آنا! دئ، من کیمم؟
یاشلئ خانئمئن، دارانمامئش، قئسسادان بیچیلمیش بوز ساچلارئ، اوزونده بیر نئچه قالئن قئییم قئرئشئ، اونو اسکی بیر شکیله پئویریب. قاشلارئندا آلدئرمئییب. صیر-صیفه تینده، بزک-بوزک یوخ دور.
یاشلی گورونن خانئمئن اونونده، بیر کاغاذ ایستیکانلا دولو دوندورما و الینده بیر قاشئق وار.
اونلار آنا بالا اولمالئ دئرلار. اوغلان، آناسئن، رئستورانا گتیریب. دوندورما یییرکن، دانئشسئنلار. دردله شسین لر. اوغلانئن، سوروشماق اوچون، بیر چوخ سوروسو وار.
آنا، آغ رنگلی پیلاستیک قاشئقلا، دوندورمانئ آمما چوخ یاواشجاسئنا، قاشئقلاماغا باشلئر.
اوزون بویلو گورونن گنج اوغلان، آناسئنئن قارشئسئندا اوتوروب. پاپاغئ باشئندان آلمئر.
اوغول: سن دئدین، بیلنمیرسن، منیم آتام کیم دیر. بیلیرسن، منیم آنام کیم دیرمی؟
آنا، بیر دونیا شک ایچینده، قاشئغئ دوندورمانئن ایچیندن چئخاردئر. آغزئنا آپارمئر. گوزلرین بو غیریبه آدامئن گورونه تیکیر. گئچه جگی، خاطئرلاماغا و دوشونمه گه چالئشئر.
آنا: سن می؟ ... ایندی... نه مه نه؟
اوغلان: سن دئدین، بیلنمیرسن، منیم آتام کیمی دیر. بیلیرسن می منیم آنام کیم دیر؟
آنا فیکیره جومان کیمی گورونورسه ده، بیر آن اوچون، گوزلرین اوغلوندان چکیر و قاشئغا تیکیر. اونو، دانئشمادان و جاواب وئرمه دن، آغزئنا آپارئر.
آنا: ... من، بئله، دوشونه بیلمیرم. ... نه نه؟
دوندورمانی چئینییه رک اوغلانا باخر.
اوغول: بیلیرسن می، منیم آنام کیم دیر؟
آنا، بیر آن الیندهکی قاشئغئ، اونودموش گورونور.
آنا: اوه ... گومان ادیرم ... بیلمیرم ...
قاشئغی آغزئنا آپارئر و دوندورمانئ چئینرکن، سورور:
آنا: سنین آنان کیم دیر؟
اوغول: منیم آنام؟ ... بیلمیرمی سن، منیم آنام کیم دیر؟
آنا: بو حاقدا دوشونمه لییم.
بوش قاشئغی چئویریر، ترسه سینه آغزئنا آپارئر، قاشئغئن ان درین یئرینده، اریمیش، قالان دوندورمانئ، دیلی ایله سیلسین.
اوغول: اولدو. فیکیرلشمه گه واختین وار.
آنا، فیکیره جومماق کیمی گورونورسه ده، قاشئغئ، چوخ یاواش دوندورما ایله دولدورور.
آنا: منه، سن دئ ...
آنا، گوزلرین تیکیب اوغلونا. بوش قاشئغئ آغزئنئن قارشئسئندا توتوب.
اوغول: منیم آنام کیم دیر؟ ... من "جویی"-یم. منیم آنام کیم دیر؟
آنا باشئن، ساغا سولا تاولارکن، دئییر.
آنا: ... خانئ... . جویی، من بیلمیرم. چالئشئرا...
اوغول: اوکی ... بیلمیرسن می؟
آنانئن ائوزونده، بیر نیگرانلئق، بیر دوشنمه گه چالئشماق گورونور.
...
اوغول: من کیمم؟
آنا باخارکن، اللری دونموش کیمی دورر، قالئر.
آنا: من بیلمیرم ...
اوغول: منیم کیم اولدوغومو سن بیلیرسن ...
آنا دوندوما دولو قاشئغی آغزئنا آپارئر، گوزلرین، اوغلونون گوزلرینه تیکیر.
اوغول: سن فیکیر ادیر سن، من ساده جه بیر دوستام مئ؟
آنا: منیم اوچون مو؟
اوغول: هه.
آنا گوزون، دوندورمایا آپارئر و دوندورمانئ قاشئق لئر. قاشئق دوندورمایا گیریرکن، آنادا دایاز بیر فیکیره دالئر.
اوغول: بیز، نئجه تانئش اولموشوق؟
آنا قاشئغئ دولدوروب، یوخارئ گتیررکن، گوزلرین اوغلونا تیکیر. بلکه مدره سه ده برابر درس اوخوموشلار، دییه دوشونور.
آنا: مدره سه ده می؟ ...
قاشئغئ آغزئنا آپارئر و "یوخ" دییر کیمی، ائوز باشئن، بیر نئچه دفعه، ساغدان سولا ترپه دیر.
آنا ایله اوغول، ایکیسی بیر آندا دئییرلر: یوخ ...
آنا دوندورمانئ قورتارمئش. بوش قوتو اونون اونونده. سیله جک کاغاذدا الینده. گوزلرین اونونده کی گنج، بورکلو آدامئن ائوزونه تیکیب آمما گوزلرده هئش بیر دویغو درینلیگیندن بیر ایز یا ایشارات گورونمور.
اوغول: بیر زامانلار، سن گنجیدین. اوشاقلارئن واری دیر. سنینريال نه اوشاغئن واری دیر؟
آنا: ... ا ...
اوغول: ... بیر اوغول، بیرده بیر قئز؟ یا نه لر وارنیدی؟ ...
آنا: بیلمیرم ...
آنانئن اونونده، عاینی کاغذدان بیر ایستیکاندا کی دوندورما ایله دولو ایدیر، قهوه وار. آنا، قهوه سیندن بیر قورتو ایچیر.
اوغول: من، سنه، بیر آز، تانئش گلیرم می؟
آنا گوزلرین کاغاذ ایستیکاندان آلئر و اوغلونون گوزلرینه زیللیر. تانئماغا چالئشئر.
آنا: من بیلنمیرم ... بلکه ده تانئشئریق...
اوغلانئن اللری چه نه سینده، بیر بیری اوستونده اوتورارکن، گولومسور ... "هئ..."
آنا کاغاذ ایستیکانئ آغزئنا آپارئب، بیر قورتو آلارکن، اوغلان، اوزون سئخئر، آغلاماسئن.
هاوار قارنلئق دئر. اوغلان، ماشئندا کمرین باغلارکن ائوز ائوزونه دانئشئر.
اوغلان: هئی ... منیم بئله بیر قصدیم یوخو دور آمما ...
هوکورمه، اونون، بوغازئنئن یولون کسیب. آغزئنداکی ساققئزی، بیر آوئردئندان، او بیریسینه آتئر. یئریندن ترپه شیر. الی ایله آغزئن توتماغا، سونرا، سیلماغا باشلئر. تیترر الی، اونون ایراده سیندن خاریج، آغزئنئن قئراقلارئندا، دولانئر. بیلمیر دویغولارئن نجه توتسون. بورکونون دیمدیگینین آلتئندا، گوزلریندهکی بولودلارئن یاغئشئن گیزله مه گه چالئشئر. دئوزنمیر. بوغازئندا قالان ائلدئرم شاخئر. گوزلرینده کی یاغئش، یاغماغا باشلئر.
اوغلان: بو منیم ... عومرومون ان چتین گونو دور ...
دایانئر. آغلاماغئنئن قاباغئن آلماغا چالئشر. دویغولارئن گوسته رمه سین، دییه، جهد ادیر. اویان بویانا باخماقلا، ایچینده کی طوفانئ کونترول اتمه گه موجادیله وئریر. بونلارئن سونوندا ایسه، بیر اوشاق کیمی آغلاماغا باشلئر.
اوغلان: او زامانکی سنین آنان بیلمه سه، سن کیم سن ... آدئمی بیلیر ... آمما بیلمیر من کیمم ...
هوکورمه چکیر و ایچیندن آغلئر. نفس چکمه سی بوله چتین له شیر. آناسئنا گورستردیگی شکیلله ره ایشاره ادیر.
اوغلان: من چوخ چالئشدئم، آنام منه دئسین کی من کیمیمیشم؟ من او شکیللرده واریدیم آمما او هئش جوره منی تانئمادی. حیس ادیرم، آنام همین آن اولوور. ...
اوزون زمان دویغولارئ ایله دوشونور، ائوزونون تسللیسی اوچون، نه دئسین؟ نئجه دئسین؟
اوغلان: من، صاباح، یوخودان دورارکن، ... بیله بیر شئیی گوزله میردیم. ... اصلن ... دوشونوردوم کی بو دوروم، ... بیر چوخ اوزون زامان سونرالار ... ائوز وئرر... بلکه ده دانئشابیلمز... بیلمیرم ... او فیکیر ادیر ... من کیمم؟ ... بیر دوستام؟ ... بیری که مدره سه ده اونلا تانئش اولموشموش؟ ...
هوکورمه و دویغولارئن دالغاسئ، دانئشماق ایذنی وئرمیر.
اوغلان: گئنه ایستیرم دونم ... قایئدام اورا. یئنی دن ... بیر کره ده ... اوندان سوروشام ... "من کیمم؟"
اوغلان، آناسئنئن آلزایمیر توتماسئنا قبوللانانمئر.
ویدئویا اساسن یازان:
انصافعلی هدایت
تورنتو - کانادا
اوتوز، مئی، 2018
hedayat222@yahoo.com
Comments
Post a Comment