اگر توتوقلانان میللی فعاللارئ قوروماق ایستیرسیز ...

اگر بیر تانیدئغئز فعال (خانیم یا آغا)، ایران رئژیمی و مامورلاری طرفیندن توتوقلانئرسا، توتوقلو خانیم و آغایا و اونون عاییله‌سینه، نئجه یاردیم اتمه‌لیییک؟

1. گیزلی اولاراق، مامورلاردان سس، عکس و فیلم گوتورمه‌یه چالیشاق.

2. تئئلفونوموزو، فیلیم چکمک حالئنا قویوب، گیزلی شکیلده فیلیم چکک.

3. موبایلئمئزدا اولان سوسیال (ایجتیماعی) شبه‌که‌لرده اولان، تانئدیغئمئز و گووندیگیمیز بیر دوستا زنگ آچئب و گیزلی حالدا، جانلی یایئن یایاق.

4. قوهوم قارداشا و قونشولارا خبر وئرک تا اونلاردا، ائوز یئرله‌ریندن باخاراق، فیلیم چکسین لر.

5. مامورلاردان محکه‌مه حوکمون ایسته‌مه‌لیییک. حوکم اولماز ایسه، اونلارئن ائوه یا ایش یئرینه گیرمکله‌رینه موساعیده اتمه‌مه‌لیییک.

6. حوکمودن عکس سالمالییق و عکس سالماغا، مامورلارلا بئله موجادیله اتمه لیییک!

7. حتمن حوکمو اوخومالیییق! ایمضا و تاریخینه و ایتتیهاما دیققت اتمه‌لیییک.

8. مامورلارلا دانئشارکن بئله، ائوزوموز یا هر کیم یاخئنئمئزدا وارسا، بیر بهانه ایله، موبایلیمیزی، گیزلی بیر شکیلده، فیلیم چکمه‌یه و سس قئید اتمه‌یه قویاق. اونجه‌دن عاییله عوضولرینه و دوستلارا، بو حاقدا تعلیمات وئرمه‌لیییک.

9. مامورلارئن آدلارئن، قیافه لرین، بویلارئن، لهجه لرین، بدنلرینین رنگین، باشلارئنئن توکونون رنگی، ائوزوکله‌ری و ساحاتلاری وارسا، و ... هر شئیله‌رینه دیققت اتمه‌ و یادداشئمئزدا ساخلامالئییق.

10. ماشئنلارئنئن رنگین، نومره سین، مودئلین یادئمئزدا ساخلامالیییق و مامورلار گئدندن سونرا اونلارئ کاغاذدا یادا سسلی و فیلیمده قئید اتمه‌لیییق.

11. مامولار هاردان گلمیشدیرلر؟
توتوقلانانئ هارایا آپاردئلار؟
نه زامان آزادلئغا بوراخاجاقلارئنا گورا سئوز دئمیشدیرلر؟
و ... هر شئیی موبایلئمئزلا فیلیم چکیب و فیلیمده دئمه لیییک.

12. مامورلارا هئش واخت اینانمامالیییق.
مامورلارئن ایشی بودور کی توتوقلانان فردین عاییله سین قورخو و اومود آراسئندا ساخلاسئنلار تا عاییله‌لر، توتوقلو و مامورلار حاقدا معلومات یایماسئن تا مامورلار، فیشارا آلتئندا قالمادان، ایشله‌رین ایره‌لی آپارسئنلار.

13. مامورلار، هئش واخت سیزین منفعتیزه بیر ایش گورمییه‌جکلر.
مامورلارئن ایشی سیزی حبسه سالماق دیر.

14. توتوقلانانلارئن عاییله عوضوله‌ری، تک به تک، ویدئو چکمه‌لی دیرلر.

15. هر کیم ائوزونون آدئن، فامیلین، توتوقلانانلا اولان ایلگیسین (اوغلو، قئزئ، اری، آروادی، آتاسی، آناسی، قونشوسو، دوستو، فامیلی و ...) آیدین شکیلده دئمه‌لی دیر.

16. هر کس، توتوقلانما حاقدا نه بیلیر یا نه‌لر اشیدیب یا گوروب ایسه، اونلاری دئمه‌لی و قئید اتمه‌لی دیر. سونرادا، همن ویدئونو، ائوز کانالئندا یا دوستلارئنئن کانالئندا یایمالئ دئر.

17. اگر مامورلاردان عکس یا فیلیم و یا سس قیده آلئنئب ایسه، ائوز کانالئزا قویمایئن بلکه خاریجه ده اولان بیر دوستا گونده رین.
بو سس، عکس و فیلیم حاقدا ان یاخئن آدامئزا هئش بیر سوز دئمئیین.
گیزلی توتون. بیرینین آغزئندان چئخار و سیزی زحمه‌ته سالار.

18. بئله‌لیکله، توتوقلانانئن یاخئنلارئ، دوستلارئ، قوهوملارئ طرفیئدن اونلار ویدئو یایئلار.

19. هر ویدئو، بین المیلل تشکیلاتلارئن الینده بیر شاهید و بیر سند دیر. بو شاهید و سندله‌ره دایاناراق، توتوقلانان آغا یا خانئمئن آزادلئقی و جانئنئن سالاماتلئغئی طلب ادیله‌جک دیر.
خبرین یالان و ساختا اولما احتیمالی دا، اورتادان گوتوروله‌جک دیر.

20. توتوقلانانئن، اوشاقلارئنئن (یاشلارئنئن آز یا چوخ اولماسی اونملی دئییل) هره‌سی بیر ویدئو دوزلتمه لی دیر.
اوشاقلار، آتا، آنا، باجی، قارداش و ... داها اونملی شاهیدلر دیرلر.

21. اگر بیری ویدئو چه‌کنده آغلئرسا، آغلاسئن. هئش بیر اییرادی یوخ دور.

22. توتوقلونون قانونی ایشله‌ری حاقدا توضیح وئره‌بیلرسیز آمما چوخ آچئقلئق گتیرمئیین.
لاکئن، توتوقلانان آدامئن یاخجی ایشله‌رین، داها چوخ خاطئرلایئن. اونا دارئخئرسانئز، دئیین.
اوندان بیر شئیه دارئخئرسیز، دیله گتیرین.
بیر خسته‌لیگی وار ایسه دئیین.

23. بللی دیر کی هر میللی فعال، ائوزونون توتوقلانماسئن گئوزونون اونونده توتمالی و گونله‌رین بیرینده توتوقلانماغا حاضیر اولمالئ دیر.

24. بئیله بیر گله‌جک اوچون دور کی هر بیر میللی فعال، بیر گیزلی کامئرا آلئب، ائوینه، حه‌یطنه، یا هر بیر یئرده یئرله‌شدیرمه‌لی دیر تا هر کیم اونون ائوینه یا ایش یئرینه گیریر ایسه، اونلاردان فیلیم چکسین و سسلرین قئید اتسین.

25. عاییله دن بیریسی او کامئرانئن یئرین بیلمه لی دیر کی اگر میللی فعال توتولدو ایسه، او ویدئونو سوسیال شه‌به‌که‌لرده یایماقلا، توتوقلانئن جانئن قوروسون.

26. هر کیم، توتوقلو حاقدا چکدیگی ویدئودا، هر شئیی آچئقلامالی دیر.

27. هر کیمین بو حاققئ وار کی هر گون، یئنی ویدئولار چکسین، سون دورومو آچئقلاسین.

28. هر ویدئودا، تاریخ، گون و حتتا ساحات قئید اولمالی دیر تا ویدئولار بیر بیرله‌ریله قارئشیق دوشمه‌سین‌لر.

29. بو ایشین هانکی فایدالارئ وار؟

الف- توتولان شیکنجه یه معروض قالماز.

ب- مامورلار ائوزباشئنالئق اده‌بیلمزلر.

ج- ایرانئن ان اوست مقاملار، توتوقلانان آدامدان خبردار اولارلار و مامورلار توتوقلونو گیزلی ساخلایا‌بیلمزلر.

د- دادیگاهلار ماجرایا گیرمه‌لی اولارلار.

ه- توتوقلودان، ایتتیهامدان باشقا، سورقو سووال سوروشانمازلار.

ی- توتوقلانان حاقدا، عومومی نیگرانچئلیق یارانئب، یایئلار و مسئوللارا روحی باسقئ یارادار.

و- توتوقلانانا داها یونگول توتارلار یادا داها تئز آزاد ادرلر.

ن- دونیا و بین المیلل تشکیلاتلار، توتوقلونون حالئن، گونده‌لیک تعقیب ادرلر.

ر- توتوقلییه، ایچه‌ریدن و خاریجه‌دن حیمایتلر گلر.

ز- توتوقلو حاقدا معلومات یایماقلا، هر کس، ائوز میللی وظیفه‌سین و میللی بورجون ائوده‌مه‌یه چالئشار.

ژ- هر کیم آللاهی و ویجدانی قارشئسئندا باشی اوجا اولار.

ط- هر کس، بئله ایش ایله، میللی حرکتین گوجونه، گوج قاتار و هامئ اینانار کی اگر میللت یولوندا توتوقلانار ایسه، بوتون میللت اونون آرخاسئندا دوراجاق دیر.

ض- میلله‌ته و میللی یولا اینانج، گوون و اعتیماد درینله‌شر.

ع- بین المیلل تشکیلاتلار، فورصتی الدن وئرمه دن، بیانات یایارلار و توتوقلانانئن آزادلئغئن طلب ادرلر!

ف- هئش بیر کیمسه، خاریجده و ایچه‌ریده‌کی میللی خبر یازان، خبر یایان و اینسان حاقلارئ مودافیعه‌چیسین یالانلا ایتتیهاملایانماز.

انصافعلی هدایت

تورنتو - کانادا

28 اکتبر 2018

hedayat222@yahoo.com