بیر تبریزلی دوستوموز فیس بوکدا منه خیطاب بیله یازمیش دیر:
Seyed Hadi Shater Mousavi
آقای هدایت ما روزنامه نگاران نباید درگیر مسائل بداخلاقی انتخاباتی شویم. شما واقعا به این فیش حقوقی اعتقاد دارید؟ آیا مطمئن هستید؟
کاش این نوع فیش حقوقی واقعی باشد اما هیچ کس در مورد مسائل آذربایجان و حقوق قانونی آذربایجانی ها با هیچ کس معامله نکرده و تا پای جان در برابر حق و حقوق آذربایجان دفاع کند.
https://www.facebook.com/photo.php?fbid=10153571051570950&set=a.10150823419775950.396507.724490949&type=3&theater
من: انصافعلی هدایتین بو حورمتلی دوستوما وئدیگیم جاواب:
سیز بو فیشین دوغرو اولوب اولماماسیندا شک یارادیرسیز آمما سوزوزون ایکینجی بندینده، ایصرارلی اولاراق حوکم وئریرسیز کی "هئچ بیر نوماینده، آزربایجان مسئله لرینده و قانونی حاقلاریندا، هئچ کیمسه ایله موعامیله اتمه میش لر."
بیر سورو ایله باشلاسام، سیزدن سوورارام، دییه رم: هاردان بیلیرسیز کی بیله یقینی حوکم وئریرسیز؟
آمما من آشاغادا بیر نئچه سورو سورماقلا گوسته ره جاغام کی هامی وکیل الدوله لر و دئولت مامورلاری (هئچ اولمازسا مودورلر و موعاوین لری، ایمام جومعه لر، سپاه، بسیچ، پلیس، و ... فرمانده لری، بونلارین ائولادلاری و اونلارین حیمایه سینده اولانلار، نوفوذ صاحیبلری و ائولادلاری، حراستلرده رئیس اولانلار، (آغازاده لر) و ... آزربایجانا، آزربایجان خالقینا، آزربایجان منافعینه، آزربایجان مووضولارینا و مسئله لرینه خییانت گوزلریله باخیب و آزربایجان خالقی و توپراقلاری ضررینه، فارسلار و دئولت ایله موعامیله ادیب لر!
بیلیرم کی سیز خبر نیگار و عینی حالدا آگهی آلان سیز و بونلاردان دولایی قازته چی اولمایانلاردان مین پای یاخجی بیلیرسیز کی نه لر گئچیر. خوصوصیله اگر گلیریز داها یوخاری اولماق اوچون، آگهی آلماق مجبورییتینده اولسانیز، بونو داها یاخجی بیلیرسیز.
دئمه لییم، سیز بیلیرسیز کی من نه قدر خالقین آبریسینا احتیرام گوسته ره رم آمما واقعیت بودور، بو نوماینده لرین هامیسی (اکبر اعلمی استثنا اولاراق) جیبلرینه ایشلیرلر و آزربایجان خالقینا و ایستک لرینه اهمییت وئرمیرلر.
مثلن سیز و من بیلیریک، اورمو گولو حاقدا 2 و حتتا 3 فورییتلی طرحی مجلیسه آپارابیلردیرلر آمما آپارمادیلار. اورمو گولو نئچه ایل دیر بوحران حالیندا دیر؟ ان آزی 17-18 ایل؟
ترسه سینه، دفعه لرجه، خامنه ای بیر سوز دئدی-دئمه دی، هم مجلیس ده راهپیمالیق ایله دیلر، هم ده 2-3 فوریتلی لایحه لر مجلیسه آپاردیلار. یعنی اونلارا بیر فردین ایستگی بیر میللتین طلب لریندن داها ایرلی دیر. دئییل می؟
به یم، آنا دیلی آزربایجان دا بیر مسئله دئییل؟
هانکی لایه حه نی مجلیسه آپاردیلار؟
هانکی قانونو گئچیردیرلر و دئولتی و جامعه نی مجبور اتدیلر تا بیزیم آنا دیلیمیزه باش ایسین لر؟
آنا دیلینین فعاللارین توتدوقلاری زامان، هانکی دیخالتلری ادیب، دئولتی و قضائییه قووه سین توتولانلارا نیسبت، هانکی اینصافلیغا مجبور اتدی لر؟
اصلن آزربایجانلی لارا اساسی قانوندا قئید اولان حاقلاری طلب اتمک حاققین دئولت دن ایسته دیلر؟
بو آنا دیلی یا میللی فعاللار دئدیگیمیز و آزربایجان قوروجولارینین کناریندا دور دولارمی؟
آزربایجانین سیاسی، ایجتیماعی، دیل، و ... فعاللاری نین غیری قانونی توتولمالاری و زیندانی لریمیز، نوماینده لرین فیکرینده، آزربایجان مسئله سی دئییل می؟
اونلار بلکه یوزلر و مین لر، تورک آداملاریمیز توتولوبلار و غیر قانونی شکیلده ایتتیهاملانیب لار. او غیری قانونی ایتتیهاملارا موحاکیمه اولوبلار کی قانوندا یوخ دور. بو نوماینده لر بو غیری قانونی توتولمالاری و موحاکیمه لری، گورمورلرمی؟
نه دن ساکیت دیرلر؟
نیه بو میللی فعاللار و آزربایجانلی لاردان حیمایه ده قانون تصویبه یئتیرمیرلر؟
محکه مه لرده و دئولت سیستیمین ده، پان تورکیسم نه دئمک دیر؟
بو آزربایجانلی لار ائوز توپراق لارین و هموطن لرین سئومه سین لرمی؟
فارسلار استعمارچیلارین و ایستثمارچی لارین و حتتا استحمارچیلارین سئوسین لر می؟
100 ایل دیر آزربایجانین منافعین فارسلارا قوربان وئرمک لری کافی دئییل می؟
بو نوماینده لر، نه زامان، بو میللی فعاللارین یانیندا دوروب و اونلارین حاقلی اولدوقلارین دئییب و اونلاردان و اونلارین ایستک لریندن حیمایت ادیب لر؟
بو وکیل الدوله لر، بو حاقلاردان و بو حاقلاری طلب ادن لردن مودافعه ده، بیر لایحه مجلیسه آپاریبلار یا آپارمئییب لر؟
بس بونلار اگر آزربایجان خالقین مجلیس ده مودافیعه اتمزلرسه، کیمی مودافیعه اده جک لر؟ کیمین نوماینده لری دیرلر؟
ائوزلرین کیمه و نئچییه ساتمیشلار؟
آزربایجاندا مواد موخددیر و اعتییادین یایقین اولماسی آزربایجانلی لارین مسئله سی دئییل می؟
ایش سیزلیک آزربایجاندا درین و بویوک بیر مسئئله دئییل می؟
ایش یاراتماق اوچون هانکی طرح لری و فیکیرلری وئریب و هانکی بودجالاری آلیبلار دئولتی هانکی ایشلری یاراتماغا مجبور ادیب لر؟
بونلارین دئورینده، نه قدر ایش یارانیب دیر؟
یا نه قدر آدام ایش تاپماق اوپون ائوین اشیگین ترک ادیب دیرلر؟
آزربایجاندان سرمایه و موتخصصیص لرین کوچمه سی سیزجه مسئله دئییل؟
یوخسا اهمییتلی دئییل کی نوماینده لر بو حاقدا دئولتی چارمیخا چکیب و دورومو آزربایجان نفعینه چئویرمه گه مجبور ادلر؟
آزربایجانیمیزدا بیر گون گئچمیر کی بیر اینسانیمیز، ائوزون اولدورمه سین. بو آمار چوخ چوخ یوخاری دیر و آمارین یوکسکلیگی گوسته ریر کی بیر درین درد وار کی حل اولمور و دئولت اونلارین حللی اوچون چابا اتمیر. دئولت، فارس دئولتی دیر آمما نوماینده لر اگر ائوزلرین آزربایجان خالقی نوماینده سی و سسی بیلرسه، نیه ساکیت دیر؟
علمی تحقیق لر نیه آزربایجان مووضولاریندا سورولمور؟
یوخسا آزربایجاندا او قدر وضع و دوروم عیب سیز دیر کی بهیشت دن داها اوستون دور و هئچ بیر علمی تحقیقه احتیاج یوخ دور؟
هئچ عیب و ایراد دا یوخ دور؟
نیه شهریار تحقیق مرکزینده کی قرار دیر، توکو دیلی درس وئریلسین، تکجه ایکی درس، اودا یاریم یالچیق تورکجه ده دیر و قالان بودجالار فارس دیلین آزربایجاندا اینکیشاف وئرمک اوچون خرج ادیرلر؟
جورم، جینایت، فقر و فلاکتین آماری نین یوخاری اولماسی سببلری نه لردیر؟
نوماینده لر بونلاری حل اتمک اوچون دئولته هانکی باسقیلاری گتیریرلر یا قانونلار مصوب ادیب لر؟
هامی بیلیر کی، آزربایجان ایالت لرینده، دئولت ایداره لری بودجالاری ایل سونو طهرانا قایتاریرلار.
نیه بودجالار فارسیستانا قایئدیر؟
نیه آزربایجانا آز بودجا وئریلیر؟
مگر بودجا توکنده، بیلمیرلر کی نه قدر ایش گوورولمه لی دیر؟
نه قدر پول لازیم دیر؟
مودورلر ایش باشارمیرلار؟
یوخسا، مجبور دورلار بودجانی دئولته قایتارسین لار تا ایش اوسته مودور و موعاوین قالسینلار؟
آزربایجانیمیزین تاریخی اثرلری، همده عمدی شکیل ده تخریب اولورلار؟
بو اثرلر بیزیم و آزربایجانین دئییل می؟
نوماینده لرین وظیفه سی اونلاری قوروماق دئییل می؟
سیز و من بیلیریز کی کیملر بو آثاری تخریب ادیب و فارسیستانا داشیرلار؟
نوماینده لر بو مافیالارین اوستون نییه آچمیرلار؟
بو مافیالارلا نوماینده لرین اورتاقلیق و موشاریکت لری نه قدر دیر؟
سیاسی و ایجتیماعی باسقی نین آزربایجاندا داها درین اولماسی هئچ سیزین و نوماینده لرین گوزلرینه چارپمیرمی؟
عیرانین هر یئرینده "جومهوری"، آزربایجان توپراقلارین دا "اسلامی" حاکیم دئییل می؟ نوماینده لر بونلاری گورولرمی، گورمورلرمی؟
نه دن ساکیت دیرلر؟
آزربایجان شهرلری، و کند لری قونشو میللت لر آراسیندا پارام پارچا ادیلیب و بولونور. بیزیم توپراقلاری دیگر میللت لره وئریب و یئنی اوستانلار یارادیرلار. نه دن نوماینده لر لال دورورلار و اعتیراض اتمیرلر؟
فارسلار و سیاسی سیستیم بیزلرین وجودوموزو و وارلیغیمیزی دانیرلار و بیز تورک اولاراق، اونلار بیزه "آذری" و فارس کوکنلی دئییرلر.
سیز و نوماینده لر بو سوزلری کیتابلاردا، مدرسه لرده، رسانه لرده، دانیشگاه لاردا، و ... گورورسوز.
نه دن دینمیرسیز؟
یوخسا بو قدر خبرسیزسیز؟
نئجه ایذین وئریرسیز اونلار سیزی و تورک میللتینین ووجودون و وارلیغین اینکار اتسین لر؟
نوماینده لر هانکی لایحه لری مجلیسه آپاریب و دئولتی مجبور ادیبلر کی بیزیم تورکلوگوموزه احتیرام قویوب، بیزی تورک تانیسینلار، یازسینلار و تورک چاغیرسین لار؟
مدرسه لرده و دانیشگاه لاردا بیزیم تاریخیمیزی تورک میللتی اولاراق، فارسلاردان آیری و موستقیل، یازیب و تدریس اتسین لر؟
نیه آزربایجاندا بیزیم خالیص تورکجه میزده رادیو و تیلویزیونون یوخ دور؟ سبب او دئییل کی سیز و نوماینده لر بیزی فارس کوکنلی بیلیر و ائوز سوکوتلاریز ایله دئولته حاق وئریرسیز کی بیزی فارسلاشدیرسینلار؟
میللی توهین و تحقیرلرین قارشیسین آلماق اوچون هانکی قانونلاری مجلیسه و دئولته قبول اتدیریب لر؟
هر گون رادیو و تیلویزیونلاردا، کیتابلاردا، دانیشگاه لاردا، مدرسه لرده، مطبوعات دا و ... بیز تورک میللتینه توهین و تحقیرلر ادیرلر آمما نوماینده لر یا ساکیت دیرلر یادا بیر شفاهی و قورو سوز ایله، اعتیراض ادیب، مسئله نین اوستون، اورت باسیر اتمه گه چالیشمیرلار می؟
هامی بیلر کی آزربایجان مطبوعاتی، مطبوعاتین آناسی دیر آمما بونا باخمایاراق، آزربایجان مطبوعاتی هر یئردن دالی قالیب.
نیه؟
چون خالقین دیلینده: تورک دیلینده، مطبوعات یوخ دور.
چون سانسور و زور آزربایجاندا داها درین دیر و قورخو سوییه سی داها یوخاری دیر. آزربایجان مطبوعاتی، ریضا پالانی دئوریندن ایندیه دک سانسور و قورخو آلتیندا قالیب دیر. بوندان دولایی، گون به گون دالیه قالیب دیر.
بو دالیه قالماغی، جوبران اتمک اوچون، گرک آزربایجان دا مطبوعات و میدیا دانیشگاهلاری قویولا. موتخصصیص ژورنالیست لر تربیت اولا و اونلار جسارت و تجروبه قازانینجا، دئولت طرفیندن مخصوص بودجا وئریله. سیزین مودافیعه اتدیگینیز او نوماینده لر بو حاقدا هانکی ایشلری گوروبلر؟
نییه فارسلارین، اونلار سیاسی تشکیلاتلاری و حیزب لری وار آمما بیز آزربایجانلی لارین بیر رسمی سیاسی تشکیلاتیمیز یوخ دور؟
سبب نه دیر؟
مگر بیزیم تورک اولماغیمیز سبب اولمئییب کی فارس دئولتی بیزه ایجازه وئرمه سین اوزوموزون سیاسی حیزبیمیز اولا؟
آذربایجانلی نوماینده لردن هانکیسی بو قبریستانلیغی پوزماق اوچون دئولتی بیر قانونلا مجبور ادیب تا آذربایجانادا، فارسیستان کیمی و فارسیستانلا برابر باخیب و آزربایجانلیلارادا تشکیلاتلانما و حیزبلنمه حاقین آلسین لار؟
نیه گرک آزربایجان، سئچگیلرده فارسیستانین سیاسی حیزبلرینین آغزینا باخسین؟
نیه گرک آزربایجان، نوماینده لرین فارسیستان منافعی اساسیندا، فارسلارین حیزبلری تعیین اتسین لر؟
نیه گرک بیز سیاسی، ایجتیماعی، ایقتیصادی، علمی و آموزشی و ... سیاستلریمیزی فارسیستاندان آلاق؟
بیز تورک لرده ساوادلی و تجروبه لی مودورلر و آداملار یوخ دور مو؟
یوخسا فارسیستان بیزی عیرانا بیر تهلوکه بیلر و بونا گوره کی بیز تورک لر بیر گون عیرانی داغیتمییاق، بیزی دئییلمه میش بیر تحریم ده و جمعی موجازاتلا ساخلئییب دیر؟ ...
بیله، سیز ژورنالیست اولدوغوز شهرده: تبریزده، شهر شوراسی نوماینده لرینین بیر نئچه سی توتولوب. بونلار آزربایجان نوماینده لری دیرلر یا یوخ؟
بونلارلا مجلیس نوماینده لرینین، نوماینده اولماقدا نه فرقله ری وار کی مجلیس نوماینده لری اونلارین نوماینده لیک حاقلاریندان مودافیعه اتمیرلر؟
نیه نوماینده لر مجلیس ده اونلاردان دیفا اتمه مک و اونلارا آزاد بیر موحاکیمه نین واجیب اولماسیندا لایحه آپارمیرلار؟
نیه اونلارین آزادلیقلارین ایسته میرلر؟
نوماینده لر، مطبوعات و رادیو تیلویزیونلارین، تبریز شهر شوراسی عوضولرینین توتولماسیندان نیه خیرسیز دیرلر؟
خبرسیز دئیرلرسه، نیه بو حاقدا جامعه ده خبرسیزلیک وار؟
و یا نیه سانسور بو قدر درین دیر؟ و ...
بو نوماینده لر اگر دئولت آخیریندان یئمیرلرسه، نه دن لال اولوبلار؟
نه دن آزربایجان خالقین دان مودافیعه اتمیرلر؟
و ...
سیزین واقعن خبریز یوخ دور کی نه لر گئچیر یوخسا بیلیرسیز آمما دینمیرسیز؟
من اوردا یاشارکن، آزربایجانین یاریم یالتاق قازته چیلری پرده آرخاسیندا گئچن لرین بیر چوخون دان خبرلری واری دیر آمما "منه نه ... منه آگهی وئرسین لر ... دونیانی چاپسینلار ..." دئییب، اوستوندن گئچیر دیرلر.
قازته چیلرین ایچینده 2-3 ، بیر آز جسارتلی لری واریدی کی بو گون اونلاردا ائولرینین بوجاقلارینا سورگون سالینیبلار.
سیزدن بیر نئچه ساده سورو سوروشوب و سوزو قورتاریرام:
بو سئچگیلر ده هر کاندید کی بیر اینجی دورده سئچیل دی یا ایکینجی دوره قالدیلار، هره سی، لاپ آزی نئچه میلیارد تومن خرج ایله دی؟
بیر نوماینده نین مجلیسدن آلدیغی حوقوقو نه قدر دیر؟
دورد ایلده، مجلیسدن آلدیقیلاری گلیر، اونلارین تبلیغات خرجلرین گورر؟ و تبلیغاتدان گتیردیکلری بورجلاری اوده ر؟
سیز هئچ آختارمیسیز کی بو نوماینده لرین مجلیس کناریندا داها هانکی ایشلری و گلیرلری وار؟
نیه میللتین بو ایشلردن و گلیرلردن خبرلری یوخ دور؟
یوزلر سورو سوروشماق اولار و ساده جه اوسته کی سورولارا جاواب تاپسانیز، دونیانین ان چوخ ساتیلان کیتابین یازارسیز!
حورمت ایله
اینصافعلی هیدایت
