موستعمیره اینسانی، اینسانلیق کیمی ایچی بوش سوزلره ایناناراق، موستعمیره اولوب

 

موستعمیره اینسانی، اینسانلیق کیمی ایچی بوش سوزلره ایناناراق، موستعمیره اولوب

سومورکه‌چی‌لر، گوجلولر و پوللولار، بعضی شئی‌لرله، ساده و ساوادسیز، سیاستی بیلمیین آداملاری تاولارلار. 

او بعضی شئی‌لر حتمن گوزل، سئویملی، قیمتلی درده‌ده‌ین و اونملی اولسون.

 ساده اینسانلار بوجور قیمتلی آنلاملارا، فیکیرلره، دوشونجه‌لره احتیرام قویارلار. احتیرامدان دولایی دا ائوز حاقلاریندان گیچرلر کی او اونملی، قیمتلی فیکیره، آنلاما، قاوراما داها چوخ فورصت ویرسین‌لر. 

بو ساده و سئویملی اینسانلاری، سیاسی‌لر و منفعت‌لرین بیلن-قاوان اینسانلار تاولارلار. اونلارین باشلارینا کلک چکرلر. ساده‌لرسه، بو شیرین سوزلره ایویارلار.

ساده اینسانلار، اوز منفعت‌لریندن واز گئچرلر. 

زیرنگ، سیاسی و منفعت‌لرین بیلن‌لرسه، ساده‌لرین ساده‌لیگیندن چوخ آمما چوخ فایدالانارلار. 

دموکراسی، آزادلیق، انسانلیق، اینسان حاقلاری، قانون، اخلاق، دین، مذهب، دوزلوق، و ... او آنلاملاردان دیر کی گوجلو، سیاسی، ممفعتچی و پوللو اینسانلار اونلاردان ایستیفاده ادیب، ساده، کاسیب، ایشچی اینسانلاردان و میللت‌لردن چوخ فایدا گوتورورلر. 

مثلا، مسیحی‌لر کانادا و آمریکایا کئتدیکده، کانادالی و امریکالی‌لار، یئر صاحیبی دیرلر. مسیحی‌لر ایسه موسافیر آمما اللرینده موقددس کیتاب دئدیکلری و گوزل گوزل، اینسانلاری دین و آللاه آدینا تاولامالی شیرین سوزلری وار ایدی.

موسافیر مسیحی‌لر، موقددس کیتابی، او ساده، ساوادسیز، تمیز نیّتلی یئر صاحیبلارینا ویریب، او ساده آداملاری تاولادیلار. 

موقددس کیتابچیلیق، کانادالی و آمریکالی یئر صاحیبلرینین اراسیندا یایئلدی. اونلار کیتابا و مسیحی‌لرین یالان، ایچی بوش، شیرین، اورگه‌یاتان سوزلرینه ایناندیلار.

موسافیر مسیحیلرسه، او گوزل قاوراملار، کیتاب، سوزلر، شیرین رویالاری یئر صاحابلارینا ساتدیلار. مسیحی موسافیرلر، اونلارین بئینین و توپراقلارین ایشغال اتدی‌لر.

همین خوش گورونن، خوش صوحبت، شیرین دیللی، گوزل دانیشان مسیحی‌لر، جینایته و اینسانلارین قئریمینا باشلادیلار‌. او گوزل سوزلر ایتدی باتدی. مسیحی‌لر، اونلار میلیون یئر صاحیبینی اولدوردولر. اونلارین یئرلرین اللریندن آلدیلار. سیلاحلا، اونلارین وطن‌لرین ایشغال اتدی‌لر.

زمان گئچدی. ایندی ایسه، اسکس کانادالی و آمریکالی یئر صاحیبلرینین ائولادلارینین الینده یئر یوخ، فقر و فلاکته قوربان گئدیب‌لر. یئر عوضینه، اونلارین اللرینده درده دئیمز بیر موقددس کیتاب وار. همده بیر چوخ گوزل، شیرین ایچی بوش سوزلر وار.

 اوروپالی موسافیر مسیحی‌لرین الینده ایسه توم آمریکا و کانادا اوزونلوقدا، بویوکلوکده موفته یئرلر.

بیلدیک می کی بو گوزل آمما ایچی بوش سوزلری‌ قودرتده اولانلار دییرلر کی اونجه‌دن نقشه‌نی چکمیشلر. یولاری و آماجلاری بللی دیر. دین، اخلاق، اینسانلیق، آزادلیق، ریفاه وعده‌سی، عدالت، اخلاق، آخیرت و … کیمی گوزل سوزلر، قودرتده اولانلارین الینده، توپ توفنگ کیمی بیر سیلاح دیر. 

حتتا اودلو سیلاحلاردان بئله داها کسرلی سیلاح دیر. گوزل سوزلر، ساواشین اصلی سیلاحی دیر. روحسال ساواشین توپخاناسی دیر. سوزلر، ساده اینسانلاری قولایجاسینا هم قورخودار، هم اومودلاندیرار هم طاماحا سالار، همده تاولار.

ساده، کاسیب، عاینی حالدا طاماحکار اینسانلار سئورلر کی گوجلو، قودرتلی و پوللو طرفدن، گوزل سوزلر ائشیتسین‌لر.

زورسوزون چاره‌سی آز دیر یادا چاره‌سی یوخ دور. اونون اوچون ده، کاسیب و ساده آداملار، بیله بیله، گوزل سوزلری ایله تاولانماقی دا سئورلر.

آمما گوزل قاوراملار، داییما تیکرار اولمازلار بلکه هر چاغین، هر دوورون اوزونه گورا گوزل و شیرین و تاولایئجی قاوراملاری، سوزلری وار، نئجه‌ کی یئنی سوزلرده لازیم دیر.

 یوخسا، ساده روحلو اینسانلار بیر نئچه کره تاولاناندان سونرا، زورلولارین، پوللولارین، گوجلولرین یالانلاردان باش تاپیب، آیئلارلار. 

بونون اوچون دور کی گوجلو، پوللو و قودرتلی اینسانلارلا دوولتلر، هر چاغ اوچون، تاپ تازا قاوراملار یارادیب، تازا پالتار کیمی گئیینیب، اورتایا چیخارلار. آمما اصلینده گئچمیش سیاستی گودورلر. 

تازا سوزلر ایله، ساده، صاف اینسانلاری، توپلوملاری، میللت‌لری ایناندیریب، اونلاری ساغماقا باشلار و گوجلرینه گوج قاتارلار.

زورلولار، پوللولار، قودرتلی‌لر، صاف، ساده توپلوملارین و میللت‌لرین بئینین ایشغال ادلر، اوز آماجلارینین خیدمتینه آلارلار. سونراسی اونلارین هم توپراقلارین، هم قول گوجلرین، هم قازاندیقلاری ثروتلرینه صاحیب چیخار اونلاردان چوخ یارارلانیرلار.

 پوللولار و گوجلولر گوجلندیکجه، صاف، ساده آداملار و توپلوملار ضعیف‌لرلر. 

گوجلو اینسانلار، توپلوملار و شیرکت‌لر، همن ساده و صاف آمادملارین و میللتلرین جاوانلارین، ساواشچیلارین، آیدینلارین، زورلولارین شیرین سوزله‌رینه اویمایانلارین و ‌‌… قتله یئتیریرلر. 

هئش چکینمه‌دن ساده اینسانلارین‌ جانلارینا قئیارلار. میلیونلارجا اینسانی اولدورورلر آمما شیرین سوزلرله، گوزل وعده‌لرله، گلجه‌یین داها آیدین و سئویملی‌لی ایله، گلجکده داها ریفاهلی اولماق اومودو یاراتماقلا، او توپلوملارین و اینسان‌لارین آجیلارینین اوستون اورترلر. 

ساده توپلوملار، اومود ایچینده، قات قات دالی گئدرکن گوجلولر اونلاری غارت ادیب، ائوز ریفاهلارین و گوجله‌رین قات قات آرتیرارلار.

بللی اولدو کی هر عصرین و چاغین ان قودرتلی‌لری، او چاغا اویغون، گوزل و تاولایئجی سوزلر یارادارلار. اون‌دوقّوز، ایگیرمی و ایگیرمی‌بیر اینجی چاغین ان گوزل و اینسانلاری، یوزلر مملکتده، توپلوملاردا و توپلولوقلاردا، سومورگه‌یه چئویرن سوزلر؛ آزادلیق، عدالت، اینسانلیق، دئموکراسی، حوقوق و قانونلار، اینسان حاقلاری، ایشچی حاقلاری، ریفاه، امنیّت، اخلاق، ایدئولوژی‌لر، دین، دین‌سیزلیک، لائیکلیک، سئکولاریسم، عومومی تعلیم، ایش دیلی، رسمی دیل، استعماردان قورتارماق، بین المیلل تشکیلاتلار، بین المیلل قانونلار، ایکی یونلو یادا چوخ یونلو یازیشمالار، چئشیتلی دوشونجه‌لر و فلسفه‌لر، و ‌… بونلار و بونلارا تای سوزلردن عیبارت دیرلر.

اگر ماجال تاپیب، باشیمیزی چئویریب، آرخامیزا باخارساق، اونلار میلیون ساده و صاف تاولانمیش اینسانلارین تاولاندیقلارین، اولدورولدوکلرین، کاسیب قالدیقلارین، ریفاه آرزوسوندا فلاکتده یاشادیقلارین، دئموکراسی اوغوروندا اولدورولدوکلرین، تالان اولدوقلارین، و … گوره‌ریک.

مسیحی دونیاسی بو گوزل، شیرین، تاولایئجی سوزلرله، توم دونیانین ثروتلرین سومورور، غارت ادیر، طاماحکار اینسانلارا مکتبلرده و اونیوئرسیته‌لرده یالانلار ساتیر، هر یئرده مین‌لر، میلیونلار آدام اولدورور، بومباردومان ادیر آمما مسیحی دونیاسینا قارشی اعتیراض و عوصیان آز گورونور یادا اصلا گورونمور.

نییه بئله‌ دیر؟

ترسینه، هامی اورگینین دیبیندن ایستیر کی مسیحی دونیاسینا کوچسون.‌ مسیحی دونیاسینین بیر پارچاسی اولسون. 

بو طاماح و اوموددان دولایی دا، مسیحی دونیاسینین جینایت‌لرین، قتل غارتلرین، چال‌چاپلارین، گورمور، گورمک ده ایسته‌میر. گورمک زوروندا قالیرسادا، زورلونون حاقّی، زورسوزون حاقّی دئییر، بیلیر.

مسیحی دونیاسی، دونیادا و بیر چوخ ائولکه‌لرده، بعضی آداملاری ایش باشینا گتیریب، اونلاری دوشمن کیمی گوسته‌ریب، یالانچی سیاسی ساواش سالیر. 

بیر وردن، اینسانلاری گوزل و شیرین سوزله تاولیر. اونلاری ائوز یانینا چکیر. آیری وردن ایسه، او خایین لیدرلرین خیانت و جینایت‌لری اوزوندن، مسیحی دونیاسینا داها چوخ آبئری و اعتیبار قازانیر.

ایچه‌لریده‌، خایین لیدرلر، اشیکده ایسه مسیحی دونیاسی، بیر قایچینین ایکی کسر قوللاریدیرلار. 

بیریسی میللته خیانت ادیر، جینایت ادیر، قانونسوزلوق ادیر، اوغورلوق ادیر، ایشکنجه ادیر، اینسانلاری بولور، چاغین یادا اسگی شیرین سوزلرین، اوز منفت‌لتی و قئسئتلی دوشونجه‌سینه آلت ادیر و توپلوملاردا راحاتسیزلیق یارادیر. 

مسیحی دونیاسی دا، شیرین و گوزل سوزله‌ری یایئر، صاف ساده اینسانلارا، دوغرو اولدوقو آدرسی؛ مسیحی دونیاسین گوسته‌ریر.

 باشقا یوندن، مسیحی دونیاسی، گورونن اوزده، ایچه‌ریده کی خایین لیدرلرله، او گوزل و تاولایئجی سوزلر ائوچون، سیلاحلی ساواشا گیریر.

آرادا، ایکی طرفلی اولاراق، میلیونلار اینسان وطن‌لریندن دیدرگین دوشورلر. نسیل‌لر زحمت چکیب، یاراتدیقلاری شهرلر، کندلر ائولر، ایداره‌لر، ایش یئرلرین محو ادیرلر. 

جانین سئونلرین ایکی سئچیمی وار: یا مسیحی دونیاسینا سیغین‌سینلار یادا اولسونلر.

دونوب، ایسلام دونیاسینا باخارساق، خایین لیدرلری، اونلارین خیانت‌لرین، جینایت‌لرین، دوشونمه‌مزلیک‌لرین، خیلافلارین، داییمی حاکیمیّت‌لرین، قانونسوزلوقلارین، آیری سئچگیلیک‌لرین، دیکتاتورلوقلارین، اوغورلوقلارین، تک‌ الچیلیکلرین، زیندانلارین، ایشکنجه‌لرین، بیر دینین، بیر دیلین، بیر میللتین ایسته‌دیلرین‌ توم توپلوملارا و میللت‌لره زورلاماقلارین گوروروک کی دولایی یوللارلا، او میللت‌لری مسیحی دونیاسینا ماراقلی ادیرلر. 

هر ایکی طرفین جینایت‌لری و ایشلری، توپلوملارا، توپلولوقلارا و اینسانلارا، مسیحی دونیاسیندان بیر آرزی دونیاسی یارادیر.

ایکی طرفلی، آیدینلاری، دوشونورلری و چالیشانلاری یا اولدورور، ایشکنجه ادیر یادا مسیحی دونیاسینا سیغینمایا زورلورلار.

او بیری یاندن ایسه، مسیحی دونیاسی، اینسان حاقلاریندان، دیموکراسیدن، آزادلیقدان، میدیا آزادلیقیندان، پارتی‌لردن، سئچیم حاقلاریندان، اینسانلیقدان، اینسان ایراده‌سیندن، ریفاهدان، و … دانیشیر، مودافیعه ادیر. 

اینسانلارا گوزل و سئویملی جنّت اوچون وعده وئریر. آمما او قیمتلی و گوزل سوزلردن مودافیعه آدینا، همن میللت‌لره هوجوم ادیر. 

عاینی حالدا، خایین حاکیم‌لردن و لیدرلردن داها چوخ اولدورور، داها چوخ داغئدیر، داها چوخ اوغورلور، داها چوخ ایشکنجه ادیر و خایین‌لرین آپارمادیقی جینایت‌لره ال وورور. شهرلری، کندلری، مکتبلری، اونیوئرسیته‌لری، باراژلاری (سدلری)، بازارلاری، خسته‌خانالاری، فابریکالاری، یوللاری، کوپرولری، و … بومبالارلا دارما داغین ادیر.

اورتادا ایسه، صاف، ساده آمما گوجسوز، پولسوز و ایمکانسیز اینسانلار، توپلوملار، توپلولوقلار، مملکت‌لر محو اولور.

اگر خایین لیدرلر اولمازسا و اگر خادیم لیدرلر اولورسا، و سیاستی، گوجو، ثروتی، وطنی، توپراقی، گوجون نه اولدوقونو، گوجون قایناقلارینی، ایداره سیستیم‌لرین، بئیین‌ یئخامانی و … دوغرو دوزگون تعلیم ادیرسه، صاف ساده اینسانلاری درین‌له‌دیرسه، سیاستی، منفعتی، زحمت چکمه‌نی اویره‌دیرسه، مسیحی دونیاسینا قارشی یالان تبلیغ اتمزسه، اوز ایش و خیلافلاری ایله مسیحی دونیاسین یئر اوزونون جنّتی گوسترمزلرسه، اوز خیانتلری ایله مسیحی دونیاسینین شیرین سوزلرینه اینانماق یئرین آچمازلارسا، وطن‌لر داغیلماز، میللت‌لر اولمز، میلیونلار اینسان قاچقین و وطنسیز دوشمزلر.

انصافعلی هدایت