میللی حرکت ده سولچولوغون حضور و موخالیفه تینه، اعتیماد اتمه دیندن آسیلی اولابیلر.سرمایه دارسیز بیر میللت بو گون یا گوزه گورونمز برده (قول) اولور یا موستعمیره اولور و یا اریر و ایستعمارچییا قوووشور.

فاس نژادپرستلیگی ایستیر هر گون بیر نئچه آزربایجانلی سیاسی، میللی، و خوصوصیله سرمایه دارلاریمیزی بیزیم وطن دن و حتتا دیریلیکدن سیلسین.

فاس استعماری (حتتا تورک ایرانچی-سولچولار-کومونیست لر) بو گون، هر کیمسه یه بیر آد قویور و چالیشیر میللت ایچینده آد قویدوقلاری آداملاری، منفور گوسترسین. هره نی بیر باشقا آدیلا مئیدان دان چیخاراجاقلار.

بیر گون گلر، گوره روخ کی بیر سن قالمیسان، بیرده من. همده کاسیب و الی بوشوخ. نه سنده ایمکان وار، نه ده منده و هر ایکیمیزده فقیر و یوخسولوخ. بیر میللت اولاراق یوخسول اولاریق.

قاییداخ و بو گونکو دونیایا بیر باخاخ. هانکی بیر مملکت استعمارچیلاردان آییریلیب آمما دونیا سرمایه دارلارین، وطنین آبادانلیغی اوچون دعوت اتمئیب دیر؟

آمریکا و کانادانین ان بویوک گلیر یئرلریندن بیریسی، سرمایه دارلارین بو ائولکه له ره، دعوت ادیلمه سی و اونلارا ایمکان و اومنییت، یارادیلماسی دیر.

بیر میللتین میللتلشمه سی اوچون نئچه شئی یا فاکتور لازیم دیر. لازیم اولانلارین ان موهوممو، ثروت و رفاه دیر. اینسانلار رفاه طلبینده، قاچارلار و حرکته گئچرلر. آمریکا و کانادا رفاهلی بیر حیاتی وعده وئردیکلری اوچون، بوگون، ریفاه و امنییت مرکزی تانی نیر و اینسانلاری اورا چکیر. سرمایه دارلار، ایش یارادیرلار و خالقا گلیر مرکزی ایجاد ادیرلر. بو یاشام اوچون موهوم بیر مسئله دیر.

بیز ایندی و بابک زنجانی مسئله سین ده سکوت ادرسک، عینن، اورمو گولونون آلین یازیسین ایقتیصادیمیزدا دا گوروب، تجروبه اده ریک.

بیز "بو آدام میللی حرکتچی سی دئییل"، دئییب، و بو جور آداملاریمیزدان حیمایت اتمه سک، فاسلار بیر یاخجی فورصتی اله گئچیردیب، آزربایجانین قالان ثروتین ده محو اتمه گه چالیشارلار و گئچمیش ایستعمارچی سیاستلرین داها جیددی آیره لی سوررلر.

اورمو گولو قوروماغا باشلامامیشدان، من اونلار دفه یازدیم و رادیولاردا دا باغیر دیم: "آی داد ...، آی فریاد ...، گلین ...، اورمو گولو آرادان آپاریلیر!"

هئش کیم منیم تهلوکه گوستردییمی سایما دی و او بوحرانی جیددی آلمادی. او زامان آییلدیق کی داها فاسلار اورمو گولونون قوروتما سیاسه تینده ائوزو آشاغا دوشموش دولر و بیز موقاویمیت اوچون ائوزو یوخاری دیرماشمامیز لازیم گلیر دی.

ایندی ده، گورورم کی یئنی بوحران و تورک ضیدلی حمله یولدا دیر. ایقتیصادیمیزی و سرمایه دارلاری میزی هدفه آلیبلار. ایندیه دک، ایستعمارچی فاس دئولتی، آزربایجان توپراقلاریندا سرمایه یاتیرماغین قارشیسیندا دورور دور آمما ایندی ایله بیر حمله اده جک کی، سرمایه دار ائوزو بو توپراقلاردان قاچسین. نیه کی بیر کومونیستی فیکیر و دوشونجه اساسیندا، آزربایجانلی نی، سرمایه دارلا حوخالیف گورسه ده جک لر. نیه کی میللت ائوز محللی و یئرل سرمایه داریندان حیمایت اتمیر.

من: انصافعلی هدایت، دئمیرم و ایددیعا اتمیرم کی بابک زنجانی میللی آدام دیر! اصلن بویله بیرایددیعام یوخ دور. آمما آزربایجان سرمایه داری گرک حیس اده کی اونون آرخاسیندا آزربایجانلی و تورک وار و دوروب دور.

آزربایجاندا ان گوجلو جریان و سیاسی حرکت، "میللی حرکت" دیر. "بیز میللی و تورک سرمایه دارلاریمیزدان حیمایت ادره ریک" مساژینی و پیامینی بیز و میللی حرکت، سرمایه دارلاریمیزا وئرمه لییک. بو واسیطه ایله ده، میللی حرکت ایله سرمایه دارلاریمیزین آراسینداکی قوپوغو و اوچورومو، آزالتماغا چالیشاریخ.

سرمایه دارلا موباریزه، آزربایجانین میللی حرکتین دن قالخان بیر فیکیر و دوشونجه دئییل بلکه گئچمیش روس کومونیست لریندن قالان و سرمایه دار ضیدلی دوشونجه لردن قایناقلانیر.

بیز، میللی حرکت فعاللاری اولاراق، ایذین وئرمه مه لییک کی "میللی حرکت" و "آزربایجانچیلیق" آدی ایله، سرمایه دارلیقلا موخالیفت اولسون و بو ضیددی خالق و سرمایه فیکیری میللت و حرکتیمیز ایچینده یئر آلسین.

بیز بویله فیکیرله ره تسلیم اولوب و سرمایه دارلاریمیزلا موخالیفت اده رسک، فارسلار بیزیم میللی و قورخاخ سرمایه دارلاریمیزین (سرمایه قورخاق دیر و هر جهت دن امن و امان یئر و شراییط آختارار) محوینه داها جیددی چالیشیرلار.

دوستلار چوخ ساغ اولون حسساسییه تیز اوچون

انصافعلی هدایت