یوز ایل بویوندا بیر قیش
گلیب، سایه سالیبدور وطنه
شاختا، قار، بوز
آسیر، کسیر،
چیخیش یوللارین باغلامئش گورونور.
بیز ایسه
قارا، طوفانا، بوزا،
آسیلیب کسیلمهیه
دوزموشوک، گورونور.
آی ایلاهی، آی میللت، آی عاغیللیلار
بو قئشدان، بو قاردان قورتولوش یوخمو دور؟
اومودلار توکهنیب،
اومودسوزلوق باش آلیب گئدیر
قارانلیق چوکوب،
گوز، گوزو گورمور
اولدوزلاردان خبری اولان وار می؟
سن،
بیر اولدوز گورورموسون؟
سن، بیر اولدوز اُلورموسون؟
توم اومودسوز، گوجسوز گوزلر،
قارانلیقدا پارلایان بیر اولدوزو گوزلور.
آغیزلار، دوداقلاردا کی سُزلر
اینانمیر
بیر گول ایله باهارین گلمهسینه.
هر کس،
بیرینی گوزلور.
او بیری، کیم اولاجاق گورهسن
بیر اولدوزو یاندیرسین
بیر کیبریته اود وورسون
سسسیزلیگین باغرین دلسین.
کیمسه باهارین گلمهسینه اینانمیر
بیر گولونقاری دلمهسینه اینانمیر
بیر اُلو اولوسون دیرچهلتیلمهسینه اینانمیر.
گورهسن اولدوزلار یوخا چئخیب
یوخسا کور اُلوب قارایا عادتلهنن گوزلر؟
قارانلیقین ان درینلهرینده
قارین ان توفهتوفونده،
شاختانین ان کهسیجیلیگینده، …
تاریخین ان قئریلقان چاباسیندا
ان اینانماز قایالیقدا،
ان گیزلینده
دوغولار بیر قارچیچهگی
بیر اونجول، بیر دهلیلر دهلیسی
بیر کُرون بالاسی
بیر اویکو آناسی
بیر دوشیاراسی.
بیر قارچیچهگینین نفهسی
یارار باغرین
هم قارین، هم شاختانین، هم قارانلیقلارین
آچار یول باهارا، گوللهره، بولبوللهره
جسارت گلر توم دامارلارا، یاتمیشلارا
قار، شاختا، قارانلیقدا اُلموش گوروننلر
بیر صور ایله
اُلولر دونیاسیندان دیرچهلیب قالخار
دئوریلر دئوران
گئدیلر قارانلیق، گهلر ائشیقلیق
قار یئرین گول چیمن آلار
اولدوزلار
گویلهری، همده یئرلری بهزهر
آزادلیقا اولارسا عشقو هوس
ایراده ایله، جان ایله، قئپقئرمئزی قان ایله
لالهلیقدان گئچمهلی
قئزیل قاندا اوتراق اتمهلی
قاندان قورخانلار
اُلَر هر گون، قان وئرَر هر گون
یوخ اولور، سیلینیر بیر گون.
وارلیقین قورویانلار
لالهلر اُلکهسی قورمالی
لاله وطندیر
وطن قاندیر، وئریلن جاندیر.
قورخما، قورخما اُلومدن آماندیر
قورخو
قارانلیق دیر، شاختاردیر، قاردیر، بوز دور
لاله؛ عوصیان، دئوریم
لاله؛ اولدوز دور،
لاله؛ آرزولارین باهاری
لاله آزادلیق ایله اونجوللوک دور.
اینصافعلی هیدایت
14 ژانویه 2025
No comments:
Post a Comment