سنین گوله‌شین دیر خوشباختلیق
سنین گوله‌شین دیر خوشباختلیق
بس‌دیر بو حیات
گل قول-بیر، دلی اولالیم
دلیلیک گوزل‌دیر، دادلی دیر
نه اولار
سن دلی اولوبان
منی سئخ قوجاقلایاسان
قوللارینلا بویوما سارمالاشئب
جانین، جانیملا
گیزلین سئررنی پایلاشئب
دلیلیگین دادین دامئزدیراسان
امیزدیره‌سن بیر اوشاق کیمی
بیرده سن، دیریلیگی آنلامینی آنلاداسان.
منده ده، دلیلیک جوشا گلیب
آلام سنی،
دولانام چوللری،
گویله‌ری
قوشلار کیمی
آزادلیقی اوچالیم برابر.
اوجسوز بوجاقسیز، حئصارسئزلئقلاردا
فئرلانام سنله
دالام سنه،
دنیزیمین دیبینه
سندن بیر بالیق آلیب ...
یوخ یوخ،
اُزوم،
بالیق اولوب اوزوم سنی.
سنله چیخیب،
گویون دیبینه‌جن شئغئیام سنی.
من،
سنه باغلی،
سنده ایتمیشم
سن‌سن بوباشیم
سن‌سن اوباشیم
گل باشا، باش آلئب باشلاشالیم.
سن ایسه
مست کئفله‌نیب،
گوله‌شین،
یئددی قات گویله‌ری دئرمانسین
گوزله‌رینده،
دوداقلاریندا،
دامارلاریندا قاینایان قانیندا گولسون.
من ایسه
سنین سئوینجیندن
یاشایام سعادتی، خوشباختلیغی
هر گون یئنیدن بیر داها.
سعادت دئدیگین نه دیر کی؟
سعادت،
سنین سئوینجینده
ایتمک
کندینی اونوتماق
سنی یاشاماق دیر،
سعادتیم.
گول.
گولمک
سنه چوخ یاراشیر
سن گولرکن
جانیمین هر یانیندان گوللر آچیر، ساچئر
قوراغا یاغان یاغیش کیمی‌سن
ایچیم سنین ایچین گولوستان اولور،
دنیز کیمی‌سن.
سایمئرسان کی
جانیم سنه،
سنین گولوشونه باغلی دیر
اونو،
امانت اتمیشدیم سنه.
ایندی بو جان،
سنین دیر، وئردیم سنه
داها من یوخام اورتادا
سنین جانینین جامی دیر
ایسترسن داش آت، سیندیر
ایسترسن ساخلا اورگین قالاسیندا
گوزلرن گیله‌سینده
کیپریگین آراسیندا
دوشمانا وئرمه منی.
ایسترسن آت
ایسترسن توت
ایسترسن اُلدور بئله
ایسترسن ده یاشات کندینده
اولا اعتراضئم
نامردم، کافیرم
یوخدور ایلاهیم.
اینصافعلی هیدایت
31.12.2024
ادیت تاریخی
ژانویه 06.2025
Comments
Post a Comment