نه دن سوهیلا خانیم کارگری توتولدو؟

نه دن سوهیلا خانیم کارگری توتولدو؟

فارث حاکیمییتی عیراندا غیر فارث اینسانلارا ایذین وئرمز مجلیسه کاندید و نوماینده اولسونلار، ایللا بو کی فارثچی یا عیرانچی اولالار. یعنی؛ فارثلار، موستقیل و میللی فیکیرلی خانیم لار و آغالارا ایجازه وئرمزلر کاندید اولوب، خالقین ایستکلرین دیله گتیریب، مجلیسه گیریب، ائوز میللت لرین نوماینده لیک اتسین لر.

بونون اوچون، هر کیمسه کی مجلیسه گئتمک ایستیر، فارسچی و عیرانچی اولمالی و خوصوصیله ائوز میللتینه سایقیسیز (حتتا خائین بئله) اولمالی دیر تا طهران و فارثلارین اعتیمادین قازنسین.

اگر بیر کیمسه نین ائوز خالقینا باغلیلیغی، فارثلارا و عیرانا اولان باغلیلیقدان چوخ دورسا، بو، عیران منفعت لرینه خطرلی دیر و گرک کی عیران  مجلیسینه گئتمه سین. اگر بویله بیر فیکیر و دویغو صاحیبی مجلیسه گئدرسه، مومکون دور ایله بیر سوزلر دانیشسین کی فارثلارین باش آغریسینا چئوریلسین.

اگر بیری سی آزربایجان میللی فیکیری ایله مجلیسه گئدیرسه و تورک میللتینه دایاناراق، بیر سوزلر دئییرسه، دیگر میللت لرین نوماینده لری ده جسارت تاپار و آزربایجانا دایاناراق، میللت لرینین منافعین دن دیفا ادر. بودا، فارثلارین منفعت لرین تهلوکیه سالار. فارثلار اصلا بویله بیر باش آغرئسین ایسته مزلر.

فارث و طهران بو باش آغریسی اولماسین دییه، بیر نئچه تدبیر آلیب تا هامی نی کونترول آلتینا آلسین:

1.    

هر کیمین نوماینده لیک سئوگیسی وارسا، اونو تانیماق و اونجه دن اونون قاباغین دا تدبیری الده توتماق.

2.

نوماینده لیک سئوگیسینده اولان هرکیمسه، گرک عیرانچی-فارثچی اولسون و فارثلارین سیاست سیستیمین، بوتونلوک ده قبول اتسین.

3.

موطلق ویلایتی فقیهی قبول ادیب-اتمه مه ک، فارث سیاست سیستیمینین قبول ادیب اتمه مه سی آنلامین دادیر.

4.

عیرانین بیرلیگین اصیل توتمایان بیر آدامین اینانجی، عیرانا و فارثلارا  وفادارسیزلیغی جورم آنلاشیلیر و ان یوموشاق بیچیم ده، شک و ظن آلتیندا دیر. فارثلارین باخیشیندا، بویله شککی لی بیر اینسان، گلجک ده باش آغریسی اولابیلر.

5.

بویله بیر ظن آلتیندا اولان آمما احتیمالی نامیزد، عیرانچی-فارثجی و ویلایتی موطلقی فقیهین مدافعه چی سی اولمازسا، فارثلارین سیاسی-ایداره سیستیمی بیر چوخ تدبیرلری الده توتمالی دیر.

6.

 او مظنون آمما احتیمالی مجلیس کاندیدینه یاخینلاشمالی، اونو دئولت ایشله رینه آلمالی و حاکیمییته یاخین توتمالی دیرلار تا اونو "ایش" و "گلیر" کولگه سینده، عیران و فارثلارا وفالی تربیه اتسین لر.

7.

او خانیم یا آغالار ایله آچیق موذاکیرییه گیریب، "رژیم و فارثلارین منفعت لرین اونده توتماق" کیمی ایستک لرین اونلارلا پایلاشارلار. احتیمالی کاندیدلردن ایسترلر،  سیاسی سیستیمین فارثچی و عیرانچی گوروش لرین قبول ادیب و اونلارا عملده موتعههید اولسونلار.

8.

هر احتیمالی کاندید، فارس سیستیمینین ایستکلرین قبول اده رسه، زیان سیز بیر تورک یا عرب، یا تورکمن یا بلوچ و یا کورد و ... حالینا گه لرو اونون نامیزد و نوماینده اولماسیندا سئخینجا یوخ اولماز.

9.

ایر هر احتیمالی کاندید ائور ، شخصی و میللی ایستیقلالینا ایصرار ادیرسه و فارث سیاست سیستیمینین ایستکلرین قبول اتمزسه، اونا قارشی بیر سئرا یاشام چتین لیک لری باشلانار.

10.

دئولت ده اولان ایشله ریندن و درس لریندن (مدرسه، دانیشگاه، دین مکتب لری حوزه لریندن) آتیلارلار.

11.

خوصوصی یئرلرده بیله ایش تاپامازلار یا چوخ چتینلیک له ایش تاپارلار.

12.

اوزلرینه موستقیل ایش آچماقلارینا موشکوللر توره نر.

13.

اونلارین اوستونه گئدیب، غیری رسمی کاناللارلا، اونلارین ضیددینه تبلیغات آپارارلار.

14.

موستقیل آداملارین آبریلارین آپارماغا چالیشارلار.

15.

موستقیل کاندیدلرین

 ائوزلرینه یا یاخینلارینا پرونده توپلاماغا باشلانار تا اونلاری چتین دورملارا

 سوخالار.

16.

هر طرفدن اونلارا باسقی گلر و تهدید اولارلار.

17.

اونلارا خالق آراسیندا و مطبوعات دا جور به جور و قانوندا اولان-اولمایان یاپیشقانلاری ووروب، ایتتیهاملارلار.

18.

کاندیدی ائوزلرینه قول اده بیلمه سه لر، اونا، رسمی اولاراق، جور به جور ایتتیهاملار ووروب و محکمه یه چکرلر.

19.

محکه مه ده، فارثچی سیاست سیستیمین مامورلارینین ایسته گی اساسینا، اونلارا آغیر بیر حوکم وئریلر. 

20.

بو رسمی و غیری رسمی ایتتیهاملارا اساسن هر موستقیل آدامین بیر پرونده سی  اولار. پرونده صاحیبی اولان هر کیمسه نین حاققی اولماز موستقیل یا . 
غیر موستقیل اولاراق بیر دئولت ایشینه گیره یا بیر پوستا کاندید اولا

 قزوین لی سوهیلا خانیم کارگری-نی نیه 
توتدولار؟

قزوین لی سوهیلا خانیمین مجلیسه کاندید اولما ایسته گی فارسین سیاسی سیستیم مامورلارینا بللی اولمامیش دیر. اونلار سوهیلا خانیمی تانیمیردیرلار و اوسته آدی گئدن پروسه لری گئچیریلمه میش دیر. سوهیلا خانیمی ایختیارلارینا آلمامیش دیرلار یا اونا پرونده دوزلمه میش دیرلر.  

یعنی، سوهیلا کارگری خانیم عیران و فارثچی سیاست سیستیمنه تانینمامیش بیر موجود دور. بودا گوسته ریر کی فارس سیستیمی هامی نی تانیمیر و درین  بوشلوقلاردا وار.

فارس سیستیمی سوهیلا خانیمی بیر ویروس کیمی گورور کی اگر فارسین سیاسی سیستیمینه دوشرسه، هر یئره یایئلابیلر و اونو سیلمک و محو اتمک چتین اولار. سوهیلا خانیم موستقیل اولدوغو و تانیلمادیغی اوچون توتولمالی دیرتا اوندان یئنی بیر اینسان چیخارسین لار.

بو شرط لر آلتیندا فارث سیاست سیستیمی نه اتمه لی دیر؟

فارث سیاسی سیستیمی بو خانیمی تانیماغا باشلامالی دیر. اونلا موذاکیره اتمه لی دیر. اونو کنیزلیگینه راضی سالمالی دیر. اونون موستقیل اولوب، اولماماسیندان امین اولمالی دیر. سوهیلانی، سیستیمه دوشمه میشدن اوول، اتکی سیز (اثرسیز) حاله گتیرمه لی، یادا فارثلارا وفالی و مودافعچی قیلما لی دیر.

سوهیلا خانیمین گوناهی نه دیر؟

بیزیم دوشونجه میزده، سوهیلا خانیمین گوناهی یوخ دور بلکه خالقیندان مودافعه سی اوچون بیر قهرمان خانیم دیر آمما فارث دوشونجه سینده، سوهیلا خانیم چوخ گوناهلارا معروض دور.

:فارث دوشونجه سینده اولان گوناهلاری و ایتتیهاملاری  بیله سادیلاماق اولار "تورکچولوک"، "فارثلاردان باغیمسیزلیق"، "تورک میللتین دن دانیشماق"، "تورکون وارلیغین و حاقلارین عیران جوغرافیاسیندا دیله گتیرمک"، "عیرانچی اولماماق"، "فارثچی اولماماق"، "میللتچی و آزربایجانچی دوشونجه یه مالیک اولماق"، "تورک لرین اینسانی حاقلاریندان دانیشماق"، "موستقیل اولماق"، "ائوز سیاسی ایستگین گیزلی ساخلاماق"، "فارث دئولت ایله توافوقا چاتمامیشدان و ائوز باشینا مجلیسه گیرمک ایراده سینه صاحیب اولماق"، ""خانیم اولاراق مجلیسه گیرمک طلبی"، "آذربایجانلی خانیم اولماق"، "تورک اینسانین حاقلارین دیله گتیرمک"، " آزربایجان خانیملارینین و کیشی لرینین تورک اولماسیندان دیفا اتمک"، " آزربایجانلی خانیملارین تورکلوک حاقلارین دیله گتیرمک"، "فارثلارین سیاسی-امنییتی قووه لرینین گوزو آلتیندا اولماماق"، "آزربایجانلی خانیم لارا سیاسیته گیرمک اینانجی وئرمک"، "ائوزونه اعتیمادی اولماق(ائوز گوون صاحیبی اولماق)"، "بیر مییللی شخصییته چئوریلمک"، "فیکیر صاحیبی اولماق"، "فیکیرلرین آچیقجا اورتایا قویماق"، "تورکلوگوندن اوتانماماق"، "آروادلیغیندان اوتانماماق"، "قزوین دن اولماق"، "قزوین دن سیاسی بیر خانیم اولماق"، "قزویندن سیاسی آما تورک دوشونجه لی اولماق"، "قزوین ده خانیم اولاراق سیاسی شوعار وئرمک" و ... کیمی گوناهلاری سایماق اولار.

طبیعی کی "پان تورکیسم"، "بولوجولوک"، "ضیددی اینقیلابلا امک داشلیق"، "خاریجی اولکه له ره باغلیلیق"، "جاسوسلوق"، "خییانت"، "غیری قانونی قوروهلارین طرفدارلیغی"، "غیری قانونی و تورکچو قوروهلارین قورماسی"، "خاریجه ده کی یاشایان آذربایجانچیلارلا رابیطه"، "تورکچو وبسایتلارلا امکداشلیق"، "میللی و تورکچو شوعارلار وئرمک"، "کاندیدلیک خبرلرینین آزربایجانچی وبسایتلاردا یایلماسی"، "موصاحیبه لری"، "سئچگیلر قانونوندان قاباق تبلیغاتا باشلاماسی" و ... کیمی گوناهلارا دا جاواب وئرمه لی دیر.

بللی دیر کی بو ایتتیهاملارین هرسهع میللی فعاللاریمیز اوچون بیر میدال و ایفتیخار علامه تی دیر!

نیه سوهیلانین اوستونده بو قدر هزینه صرف ادیرلر؟

فارث و عیرانچی سیاسی سیستیم 100 ایله یاخین دیر کی قزوینین توراقین و تورک اینسانلارین، آزربایجانلی تورک لردن آیئریب و اونلارین اوستونده چوخ بویوک و آغیر سرمایه یاتیراراق، اونلاری فارثلاشدیرماغا جهد ادیب لر.

قزوین ده بو اوزون زامان و آغیر تبلیغات و تعلیم دن سونرا، سونوج، سوهیلا کیمی خانیملار دئییل دیر.

  فارثلارین طلبی و اینتیظارلاری، "قزوین دن گوجلو فارثچی وعیرانچی آداملار آیاغا قالخیب، فارثلاردان دیفا اتسین" ایدیر. ایله قزوین لی لر کی قالخیب، فارسلارین یانیندا دوروب، تورک له ره توهین و تحقیر روا قیل سینلار. اوزلرین تورک و آزربایجانلی بیلمه سین لر. فارثلاری مودافیعه اتسین لر.

 فارس سیاست سیستیمی، دانیشگاه لاری و خالقی آراسیندا، بویله بیر اینتیظار، خانیم لاردان داها چوخ گئدیر دی. حتتا آزربایجانلی میللی فعاللار بئله، گومان ادیردیرلر کی قزوین خانیملاری، همن 100 ایل سورن ضیددی تورک و زهرلی تبلیغات و تعلیمین آرخاسیندان، ارکک لردن داها چوخ "فارثلیق دا" آرییب و تورک لوکدن اوزاقلاشیب لار.

آمما سوهیلا خانیمین دوشونجه سی و رفتاری بیز تورک لری و فارثلاری شاشیرت دی . سوهیلا خانیمین موضع لری، فارثلارین 100 ایللیک جهدلرین و یوزلر میلیارد تومن هزینه لرین و قزوینی آزربایجاندان آیئرما سیاسیتینین نتیجه سین، یوخا و پوچا چیغارت دی.

  سوهیلا خانیم، آزربایجان و خوصوصیله قزوینین تورک اینسانی و داها ائوزل اولاراق، قزوین خانیملاری نین ایچی، پرده آرخاسینین نوماییشی و سمبولو دور.

 فارث سیاست سیستیمی، سوهیلا خانیمی، قزوین خانیملارینین سمبولو و نومونه سی اولاراق، تانیمالی و تحلیل اتمه لی دیر. بونون اوچون ده، سوهیلانی توتمالی، حبسه سالمالی و سورقویا چکمه لی دیر.

نئجه کی آزربایجان و میللی حرکت ده بو فنومنی (جریانی) علمی شکیلده آراش دیرمالی و یئنی دن دوشونمه لی دیر.  

 بو سونوج لار اساسیندا، بلکه قزوین ده آپاریلان فارث سیاستی، درین دئییشیک لری گون ده مه گتیرمه لی اولاجاق دیر.

بو توتوقلامانین آرخاسیندان نئجه بیر سوهیلا چیخاجاق دیر؟

فارث سیاست سیستیم بو خانیمی آلماق و صاحیبلنمک فیکرینده دیر. بو فورصت دن ایستیفاده ادیب، اونلا تانیشاجاق، فیکیرلرین اورگنه جک، سیاسی-ایجتیماعی باخیش لارین و گوروشلرین تانیاجاق تا قزوینی و خوصوصیله اومود باغلادیغی قزوین خانیم لارین تانیسین.

سوهیلا خانیما روشوت، ایش، پول، مئوقع و پوست تکلیف اده جک دیر. چالیشاجاق بو خانیمی فارثلیغا و عیرانچیلیغا اتگیسیز و اثرسبز بیر حالا گتیرسین.

اگر سوهیلا خانیم درین میللی فیکره صاحیب اولورسا، ائوز دوشونجه سینه اساسن، سورقو و موذاکیره زامانی، ایستیراتژی لر و تاکتیک لر توتاجاق دیر:

1.

فارث سیاست سیستیم ایله توافوقا یئتیشر و اونلارین موطلق حالدا ایسته گین قبول ادر و اونلارین آدامی اولار. بو حالدا، آزاد اولار، پوست، مال و مقام قاپیلاری اوزونه آچیلار.

2.

توافوق اساسینا آزاد اولار. بیر قزوین لی آزربایجانلی کیمی ایشله ر و فارث  دئولتی ده اونا ایمکانلار یارادار. اوردا دئولتین سیاست لرین سوردورر.

3.

امنییت قووه لری ایله توافوقا یئتیشر آمما اونلارین آدامی اولماز بلکه اورتا بیر یول توتار و فعالییتینه داوام ادیر آمما داها یوموشاق اولاراق.

4.

اونلارلا توافوقا چاتماز، آمما بعضی شرطلر اساسیندا ایستیقلالین قورور، بیر آز یوموشاق اولماق شریط ایله فعالییت لرینه داوام اده ر. مامورلاردان گیزلی ساپلی سی اولماز.

5.

سوهیلا خانیم ائوز کیملیگینده، تورکلوگونده و میللتچی لیگینده ایصرارچی اولار. بو سیناریودا، آزاد اولماسی زور دور آمما بیر قول و قرار اوزرین ده، آزاد اولار. اوندان کیچیک ایستک لری اولار و سوهیلا خانیم دا بویوک آماجلاری اوچون، کیچیک قوربانلیقلار وئرر.

7.

کیچیک قوربانلیق وئرمه گه بئله حاضیر اولمازسا، اونا ایتتیهام یاغدیرار و پرونده دوزل درلر.

8.

محکه مه یه گونده رمه سه لر بئله، اونا پرونده دوزلیب لر آمما محکه مه حوکمو

  اسایندا، اونو اتکیسیزی حالا گتیرمه گه چالیشارلار.

9.

سونون دا سوهیلا خانیما حبس و جزا وئرمک ایله، سوهیلا خانیمی، عیراندا و 
فارثلارین قارشئسیندا سیاسیت مئیدانینا گیرمه کدن اوزاقلادارلار.

10

یادا بو پروسسین سونوندا، آزربایجانا، بیر دیشی لیدر دوغار.

11.

 ایله بیر سوهیلا اورتایا چیخار کی آزربایجان تورکلوگونه یاراشار بیر شکیلده آزربایجانی تمثیل ادر.

12.

 سونوندا، آزربایجان تورک خانیملارینا، سیاست م موباریزه عرصه سینده بیر مودل و اولگو چیخار.

13.

تورک خانیملارین عیراندا سیاسی مئیدان و موباریزی یه گیرمک لری تابوسونا سون قویار.

14.

دیشی بیر عابباس لیسانی، دیشی بیر سعید متین پور، دیشی بیر  لطیف حسنی، دیشی بیر ... و بیر دیشی آمما یئنی آصلان دوغار بو میللت اوچون.

15.

زیندان دان، تهدیددن، چتینلیک دن، ایش سیزلیکدن، پولسوزلوقدان، پوست و مقام سیزلیقدان قورخمایان بیر موباریز دوغار تا آزربایجانین بو تاریخینه بیر سیمگه اولسون.

16.

 اولومدن و زیندان دان قورخمایان  لاکن اولومه و زیندانا طالیب اولان بیر تورک قادین دوغار کی اولوم و زیندان اوندان  قورخار.

17.

فارثجیلیغا و عیرانچیلیغا یئنی آما گوجلو بیر دوشمان دوغار تا میللی موباریزه نین جیبهه سی داها دا سیخ و گوجلو اولسون، فارثچیلار و عیرانچیلارین جیبهه سی ضعیفله سین

سوهیلا خانیمی نه قدر ساخالییه خاجلار؟

سوهیلا خانیمین توتقلانمادا قالما و سورقولانماق سووره سی، اونون نه قدر میللی فیکیره صاحیب اولماغینا باغلی دیر. هابئله هانکی ایستیراتژی و تاکتیک لردن ایستیفاده اتمک قرارینا بو سورجی قیسسالدار یا اوزادلار.

فارثچیلیق و عیرانچیلیغا یاخینلاشارسا، تئز آزاد اولار آمما بو توتوقلانما و زوراکیلیق سوهیلا خانیما ثابیت ادر کی توتدوقو یول و دیفا اتمه گه قالخدیغی میللت، حاقلی دیر و بو حاقدان هر نه شراییط ده اولور اولسون، دیفا لازیم دیر. بو شرط ده، اوردا و یا زینداندا  قالماسی، اوزونا چکه بیلیر آمما قادین اولدوغونا گورا حوکومت بیر آز یوموشاق توتمالی دیر.

عینی حالدا داخیلده و خاریج ده، اونون آزادلیغی اوچون حرکتلر باشلانمالی دیر. ایچه ریده تازا مجلیسه سئچیلمیش نوماینده لر ایله گوروشلر آپاریلمالی و سوهیلانین آزادلیغی اوچون جیدی جهد اتمه لی دیر تا بو سورج داها قیسسا اولسون.

قزوین لی خانیمین سئچه نک لری نه لر دیر؟

سوهیلا خانیمین سئچه نکلرینه اوست ده ایشاره اتدیم آمما خولاصه دئسم: "فارث رژیمی ایله امکداشلیق" (هر حالدا و قیلیق دا) یادا آزربایجان میللی حرکتینده "ده رینلشمک وموباریزه ده دیرنمک"، اونون ایکی یولو دور.

زیندان دان، آزربایجان اوچون یا بیر آصلان دوغاجاق یا فارثلار اوچون بیر تولکو بوراخیلاجاق.

طهران و امنییت مامورلاری نین اینتیظارلاری نه دیر؟

طهران و مامورلارین ایستگی، بو خانیمی مالی، روحی و روانی چتینلیگه معروض قویماق دیر. چالیشاجاقلار اونا موباریزه یولونون چتینلیگین و فایداسیزلیغین تلقین اتسین لر. سوهیلا خانیما فارثلارلا بیرلیگده اولماغین مالی و ماددی فایدالارین گورسه ده جک لر. فارثلارلا امکداشلیغین ثمره لریندن، عیراندا اونون اوزونه تامام باغلی قاپیلارین راحاتجاسینا آچیلیشین اونا گوسته رجک لر و سوز وئرجک لر کی فارث خیدمتینده اولورسا، گلن دوورمجلیس نوماینده سی سئچیلمه فورصتی اولاجاق دیر. تامام حیله لریله چالیشاجاقلار تا سوهیلانی ائوزله رینه باغلایئب، آزربایجان و تورکلوک حرکتینه بیر یئنی مامور سوخالار تا موباریزه آدینا، فارثچیلیق و عیرانچیلیق سیاست لرین ایره لی آپارسین لار. بو سیاستله بیزیم آرامیزدا اعتیمادسیزلیق توخوجون اکمگه چالیشاجاقلار.

بویله بیر سینارییو اساسیندا، کیم لر؛ تورک لردن، عرب لردن، بلوچلاردان، توکمن لردن، کوردلردن و دیگر میللت لردن نوماینده اولابیلر؟ 

هر کیمسه کی موطلق ویلایت فقیهی قبول اده رسه، عیرانچیلیق ادرسه، فارثلارین منافعین داها یاخجی تامین ادرسه، ائوز میللتی ایله موخالیفت و دوشمنلیک ادرسه، ائوز قانیدن دان و دیلیندن اولان میللتین منافعین فارث قبیله سینین منفعت لرینه قوربان وئررسه، عیران مرزلرینین پوزولماس ایله موخالیف اولورسا، گونئی آزربایجان آدیندا بیر وارلیغا اینانمازسا و بو وارلیغا چالیشانلاری عیران و آزربایجان دوشمانی آدلاندیریرسا، تورکون عیراندا ووجودون اینکار ادرسه، آزربایجانین میللی منفعتلرین و وارلیغین فارثلارا و عیرانا قوربان وئرمه گه حاضیر اولورسا، فارثلار طرفیندن نوماینده لیگه اویغون گورونر و ایذین وئریلر.

آمما بو خاصیتلردن  بوش اولورسا و اونلارین یئرین ائوز دوغما میللتینه و میللی وطن و منافعینه و عشقی ایله دولدورورسا، فارسلار اونا ایجازه وئرمزلر عیراندا سیاست مئیدانئنا گیرسین.

انصافعلی هدایت

مئی آیئن 18- 2016

تورونتو - کانادا