سن اوخوماق ایستیرم
سن
منیم اوچون بیر یازیلمامیش شعرسن
سن یازیلمامیش کیتابسان
من سنی سایر سایر اوخوماق
سنی حریف حریف،
سنی کلمه کلمه، سوزجوکلره چکیب
اورگیمین اورتاسینا دوزوبن یازماق ایستیرم
سنی شعره چکیب،
اورهگیمده رسیم کیمی آسماق ایستیرم.
توم شاعیرلر سنی شعره چکمک ایستهمیش
بو منم کی سنی عشقیمه چکمک ایستیرم.
توم موزیکلر سنین گوزونو چالماق ایستهمیش
بو منم کی سنین گوز گیلهلرینده اوتراق ایستیرم.
توم اویونچولار سنی اویناماق ایستهمیش
بو منم کی سنینله بیر اولماق ایستیرم.
توم شارکیلار سنین اوچون یازیلمیش دفترلرله دولو
من، سنی ایستی قانیم کیمی یاشاماق ایستیرم
ای تایسیز جهاندا بیراه سن
یازیلاریمدا، شعرلریمده، دوشونجهلریمده، خیالیمدا
سنی سحر آخشام حیاتمان یاشاماق ایستیرم
سنی هر گون، مینلر سوزله،
هر آن مینلر نفسله اوخوماق ایستیرم.
نفسین منه شارکی اولوب
من، سنی هر آنینلا اوخوماق ایستیرم.
اینصافعلی هیدایت
03 فوریه 2025
No comments:
Post a Comment