چوروک اودون کیمی
سالام دئدیم
سالاملا باشلادیم ...
دیلیم توتولدو.
باشیمداکی سئزیلدادیقیم سوزوله‌ریم
دیلیمه آخمادان قورودو.
باشیم دیمیشکن،
باشیم سن ایله دولودور.
هر یانا باخئرام،
اوزومو هر که‌سه توتورام،
هر کسله سوز آچئرام،
سن اورداسان.
بو گونلر،
نه‌دنسه،
سندن باشقا بیرنی گورمورم،
دانیشدیرمیرام،
قوخومورام.
سن،
نه‌دن منیم ایچیمده یوخ
توم هوجره‌له‌ریمده
یئر سالیب، یاتمیسان؟
نه‌دن سنسیز بیر آنیم
بیر خلوه‌تیم یوخ؟
نه‌دن هر کسی، سن گورورم؟
نه دن دیلیم لال
ایچیمده غوغا دیر،
ایچیم،
نفس چکمه‌دن سنله دانیشیر؟
سندن سورمالییام
ایچیمده کی کیم دیر، سوسمور؟
نه‌دنسه،
سنله دانیشمادیقیم بیر زامان یوخ ایچیمده؟
سنله آیرئیام، …
سنله یاشیرام،
هم یوخومدا هم آیئقلئقئمدا.
سندن باشقاسی یوخ، منیم ایچین.
سن …، گلدین، گئج گلدین
ایچیمده ائو، اوبا، تخت، یاتاق قوردون
قولایجا
منده سئوینجک، دارتینمادیم
گئده‌بیلمزسن داها مندن.
دوشرگن: ایچیم
وطنین: ایچیم
ایچیمده یاشیرسان.
سن گئدرسن اگر
من، یئتیم قاللام
ائوسیز، اوباسئز، تختسیز، یاتاقسئر، یورتسوز، وطنسیز قاللام.
قویما یئتیم قالیب، دوشمنله‌ره اسیر دوشم وطنی.
ایچیمده؛ وطنیمسن
من سنده، سن منده یاشامالی.
هیئ … خبرسیز!
من سنین سئوگینه آلوده، موبتلا.
بیر درد دیر، درمانی: سن
درمان دیر، دردی: سن.
فریاد دیر: سن.
گل بیرله‌شه‌لیم،
من سن اولوم، سنده من.
یاشایالیم بو یاشامی،
ایسترسک اگر سنلی منلی،
یول بیزی بورا گوتورر.
یول سندن، یول مندن،
باشقا دیر می؟
یول گیدیر،
یوللانمالییق
یوللانماساقسا
یوللا بیزیم آیریلیقیمیز
ابده‌جک اوزاناجاق.
گل، باغیشلا منی
جسارتسیزلیقیما
اوزون زامان سنی یاشامادیقیما
حتتا سنی اونوتمایا چابالادئقئما
سنی، منه اونوتدوردوقلارینا قارشی چیخمادیقیم زامانلاریما.
گل باغیشلا منی
سنی ایچیمده گیزلی ساخلادیقیما
گیزلی، بیر گوناه‌کیمی سئودیگیمه
سنه دونه‌ممه‌دیگیمه،
"سنی سئویرم" دیه‌نمه‌دیگیمه.
سنه قوربان که‌سیلمه‌دیگیمه
باغیشلا منی.
زمانی چاتمیشسا
گل وطنله‌شه‌لیم گوزلیم.
وطنیم.
سن، منیم ایستیقلالیم
سن، منیم گیزلی دوولتیم
سن، منیم توم شهوتیم،
توم شوهره‌تیم،
توم هوه‌سیم سن.
سنسیز، وارمی قیمه‌تیم؟
وطنسیز، سنسیز، قیمه‌تسیز یاشیرام
قورو، چوروک اودون کیمی.
اینصافعلی هیدایت
دسامبر / 17 / 2024
Comments
Post a Comment