اینجه صنعت؛ توپلومسال مسئولییت
هونه‌ر ایله اينجه صنعتین؛ شعرله شاعیرین، موسیقی‌له موغننی‌نین، هیکلچی ایله هیکلین، رسم ایله رسامین، ... مسئولییتی اولمالی دیر.
اینجه صنعت و هونرچی، توپلومسال یوک گوتورمه‌لی، داشیمالی دیر.
هونه‌رین و هونرچی‌نین مسئولییتی اولمازسا، ایشله‌ری جیزگی، بویا، داش، هیکل، سئزئلتئ ... دان اوته‌یه گئچمز.
هونر‌له هنرچی، بیر میللتی اونه گوتورمه‌زسه یادا او یونده چالیشمازسا، اونلارین یاشامین، دویغولارین، دوشونجه‌لرین، باخیشلارین، ... دئییشدیرمه‌زسه، یالانچی پوللولارین ایفاده‌‌سینه، پوزونا سبب اولار.
اوندا دا او هونر، کاسیب خالقلاری تاولاماقدان سونرا بیر ایشه یاراماز.
مثلن موزه‌لرین اصیل ایشی نه دیر؟
موزه مدو یاراتماقلا، خالقین جیبله‌رین بوشالتماق دئییل‌‌می؟
پوللولار، اینجه صنعت آدلانان شئیلرین گورمه سینی ده، هر باشقا مدا تای مد ادرلر، اوندان پول قازانسینلار دییه.
او مددا دا، هونر و هونرچی‌نین ایشی‌نین فایداسی اولماز. اولورسادا بیریسل (فردی) قازانجا دونور.
توپلوما یاراماز. یول یونتم گوسترمز. توپلومو ایره‌لی سوروکله‌مز. باغلی یوللاردان، چیخیش یولو گوسترمز. یاتانلارا، بیر خوروز سسی اولاماز بئله.
یوخسا نه‌دن هونه‌ره، باشقا ایشله‌ر کیمی ایش آدی وئریلمیر؟
اینجه صنعت، ایلدیریم کیمی قارانلیق‌لاردا شاخیمالی، ظولمه‌ته بورونموش یوللارا ایشق ساچمالی. یول آچمالی.
هونرچی، دوشونجه‌سل، دویغوسال اونجول اولمالی. هئچ اولمازسا بیر که‌سیمی، حرکه‌ته یونه‌لتمه‌لی.
یوخسا، هونر، "مونالیزا" کیمی، فایداسیز، دیوارلاردان آسیلار.
بوش بوشونا، دیواری به‌زمکدن آرتیق، نه فایداسی اولار؟
گونده، یوزمین‌لر اونا باخار. رنگدن، تابلودان و ان چوخو، بیر قادینین گوزللیگیندن باشقا بیر شئی آنلاماز. آمما آنلامیش کیمی گوسته‌رر.
مونالیزایا باخانلارین بیر چوخو، ائوز حیماقتلرین گوسته‌ریرلر. ساحاتلارجاسینا، اونا باخابیلیرلر. غرق اولموش، فیکیره جومموش کیمی گورونه بیلیرلرده.
آمما سورسانیز، سیزده هانکی دئییشیم ائوز وئردی؟ نه آنلادئنیز؟
نه دئسین.
مونالیزانین، توپلومسال یوخ، حتتا بیرئیسل بئله مسئولییتی یوخدور.
بیرئیسل فایداسی اولورسادا، عاییله‌سینه، عاشیقینه اولابیلر.
یوخسا، اینسان توپلوملاری میلیونلار جانلی مونالیزا ایله دولودور. یالانچی‌لار، او رسمه وئردیکلری حورمتی-قیمه‌تی، زورلوقلاردا یاشامایا محکوم اولان گوزل گویچک خانیملارا، قیزلارا وئرمیرلر. فابریکالاردا ان چتین ایشله‌ره محکوم ادیرلر.
رسام، اونو چکیب، حیاتینی، گونده‌مینی یاشاسین. بورجون ائوده‌سین. عاییله‌سین راحاتلاسین. بیریسی ده اونو دیوارینا آسسین.
پوللولار، اونونلا قیافه توتسون. پوز وئرسین. وارین-مالین گوزله‌ره چکسین. آدلی-شانلی گورونسون‌لر دئییه، قیمت‌لندیریبلر.
کاسیبلار دا، توم مودلاری پوللولاردان آلدیقلارینا تای، اینجه صنعت مدونون کولتورون ده اونلاردان آلیرلار. پوللولار کیمی، هونر آدلانان اشیا حوضوروندا قیافه توتوب، پوز وئرمه‌یه چالئشیرلار.
فقر فوقرالار ایسه خیالا جوموب، ائوز منفعتین ایتیریب، وارلی‌لار کیمی گورمه‌یه، یاشاماغا، خرجله‌مه‌یه و گورونمه‌یه چالیشرلار. ائوزلرین پوللو، گوسته‌رمک ائوچون چابالئرلار.
کاسیب کوسوبلار، داییمن، ثروتلی‌لرین تورونا دوشه‌رک، مدلارا اویارلار. قازاندیق‌لارین، ثروتلی‌لرین ریفاهینا خرج ادرلر.
فرق اتمز آدی هونر اولسون، مد اولسون، بزک دوزک اولسون، یئمک، ایچمک، ائو، آرابا، دولانماق، ... گل گئت، قوناقلیق، بایرام اولسون، دبله‌رین، پوللولاردان گوتورورلر.
هر نه اولور اولسون، باهالی اولسون. زوردا یاشاسادا، بورجلو اولسادا، اوجور یاشاماغا چالیشیر کی ایمکانین‌دا یوخ دور. یالان بیر یاشایئشدا، هونه‌ریده یالاندان یاشاییر.
دونیانین هر یئرینده، یوزلرمین آج - سوسوز، موزه‌لری و باهالی یئرلری زیارت ادیب، "هونر سئور" (مشهده گئدیب، مشهدی اولارلار کیمی) دسته‌سینه قوشولموشلار.
سونوج؟
بو هونرلر، بو موزه‌لر، بو ... هانکی آدامین حیاتین، یاشامین، دونیا گوروشون، حاقلارین دئییشدیرمیش؟
هانکی توپلومون یولون، باخیشین، حاقلارین، دوشونجه‌لرین، میللی قازانجلارین شکیل‌لندیرمیش؟
انصافعلی هدایت
No comments:
Post a Comment