نه اولوب سنه، یوخسان؟
نه اولوب سنه، یوخسان؟
نه اولدو دا جفا قاپیسین آشدین اوزومه؟
من هی دئدیم اوزوم اوزومه
نه اتدیم درده سالدیم سنی؟
باشینا آغیر‌ی دستمالی باغلادیم؟
نه‌دن کسیلدی گوروشلر؟
چاغیریرام، سیسم یئتمیر اونا
باغیریرام ائشیتمیر منه
گئجه‌م، گوندوزوم
گوز تیکمیشم اوزاقلاردان بیر چیراغ جوزولتوسونه
یوخوم یوخ، آرامیم یوخ، قراریم یوخ، صبیریم یوخ
نه ائدیم، مینلر آغاج اوزاقدا، الیم قئسسا
اورک دایانمیر بو هیجره، بو ائراقلیقا
هوسیم یوخ کیتابا، یازی‌یا، موزیکه،
یئمک داش اولور دوشور ایچیمه
سو آجی زهر اولور باغریمی دلیر
اوزاقلیق اوخ اولور روحومدان گئچیر
هاردادیر فلک،
نه دن، نه اوچون منی جزالاندیریر
نه یین اینتیقامین‌آلیر بو آجیلئقدا
یارسیزلیقلا، تامارسیزلیقلا؟
دئمیشدی "عاشیقم سنه
یاشارام سنله داغ باشیندا
بیر چادیردا بیله."
اینانمیشدیم دنیزیمین سولانماسینا
ایللردن سونرا
اُلموش جانیما یئنی جان سویو،
عشق اودو دوشموشدو
گولوشو، گولوستانلیق
گوزلری چیمدیگیم دنیز
دوداقلاری یاتدیقیم یوخو
قاشلاری آسئلدیقیم دار.
هانکی آلمانی یئدیم،
گولوستاندان آتیلدیم
دنیزیم قورودو دوزلاقدا یاتاقلاندیم
یاسدیقیم کدر، دوشه‌گیم غم اولدو
نه دن سئودیگیلیمین دارئندان آلدیلار، سالدئلار منی.
سنین داریندان آسئلماق ابستیرم
نه‌دن یازین یاغمورلو بولوتلاری
کوسدولر منی ایسلاتمیر داها
باشینا نه گلدی سئودیگیم گوللرین
بولبولو گولوستانیمن سسی کسیلدی نیه؟
ای باختسیز اینصاف، باختین اولسایدی
اوزاقدان عاشیق اولوب یانمازدین اودلارا
ال اوزالدیب، الین توتاردین، چکردین،
غم کدر دریاسیندان
ای چاره صاحیبله‌ری
چوخ چاره‌سیزم
چاره ادیب، آچین دوگونلری
الیم، اللرین اوپسون
گوزله‌ریم، گوزله‌رینده بوغولسون
دوداقلاریم قاشلاریندان آسیلسین
جانیم آیاقلاری آلتیندا کیلیم اولسون.
خبرسیز قالمیشام،
سنسیز قالمیشام،
چاره‌سیز قالمیشام.
توم یوللار باغلی، یولسوز قالمیشام
بیر ال اوزانیب، چاره اولارمی؟
باغلی قاپیمی آچارمی؟
اینصافعلی هیدایت
31 جنیوری 2025
Comments
Post a Comment