گونئی آزربایجان میللی فعاللار اوچون ژورنالیسم 25 ب- خبر یازاق

https://youtu.be/eOCf5pRpZBo

- نژادپرستلیک نه دیر؟

- اسکی بیر سیاسی و ایجتیماعی رفتارمی دئر یوخسا یئنی بیر ایدئولوژی می دیر؟

- نژادپرستلیک دوز بیر حرکت دیر، یوخسا ضیددی اینسانی بیر حرکت دیر؟

- من، بیر نژادپرستم می؟

- نژادپرستلیک نئچه جور دور؟

- استعماری و اوستون طلب نژادپرستلیک نه دیر؟

- حاق-حقوق و برابرلیک طالیبی اولماق، نژادپرستلیک می دیر؟

- ایراندا نژادپرستلیک هانکی زاماندان رسمی شکیلده، سیاسته داخیل اولدو؟

- ملل موتتحید تشکیلاتی، ایرانی بیر نژادپرست اولکه تانئرمی؟

- ایران، بو نژادپرستلیک حالئندا داوام ادربیلرمی؟

بو یازئدا، بو جور سورولارا جاواب وئرمه گه جهد ادیرم.

گوناز تی وی سیته سیندن بیر خبر سئچمیشم. بو خبر، فارس میدیاسیندان و "شرق" گونده لیگی(روزنامه) سیندن آلئنئب. بونلان بئیله کی اونون گوناز تی وی ده کی "کپی-پئیست" اده نیله یازئشدئم و خواهیش ایله دیم؛ بو خبری یئنی دن یازسئن، دوستوموز کی بیر میللی و سایقئ دهیر میللی فعالدئر، حتی بو خبرین نژادپرستلیک اساسئندا یازئلدئغئنا بئله شک اتمه دی.

بلکه منی، بیر رقیب کیمی گوردو. او حالدا کی من او دوستوملا هئش بیر رقابتیم یوخ و اولابیلمز. او بیلیر کی من گوناذ تی وی سیته سینه، خبر یا تحلیل یازمئرام. حتتا منیم، شخصی و موستقیل یازئلارئم، گوناذ تی وی سیته سینده بئله یایئلماز.

https://www.gunaz.tv/fa/%D8%A7%D8%AE%D8%A8%D8%A7%D8%B1/%D8%B0%D8%B1%D8%A8%D8%A7%DB%8C%D8%AC%D8%A7%D9%86%D8%AC%D9%86%D9%88%D8%A8%DB%8C-1/%D9%BE%D8%B2-%DA%A9-%D9%85-%D9%87%D9%88%D8%B1-%DA%86%D8%B1%D8%A7-%D9%87%D9%85-%D8%B1-%D8%AE%D9%88%D8%AF-%D8%B1%D8%A7-%D8%A8%D9%87-%D9%82%D8%AA%D9%84-%D8%B1-%D8%A7%D9%86%D8%AF-104416

بو خبر "گوناز تی وی" سیته سینده گلیر ایسه، گرهکیر، آزربایجانچئلئق و میللتچیلیک اساسئندا یازئلسئن یا یئنی دن یازئلسئن آمما یازئلمئییب، بلکه آزربایجان میللی منافعی ضیدلی و فارس نژادپرستلیک اساسئندا یازئلئب. گوناذ تی وی سیته سی ده، بو موضوعیا جیددی باغمایاراق، اونو یایئب.

خبر یازان حورمتلی دوستوم، منیم خواهیشیم اساسئندا، تیتردن "تبریز" سوزون گوتوروب آمما بونلان بئیله، خبرده سگگیز ده فه، "تبریز" سوزو، همده منفی آنلامدا ایشله نیلیب دیر.

بیلیروخ کی ایراندا، نژادپرستلیک، "پالانی لر" (پهلوی ها) دووروندن، سیاسته، تعلیم و تربیته، عومومی کولتور و فرهنگه داخیل اولوب دور.

هر ساحه ده بئله، همده عملی شکیلده ایجرا اولور. مطبوعات، رادیو-تیلویزیون، سینما فیلملری، سریال یا دیزیلر، رادیو نوماییش لری، دیلده یا یازئلئ جوکلار و گولمه جه لر، رومانلار، ناغئللار، حیکایه لر، تاریخه بنظر حیکایه لر، تاریخ حاقدا یازئلمئش اثرلر، مدرسه کیتابلاری، دانیشگاه کیتابلارئ، موعللیم لر، دانیشگاه اوستادلارئ، پورفوسورلار، ایداره لر ایشچی لری، محکه مه لر، امنییت قووه لری و ... بو خسته لیگه او قدر درین بولاشئبلار و عادت ادیب لرکی، اونلارئن فیکریجه، ایراندا "نژادپرستلیک" یوخ دور و نژادپرست لیکی سیاسیتی و فرهنگی حاکیم دئییل.

بوکی ایراندا مه مه یییندن په په یییه نه قدر، هامی، "نژادپرستلیگین" هر سوییه ده داخیل اولماسئن اینکار ادیرلر، بوردان دوغور. چون اونلار بو خسته لیگی توتوب و اونا موبطلا اولوبلار و اونلا یاشاماغا عادت ادیب لر. همده اوشاقلئقدان بونا عادت ادیب لر.

ایندی هامئنئن چئری اولماسی، اونلارا طبیعی دیر. عجب اودور کی "نیه فولان کسلر چئری دئییرلر؟" سوروسون، سوروشورلار و علاوه ادیرلر، "بو پان تورک لر، جوک بیلمیرلر نه دیر! بیلمیرلر کی بیز توهین و تحقیر اتمیریک! شادلئق ادیریک!"

من و هر کیم کی ایراندا؛ شاه و موللا حاکیمییتی دوورونده دوغولوب و تعلیم و تربیت اولموشوخ، تامامیله بو خسته لیگه موبطلا اولموشوخ.

چوخ بیر آز اینسانلار، بعضی شراییطدن دولایئ، بو خسته لیگی، تانئماغا باشلایئبلار. بو شرایئطدن بیری، "قارا بالئق" اولوب، کیچیک ایران گولوندن، بیر خاریجی اولکه یه و بیر یئنی دنیزه کوچونلر دیرلر.

تازا موحیطده، بو خسته لیگه موبطلا اولدوقلارئنا، امین اولوبلار. سونرا او خسته لیگ ایله موباریزه و اوزلرین داوا-درمان اتمهگه باشلئییب لر.

منیم کیمی بعضی اینقیلابی و عوصیانچی لاردا روحلو اینسانلاردا، مرکزده و ایللر بویو فارسلارلا ایشلدیکدن سونرا، یاواش یاواش، بو خسته لیگ ایله تانئش اولوبلار و اونون قارشئسئندا دورماغا باشلایئبلار.

یا بیر شفا تاپمئش یولداشلاری، تانئدئقلاری اولوب.

هر بیر قدم، اونلارئ داها بیر آددئم ایرلی آپارئب آمما بونلان بئیله، بیزیم میلیاردلار بئیین و جان و روح سیللوللارئمئز، فارس نژادپرستلیک خسته لیگینه موبطلا اولوبلار. بیزیم بئیین هوجره لریمیزده "سئیو" یا توپلانان معلومات، بیزیم کیشیلیگیمیزی و کیملیگیمیزی تثبیت ادیر و شکیللندیریر.

بئله دیرسه، اوندا بیز عوموروموزو فارس و فارسلاشما کیشیلیک و هووییتی یولوندا خرجله میشوخ. فارس هوییت و کیشیلیگی، تورک، عرب، بلوچ، تورکمن، و ... کیمی هووییتلر و کیملیکلر ایله موخالیف دیر. اونلارئن صیددینه دیر.

بیز، بیر نئچه جومله اگری (ایری)-دوز تورکجه یازماقلا و اوخوماقلا یا بیر خاریجی اولکه ده یاشاماقلا، بو درین خسته لیگی، روح، جیسم و بئینیمیزدن سیلیب، آتانمارئق. بو قدر ساده و راحات دئببل. بو آجی حقیقتی قبول اتمه میز گرکیر کی بیز درین و آغئر بیر خستهلیگه یاخالانمئشئق.

بیز (تک تکیمیز) آنا قارنئندا ائشیتدیگیمیز قارانطور سوزلردن باشلایاراق، هر بیر کلمه کی اشیدیب-اوخوموشوق و بونلاردان دولایی، فارس دیلین باشارئروخ، بو گونکو هووییت و کیشیلیگیمیزی بینا ادیبلر و اتمیشوخ.

هر بیریمیز، آزدان-چوخدان درس اوخوموشوخ. اون ایکی ایل مدرسه ده و ایللر بویو دانیشگاهلاردا درس اوخوموشوق. یوزلر بلکه ده میلیونلار صفحه روزنامه، مجله، کیتاب، ناغئل، رومان، جوک، شعر، نقد، خبر، تحلیل، و ... اوخوموشوق.

میلیاردلار کلمه، ائوده-ائشیکده، آتا-آنادان، یار-یولداشدان، قوهوم-قارداشدان، رادیو-تیلویزیوندان، موعللیم لر-اوستادلاردان، چئخئشچئلاردان، موللالاردان، شاعیرلردن، دینچی لردن، نوحه خوانلاردان و ... و سوز اشیتمیشوخ.

بو میلیاردلار سوزلر، تورکجه ده اولسا بئله، "فارس" خیدمتینده اولوب و بیزی، فارسئلاشدئرماغا چالئشان تورکجه اولوب دور.

یانی هر بیر توک سوزون ایچینده، ایرانچیلیق و فارسچئلئق، آنلامی قویولوب، سونرا اونلاری بیزیم بئینیمیزه سوخوبلار. بیزیم یازئق-بئناوا بئینیمیزده، اونلارئ، تیکراردان دولائی، دوغرو-دوزگون بئللئییب، اوز ایچینده منیمسئییب و "بیزیم" ("منیم") کیشیلیگیمیزی و شخصییتیمیزی شکیللندیریب دیرلر.

بو ائوزدن دیر کی یوزلر میلیون کلمه، سوزو ایناناراق و منیمسه یه رک، دیله گتیرمیشوخ. بونون اوچون دور کی بیز هر بیر سوزو ائشیتدیکجه و تیکرار اتدیکجه، فارسلئق بیزیم کیشیلیگیمیزده، درین لهشیب دیر و درینله شیر.

هر بیر 50 یاشئندا بیر ساوادلئ اینسان، ان آزی، بیر میلیارد بئش یوز میلیون سوزجوکو، اشیدیب، اوخویوب، تیکرار ادیب دیر.

اگر او میلیونلار و حتتی میلیاردلار سوزجوکو، دوغرو و دوز دینلهمک و تیکرار اتمک دن دولایئ، روحی و جیسمی تنبیه اولموشساق، جزالانئب یا تشویق اولموشساق، بیزده، داها درین تخریبی ایزلر بوراخئب. نئجه او مانقوردون خبری یوخ دور کی مانقورد اولوب دور، منیم ده خبریم یوخ دور کی نئجه و نه درینلیکده، مانقورد اولموشام.

بیز، بو اونلار و یوزلر میلیون سوزجوکلرین الیندن قورتارماغئمئز داها چتین دیر. یانی، اگر تشویق و تنبیه اولماسایدئق، بو سوزجوکلر، بیزه بوندان آز اثر و ایز بوراخاردی. اونلاری راحات و قولایجا بوراخئب و یئنی سوزجوکلری منیمسهردیک. داها راحات قورتارماق ایتمکانئمئز واریدی. "مانقوردلوق"، تشویق و تنبیه ایله درینلهشیرمیش.

اگر گئچن اون ایلده، بیر کلمه فارسی دانئشمامئشساق، و اگر دانئشدئغئمز تورکجه، فارسی فرهنگه و گولتوره قوناقلئق اتمیرمیش ایسه، اوندا، گئجه لی-گوندوزلو، 316 میلیون تورکجه کلمه دانئشئب و تکیرار اتمیشیم کی گئچمیش هر اون ایل عومروموزون قارشئسئندا، دورابیلر و نه قدر آز اولدوغو، پارپئچی اولابیلر.

بیزیم هر بیر بئیین هوجره میزده اولان معلومات و دویغولار، اولدا و بیر گون، بیر آماج اوچون ایستیفاده اتمک اوچون، سئیو یا ذخیره اولوب. اگر ایندی، "من"، "منیسم" سه، او سوزجولردن دولایئ، "بو من" اولموشام.

ایندی بیزی بو دوکترا، فوقی لیسانس، لیسانس، فوقی دیپلوم، دیپلوم، سیکل و ایبتیدایی و آنا-آتادان، دیندن و موللادان، آلدئغئمئیز سوزجوکلر و نتیجه ده، کیملیک لر ایله، هووییت تاپمئشئق. "من" اولموشوق.

بوندان دولایئ دئر کی اگر هر بیر کیمسه، بیزی ساوادسئزلئغا موتته هم ادر ایسه، اونلا ساواشارئق.

نیه؟

چون، او بیزیم کیملیگیمیزی و ایللر بویو چکدیگیمیز زحمت لری اینکار ادیر. یعنی "منیم" کیملیگیمی دانئر. یانئ، منیم بیر درین پارچامئ، بو دانیشگاهدان یا آموزش و پرورش دن آلدئغئمئز مدرکی آیاقلئر و قیمیتین الیمدن آلئر.

بونون اوچون دور کی او مدرک، بیر ساده ایش درهجه سی و کاغاذ دئییل. بلکه او دیپلوم، فوق دیپلوم، لیسانس، دوکتورا و ... حوججتوالایسلام، آیتواللاه و ... گورسهدیر کی من نه قدر، جیدد و جهت اتمیشم کی فارسلاشام.

بیز، او مرحله نی پیس-یاخجی گئچیرتمیشیک. بو مرحله نی گئچیرتمک گوسته ریر کی بیز او سوییه ده، درین معلوماتا اینانج تاپئب و منیمسه میشیک. یانی، بیزیم دانیشگاه مدرکیمیز، دوز-یالان، بیزیم کیملیگیمیز دیر. هووییتیمیز دیر. بیز (آز ایستیثنا ایله) او مدرکلردن عیبارت بیر سئرا اینسانلارئق. اونون اوچون، دوکتور و مهندیس دئمهسهلر، راحاتسیز اولوروق. ایله بیل کی بیزیم اینسانلیقدان بیر اصلی بولوموموزو دانیرلار. آمما "تورک دئییلسیز!" دئییرلر و بیزه او قدر راحاتسئز اتمیر. چون تورکلوک، او قدر بیزیم کیشیلیک (شخصییت) نشانه میز اولمئییب دیر. نئجه کی ایرانچئلئق و فارسچئلئق دا بئیله دیر.

بونودا بیلمه لییک کی ایران دوولتی و ایران دین سیستیمی نین هر ایکیسی ده نژادپرستلیک له بینالانمئشلار. او بینانئن هر بیر داشئ، قومو، توزو، توپراغی، چئرئ-چئنقئلئ و ...کرپیجی، اهنگی، سیمانئ، دمیری و ... نژادپرستلیک ایله دولوب. اگر او ایران، بیزیم هره میزدن بیر "انصافعلی" آدیله (مثلا) ایله بیر کیملیک و هووییت تیکبلر ایسه، من، بیر ایرانچی یام. چون اونلار، منی بویله یارادئب لار.

بو درین ایرانچیلئغئما آگاه اولمام گرکیر تا ایران و فارسدان اونجه، ائوز ضیددیمه عوصیان ادم. اوز کیملیگیمی یئخئم و یئنی بیر کیملیک تیکیم.

عوضیان و شوریش اتمه لییم تا ساوادئمئ، مدرکیمی، کیملیگیمی، کیشیلیگیمی، هووییتیمی، وارلئغئمئ، و ... سورغو سووال آلتئنا آلماغا جسارت ادیب، و ایللر بویو، فارس بینا اتدیگی انصافعلی ایله ساواشئب، اونو، یئخماغا چالئشام. بو ان چتین مرحله دیر.

نیه ان چتین یول دور و بو یولدان گئچمک گرهکیر؟

چون، من ایستیرم هامی و دونیا منی تانئسئن. معروف و مشهور اولوم. حورمت قازانئم. بو حورمتین کولگهسینده، راحات و شاد یاشایئم.

بونون اوچون ده، قئرخ-اللی ایل زحمت چکیبلر و چکمیشم و منی بیر کیملیک ایله دولدوروبلار و دولدوموشام تا معرف و مشهور اولوب، حورمت قازانام و قولای (راحات) و دردسیرسیز یاشایام آمما ایندی و ایللر زحمتدن سونرا، من، اونلار دوزلدن "منین" قارشئسئندا دورمالییام. اونلا موباریزه اتمه لییم. اونو سئندئرمالییم. هر نهمنه قازاندئرمئشدیرلار، اونلارئ ویران اتمه لییم.

زحمتلری و زحمتلریم، بوشا گئتمیرمی؟

بو حالدا، من دونیا حرکتینین ترسه سینه گئدیرم می؟

گئری گئتمه لی، بئیین حوجره لریمی و سیللوللارئمئ بیر بیر تاپمالئ، اونلارئ بوشاتمالئ، سیلیب، آتمالییام و ... و سونرا یئنیدن، ائوزومه آمما بو کره، آگاه و بیلینجلی اولاراق، بیر کیشیلیک، هووییت، کیملیک و یئنی "من" یاراتمالییم!

بونون خالیقی، نه آنا-آتام، نه قوهوم-قارداش، نه یار-یولداش، نه موعللیم-اوستاد، نه دین-دینچی، نه موللا-نوحه خان، نه مدرسه کیتابلارئ، نه دانیشگاه، نه رادیو-تیلویزیون، نه روزنامه-مجلله، نه ... یاراتمامالئ دئر. منی، اوزوم یاراتمالییام. یئنی بیر خیلقت. یئنی یارادئق. بیر بیلینجلی قوقنوس.

بو سوییه یه چاتماق، دونیا نئن ان چتین ایشی دیر و بورداندئر کی بیر رونیسانس و آیدئنلئق مرحهله سی باشلئر. هر شئیی سورغولادئقدا، یئنی منی یارادئب، شکیللندیریرم. یئنی کیملیگیمی یارادئرام. گهلهجهگیمی قورماغا باشلئرام.

بو حالدا، گهرهکیر کی هر بیر دوستدان و هر بیر دیلداشدان، هر بیر وطنداشدان و فیکیرداشدان گلن معلوماتا کی همده ایراندا کی "من" ایله ضید اولا، سئجاق باخام. قبول اتمه سمده، شک ادم و اونون دوغرو-یانلئش اولماسئن آختارام، تاپام. تحقیق ادم.

بلکه بیر اوزون زامان سورر تا یئنی منی و یئنی "اینصافعلی"نی تکمیل ادم آمما ایندی بیلرم کی، من، دوغرو منم و یالانلارلا دولدورولمامئشام.

هر شئییم، پروپاگاندا اثری و دوشمان یاراتدئغی ایز و اثر دئییل کی منی گونش یئرینه، قارانلئغا دوغرو گوتورور.

انصافعلی هدایت

تورنتو - کانادا

ایگیرمی اوچ، مارچ 2018

ویدئو ایگیرمی ایکیسنده چکیلیب دیر.

hedayat222@yahoo.com