یئنی تجروبه‌لره آچیقمی‌ییم؟
شپه‌لر، دونموش گولون بوزلارین میشار کیمی کسیب، ساحیله گتیره‌رک، بیر بیرینین اوستونه قالایئب. بعضی‌سینین انی-بویو مئتیرلر اوزونلوغوندا و تونلار آغئرلئغیندا. اینسانلار، بوز اوستو آرابالار ایله گولون اورتاسینا گئدیر، چادیر قوروب، بوزو دلیر، بالیق توتاراق، کاباب ادیر، و حتتا بیر ایکی گونده چادیر قالئبلار.
منده بو گون، ...، بوز اوستونده، یول یورودوم. عجیبه، قریبه، بیر حیسسی تجروبه ایله‌دیم. اعتیمادسیزلیقین ایچینده، اعتیمادلیق، هر آددیمدا، بیر دونیا ...، نیگرانلیق، ...، هوووشنه. بوزلو سو، دوندوروجو سو، بوزو آددیملایئم؟ جسورمی اولایئم؟ جسارتلی گورونوم‌مو؟ سئنیرمی بوز؟ سئنیرسا؟ بوز گونونده دونورسام؟ سویا بوغولورسام؟ ... بیرداها، چیخابیلمزمیسم؟ ریسکینه، خطرینه ده‌ییرمی؟ تجروبه‌سینه ده‌یرمی؟
قالین بوزا اینانماق و اینانماماق؟ ایندی بوردایام؟ یولوم بو دورمو؟ ائوز باشیما تجروبه اده‌رک، بو دونیانی الیمه آلیم‌می؟
یوخسا باشقا تجروبه‌لی، محیطی و قیشی، بو ائولکه‌نی یاشایان‌لار و بیلن اینسانلارا تقلید اده‌رک، بئینیمده‌کی سورولار و ایچمده‌کی قورخولار ایله داوام ادیم‌می؟
داوام اتدیم. بوده و ایله. گوزل بیر تجروبه! بیر داها تجروبه اتمه‌لی‌یم بو مین فیکیرلی تجروبه‌نی.
انصافعلی هدایت
تورنتو - کانادا
ایگیرمی (20) مارچ 2021
hedayat222@yahoo.com
Comments
Post a Comment