گونئی آزربایجان میللی قورتولوش پارتیسی سورولاری جاوابلیر - اوچونجو بولوم
منیم اوچون، بو گون چوخ فایدالی و فرقیلی بیرگون اولدو. سببلرین ان باشیندا بیر سورونون اورتایا چیخماسی ایدی. سایین آئلدار بئی قاراداغلی جنابلاری ایله آپاردیقیمیز درین دانیشیقلار و دارتیشمالاردا، بو قونو ایله اوز به اوز اولدوق کی «نییه و هانکی سببلردن دولایی، تورکلر گئچن یوز اللی-ایکی یوز ایلده، میللی دوولتلرین ایتیریب، بلکه ایشغال و سونرادا سومورگه اولموشلار؟»1
منجه و سایقیلی قوناقیمیز ائلدار جنابلارینا گورا، بو سورو، چوخ اونملی سوقو و آیلارجا، اوزمانلارین حوضورو ایله، هر طرفلی دارتیشماسی و آراشدیرماسی لازیم اولان بیر قونو دور. ایله کی بیر دوشونجه اوتاقئنین قونوسو اولابیلیر.
منه بئله گلیر کی بو قونو اوچون، توم تورک ائولکه لریندن، حتتا عربلردن، اینگیلیس، آلمان، روس، آمریکا و ... دوشونورلریندن دعوت اولماسی و قونونون هر طرفی، همده موختلیف میللتلر و منفعتلر آچیسیندان دارتیشیلمالی قونو دور.
بو سورونون یانیندا، بیر نئچه داها اونملی قونولار، اونجه دن یازیلمیش سورقولاردان علاوه ده دارتیشیلدی.
مثلن، عجبا، توپلوملاردا دوغولان و یاشایان بیر کیمسه نین حقیقی و حتتا بئیینسل ایستیقلالی اولابیلرمی؟
داها درینلشسک، عجبا، هر بیر بیرئیین دوشونجه سینده بئله، ایستیقلال صاحیبی اولماق ایمکانی وارمی؟
منجه، چوخ گولونج اولار، اگر بیز اینسانلارین دوشونجه ایستیقلالین دان سوز ادرسک. چون اینسانلار، توپلومون دوشونجه لرینین، اینانجلارینین، میدیالارینین، کیتابلارینین، قازئت و درگیلرینین، مکتب و مدرسه لرینین، موعللیملر و اوستادلارینین، دوشونورلرینین، یازارلارینین، و ... دوشونجه سوییه لرینین، اورونو و محصولو دور.
سونوجدا، توپلومدا یاشایان بیر فردین بئینین، توپلوم و دئولت یاراتمیش و شکیللندیرمیش دیر. اونون بئینی، دوشونجه سی، همن توپلومون دوشونجه سوییه سینده دیر. طبیعی کی سنتئزی و سونوجلاری بیر آز فرقیلی اولابیلیر. بوندان دولایی دیر کی اونون بئینین ده کی دوشونجه لرینین ایستیقلالی اولابیلمز. بو دوشدویوموز توردان (توپلوم و دوولت تورو) قورتارماق اولاناقسیز گورونور.
هابئله، اینانیریق کی ایراندا یاشامایا زورلانان بیرئیلرین و میللتلرین گئچمیش بئش-آلتی نسلینین بئینی و وطن آنلایئشی و دویقولاری ایشغال اولموش و ایشغالچینین ایسته گی اساسدا دئییشیلمیش دیرلر.
بونون اوچون دور کی ایشغالدان قورتارماق و ایستیقلالا یورومک اوچون، ان باشدا، بئیین یئخانماسینین وارلیقینا اینانمامیز لازیم دیر.
سونرا، بئنیمیزی ایشغالدان آزاد اتمک چاباسینا گیرمک گرکیر. بودا، چوخ اوزون بیر پروسس دیر. بئینیمیزی ایشغالدان آزاد ادرسک، بیزیم کیم اولدوغوموزو، آیاقدان باشا دئییشدیرن بیر فاکتور دور.
بوندان دولایی، بیر پیلانلا، مئیدانا گیریب، بئیین یئخامانین اونونده بیر دوشونجه سددی یاراتماق گرکیر. بیر تعلیم سیستیمی، مدرسه، مکتب، کیتاب، لازیم دیر. بونون لوزومو، یئمک قدر اونملی دیر. بونلا چییین به چییین دوشونجه سیستیمی یارانمالی و قورولمالی دیر.
تعلیم، تربیه، بئیینلری دئییشدیرمک اوچون اوخومالی، یازمالی، یایمالی و آچیقلامالی بیر گئنیش سیستیم لازیم دیر تا توپلومون اونده گئدن و سایقین اینسانلاری، بئیین یئخاما باتلاقیندان چیخمایا یونلتسین و بو یونده گئنیش چابا گوسترسین.
بو یولدا، ان اونملی فاکتورلاردان بیری ده، فارس دیلی ایله موطلق موخالیفت و هر ساحه ده، تورک دیلینه دایانماق زوروندایئق.
بونون اوچون، هر بیر تورک، تورک دیلین، موکممل اویرنمه لی، یازمالی، اوخومالی و اوندا، یارادیجی اولماق سوییه یه سینه چاتماق گوره وین عوهده سینه آلمالی دیر.
اگر تورکجه میزده یارادیجیلیق دوزئیینه چاتمازساق، یارادیجی اولمازساق، فارس دیلینین یوز اللی ایللیک بئیین یئخاماسیندان و سولطه سیندن قورتارماق ایمکانسیز گورونور.
چون دیل، تکجه دانیشیق و کلمه لردن عبارت بیر وارلیق دئییل. بلکه دیل، بئیینین قورولوشو، دوشونجه نین تمیلی و دونیا گوروشو، هابئله گله جه یین یول یونته می دیر. دونیانین چارچیوه سینت شکیللندیرن ان اساس فاکتور دور.
تورک کیملیگینه اینانماق، او کیملیگی یایماق و یاشاماق لازیم دیر.
آمما بونلار ایستیقلال اوچون کافی دئییل دیر بلکه تشکیلاتلانماق، بیربیریمیزه گوونمک، ایستیقلالا اینانماق، ایستیقلال اوچون جاندان-مالدان گئچمه یه حاضیرلانماق، ان سونوندا ایسه سیلاحلانماق و سیلاحلی ساواشماق ، وطن و میللت اوچون جان آلیب، جان وئرمک، ایستیقلال اوچون حاضیرلانمانین ان اونملی و لازیم موقددمه لری و شرطلری دیرلر.
بو گونکو دارتیشمالارین بیری ده «ایچیمیزده و بیزدن ائشیکده هانکی گوجلر و دوشونجه لر ایستیقلال ایله موخالیف دیرلر؟» سوروسو ایدی.
ایچیمیزده کی ایستیقلال ایله موخالیف دوشونجه لر وگوجلر: مرکز و فارسلار ایله منفعتلری اوست اوسته دوشنلر، یا فارس و فارسلیقلا بیرلشمیش بیرئیلر، قوروپلار و قوروملار، دینجی کسیمین بیر پارچاسی کی فارس شیعه لیگینه اویموشلار، بعضی سرمایه صاحیبلری، ایداره لرده کی ایشچی لرین بیر چوخو، بئیین لری یئخانمیش اینسانلارین بیر چوخو، ایلیناسیون اوئلموش بیرئی لر و توپلوملار، ایرانچیلار، فارسچیلار، دوشونجه سیز، و ... تقلیدچی کسیملردن آد چکمک اولار.
دئش موخالیف کوجلر و دوشونجه لر ایسه: پانفارسلار، پان ایرانیستلر،اوممتچیلر، فارسلارین دوشونورلری و سیاستچیلری، سرمایه صاحیبلری، ایشغالدان و سومورگه دن فایدالانانلار، ایران-فارس رئژیمی ایله امکداشلیق ادن دوولتلر و شیرکت لر، سیلاح شیرکتلری کی ایران و فارس قورخوسوندان دولایی عربلره تاریخده تایی گورونمه میش قدرده سیلاح ساتانلار.
بو دارتیشمالاردان داها چوخون، آشاغاداکی سورولار ایله ایلگیلی قونولاردا شاهید اولابیلرسینیز.
خاطئرلادیم، چون «گونئی آزربایجان میللی قورتولوش پارتیسی» ایستیقلالچی بیر پارتی دیر، اونون لیدئریندن، فئدرالیسم حاقدا چوخ سورو سورمادیم. آمما فئدرالیسم حاقدا دا بیر گئنیش دارتیشمامیز اورتایا چئخدی.
ایستیقلال
ایستیقلالی نئجه دوشونورسونوز؟
- ایستیقلالدان تعریفینیز نه دیر؟
- ایستیقلالی، هانکی ساحه لرده گورور، دوشونورسونوز؟
- موطلق ایستیقلالا اینانیرمیسینیز؟
- سیزین تشکیلاتین یول خریطه سی، گونئی آزربایجانین ایستیقلالینا یورومه نی نئجه ترسیم ادیب؟
- ایستیقلال ائوچون ساواشا گیررمی سینیز؟
- سیزین اوچون ایستیقلال اونملی دیر یوخسا ریفاه؟
- ایستیقلالی الده اتمک ائوچون ان اونملی و لازیم ایشلر نه لر دیر؟
- نه دن و هانکی سببله ره گورا، تورکلرین یا آزربایجانلیلارین ایستیلقالی یوخ دور؟
- ایستیقلالا، آلتیرناتیو تانیرمی سینیز؟
- ایستیقلال مومکون اولمازسا، فئدرالیزمه نئجه یاناشیرسینیز؟
- چوخ آز بیر احتیمال اوزره، فئدرال ایرانی قبول اده رمیسینیز؟
- سیزین تشکیلات ایرانداکی توم تورکلرین ایستیقلالین دوشونور مو؟
- یوخسا تکجه گونئی آزربایجانین ایستیقلالین آماج سئچمیش می؟
- ایستیقلال ال وئریشلی می دیر؟
- هانکی دوشونجه لر و گوجلر، ایراندا محکوملوقلا یاشایان میللت لرین ایستیقلالی ایله موخالیف لر؟
- هانکی دوشونجه لر، هانکی سببلردن، میللت لرین ایستیقلالی ایله موخالایف لر؟
- اگر بیر میللت یا میللت لر، ایستیقلال ایستیرلرسه و ایستیقلال ائوچون ایراده ادرلرسه، کیملر و نه دن او میللت لرین ایستیقلالی ایله موخالیف اولابیلرلر؟
- ایستیقلال ایراده سی، ایستیقلالی الده اتمک بیر اولوسلار آراسی، اخلاقی، سیاسی حاق می دیر؟
- ایستیقلالا ایراده دادن میللت اوچون، موخالیفتلرین اونمی نه دیر؟
ایران
- ایران قاورامی سیزین دوشونجه نیزده هانکی تعریف ایله تانیملانیر؟
- ایران قاورامین سیاسی گوروسونوز، یوخسا گولتورل می، توپراقسل می، دیل سل می، دین سل می؟
- ایران آدلی وارلیقی رسیمیته تانیرمی سینیز؟
- ایرانلی سوزوندن سیزین آنلامینیز نه لر دیر؟
- تورکلر، آزربایجان، آزربایجانلیلار، ایران و ایرانلیلار قاوراملارین، سیاستده، نئجه یان یانا گتیریرسینیز؟
- ایرانی، میللت لر ائولکه لر وارلیقی بیلیرسینیز یوخسا بیر بوتون ائولکه تانیرسینیز؟
- سیزین تشکیلات، ایران آدلی وارلیقین گله جه یین نئجه گورمک ایستیر؟
- سیزین تشکیلات، ایران آدلانان سیاسی وارلیقدا فئدرالیزمه نئجه یاناشیر؟
- سیزین تشکیلات، بو گونکو ایراندا بیر کونفدرالیزم سیستیمین قورولماسینا نئجه یاناشیر؟
- دونیا گوجلری و قونشو ائولکه لر، ایران آدلانان یئرده، تورکلرین ایستیقلالینا نئجه یاخینلاشابیلرلر؟
- ایرانین جوغرافییاسینا باخاندا، نه لر گورورسونوز؟
- ایرانین جوغرافییاسینا نئجه باخیرسیز؟ ایران دوولتین نئجه گوروسونوز؟
- فارس دیللی اینسانلارا نئجه باخیرسینیز؟
- اونلاری نئجه بولور و بُلورسونوز؟
- فارس دیلین نئجه تانیملیرسینیز؟
- فارس دیلی، تورکلرین یا آزربایجانلیلارین گله جه یینده یئری اولارمی؟
- ایران و فارسلارین سیاسی گله جه یین، نئجه گورورسونوز؟
- ایران - فارسلارین جوغرافی گله جه یین نئجه گورورسونوز؟
- ایران-فارسلارین ائکونومیسل گه له جه یینه نئجه باخیرسینیز؟
فئدرالیزم
- فئدرالیزمی نئجه تعریف ادیرسینیز؟
- ایراندا فئدرالیزم اولابیلرمی؟
- هانکی فئدرالیزمدن سوز گئدیر؟
- سیزین ایسته دیگینیز فئدرالیزیمین موشخّصه لری نه لر دیر؟
وطن
- وطن نه دیر و هارادیر؟
- ایران و فارسلار، وطن آنلامین، سرحدلرین، قارماقاریشیق اتمندن هدفلری نه دیر؟
- وطنی کیم تعریف ادیر؟
- سیزین تعریفینیز وطن دن نه دیر؟
- سیزین وطندن اولان تعریفینیز هانکی اساسلارا دایانیر؟
- وطنین سرحدلری، هانکی دوره اساسن تعیین اولور؟
- وطنی، وطنسیزلشدیرمک سیاستی حاقدا نه دوشونورسونوز؟
- وطنی گئچن یوز ایلده، دفعه لر جه بولوب، وطنین آدین اوستوندن گوتورموشلر. وطن دویغوسون، وطه نین اوستوندن گوتورمه یه چالئشیبلار، سیزین تشکیلات بو قونویا نئجه باخیر؟
- پهلوی لر و موللالار سیاسیتی سونوجوندا، وطنین بیر پارچالارین قونشولارا وئریب و بیر نئچه نسیلدن سونرا، او پارچالارا وطن دویغوسو آزالیب، یادا وطن اولماقدان چیخیلیب، بونلارین حاقّیندا نه لر دوشونورسونوز؟
- وطن اوچون، وطنی گئری آلماق اوچون، ساواشا گیررمی سینیز؟
سایقیلاریملا
دوشونجه باغی
انصافعلی هدایت
