گوروموزو قازیریق
گوروموزو قازیریق قازیریق
سلام سایین و حورمت ایران فارس رئژیمین اسیر یئسیری اولان تورک بایلار و بایانلار
گئچن یوز ایلده، سئچگیلر مهندیسلیگینده، بیز تورکلرین سئچیمیمیز "ان پیس ایله پیس‌لرین" آراسیندا یاشاماق اولموش.
بونون بیر چیخیش یولو اولمالی. بو فئرلانان داییره‌نی بیر یئرده سیندیرمالی و "سئچگی مهندیسلیگینه "یوخ" و "دایان" دئمه‌لی ایک.
حتتا گرک کی اوزوموزه؛ تورکلره، فرقیلی بیر یول آچمالییق.
بیز تورکلرین، "تحریم سسی"، تحریمچی تورک آدینا یازیلیر. تحریمچی سسیمیز، باشقا سسلردن داها گوجلو قولاقلارا چاتیر و مهندیسلیک سیستیمین ایراده‌سینین ترسینه گئدیر.
او حالدا کی پیسی یا آز پیسی (فارسلیقی و ایرانچیلیقی) سئچمک ایله، مهندیسلیگین ایسته‌گینین ایچینده اوینوروق. حاکیمییته، ایرانچیلیقا و فارسلیقین قودرتینین خئیرینه اوینوروق.
سورو:
تورکلر، سس و رای وئرمه‌سه‌لر نه اولار؟
تورکلر تحریم اتسه‌لر، نه‌یی الدن وئررلر کی ایندی تورکلرین اللرینده دیر؟
توم تورکلر، سس وئرسه‌لر، هانکی ایمتیازلاری الده اده‌ریک؟ تورکلرین هانکی ایراده‌لری و ایستک‌لری حیاتا گئچیر یا گئچیب؟
عجبا، تورکلر رای وئرمه‌سه‌لر، تورکلرین موخالیفت سسلرینین هارایا قدر گئتمک ایمکانی وار؟
عجبا، تورکلر سس و رای وئرسه‌لر، رای سسلری ایران و فارس سسی آراسیندا ایت بات اولماز می؟
تورکلرین رایی، فارسلیقین، ایرانچیلیقین و ایران-فارس دوولتچیلیگینین مشروعلوقونا یازیلمیر می؟
یوز ایل مهندیسلیک ایله تورکلری آپاردیقلاری یولدان و زیاندان، تورکلر ایله دوشمانلیقدان دونمک و هر طورلو ایصلاح و دئییشیمدن اومودوموزو کسمه‌نین زامانی گلیب، چاتمادی می؟
اگر یوز ایل رای وئرمیشیک آمما تورکلرین میللی منفعتلری زیاندا و ضررده دیر، ان آزیندان رای وئرمییک، زیاندا اولاق. بو ایستیراتئژی، داها دوغرو اولماز می؟
هم رای وئرک، هم مشروعئت وئرک، همده زیاندا اولاق، اوز الیمیز ایله، اوز وطنیمیزین و میللتیمیزین گورون قازمیریق می؟
سایقیلار و حورمتلر ایله
انصافعلی هدایت
Comments
Post a Comment