فایل صوتی
ان بُیوک اینقیلاب؛ یئنی نسیل یئتیشدیرمک چابالاری دیر
یازدی: لطفا، سیزلر، ماهر روزنامه نگارلارسیز. یاردیم ائدین، حرکتده، بیراینجی نسلیلری بازنشست ائدک. چون نقدر بونلار وار، بیز دونیادا رسمی اوپوزوسیونا چئوریله بیلمییجییک.
یازدیم:
من، اُن ایلدن چوخ دور، بونو دئییرم آمما اولماز. بیر نسیلی امکلی اتمک چاباسی، سادهجه ایختیلافلاری چوخالدار. چونکو، بیز، ایندی دورد نسیل له ائوز به ائوزوق.
بیر - یئتمیش یاشدان یوخاریلار: بونلارین هامیسینین بئیینلرینده ایرانچیلیق اوتراق اتمیش. اُ نسیلین طبیعی اُلوب، قورتارماسین گوزلهمهلیییک.
ایکی - قئرخ- یئتمیش یاشلیلار: بونلارین، یوزده دوخسانی پانایرانیست دیرلر (گورونمز پانایرانیستلر). چوخو بیلمیر و قبول اتمیر کی بئیینلری یئخانمیش. بو نسیل، بعضی فیکیرلری اورهتهبیلر. بونلار تشکیلات قورابیلرلر آمما دوشونجهلهرینین درینلیگینده آزربایجانچیلیق، تورکچولوک و ایستیقلال ضعیف اولابیلر.
بونلار، چوخونلوقدا، عاییله و ایش صاحیبی اولدوقدان، موحافیظهکارلار دیرلار. بونلارین بو شانسی وار کی آزدان چوخدان دئییشسینلر. آمما بو نسیلدن ساواشچی و رئژیم دئییشدیرن چیخماز. خصوصن خانیملار، ایرانچی-فارسچی میدیالارینا باغلی اولدوقلارینا گورا، ایرانچی دیرلار.
ائوچ - ایگیرمی-قئرخ آراسی یاشلیلار؛ موختلیف سببلردن دولایی، بونلارین بئینی، ایران، فارس و موللا رئژیمی ایله موخالیف دورومدا دیر. دیندن، موللادان، تراختور اولان عدالتسیزلیکدن، ایشسیرلیکدن و ... گلایهلی دیرلر.
بونلارین بیر چوخو، ایران-فارس استعماریندان آنلیرلار. دئییشهرک، آزربایجان و تورکچولوک ادهبیلیرلر آمما قورخاق نسیل و 1357 انقیلابین سوی قئرئمئندان ناغیللار اشیدیب، توتوقلانمالاری گوروب، ایشکنجه خبرلرین اشیدیب، و ... قورخاق دیرلار.
هابئله، مدرسه، رادیو-تیلویزیونلاردا، فارس رئژیملرین پروپاقاندالارینا قوربان گئدیبلر. بونلارین سیاسی و دونیا گوروشلری، بئیین آلتی و دوشونجه بونوورهلری (زیر بنای فکری) یاریم یامالاق ایرانچی دیر آمما فارسلا و فارس دیلی ایله موخالیف دیرلر. بونلاردان، آلتیرناتیو فیکیرلر و دوشونجهلر اورتایا چیخابیلر. تشکیلات قورماقا چابا گوستهریرلر.
دورد- بیر - ایگیرمی یاش آراسی: بونلارین آنالاری تورکچو و آزربایجانچی اولورسا، میللی، تورکچو، آزربایجانچی، فداکار، قورخوسوز، عوصیانچی، عدالت آختاران، آزادلیق و ایستیقلال اوغوروندا جان آلان- جان وئرن نسیل اولاجاقلار.
بو نسیل، ایگیری-قئرخ یاشلی قورخاقلارین فیکیر ائورونلرین اشیدهجک، او دوشونجهلرین اوستونه قات قات آرتیراجاق. تشکیلاتلانماقدان چکینمییهجک. تشکیلاتلاناجاق. سیاسی و دونیا گوروشو، فارس و ایرانچیلیقلا درین قارش قارشیا دوراجاق.
بیر-ایگیرمی یاشلیلار، قورخوسوز، وطنپرور و جسور اینسانلار اولاجاقلار. وطن و میللتین آزادلیقی و گوزل گلهجگی اونلارین الی ایله معنالاناجاق.
سُوزون اُزتی: ایندیدن، اون-اونبئش ایل واختیمیز وار تا بیر یئنی آمما دوغرو-دوزگون نسیل یئتیشدیرک. واختیمیزی او بیری ائوچ نسیله هدر اتمهمهلیییک.
قالان عومروموزو، یئنی یئتیشمهلریمیزه، فارس-ایرانچیلیقدان آلدیغیمیزدان باشقا تعریفلر و دوشونجهلر وئرمهلیییک.
حایئف اولسون، بیزیم ایشه آلدیغیمیز سُوزلرین بیر چوخونون ایچهریسی، ایران-فارس و موللا-شاه رئژیمی تورتدییی، معنالار، دوشونجهلر و دونیا گوروشون داشیر. ایستر ایستهمز، بیز، فارس کولتورون، دوشونجهسین، دونیا گوروشون و ... داشیر و پایلاشیریق.
بیز (دوشونور تورکچولر) بیر دئوریم، بیر چاغ، بیر دوشونجه پارتلایئشینا یونلمهلیییک. یئنی بیر تورکچولوک، آزربایجانچیلیق، وطنپرستلیک، میللتچیلیک آنلامی یاراتماقا چابا و جهد گوسترمهلیییک.
بو چابالاری ایندی باشلارساق، اگر شانسیمیز دا اولورسا، یئنی نسیلین تورکچو، قورخماز، ساواشچی، دوشونجهلی، فدایی، فرقیلی باخیشلی، گلهجهیه یونلو و اینکیشاف آماجلی اولماسینا یاردیمجی اولاریق.
ایندیکی، ایچ ایختیلاف و ساواشلاریمیز، الده اولان آز قووه و گوجوموزو ده ضایع ادر.
بو ایختیلافلار، یئنی نسیلی یئتیشدیرمک فورصتینی الیمیزدن آلار.
دوشونجه سیز و ایران-فارس میدیا هیژمونوسی ایله یئتیشن نسیللر، سادهجه بیر بیرلری ایله موجادیله ادرلر. نئجه کی بو گونلرده، بیزیم ائوچ نسلیمیز، بو خستهلیگه آلودهلهنیب. اصیل دوشمنی (فارسچیلیق و ایرانی) گورمزدن گلیر. ائوز آرالارینداکی ایختیلافلاری، دوشمن قونومونا اُتوردوبلار. توم فیکیر و چابالارین، اُزلهرینین گوجسوزلهنمهسینه صرف ادیر.
اصیل دوشمن، موستقیل آزربایجانیمیزا حمله حالیندا اولارکن، بیزی، بیر بیریمیزین جانینا سالیب تا ایچهریده کی و اونا قارشی چیخابیلن گوجوموزو خونثا اتسین.
اصیل دوشمن قئراقدا اوتوروب، بیزیم آرامئزداکی جوزئی و طبیعی ایختیلافلاری (ایچیمیزدهکی اللری ایله) خارلاندیریر، آلوولاندیریر.
نهدن بو ایختیلافلار، بو سطحیده، ایندی اورتایا چیخیب؟
نهدن بیز ایختیلافلاری، یاشیریق؟
هر میللت، موشترک تعریفلر اُزرینده بیر بیرلری ایله امکداشلیق ادرلر. نهدن بیر بو تعریفلری یاراتماعا جهد اتمیریک؟
اصلینده، بیزیم اینسانلاریمیز، باشقا باشقا دیللرله، بیر بیرلری ایله دانیشیرلار کی هر بیریسی، او بیریلرینین دیلدن آنلامیر.
نهدن، تورکچولوک، آزربایجانچیلیق، میللتچیلیک، میللی منافع، دوشمن، دوست، تورک مللتی و تورک دونیاسی، تورک بیرلیگی، و بونلارین اوغروندا فداکارلیق، ائلدورمک و ائولمک بیر شرف دیر دییه ادبییات تورتمیریک؟
نهدن وار گوجوموجوز ایختیلافلارین درینلشمهسینه، بیر نسیلی گورمهمزلییه، حتتا سیلمهیه جهد ادیریک؟
چون، بیزلر، دیلده و ظاهیرده، تورکچو و آزربایجانچییق. دوغرو تورکچو، میللتچی، وطن فداییسی اولسایدیق، فرقیلی باخار و اویانیشی، تشکیلاتلانمانی، نسیللری ائوز اولادیمیز، ائوز آتا آنامیز کیمی گورور. هئش بیرین سیلیب آتمازدیق. اونلاری، یاریشدان چیغارتمازدیق. هر بیری ایله، او سوییهده داوراناردیق تا هامیمیز بیرلیکده، اصیل آماجیمیزا ال تاپاق.
هر آیدین بیلر کی دارالفنون قورولاندان بو گونهدک، آلتی نسیلیمیزین بئینی فارسچی-ایرانچی یئتیشمیش. هرهنین آیئلماق، دوشونمک، داورانماق و فداکارلیق سوییهسینین فرقیلی تاریخی واردیر. هامی منله یا بیزله بیر زاماندا آیئلمایئب، آیئلماغا دا زورونلو دئییل.
یئنی نسیل یئتیشدیرمک، دوزوم، فداکارلیق و عفو اتمک گوجو ایستر. اینتیقامچی روحلا، آیدین و فداکار، جاندان-مالدان گئچن نسیل یئتیشدیرمک اُلماز.
بیر بیریمیزین ایختیلافلارین، سهولرین و ایشتیباهلارین گورمهمک و باغیشلاماق ایله، قورادان، حالوا بیشر، بارامادان ایسه اطلس اله گلیر.
حئورمت و سایقیلاریملا
اینصافعلی هیدایت
