قلم گونون یالانلاری : بوغار منی، آدلار، آدلار
قلم گونون یالانلاری
بوغار منی، آدلار، آدلار
آدلار، آدلار، آدلار
آمان آدلارین الیندن
آدلارین گوجوندن
یامان، یامان بوغار منی
یامان تاولار منی
بو آدلار، آدلار.
ایکی اللی
یوخ، یوخ،
مین اللی بوغازلار منی
بوغار منی،
آدلار، آدلار.
گول، اورمو گولو،
سو، سوزوزلوق
قورو، قوراقلیق
وطن، یوخسوللوق
دیل، دیلسیزلیک
بوغازیمدا، بوغولموش، بوغازلار
گوزلریمدن فیشقیرار
آخان قان، وطن دیر دامارلاریمدا.
آد قویمایئن سئودیکلریمه
بوغار سئوگیمی اویارکن آدلار.
آدلار، آدلار
دارا آسار منی.
آدسیزلیق، آزادلیق ایمیش دئمک.
تورکم دئسم،
گولوم دئسم
ائلیم دئسم
یوردوم دئسم
دیلیم دئسم
... دئسم، دئسم ...
دیلیمدن آسارلار
دارا منی.
آدلار، آدلار
دئمه‌سم
شانسیما پوچ چئخار.
آهای ...
الده قئلینج،
باش کسن
زورلا آدلاری دوغرایان آغا!
قویما آدلارین،
گولدورور منی
آلیر گوجومو، اویدورور منی.
قیزلار گونو، قادینلار گونو، آزادلیق گونو، خبرنیگار گونو، قلم‌گونو، کیشی‌لر گونو، بابالار گونو، آتالار گونو،
گونو،گونو، گونو، ...
ایچی بوش، آنلامسیز گوندن باشقا،
بو آدلاردان، نه قالمیش؟
دیوار میخلانمیش حیوانلار کیمی.
قابداکی تانینماز آداملار کیمی
یابانجی دیلله بیر تابلو کیمی.
هانکی آزادلیقدان، هانکی قلمدن، هانکی کیشیلیکدن، هانکی آتالیقدان، هانکی آنالیقدان وار خبر؟
ائولمه‌دیلر می؟
دیواردا ائوزگه‌لرین شکلینه دونمه دیلرمی؟
سنین آدلارین
توم دویغولاری
توم ایستکلری
تورم ایرراده لری
توم‌ایلگیلری
توم اینسانلیقی
ایفلیج ادیر.
قلمله سئویشمیش عومور بویو
یازمیر قلمیم بیر نئچه گوندور.
سورقولار کویرینده قالمیشام.
بو گون
یازی ایله کوسولولرین
«قلم گونو»نون
یالان «تبریک»لرین گوردوم.
سنین قوندارما آدلارین
آلیرمیش الیمدن، دیلیمدن، ائلیمدن، قلمیمدن ایراده گوجونو.
صاحیب چیخدیقین هر شئی،
قاچمالی.
یالان، ریا، نیفاق، آلداتمالی
منیسه قاچیرام سنین آدلاریندان
ای بوگونلوک آغا.
بو گونلوک، بوگونلوک، بو گونلوک، بو‌گونل...
انصافعلی هدایت
تورنتو - کانادا
06.07.2022
Comments
Post a Comment