دوشونجه باغی اوتاقینین سورولاری
دوشونجه باغی اوتاقینین سورولاری
بو سورولار، توم گونئی آزربایجان سیاسی تشکیلاتلارین منصوبلاریندان، همده آیری آیری سورولاجاق دیر.
بو سورولاردان علاوه، سورولاردا اورتایا چیخابیلیر یادا تیکرار اولابیلیر.
تشکیلات منصوبلاری، هر عاغلا گلن-گلمه ین سورولارا، همن جاواب وئرمک مجبورییتینده دئییل لر. بلکه بعضی سورولارین جاوابین، باشقا اوتوروملارا حواله اده بیلیرلر.
تشکیلاتلانما سیستیمی
- لوطفن، اوزونوزو و تشکیلاتینیزی تانیتدیرین؟
- تشکیلاتینیز هانکی تاریخده و شرطلرده و هانکی قونولارا جاواب وئرمک آماج اساسیندا قورولوب؟
- حیزب و تشکیلاتین آنلامی نه دیر؟
- حیزب و تشکیلاتین ضرورتی نه دیر؟
- حیزب و تشکیلاتین آماجی نه دیر؟
- نئجه تشکیلاتلانماق اولار؟
- سیزین تشکیلات نئجه قورولدو؟ نییه ایستیقلال؟ نییه فئدراال؟ یا نییه ... ؟
- تشکیلاتینیزین پرنسیپلری هانکی لار دیر؟
- هر بیر تشکیلاتین ان اونملی ایشلری نه لر دیر؟
- بیر تشکیلاتی قورماق اوچون اساسلار کی لازیم دیر، نه لردیر؟
- سیزین منصوب اولدوقونوز تشکیلاتین ایداره سیستیمی نئچه مرحله لی دیر؟
- سیزین تشکیلاتین مدرسه سی، اوکولو، تعلیم سیستیمی وارمی؟
- سیزین تشکیلاتین یازیلی ایدئولوژیسی وار می؟
- تشکیلاتینیز مالی اولاراق نئجه تامین اولور؟
- سیز اوزونوزو، آزربایجان پارتی و تشکیلاتلارینین بیرینین لیدئری گوروسونوز یوخسا ائوزونوزو گونئی آزربایجان لیدئری کیمی گوروسونوز؟
- لیدئرلیک حاقدا، نه لر دوشونورسونوز؟
- سیزین اونردیگینیز بایراق، پارتی بایراقی می دیر یوخسا گونئی آزربایجانین سیاسی بایراقی دیرمی؟
- گونئی آزربایجانلیلارا و تورکلره، سیزه و سیاسته ماراقلی اولانلارا، سیزین تشکیلات، تشکیلاتین آماجلارین، ایستک لرین، پئلانلارین و ... اوخویوب، تانیماسی اوچون، هانکی کاناللاری و یوللاری آچمیسینیز؟
- هانکی واسیطه لر و یوللارلا گونئی آزربایجانلیلار ایله گونده لیک علاقه ده سینیز؟
- سیزین تشکیلاتئنیز، اوزون، هارانین، کیملرین و هانکی جوغرافیانین سیاسی تشکیلاتی بیلیر؟
- سیزین اوچون؛ 1- ایران-ایرانلیلار، 2. ایرانداکی تورکلر-آزربایجانلیلار، 3. آزربایجانلیلار، بونلاردان هانکیسی ایستیراتئژیک اونم داشیر و سیاستیزین مرکزینده دیر؟
- سیزین ان اونملی سیاسی ایستیراتئژینیز یا ان اوستون آماجینیز نه لر دیر؟
دوولتلر، دوشمن، دوست و رقیبلر
- دوولتلر ایله سیزین تشکیلاتین ایلگیسی، هانکی اوصول اوزه رینه قورقولانیر؟
- دونیا اوزرینده اولان دوولت لره نئجه باخیرسینیز؟
- دوولتلرله اولابیله جک ایلگینیزی نئجه تعریف ادیرسینیز؟
- عجبا سیزین تشکیلات بیر دوولته باغلی دیر می؟
- تشکیلاتلارین هانکی بیر خاریجی دوولته باغلی اولماسینا نئجه باخیرسینیز؟
- تشکیلاتلارین و هر تورلو فعالیت ادنلرین خاریجی ائولکه لردن مالی یاردیم آلمالارینا نئجه یاخینلاشیرسینیز؟
- سیاسی اولاراق هانکی دوولتین سیاستلرینه یاخین سینیز؟
- ایدئولوژیک اولاراق هانکی دوولتین ایدئولوژیسینه یا هانکی ایدئولوژییه یاخین سینیز یا هانکی ایدئولوژینی اوزرینده قورولموسونوز؟
- حوقوقی اولاراق هانکی دوولته یاخین سینیز یا هانکی دوولتی حوقوقی اولگو سئچیرسینیز؟
- سیزین تشکیلات، تورک یا آزربایجان توپلومون ایداره اتمک آماجلا، بیر حقوق سیتیمی تعریف اتمیش می؟
- ایداره سیستیمی اولاراق هانکی دوولتین ایداره سیستیمینه یاخین سینیز؟
- هانکی دولت لره یا میللت لره یاخین اولماقی دوشونورسونوز؟
- هانکی دوولتلری دوشمن تانیرسینیز؟
- هانکی میللت لری و دوولتلری رقیب تانیرسینیز؟
- رقیب دوولت لره قارشی نئجه بیر سیاستلر و ایستیراتئژی لر دوشونورسونوز؟
- دوشمن تانیملادیقینیز دوولت لره قارشی هانکی ایستیراتئژی لر و سیاستلری گوتوره جکسینیز؟
- هانکی دوولت لری و میللت لری، دوست دوولت و میللت تانیرسینیز؟
- هانکی ائوزللیک لرله (خوصوصیات-ویژگی ها) بیر دوولتی دوشمن، او بیریسین دوست و او بیریسین ده رقیب سایئرسینیز؟
- تعریفینیز دوشمن دن، دوستدان و رقیبدن نه لردیر؟
- دوشمن تانیدیقینیز میللت لر و دوولت لرله، تشکیلاتلارلا بیر یئره گلمک ایمکانینیز وارمی دیر؟
- رقیبلرله امکداشلیقا نئجه باخیرسینیز؟
- سیز تشکیلاتدا، گونئی آزربایجانین سیاسی تشکیلاتلارین (ایستیقلالچی، فئدرالچی، ایرانچی، و ... لاری دوشمن گورورسونوز، رقیب یا دوست؟
اساسنامه و دئموکراسی
- سیزین تشکیلاتین یازیلی اساسنامه سی وارمی دیر؟
- تشکیلاتین اساسنامه سی علنی دیرمی؟
- سیزین اساسنامه نیز تورکلرین و گونئی آزربایجانلیلارین اوخوماسینا آچیق می دیر؟
- سیزین تشکیلات، ایندیکی آشامادا، دئموکراتیک بیر تشکیلات می دیر؟
- سیزین تشکیلات، دموکراتیک ائولکه و دوولت قورمایا نئجه باخیر؟
- سیزین تشکیلات، دئموکراسینی و دئموکراتیک سیستیمی نئجه تعریف ادیر؟
- سیزجه، دئموکراسی سیستیمی گونئی آزربایجانا ،نه زمان گلمه لی دیر یا نئچه مرحله و آشامالی اولمالی دیر؟
- دوشمن لرله ساواش چاغیندا، ایستیقلال آلیب، ایستیقلالی و امنیتی قُروما چاباسی چاغیندا، میللی حاکیمیتی قورماق زامانیندا و میللی حاکمیتی، ایچ و دئش دوشمن لره قارشی مودافیعه اتمک زامانین دا، دئموکراتیک تشکیلات اولمانی دیر؟
- سیز بو زاماندا دئموکراتیک دوولت و سیستیم قورمایا نئجه باخیرسینیز؟
- سیزجه دئموکراسی اونجه لیگی اولمالی دیر یوخسا میللی حاکیمیت؟
- دئموکراسی تعطیل اولابیلرمی؟
- هانکی شرطلر و دوروملاردا دئموکراسی تعطیل اولابیلیر؟
- سیزه گورا، دئموکراسی سیستیم دیر می؟ دوولت دیر می؟ دوشونجه دیر می؟ یاشام طرزی می؟ ایداره یول یونته می می؟
اویه لیک
- سیزین تشکیلات کیملری، هانکی شرطلر اساسیندا عوضو گوتورور؟
- عوضولرین یوکسلمه سی نئجه و هانکی شرطلره باغلی دیر؟
- عوضولرین تعلیم لری وارمی دیر؟
- هانکی ساحه لرده و قونولاردا، عوضولرینیزه تعلیم وئریرسینیز؟
- تعلیم سیستیمینیز، هانکی زاماندان باشلیر و هانکی مرحله ده دایانیر؟
- سیزین تشکیلاتین ایچینده، تشویق و جزا سیستیمی نئجه دیر؟
- سیزین تشکیلاتین ایچینده سئچیم وارمی؟
- سیزین تشکیلاتدا اوزمانلیقا یا تخصصوصه نئجه باخیلیر؟
- سیزین تشکیلاتین ایچینده لیاقته نئجه باخیلیر؟
- لیاقتی نئجه اولچورسونوز؟
رانتلار
- رانت، نه دئمک دیر؟
- سیزین تشکیلاتدا رانتا نئجه باخیلیر؟
- رانتلا لیاقتی نئجه آیئرت ادیرسینیز؟
- رانتدان تعریفینیز و دوشونجه نیز نه دیر؟
- رانت، هانکی شرایطده و هانکی سیستیمده اورتا چیخار یادا رانت سیستیمینه چئوریله بیلیر؟
- سیزین تشکیلاتین ایچینده لیاقتلری نئجه و هانکی ایستانداردلار ایله ائولچورسونوز؟
- عجبا سیزین تشکیلاتدا ایستانداردلار هامی عوضولر اوچون ایستاندارد دیرمی یوخسا بعضی عوضولره اوستونلوک وئریلیر؟
- عاییله و اقربا عوضولرینین بیر تشکیلاتدا اولماسینی، رانت سیستیمینه باغلیرسینیز یا یوخ؟
- عجبا سیزین تشکیلات عاییله، اقربا و فامیللردن قورقولانیب می؟
- کانادا سیستیمینده، اگر سیزین باقّاللیق دوکانیز وارسا، لاتاریدا ساتیرسینز، الینیزده رانت ایمکانی وار. بونون اوچون سیزین اوزونوز و عاییله نیز و یاخین اقربانیز، سیزدن لاتاری آلامازلار. نییه؟ چون رانت حساب اولور. سیز بو سیستیمه گورا، رانتی و اوزللیک له ده سیاسی و ایداری رانتی نئجه دوشونورسونوز؟
- توپلومدا، گونئی آزربایجان تشکیلاتلارینا «عاییله تشکیلاتی» دییه بیر سوز یایقین دیر و حتتا سیاسی تشکیلات لیدرلرینین بعضی سی ده بو حاقدا سوز آپارمیشلیقلاری وار، سیز، سیاسی، ایداری و ایقتیصادی عاییله تشکیلاتینا نئجه باخیرسینیز؟
- عجبا بیر تشکیلاتدا عاییله عوضولری اولورسا، رانت اساسلی تشکیلاتا چئوریلر می؟
- عجبا بیر تشکیلاتدا عاییله عوضولری اولورسا، ایستانداردلار قورونابیلر می؟
- عجبا بیر تشکیلاتدا عاییله عوضولری اولورسا، یوکسلمک ایمکانی اونلارلا دیگر اویه لره آراسیندا برابر شانس اولابیلرمی؟
- سیزین تشکیلاتدا اویه لر آراسیندا، گوون سیستیمی نئجه یارانیب و قورونور؟
یاسالانما
- سیزین تشکیلات هانکی قانونا دایاناراق یارانیب؟
- سیزین تشکیلات هانکی ائولکه قانونو اساسیندا قورولوب؟
- سیزین تشکیلات هانکی ائولکه قانونلاری اساسیندا چالیشیر؟
- سیزین تشکیلاتین سیاست لری، هانکی ائولکه و هانکی قانونلارین اساسیندا دئییشه بیلیرمی؟
- طبیعی کی اساسنامه نیز حاقدا موباحیثه لر گئده جاق. اونون اوچون، دوشونجه باغی اوتاقئنا بیر نوسخه لازیم دیر.
مرامنامه، دوشونجه، فلسفه
- سیزین تشکیلاتین یازیلی مرامنامه سی وارمی؟
- یول خریطه نیز وارمی دیر؟
- سیزین تشکیلاتین مرامنامه سی میللتیمیزین اوخوماسینا آچیق می دیر؟
- دوشونجه اولاراق، هانکی دوشونجه و فلسفه نی و ایدئولوژینی منیمسه میسینیز؟
- سیزین تشکیلاتین فلسفه سی نه دیر؟
- مرامنامه نیزین ان اونملی اون قونوسون بویورارمیسینیز؟ سیزین تشکیلاتین یول خریطه سینده کی آماجلاری نه لر دیر؟
وطن
- سیزین تشکیلات، وطنی نئجه تانیملیر؟
- وطنین آنلامی و اونمی سیزین تشکیلات و اویه لر ائوچون نه دیر؟
- سیزین تشکیلات وطن سرحدلرین نئجه تعیین ادیر؟
- سیزین تشکیلات وطنی قورومانی نئجه دوشونور؟
- وطن اوچون ساواشا گیررمیسینیز؟
میللت - قوم
- سیزین تشکیلاتین تعریفی میللت دن، هانکی ائوزللیک لری ایچینه آلیر؟
- سیزین تشکیلاتدا کیم لره «میللت» دئییلیر؟
- سیزین تشکیلاتین دوشونجه سی «قوم» سوزوندن، نه دیر؟
- سیزین تشکیلاتین سیاسی و ایدئولوژیک دوشونجه لرینده «قوم» سوزو کیملره دئییلیر؟
- سیزین تشکیلاتدا، میللت لر ایله قوملاری، هانکی معیارلار و ائولچولره اساسن بیربیریندن آیئرت ادیلیر؟
- سیز آزربایجانلیلاری، قشقایی لری، تورکمن لری، عربلری، بلوچ لاری و ... قوم حساب ادیرسینیز یوخسا میللت؟
- سیز فارسلاری میللت گورورسونوز یوخسا قوم، یوخسا فارسلارین و فارسلیقین باشقا بیر آنلامی وار سیزین ایچین؟
- فارسلارین وطنی وارمی دیر؟
- سیزجه، آزربایجانلیلار، قشقایی لر و تورکمن لر، تورک دورلر یوخسا باشقا کیملیکلری واردیر؟
میللی منافع
- میللی قاورامی نه دئمک دیر؟
- میللی منافع و چیخارلاری نئجه تعریف ادیرسینیز؟
- میللی چیخارلار یا میللی منافع نه لر دیر؟
- میللی چیخارلاردان واز گئچرمی سینیز؟
- میللی چیخارلاردان هانکی دورملاردا و هانکی شرطلرده واز گئچرسینیز؟
- نه لر میللی منافع دئییل؟
- عجبا میللی منافع اولمایان قونولاردان واز گئچمه یه حاضیرسینیز می؟
- سیزین تشکیلات، میللی منافعی هانکی سیاستلر ایله و نئجه تامین اتمه نی دوشونور؟
- میللی چیخارلار یولوندا ساواشا گیررمیسینیز؟
- میللی منفعدن بیر نئچه میثال ووروب، سیاستلرینیزی اونلارین حاقین دا آچیقلارمیسینیز؟
ایستیقلال
- ایستیقلالی نئجه دوشونورسونوز؟
- ایستیقلالدان تعریفینیز نه دیر؟
- ایستیقلالی، هانکی ساحه لرده گورور، دوشونورسونوز؟
- موطلق ایستیقلالا اینانیرمیسینیز؟
- سیزین تشکیلاتین یول خریطه سی، گونئی آزربایجانین ایستیقلالینا یورومه نی نئجه ترسیم ادیب؟
- ایستیقلال ائوچون ساواشا گیررمی سینیز؟
- سیزین اوچون ایستیقلال اونملی دیر یوخسا ریفاه؟
- ایستیقلالی الده اتمک ائوچون ان اونملی و لازیم ایشلر نه لر دیر؟
- نه دن و هانکی سببله ره گورا، تورکلرین یا آزربایجانلیلارین ایستیلقالی یوخ دور؟
- ایستیقلالا، آلتیرناتیو تانیرمی سینیز؟
- ایستیقلال مومکون اولمازسا، فئدرالیزمه نئجه یاناشیرسینیز؟
- چوخ آز بیر احتیمال اوزره، فئدرال ایرانی قبول اده رمیسینیز؟
- سیزین تشکیلات ایرانداکی توم تورکلرین ایستیقلالین دوشونور مو؟
- یوخسا تکجه گونئی آزربایجانین ایستیقلالین آماج سئچمیش می؟
- ایستیقلال ال وئریشلی می دیر؟
- هانکی دوشونجه لر و گوجلر، ایراندا محکوملوقلا یاشایان میللت لرین ایستیقلالی ایله موخالیف لر؟
- هانکی دوشونجه لر، هانکی سببلردن، میللت لرین ایستیقلالی ایله موخالایف لر؟
- اگر بیر میللت یا میللت لر، ایستیقلال ایستیرلرسه و ایستیقلال ائوچون ایراده ادرلرسه، کیملر و نه دن او میللت لرین ایستیقلالی ایله موخالیف اولابیلرلر؟
- ایستیقلال ایراده سی، ایستیقلالی الده اتمک بیر اولوسلار آراسی، اخلاقی، سیاسی حاق می دیر؟
- ایستیقلالا ایراده دادن میللت اوچون، موخالیفتلرین اونمی نه دیر؟
ایران
- ایران قاورامی سیزین دوشونجه نیزده هانکی تعریف ایله تانیملانیر؟
- ایران قاورامین سیاسی گوروسونوز، یوخسا گولتورل می، توپراقسل می، دیل سل می، دین سل می؟
- ایران آدلی وارلیقی رسیمیته تانیرمی سینیز؟
- ایرانلی سوزوندن سیزین آنلامینیز نه لر دیر؟
- تورکلر، آزربایجان، آزربایجانلیلار، ایران و ایرانلیلار قاوراملارین، سیاستده، نئجه یان یانا گتیریرسینیز؟
- ایرانی، میللت لر ائولکه لر وارلیقی بیلیرسینیز یوخسا بیر بوتون ائولکه تانیرسینیز؟
- سیزین تشکیلات، ایران آدلی وارلیقین گله جه یین نئجه گورمک ایستیر؟
- سیزین تشکیلات، ایران آدلانان سیاسی وارلیقدا فئدرالیزمه نئجه یاناشیر؟
- سیزین تشکیلات، بو گونکو ایراندا بیر کونفدرالیزم سیستیمین قورولماسینا نئجه یاناشیر؟
- دونیا گوجلری و قونشو ائولکه لر، ایران آدلانان یئرده، تورکلرین ایستیقلالینا نئجه یاخینلاشابیلرلر؟
- ایرانین جوغرافییاسینا باخاندا، نه لر گورورسونوز؟
- ایرانین جوغرافییاسینا نئجه باخیرسیز؟ ایران دوولتین نئجه گوروسونوز؟
- فارس دیللی اینسانلارا نئجه باخیرسینیز؟
- اونلاری نئجه بولور و بُلورسونوز؟
- فارس دیلین نئجه تانیملیرسینیز؟
- فارس دیلی، تورکلرین یا آزربایجانلیلارین گله جه یینده یئری اولارمی؟
- ایران و فارسلارین سیاسی گله جه یین، نئجه گورورسونوز؟
- ایران - فارسلارین جوغرافی گله جه یین نئجه گورورسونوز؟
- ایران-فارسلارین ائکونومیسل گه له جه یینه نئجه باخیرسینیز؟
فئدرالیزم
- فئدرالیزمی نئجه تعریف ادیرسینیز؟
- ایراندا فئدرالیزم اولابیلرمی؟
- هانکی فئدرالیزمدن سوز گئدیر؟
- سیزین ایسته دیگینیز فئدرالیزیمین موشخّصه لری نه لر دیر؟
- فئدرالیزم ایراندا ال وئریشلی می دیر؟
- ایراندا اوزلرین اوستون گورن و قودرتی الده توتان فارسلار و فارسچیلیق فئدرالیزمه نئجه یاناشیر؟
- فارسلیقین جور به جور قانادلارینین دوشونجه لری فئدرالیزمدن نه دیر؟
- مشروطه ایصلاحاتیندان و ریفورملاریندان دن بوگونه دک، فارسلار توم یازیلی و سوزلو موقاویله لری آیاقلاری آلتینا آلمیشلار. عجبا فارسلارا گوونمک اولابیلرمی؟
- فئدرال سیستیمده، آزربایجانین سرحدلری نئجه تعیین اولار؟
- فئدرال سیستیم ده، آز نوفوسلو توپلوملار یا توپلولوقلارین آلین یازیلارین کیم و نئجه یازاجاقلار؟
- فئدرال ایراندا، توکلرین و آزربایجانلیلارین تورک دونیاسی ایله ایلگیلری نئجه تعریف اولار؟
- فئدرال سیستیمده، فارسلاردان هانکی حوقوقی، ایجرایی تضمینلر الماق اولار کی زورلاری چاتان زمان، فئدرال سیستیمین داغیتماسینلار؟
- عجبا فئدرال سیستیمده میللت لرین حاقی اولاجاق، قونشولاری اونلارین توپراقلارین ایشغال اتمه سین دییه، سیلاحلی اوردولاری و گوجلری اولسون؟
- عجبا فئدرال سیستیم ده، فئدراللاشما داوطلبانه و میللی گونوللوک اوستونده دیر یوخسا زورلار دیر؟
- عجبا فئدرال سیستیمده، میللت لرین و مملکتلرین آیریلماق و موستقیل اولماق حاقلاری دا اولاجاق می؟
- ایرانی فئدرال اتمکدن آماجلار نه لر دیر؟
- فئدرال سیستیم ده، ایرانی بوتون ساخلامانین هانکی فایدالاری وار؟
- فئدرال سیستیم ده، ایرانی بوتون ساخلامانین هانکی ضررلری وار؟
- هانکی سببلر و چیخارلارا گورا، ایرانی فئدرال سیستیم ایله قوروماق و ساخلاماق ایستیرسینیز؟
- فئدرال ایران قوراندا و ایرانی قورویاندا، آماجلار، میللت لرین ایراده لرین یوروتمک، ایستک لرین ایشله مک، میللی یاشاملارینا یول وئرمک، اوزلرینه لاییق گوردوک لری و تعریف اتدیکلری حاقلاری یاشاماق می دیر؟
- فئدرال سیستیمین ایراندا قورولماسینا، یئر و ماجال، ایستیقلال ایله موقاییسه، ده نه قدر گوروسونوز؟
- هانکی گوجلر فئدرالیزم ایله موخالیف لر؟
- فئدرالیزم، بیر سیاسی، اولوسلار آراسی و حوقوقی بیر میللی حاق می دیر یوخسا بیر ایداره سیتیمینین سئچیمی و داوطلبانه دیر؟
- فئدرالیزمه یئر اولمازسا، یوخسا فئدرالیزم مومکون اولمازسا، ایستیقلالا نئجه یاناشیرسینیز؟
- ایستیقلالچیلارا نئجه یاناشیسینیز؟
وطن
- وطن نه دیر و هارادیر؟
- ایران و فارسلار، وطن آنلامین، سرحدلرین، قارماقاریشیق اتمندن هدفلری نه دیر؟
- وطنی کیم تعریف ادیر؟
- سیزین تعریفینیز وطن دن نه دیر؟
- سیزین وطندن اولان تعریفینیز هانکی اساسلارا دایانیر؟
- وطنین سرحدلری، هانکی دوره اساسن تعیین اولور؟
- وطنی، وطنسیزلشدیرمک سیاستی حاقدا نه دوشونورسونوز؟
- وطنی گئچن یوز ایلده، دفعه لر جه بولوب، وطنین آدین اوستوندن گوتورموشلر. وطن دویغوسون، وطه نین اوستوندن گوتورمه یه چالئشیبلار، سیزین تشکیلات بو قونویا نئجه باخیر؟
- پهلوی لر و موللالار سیاسیتی سونوجوندا، وطنین بیر پارچالارین قونشولارا وئریب و بیر نئچه نسیلدن سونرا، او پارچالارا وطن دویغوسو آزالیب، یادا وطن اولماقدان چیخیلیب، بونلارین حاقّیندا نه لر دوشونورسونوز؟
- وطن اوچون، وطنی گئری آلماق اوچون، ساواشا گیررمی سینیز؟
وطنداشلیق
- سیزین تشکیلاتین آنلامی «وطنداش» دان نه دیر؟
- وطنداشی و وطنداشلیقی علمی، سیاسی و حوقوقی اولاراق نئجه تعریف ادیرسینیز؟
- وطنداش اولمانین اوزللیکلری و شرایئط لری نه لر دیرلر؟
- کیملر وطنداش حساب اولور؟ کیملری وطنداش تانیمیرسینیز؟
- وطنداشلیق حاکیمیت طرفیندن وئریلن و رسمیله شن بیر گئچیجی سیاسی-حوقوقی دوروم دور یوخسا ازلی و ابدی بیر حاق می دیر؟
- دوولت وطنداشلیقی وطنداشلاردان آلابیلرمی؟
- وطنداش، وطنداشلیق حاققین آتابیلرمی؟
- یوخسا وطنداشلیق او حاقلاردان دیر کی هئش بیر شرایئطده سلب اولوناماز؟
- چیفته وطن و وطنداشلیقا نئجه باخیرسینیز؟
- وطنداش قاورامی کیملری ایچینه آلیر؟
- وطنداشین هانکی حاقلاری وار؟
- وطنداش و وطنداشلیق حاقلاری بیرئیسل یا فردی می دیر یوخسا وطنداشلیق توپلومسال و میللی می دیر؟
- اگر بیر گون، بیزله قونشو میللتلردن و توپلوملاردان بیر ایله ساواش چیخدی، اوندا او توپلومدان اولان وطنداشلاریمیزین وطنداشلیقینا نئجه باخیرسینیز؟
حاق
- حاق قاورامیندان دوشونجه نیز نه لردیر؟
- حاقین منشایی و کوکو نه دیر؟ یعنی، نه لر حاقی یارادیر؟
- حاق قاورامین کیم تعریف ادیر؟
- بیلیریک کی حاقدا و حاقلی اولمادا بیرئیلر و توپلوملار آراسیندا درین ایختیلافلار وار، بو ائوزدن، حاقلی اولماق نه یه باغلی دیر؟
- حاقین دایاناجاقی نه لر دیر؟
- نه لر حاقی، حاقلاری پوزا بیلیر؟
- نه لر حاقلینی، حاقسیز ادر؟
- حاق قاورامی پوزولان بیر قاورام می دیر؟
- کیم (کیملر) حاق و حاقلی دیر؟
- کیم (کیملر) حاق دئییل و حاقسیزدیر؟
- موطلق حاق وار می دیر؟
- اوزونوزو و تشکیلاتینیزی حاق و حاقلی بیلیرسینیز؟
- موخالیفلرینیزی حاقلی بیلیرسینیز می؟
- عجبا موخالیف لرینیزی نه قدر حاقسیز بیلیرسینیز؟
- حاقی و حاقلینی ائولچمک ائوچون ائولچونوز نه دیر؟
- سیزین تشکیلاتین دوشونجه لرینده ان اونملی «میللی حاقلار» هانکی حاقلار دیر؟
- سیزین تشکیلاتین دوشونجه لرینده ان اونملی «بیرئیسل حاقلار» نه لردن عیبارت دیر؟
- هانکی حاقلاری پوزولمایان بیرئیسل و میللی حاقلار بیلیرسینیز؟
- حاق و حاقلی، تعطیل گوتوررمی؟
- حاق و حاقلی یا ائوزون حاقلی بیلن بیرئی و توپلوم، حاقی یا حاقلاری ائوچون سیلاحلی ساواش حاقی وارمی دیر؟
عدالت
- سیزجه عدالت نه دیر؟
- عدالت موطلق بیر قاورام دیرمی؟
- عدالتین ترازیسی نه دیر؟
- عدالتی کیم تعریف ادر؟
- عدالتین ائولچولری نه لردیر؟
- عدالتی نئجه ساغلاماق اولار؟
اخلاق
- سیزین تشکیلاتین آنلایئشی اخلاق دان نه دیر؟
- اخلاق قاورامیندان نه لری آنلیرسینیز؟
- سیزین تشکیلات، اخلاقا و اخلاقلیقا اینانیر می؟
- نه لر اخلاق دیر؟
- نه لر اخلاق دئییل؟
- اخلاقلی بیرئی، اخلاقی توپلوم، نه دئمک دیر؟
- موطلق اخلاق وار می دیر؟
- اخلاقلی اولمانی، اخلاقلی یاشامانی، نه یا نه لر پوزار؟
- اخلاق قاورامی، اونملی، قاورام می دیر؟
- اخلاقین توپلومسال دوروملارلا، سیاستله، ائکونومیله، آزادلیقلا، باسقیله، ظولومله، و ...نه ایلگیسی وار؟
حاکیمیّت - دئموکراسی
- سیزین تشکیلاتین باخیشینا اساسن حاکیمیت نه دئمک دیر؟
- سیزین تشکیلاتین باخیشینا گورا حاکیمیت اونملی دیر یا دئمورکراسی و آزادلیق؟
- دئمورکراسی نه دئمک دیر؟
- دئمورکراسی اوچون هانکی شرایئط لازیم دیر؟
- هانکی شرایئط ده دئموکراسینی تعطیل اتمک لازیم گلیر؟
- دونیادا بیر چوخ دئموکراسی اورنکلری وار. سیز نئجه بیر دئموکراسینین طرفداریسینیز؟
- سیزین دوشونجه ده کی دئموکراسیده، ان اونملی وارلیق و ایراده، میللتین ایراده سی دیر یوخسا دوولتین، مجلیسین و قانونون ایراده سی دیر؟
- دئموکراسینین ضامینی کیم دیر یا نه دیر؟
- دئموکراسینین نئجه اولچمک اولار کی دئموکراسی اولسون و دئموکراسی آزاولماسین؟
- سیزین دئموکراسی ده فردین ایراده سی، جمعین ایراده سی، دوولتین ایراده سی، مجلیسین ایراده سی و قانونون ایراده سی آراسیندا هانکیسینا اونم وئریلیر؟ هانکیسی او بیریله رینه اوستون توتولور؟
- دئموکراسی یه قارشی موباریزه ایله نئجه سینیز؟
آزادلیق
آزادلیق نه دیر؟
نه لر آزادلیق حساب اولور، نه لر آزادلیق دئییل؟
آزادلیقی قانونلا، پولیس له، مافیا ایله ازمک ایسته یه بیلرلر، آزادلیقین ضمانتی نه اولمالی دیر؟
آزادلیق کیمین ایرادهسینه و ایسته یینه باغلی اولمالی دیر؟
آزادلیقین سئنیرلارین کیم تعیین ادیر؟
آزادلیقین سرحددی می وار یا سربست بیر آزادلیق دوشونورسونوز؟
اکونومی ده ده آزارلیقی دوشونورسونوز مو؟
اکونومی ده آزادلیق هاراجان اوزانابیلیر؟
آزادلیقا قارشی فعالیتلر ایله نئجه داورانمانی دوشونورسونوز؟
فیکیر آزادلیقی هاراجان سئنیرلی دیر؟
اگر بیرئی لر و قوروملار یا ان.جی.او لار فیکیر و دوشونجه لرین یایماق ایمکانینا صاحیب اولمازسالار، آزادلیقین هانکی آنلامی قالار؟
آزادلیقدان فایدالانماق ائوچون، نه جور ایمکانلار یارانمالی دیر، بو ایمکانلاری کیم یا هانکی قووه یاراتمالی دیر؟
عجبا هر جور دوشونجه نین یارانماسی و یایئلماسی آزادلیقین ایچینده یئر آلارمی؟ (تئرور، شوریش، عوصیان، و ...)
آزادلیقین بیر باشی توهینه، بیر باشی ایسه ایفشاگرلیقا گئدیر. آزادلیقی نئجه اورتادا ساخلاماق اولار کی ایستیبداد و دیکتاتورلوقا گئچمه سین؟
دوغرودان و حقیقی آزادلیق وار؟ او حالدا کی بیرئیلرین و اینسانلارین حاقین آلیب، دوولته ویریرلر؟
دوولت
سیزین تشکیلاتا گورا دولت نه دیر؟
دوولتین ایشی هاردان باشلار، هاراجان گئدر؟
حاکمیت انحیصارچی و تک الچی دیر. حاکمیتین تک الچی یاله نئجه موقابیله اتمک اولار؟
نورمالدا، حاکمیتین قوروملاری، احتیاج دویدوقلاری قانونلاری یازیب، حاضیرلیرلار و مجلیس اونلاری بیر آز اویوز بویوز تصویب ادیر. یعنی مجلیس حاکمیتین الینین آچار و گیلیدی دیر می؟
حاکمیتی کیم یا کیم لر قورار؟
دوولتی کیملر کونترول اده بیلیر؟
حاکمیتین کونترولو میللی گوونه و میللی چئخارلارا ضرروئره بیلیرمی؟
دوولتین خدمه لرین، هانکی سویّه یه دک میللت سئچمه لی دیر؟
عجبا میللت، حاکمیتین مودورلرین ده سئچمه لی دیر می؟ یوخسا اونلاری پارلیمان سئچمه لی، یوخسا پارلیمان عوضولریندن حاکمیتین خده مه سی سئچیلمه لی دیر؟
دولت ایله حاکیمیتین فرقی نه لر دیر؟
دوولتی نه زامان قورماق اولار؟
عجبا وطن ایشغالدا اولورسا، یا حاکمیت میللتین ایراده سینه، حوقوقونا، ایسته یینه و ... یوخ دئییرسه، میللتین میللی دوولت حاکمیت قورما حاقی می وار؟
حاکمیت، مجلیس و عدلییه نی بیر گوروسونوز یوخسا آیری آیری گورمه لی دیر؟
سیزجه، نه دن سورگونده اولان اینسانلار و تشکیلاتلار، سورگونده میللی و گئچیجی دوولت قورماقدان عاجیزلر؟
عجبا ایران آدلی دوولتین گیزلی و پوللو آداملاری، میللتین بو ایراده سینه مانع دئییل لرمی؟
عجبا، سورگونده یاشایان میللتلر آراسیندا دوشونجه، آنلایئش و ایراده قئط لیقی حاکیم دیر و هله ده بو اینسانلار و میللت لر صغیر دیرلرمی؟
آنایاسا - حوقوق
سیزین تشکیلاتین باخیشیندا آنا یاسا نه دئمک دیر؟
سیزین تشکیلاتین بیر آنا یاسا تکلیفی وارمی؟
دونیا دا هانکی ائولکه نین آنا یاساسی ایله تانیش سینیز؟
هانکی آنا یاسانی یا هانکی آنایاسالاری، میللتینیزه تکلیف اولاراق اورتایا قویماق ایستیرسینیز؟
عجبا آنا یاسا قونوسون، تم تله سیک زامانلارا و ایستیقلالدان سونرایا حوالت ادیرسینیز می؟
اورتادا، اوزونوزون بیر آنا یاسا تکلیفینیز اولمادان بئله، سیزین تشکیلات، ائوزون، هانکی قانونلارا دایاناراق قانونسال بیلیر؟
سیزین تشکیلات و البتّه، توم تشکیلاتلار، بو قانونسوزلوقدا و آنایاسا بوشلوقوندا، هانکی قانونا دایاناراق ایشلرین آپاریر؟
سیزین تشکیلات، هانکی حوقوق و قانونلارا اساسن موخالیف لر و دوشمن لره قارشی حوکوم وئریر و محکوم ادیر؟
فردی، جیزبی دویغولارا اساسن موباریزه فورمو سئچیلیر و گئدیرمی؟
سورگونده دوولت
اگر سیزین تشکیلات ایستیقلال یا فئدرال، میللی حاکیمیت و دوولت قورماق آماجلی چالیشیرسا، نئجه، گئچیجی اولسادا بئله، بیر آنایاسا اوزورینده چالیشمامیش و بنزر تشکیلاتلاری بو حاقدا بیر امکداشلیقا دعوت اتمه میش؟
عجبا هر بیر سیاسی تشکیلاتین ان باش آماجی قانونسال چالیشماق و دوولتلری قانونا باغلاماق دئییل می؟ بس نه دن اوزلری قانونسوز چالئشیرلار؟
عجبا، تشکیلاتلارین قانونلاری، پارتینین لیدئرلرینین ایراده سی می دیر؟
عجبا، قانونسوزلوق، دیکتاتورلوق آنلامینا گلمیر می؟
سیزین تشکیلاتین گوروشلرینده، تبعید یا سورگونده بیر دوولت، مجلیس وعدلیه قورولماسینا نئجه باخیلیر؟
ایران آدلی سیاسی وارلیقدا یاشایان تورکلرین سیاسی لرینین بیر دوولت قورما آماجی اولمامیش می دیر؟
ایران آدلی سیاسی وارلیقدا یاشایان تورک میللتی تشکیلاتلارینا، دوولت قورماق اوچون بیربیرینه یاخینلاشماقدان داها اونملی باشقا بیر شئی اولابیلیر می؟
اگر تورک بیرئی لر و تشکیلاتلاری، دوولت قورماقدان قورخورلارسا، کیمی یا هانکی گوجلولری بکلیرلر تا اونلار ائوچون بیر دولت قورسون؟
اگر سیاسی، مدنی و ...فعال بیرئی لر و تشکیلاتلار، بو گون دوولت قورماق اوچون بیر اورتاق دوشونجه یه گله بیلمیرلرسه، گله جکده، بونلارلا دوولت قورماق ایمکانلاری نه قدر اولابیلیر؟
بوقدر داغینیق تشکیلاتلارین و بیرئی لرین، بیر دوولتی داغئتماق ایمکانلاری نه قدر اولابیلیر؟
بوقدر داغینیق تشکیلاتلارین و بیرئی لرین، بیر دوولت برپااتمک یا تاسیس اتمک ایمکانلاری نه قدر اولابیلیر؟
ایران-فارس سیستیمی، سیزین وطنداش آدلاندیردیقینیز اینسانلاری توتور، ایشکنجه ادیر، ایتیهاملارا معروض قویور، موحاکیمه و موجازات ادیر، حتتا اولدورور. سیز، بیر سیاسی تشکیلات اولاراق، بنزر سیستیم قورمایا یونلمه میسینیز تا دوشمن آدلاندیردیقینیز قوروملارا و باشچیلارین دوولت و حاکیمییت سیستیمینه یاراشان یول یونتم ایله جاواب وئره سینیز، دوشمنین باشچیلارین موحاکیمه ادیب، حوکم وئره سینیز و اونلارلا بیر سیاسی -حوقوقی ایراده و وارلیق کیمی قارشیلیق اده سینیز؟
بو شرطلرده، نئجه موباریزه ادیرسینیز؟ موباریزه نین نه قدر آنلامی قالیر؟
بو موباریزه فورمو سیزلری راضی سالیر می؟
گله جک سیاسی سیستیم
موستقیل (فئدرال) مملکتینیزین گله جک ایداره سیستیمین نئجه گورورسونوز؟ مرکزی یونتیم؟ فئدرال یونتیم؟ نئچه مرحه له لی یونتیم؟ کونفئدرال یونتیم؟ خودحوختار یونتیم؟
آزربایجانین رسمی - سیاسال آدی اوچون، هانکی آدی تکلیف ادیرسینیز؟
ایندی بیر چوخ بایراق وار. سیز، بایراق حاقدا هانکی دوشوشنجه نی داشیرسینیز؟
عجبا موستقیل آمما فئدرال آزربایجاندا، هر فئدرالین ائوزونه اوزل بایراقی، پارلیمانی، دوولتی اولاجاق می؟
نوماینده لیک و مجلیس
سیزین تشکیلاتین سیاسی - حوقوقی دوشونجه سینده، میللتین مجلیس یا مجلیس لری اولمالی می دیر؟
نه دن ایندی و سورگونده، بیر مجلیس یاراتمایا چالیشمیرسینیز؟
مجلیس، ایستیقلال ساواشیندان سونرا یا ایستیقلال ساواشیندا ایکن،قورولمالی می دیر؟
مجلیسین (مجلیس لرین) قورولما سیستیمین نئجه پئلانلیرسینیز؟
مجلیس نوماینده لرینین اوزللیک لری نه اولمالی یدر؟
مجلیس نوماینده لرینین صلاحییت مسئله سی نئجه گورونمه لی دیر؟
نوماینده لرین آزادلیقلاری هاراجان دیر؟
هانکی شرایئط ده، نئوماینده لرین هانکی آزادلیقلاری، قئسئتلانار یادا قئسئتلانمالی دیر؟
وطن قاورامین، کندلردن (ان آشاغادان) اوسته گوروسونوز یوخسا اوستن آشاغایا یا بیر بوتون وارلیق گوروسونوز؟
شهربازلیق، یئربازلیق مسئله سینه نئجه باخیرسینیز؟
وطن قاورامی ایله شهرچیلیک (یئرچیلیک) ایسته ک و قاورامین، نئجه بیرلشدیرمک ایستیرسینیز؟
نوماینده لر، سئچیلمیش محلله نین، شهرین نوماینده سی دیرلر، یوخسا توم موستقیل توپراقلارین نوماینده سی؟
مجلیسه و دوولته کاندید اولانلارین هانکی شراییطی اولمالی دیر؟
قادین
قادینلارین دورومو نئجه اولمالی دیر؟
قادین ضیدلی فارس شیعه لیگینین قانونلاری، تاریخ بویو قاللاخلانیب بو دینلشمیش قانونلارلا نه ایده جکسینیز؟
قادینلارین ایش و گلیر حاقلارینا نئجه باخیرسینیز؟
قادینلارا یوزلر بلکه مین لر ایل ظولوم اولموش. بو ظولوملری جوبران اتمک ائوچون هانکی موثبت اوستونلوکلری قادینلارا وئرمه نی دوشونورسونوز؟
سیزجه کبین، مهریه، باشلیق و ... کیمی ائولنمک شرطلرینین آنلامی نه دیرلر؟
قیزلارین عاشیق اولوبان، ائلچی گئدیب، ائولنمه لرینه نئجه باخیرسینیز؟
کبین بیر یوندن، جئهیز آیری یوندن، قیزلارین، اوغلانلارین، بیربیرلرین سئویب، ائولنمه لرینین اونونده بویوک سد یاراتمیشلار. قئزلارین و قادینلارین عاشق اولماق و عشقلرین یاشاماق حاقلاری یوخ دور. بو تاریخسل گلنکلره نئجه باخیرسینیز و اونلاری نئجه چوزمه نین یوللارین دوشونورسونوز؟
قادینلارین و قئزلارین بیر چوخونون، ارککلر قدر مالی ایمکانلاری یوخ دور کی ایش قورسونلار و ایشلرین ایرلی آپارسینلار. اونلارا هانکی مالی یاردیم حاقلارین دوشونورسونوز؟
ارکک لرین قادینلارا گورا، ایش و گلیر حاقلاری داها چوخ دور. سیزین تشکیلات، بو حاقدا هانکی سیاستلری اونده تومانی دوشونورسونوز؟
قادینلارین گلیرلری، ارککلره باخاندا چوخ آز دیر. بو قونونو نئجه دوزلتمک ایستیرسینیز؟
اوشاقلیق
حایئف کی اوشاقلار ان آز یاشلاردان، یا ایشلیرلر یادا یئکلیب ائوله نینجه یه دک درس اوخورلار. یعنی، اوشاقلار، اوشاقلیق اتمیرلر. اوشاقلیقی یاشامیرلار. اگردرس اوخومانی و ائوده مشق اتمه نی ایش تعریف ادرسک، اوشاقلار، ایکی شیفته یاخین ایش ایشلیرلر. سیز بو قونویه نئجه باخیرسینیز؟
درس اوخوماقی، ایش تعریف ادیرسینیز، یوخسا تفریح و اویناماق؟
اوشاقلارین دورومو توم ساحه لرده اینسانین ایچین و روحون آجیدیر. اوشاقلارین راحاتلیقی اوچون هانکی برنامه لریز وار؟
اوشاقلار، ائوزلریندن دیفاع اده بیلمیرلر. حایئف اولسون کی آتالار و آنالار بئله اوشاقلارا ظولوم ادیرلر. اوشاقلاری ظالیم آتا آنالارین ظولمونده قورامانی نئجه دوشونورسونوز؟
اوشاقلارین تعلیم سیستیمی و مدرسه لرده عومور تلف اتمنی نئجه چوزمه یه یاناشیرسینیز؟
اوشاقلار مدرسه لر ده و دانیشگاهلاردا، هر شئیی ازبر اتمه یه محکوملار کی سونرالاردا، اویرندیکلرین اونودورلار. او بیلگیلر، یاشاملارینین دردینه دئیمیرلر. عاینی حالدا، اوشاقلارین ایختیراع، ایکتیشاف و یارادیجی بئیین گوجلری و پوتانسیللرین محو ادیرلر. اوشاقلارین یارادیجی اولمالاری و دوشونجه لرینین گلیشمه سی ائوچون نه لری دوشونورسونوز؟
مکتبرلرده، اوشاقلارین، اوشاق یاشاما حاقی اوغرولانیرمی؟ اوشاقلاری، درسله، مشق له قوجالدیب، بیردن ایشه و ائولیلی گه سوخموروق مو؟
اوشاقلار، یئتیشمیش اینسانلارین قانونلاری ایله چالیشیر، موحاکیمه و مجازات اولورلارسا، نه ایش لری دوشونورسونوز؟
بیر چوخ اوشاق، آنا، اتاسینین ائو خرجینه یاردیم اتسین دییه چالیشماق زوروندا دیر. اوشاقلارین ایش قونوسونا نئجه یاناشیرسینیز؟
اوشاقلارلا ایلگی لی قانونلار و عورفلره نئجه یاناشاجاق سینیز؟
قورخونج توپلولوقلار
گئچن یوز ایلده کی سیاسال، ائکونومیسل، حوقوقسال، ائوزگه لشدیرمه (ایلیناسیون) گوچدورمه، و ... سیاستلرین سونوجوندا، توپلوملار و توپلولوقلار ایکی دوشمن حالینا گلمیش و چوخ پوللو- چوخ پولسوزا، فارسا- تورکه، توکه-گورده، عربه-فارسا، شیعه یه- سوننویه، کندلی یه-شهرلی یه، فارس دیللی یه- آنا دیللی یه، موللا-عومما، پاسدار- میللت، دوولت اوغرولاری - اوغرولانانلار، ظولوم ادنلر - ظولوم چکن لر، ... بولونموش. بو قونولار حاقدا نه لر دوشونورسونوز؟
سیزین تشکیلات بو قونولاری تهلوکه سایئر می؟
اگر بو قونولاری، تهلوکه گوروسه نیز، تهلوکه نین درین لیگی و گئنیشلیگین نئجه دوشونورسونوز؟
بو جور قونولار، توپلوملارین گوونلیگین تهلوکه یه سالابیلرمی؟
بونلارا بیر چاره لر دوشونموشسونوز مو؟
سرمایه
پولا و پوللولارا، نئجه باخیرسینیز؟
گئچن یوز ایلده، بیر چوخ رئژیملرین یانلیلاری، میلیاردلار روشوت آلیبلار، حاقلاری حاقسیز ادیبلر، اوغورلایبلار، ایختیلاس ادیبلر، و ... ایشله مه دن، چوخ بویوک ثروتلرین صاحیبی اولوبلار، اونلارلا نئجه بوکه جکسینیز؟
کاسسیبلیق و یوخسوللوق میللتی باسیب آلتینا و ان چتین شرطلره معروض قویموش. کاسیبلیقا و کاسیبلارا هانکی جاوابینیز وار؟
ایشسیزلیک باش آلیب، گئدیر. ایش یاراتمانی نئجه و هانکی یول یونتملر ایله دوشونورسونوز؟
ایش یاراتماق اوچون پول پارا لازیم یدر. لازیم اولان سرمایه نی نئجه تاپیب، گتیریب، ایش یاراداجاقسینیز؟
سیزین دوشونجه ده، پوللو ایله یوخسوللار آراسیندا هانکیسینین منفعتین داها چوخ دوشونورسونوز؟
وطندن خاریجده یاشایانلارین سرمایالاریندان فایدالانماق ائوچون هانکی تشویق ائدیجی سیاستلری دوشونورسونوز؟
بیگانه لرین ثروتلرین وطنه و میللته گتیریب، ایش یاراتماق اوچون هانکی سیاستلری اون گوروسونوز؟
اگر وئرگیلری یوخاری توتارسینیز، وطنین ائکونومیسینه لازیم اولان سرمایه گلمز. اگر وئیگیلری آشاغا توتارسینیز، پوللولار ایله پولسوزلار آراسیندا کی دره لر، داها درینله شیر. بو قونونون حللینه نه لر دوشونورسونوز؟
ریفاه
سیزجه، ریفاه نه دیر؟
ریفاه نئجه ائولچولور؟
ریفاهی یاراتماق ائوچون هانکی سیاستلری دوشونمک بازیم یدر؟
مییلی سرمایه نین یئری؟
خاریجی سرمایه نین گلمه سی و اونمی؟
ایشین اولماسی
گلیرین، یاشامی قولایلاتماسی اوچون کافی اولماسی گرکیر می؟
- یوخسوللوق
یوخسوللوق نه دیر؟
یوخسوللوق نئجه ائولچولور؟
یوخسوللوقون زیانلاریندان خبرینیز وارمی دیر؟
یوخسوللوق، روحا، جیسمه و عاغیلا هانکی ضررلری وئریر؟
یوخسوللوق، ائوزون توپلومدا نئجه گوسته ریر؟
پوللولار ایله یوخسوللار آراسیندا کی درین دره نی و تهلوکه نی نئجه دولدورماق و چوزمک ایستیرسینیز؟
یوخسوللار اینقیلابی و عوصیانئنین احتیمالینا نئجه یاخینلاشیرسینیز؟
ساغلیلیق
بهداشت، ساغلیق و خسته لری ساخلاماق چوخ آغیر اولوب، بو سیستیمی نئجه ساغلاشدیرماق ایستیرسینیز؟
داوا درمان سیستیمینین ایداره سی نئجه اولمالی یدر؟
هانکی دوولتین و میللتین ساغلیق سیستیمینین بنزه رین یاراتماقی دوشونورسونوز؟
ساغلیق، خوصوصی یا اوزل اولمالی یدر یوخسا دوولتین الینده اوئلمالی یدر؟
باشقا بیر یوندن باخاندا، هم ساغلیق ایشچیلری بیر نئچه ایل درس اوخورلار، همده مهندیس لر، همده اوبیری اوزمان ساحه لری آمما بو اتیش صئنیفلارین گلیرلرینین فرقی چوخ آشئری دیر. بو ایشلرین و گلیرلرین آراسیندا درین تبعیض وار. بو حاقدا نه دوشونورسونوز؟
ایش- گلیر
بیر عیدده اوزون ایللر درس اوخور و یوکسک سویه لی اوزمانلیق آلانیندا ایشه باشلیر. بیر عیدده ایسه یا درس اوخومور یادا آز اوخور و ایشه یاشلیرلار. نه دن اونلار کی داها اوزون سوره درس اوخوموشلار، داها چوخ پارا قازانماق حاقلاری وار؟
ایش لرین و ایشچی لرین ایشلرینین اراسیندا اونملی و اونمسیز دئمک اولابیلرمی؟
ایشین نه اولوب، اولماماسی، گلیرلرین داها آز و داها چوخ اولما تبعیضینه سبب اولابیلرمی؟
ایشلرین و اونلارین گلیرلرینین آراسیندا اولان درین فرقیلرین و تبعیضلرین اولماسینا سببلر نه لر اولابیلر؟
نه لر ایش حساب ادیر، نه لری ایش حساب اتمیرسینیز؟
گونده، هفته ده و آیدا نئچه ساحات ایشله مک و اونون گلیر ایله یوخسوللوق دان چیخمانی دوشونورسونوز؟
ایش و گلیرلر، اینسانلاری و توپلوملاری اوچ آیری چوخ وارلی، اورتا وارلی و آز وارلی اینسان و توپلوملارا بولور و تبعیضی یارادیر و ایداره ادیر. سیز، ایش و گلیر حاققیندا نئجه دوشونوزسونوز کی بو اوچ طبقه آدلانمیش وارلیقلارین آراسینداکی دره لر دولسون یا درینلیک لرآزالسین؟
دیل - میللت
ایراندا آدلانان سیاسی وارلیقدا یاشایان تورکلرین توپراقلاریندا، اینسانلار و دیللرینه نه دئمه نی دوشونورسونوز؟ آذری می؟ آذری دیل می؟ آزربایجان دیلی میللتی می؟ آزربایجان آذریسی می؟ آزربایجان تورک میللتی یا آزربایجان تورکجه سی می؟
تورکلرین یاشادیقی توپراقلاردا رسمی دیل، هانکی دیل یا هانکی لهجه اولاجاق؟
میللتین رسمی آدین، نه دوشونورسونوز؟
تورکچولوک
تورکلوک حاقدا نه دوشونورسونوز؟
تورکچولویو نئجه گورورسونوز؟
تورکچولوک و پان تورک قونولارینا نئجه باخیرسینیز؟
بیرلشمک
بعضی لر، آزربایجان جومهوریتینین بایراقین و دوولتین، گونئی آزربایجانین دوولتی و بایراقی کیمی دوشونورلر. سیز بو حاقدا نئجه دوشونورسونوز؟
نه دن، آزربایجان سیاسی بیرئی لری و پارتی لری آراسیندا، تورکییه جومهوریتینین دوولتینه و بایراقئنا دونوش و تورکییه ایله بیرلشمک آرزوسو آزدیر؟
عجبا سیز بیر آراشدیرما آپارمیسینیز کی بللی اولسون، ایراندا یاشایان تورک لر، آزربایجان جومهوریّتی ایله بیرلشمک ایستیرلریوخسا تورکییه جومهوریّتی ایله بیلشمک ایستیرلر؟ یوخسا هر ایکیسی ایله بیرلشمک ایستیرلر؟ یوخسا تورک دونیاسی ایله بیرلشمک ایستیرلر؟ یوخسا بیرلشمک ایسته میرلر؟ یوخسا ایران چرچیوه سینده قالماق ایستیرلر؟
قارایاخا میللت، دیل ساحه سینده تورکیه تورکجه سینه داها چوخ ماراقلی گورونورلر. نه دن بونو معیار توتاراق، سیاستده، تورکییه یه یاخینلاشماق زور گلیر؟ یا بو حاقدا آز دانیشیلیر؟
ایکی آزربایجانین بیرلشمه سینه نئجه باخیرسینیز؟
گونئی آزربایجانلا تورکییه نین بیرلشمه سینه نئجه یاناشیرسینیز؟
آزربایجان و تورکیه ایله عاینی زاماندا بیرلشمه نی دوشونورسونوز مو؟
تورک دونیاسی بیرلیگی دوشونجه سی حاقدا هانکی دوشونجه لری داشیسینیز؟
تورک دونیاسی بیرلیگی یولوندا هانکی آددیملاری آتمانی لازیم گوروسونوز؟
تورک دونیاسینین بیرلیگی قارشیسیندا هانکی گوجلر مانع و سد توره دیرلر؟
ایشغال - استعمار
آزربایجانی و ایران آدلی توپراقلاردا یاشایان میللت لرین توپراقلارین ایشغال اولموش توپراقلار می گوروسونوزمو؟
عجبا، تورکلرین تکجه توپراقلاری ایشغال اولوب، یوخسا ایشغالین باشقا یولری ده وار؟
آزربایجانین قایناقلاری غارت اولوب و اولور مو؟
تورکلرین سرمایه لری توپراقلاریندان قاچیریلیب و قاچیریلیرمی؟
ایشغال ایله سومورگه یا استعمار اراسیندا نئجه بیر آل وئر گوروسونوز؟
ایشغالدان قورتولمانین یوللاری نه لر دیرلر؟
گله جک - ایداره چیلیک
گله جک آزربایجان و تورکلرین وطن لرینده، ایداره سیستیمه لازیم کادرونون اسکیکلیین هاردان و نئجه تامین اتمه نی دوشونورسونوز؟
ایران بولونرکن، وطن، میللت و وطن ایستیقلال آلارکن، گئچیجی اولاراق اوردوسوز اولارکن، تورکلرین میللی گوونلیکلری و امنیت لری نئجه تامین اولاجاق؟
پاسدارلار، بسیجیلر، ایطیلاعاتچیلار، محکمه ایشچیلری، موللالار، حراست لر، گزینشلر، ایداره لرده چالیشانلار، و... تکلیفلری نئجه اولاجاق؟
گئچیجی چاغدا، امنیتی نئجه و هانکی گوج، اوردو، سیلاح و ... ایله تامین اده جک سینیز؟
مدرسه لرده و اونیوئرسیته لرده اویرتمن بوشولوقلارین کیملر ایله دولدومانی دوشونورسونوز؟
میللتیمیزین و وطنداشلاریمیزین یئمک، ایچمک، و مین لر احتیاجی وار کی بیزیم وطنده اورتیلمیر (تولید اولمور) اونلار اولمازسا، اولماز دیر. اونلارین تهمینی ائوچون نه لر دوشونمووسونوز؟
خاریجی ائولکه لر ایله آل وئر ائوچون، دووز یا ارز لازیم دیر. اوره تیم (تولید) اولمازسا، ارز اله گتیرمک چوخ چتبن گورونور. دووز ایله تامین اولان ماللارین آلماسی ائوچون هانکی سیاستی اورتایا قویاجاقسینیز؟
ایران بولونرکن، ایستیقلال ساواشی گئدرکن، نئفت، گاز و مازوت (گازول) گسله جک دیر. میللتین احتیاجین نئجه تامین اتمه نی دوشونورسونوز؟
ساواش گئدرکن، ائلیکتیریک مرکزلری ایشدن دوشورلرسه، توک ایش یئرلری و ائولر ایشدن دوشر. بو قونویا هانکی فیکیرینیز وار؟
دوشمن - دوست - رقیب
دوشمن کیم دیر؟
دوشمنی هانکی پرنسیپ لر اساسیندا و نئجه تعریف ادیرسینیز؟
دوشمن یا دوشمن لرین قارشیسیندا هانکی سیاستلری و ایستیراتئژیلری گوتوره جکسینیز؟
کیملرله دوشمنلیک اتمه نی دوشونورسونوز؟
دوست کیم دیر؟
دوستولوق هانکی اوصوللار اساسیندا و نئجه تعریف ادیرسینیز؟
الینیزده کی معیارلار و میلاکلارا باخاراق، هانکی میللت لر و دوولت لری دوست تانیرسینیز؟
رقیب لر کیم دیر؟
ریقابتی نئجه تانیملیرسینیز؟
رقیب لری نئجه تعریفلیرسینیز؟
ریقابت دونیاسینا، هانکی سیاست و ایستیراتئژیلر ایله گرمه یی دوشونورسونوز؟
ریقابت گوجونوزدن، دوغرو بیلگینیز وار می؟
سیاسی زیندانی لر
ایندیکی سیاسی - مدنی زیندانی لرین دورومو نه اولاجاق؟
سیاسی-مدنی و مللی فعاللارین تحمّول اتدیکلری ایشکنجه لر، زیندان لار، ایشسیزلیک لر، وطندن آوارا دوشنلرین دردلرینه هانکی درمانی و علاجی قویمانی دوشونجه سینده سینیز؟
آزربایجان و تورکلر ائوچون ضرر گورنلرین خسارتلرین جوبران اتمک ائوچون دوشونجه لرینیز وارمی دیر؟
غیر سیاسی محبوسلار
ایران-فارس یالان و اساس سیز اتیهاملاری و جورم یونتالاماق سیستیمی اوزرینه محبوس اولانلارین دورومو نه اولاجاق؟
ایران-فارس رئژیمینده بیر چوخ جورملر وار کی مومکون دور سیز اونلاری جورم بیلمییه سینیز. اونلارلا نئجه داوراناجاقسینیز؟
اعدام حکومو حاقدا نه دوشونورسونوز؟
ایراندا مینلر آدام و مین لر تورک بئله اعداما محکوم اولموش. بونلاردان بعضی لری بیر نئچه آدام اولدورموشلر. سیز بونلارین حاققیندا هانکی سیاسیتلری گوتوره جکسینیز؟
موعتادلار، قاچاقچیلار، شرّ آداملار، خالقین ناموسونا، مالینا ال اوزادانلاردا زیندانلاردا وار. اونلارلا هانکی یولو گئتمه نی دوشونورسونوز؟
هانکی قانونلار؟
ایران-فارس ایشغال حاکیمیّتیندن، موستقیل و میللی حاکیمییت و دوولته گئچن زامانلاردا، چوربه جور ساحه لرده، هانکی قانونلارلا ائولکه نی، وطنداشلاری، ائکونومینی، سیاسیتی، ایداره لری
و ... ایداره اده جکسینیز؟
ایران داغیلاندان سونرا، کیم لر موحاکیمه اولاجاق؟
خایین لر، جاسوسلار، آدام ساتانلارین دورومو نئجه اولاجاق؟
ایران-فارس طرفدارلارینین دورومو نئجه ایداره اولوناجاق؟
گئچیجی دئوراندا، اعدام مسئله سی اوئلمالی می دیر؟
آزربایجانین ایستیقلالی ایله دوشمانلیق ادن لر، آزربایجانین اوزرینه سیلاح چکن لر اعدام اولاجاق می، اونلاری نئجه بیر موجازات گوزلور؟
ابد حبس لر و حوکوم لر حاقدا، نئجه یول گوتورورسونوز؟
نارکوتیک ماده لرین قاچاقچیلاری، اورتنلری، ساتانلاری ایله نه اتمه لی دیر؟
نارکومانلار یا موعتادلار ایله نئجه گئچینمه نی دوشونورسونوز؟
اینتیقام - مافیالار
هر سیاسی بوحراندا، هر سیاسی داغیلیشدا و هر بیر سیاسی سیستیمین قورولوشوندا، چوخلو سیاسی، حقوقی، امنیتی و ... بوشلوقلار اولار. بو زامانلار، بعضی اینسانلار و مافیا دوشونجه لیلر فایدالانیب، دوولتین مالین، فابریکالاری، سرمایه صاحیبلارین و ... غارتینه ال وورارلار. او زامانکی غارتچیلر ایله نئجه داوراناجاقسینیز؟
اگر
ایران دوولتینین، ایران یانلیلارینین، مافیالارین و ایران-فارس حاکیمیتینه باغلی سرمایه دارلارین واریوخو، تورک توپراقلاریندان خاریجده، غارت اولورسا، نئجه دوشونورسونوز؟
بیر چوخ وطنداشیمیز، پولیس لردن، پاسدارلاردان، امنیت و ایطلاعات گوجلریندن، موللالاردان، موعللیم لرین بعضی لریندن، حراستلی لردن، مودورلردن، بعضی ایداره ایشچیلریندن، ایران دوولتینین یوکسک مودورلری و خدمه لریندن و ... اینتیقام آلماق، اونلاری غارت اتمک و اولدورمک دوشونجه سینده دیرلر. سیزین تشکیلات، بوجور اینتیقاملار حاقدا هانکی یولو یونتمی گودور؟
رئژیم آداملاریندان، ایشکنجه چی لردن، اعدامچیلاردان و ... اینتیقام الماق ایستیین لره، هانکی وعده نی وئریرسینیز؟
ایران-فارس مافیالاری، آزربایجان و تورک میللتینین قانین سوموروب، شوشه یه چکمیشلر. مافیالار ایله هانکی یولو گئده جکسینیز؟
محکمه حاکیملری روشوت آلیب، بیر چوخ قانونسوزلوقا یول وئرمیش لر. قاضی لرین، دادسیتانلارین، و اونلارلار البیر اولانلارین جانلاری، اینسانلارین اینتیقام تهلوکه سینده دیر. محکمه قاضی و ایشچیلری ایله نئجه گئچینه جگسینیز؟
دوولت
دوولت نه دیر؟
دوولتی نئجه تعریف ایدرسینیز؟
دوولتین ایشی-گوجو نه دیر؟
دوولتده ایشلیین لری نئجه گورورسونوز؟
دوولتین ان اوست خدمه سین نئجه گوروسونوز؟
دوولت بیلگی ایله دولو دور و بیلگی رانتا و قودرته سبب اولار. بو بیلگی فقط دوولت ایشچیلرینین الینده اولدوقوندان، دوولت ایشچیلرینین ائوزلرینه و یاخینلارینین رانتینا نه دن اولموشدور. رانت ایله نئجه موقابیله اده جکسینیز؟
دولته هانکی ایختیارلاری وئرمه نی دوشونورسونوز؟
دوولتی کونترول اتمه نی دوشونورسونوز مو؟
دوولت، گئنیشلنمه، کولگه سین هر یانا سالماق دوشونجه سینده دیر. توپلومون حاقلارین قئسئتلاسین، ائوزنون حاقلارین چوخالتماق دوشونجه سینده دیر. دوولتین گوجون موهار اتمه و میللتین الینده اولماق ائوچون هانکی یول یونتم لری دوشونموسونوز؟
سیاست
سیاست نه دیر؟
ساستی هاردا اویرنمیسینیز؟
نئجه و نه دن اوترو، سیاست مئیدانئنا گیرمیسینیز؟
نئچه یاشیندان سیاستده اولموسونوز؟
سیاستده، ایجرا تجروبه نیز ورا می؟
سیاسیتچی کیم دیر؟
سیاستچینین آماجی نه لر دیر؟
سیزین تشکیلات و اونون منصوبلاری، باش باکان، باکان، مودور و ... اولماق ایستیرمی؟
سیزین سیاسی و ایستیراتئژیک باخیشینیزدا، ایران دغیلاندان سونرا، دئموکراسی هانکی زامانا الوئریشلی گورورسونور؟
سیزین سیاسی موخالیف لرینیزین دورومو نئجه اولاجاق؟
سیاسال موخالیف لرینیزی نئجه تعریف ادیرسینیز؟
سیاسال موئخالیفلرینیز ایله دوشمن اولماق احتیمال نه قدر دیر؟
سیاسال موخالیف لرینیزی سیل-سوپور اتمک کیمی بیر دوشونجه نیز وار می دیر؟
موخالیف سیاسال دوشونجه صاحیب لری و قوروپلارینین هانکی آزادلیقلاری سیزین اوچون داها اونمی وار؟
سیاستچیلرین هانکی حاقلارین قورویاجاقسینیز؟
سیاستدن و پارتیدن کوسمک و قئراغا چیخماق احتیمالینیز نه قدر دیر؟
پارتینیزده، سیاستچی گنجلر اوچون، اوزللیک له سیاستچی قادینلار اوچون، نه قدر یئر آیئرمیسینز؟
سیزجه، سیاستچی نین ان چتین ایشی نه دیر؟
سیز، پاپولیست یا قارا یاخالارین آرخاسینجا سورونمه حاقدا نه دوشونورسونوز؟
سیزجه، سیاستچی لر، عاوامدان نه قدر اونده اولمالیلار؟
سیزجه، سیاستچی لر نه قدر جسور اولمالی و میللی منافع اوچون، میللتین گومه دیگین گوروب، اونا گورادا داورانمالی دیر؟
پاپولیسمی یا عاوامچیلیقی نئجه تعریف ادیرسینیز؟
سیزجه سیاست ده پاپولیست اوماماق مومکون مو دور؟
سیز، نه قدر پاپولیست سینیز؟
سیزجه، میللی حرکتین نئچه فایزی پاپولیست داورانیر؟
پاپولیسمی، تورکچولویه، میللتچیلییه، میللی چیخارلارا، و ... تهلوکه سایئرسینیز یا یوخ؟
سیزجه، پارتی لر و سیاستچی لر، رادیکالیزمه موبطلا اولماسینلار دییه، تورک میللتیندن گئریده حرکت اتمیرلرمی؟
سیز، میللتی و سیاستچی لری رادیکالیزمه دعوت ادیرسینیز می یا یوخ؟
رادیکالیزمی، «عاغیللی» حرکت گوروسونوزمو یا یوخ؟
سیزجه تورک سیاستچی لر، اینفیعال و عکس العمل اساسلی داورانمیرلار می؟
سیزجه، هانکی زماندا و شرایئط ده تورکچو سیاستچی لر، اینفیعالدان چیخیب، ایبتیکار مرحله سینه گئچه جکلر؟
سیزجه، نییه ایبتیکارلی اولماق، سیاسی فعاللارین الینده دئییل؟
عجبا، سیاسی فعاللار و پالرتی لرین لازیم قدر سیاسی دوشونجه لری و تجروبه لری اینکیشاف اتمیش می کی ایبتیکار مهندیسلیینه گیرسینر؟
سیزجه، ایران-فارس رئژیمی، آزربایجان تورکلری ایچینده، نه قدر نوفوذ ادیبلر؟
عجبا، ایران-فارس رئژیمی، میللتچی و سیاستچیلریمیزین داورانیشلارین و دوشونجه لرین کانالیزه اده بیلیرمی؟
سیزجه، ایرانان آدلانان سیاسی مئیداندا، سیاسی تورکلر، اوزلرینین بئیین لرین ایران-فارس رئژیمینین بئیین یئخاماق، یالان، تبلیغات و ... سیستیم لریندن آزاد اده بیلمیشلر می؟ یوخسا هله ده، بیر چوخو، ایران-فارس ادبیاتی، دیلی و سیاسی- دینی دوشونجه سی ایله، دانیشیر و داورانیرلار؟
سیزجه، عجبا، تورکچو و آزربایجانچی سیاسی فعاللارین نئچه فایئزی دوغرودان آزربایجانچیلیقی و تورکچولویو اینانمیشلار؟
سیزجه اینکیشاف نه دیر؟
سیزجه مدنییت نه دیر؟
سیزج، مودرنیزمی نئجه آنلیرسینیز؟
ائکونومی
ائکونومی نه دئمک دیر؟
دونیا ائکونومیسیندن دوشونجه نیز نه لردیر؟
هانکی ائکئنومیلر ایله تانیشسینیز؟
ائکونومی موطالعه نیز وارمی دیر؟
هانکی ائولکه نین ائکونوموی مودئلین داها چوخ به یه نیرسینیز؟
سیزجه، ائکونومی ده، خاریجی ائولکه لردن تقلید اتمک اولابیلرمی؟
سیز، تورکلرین گله جه یینده، اکونومینی، هانکی اساسلار اوزرینده قوراجاقسینیز؟
دوشونموسونوز کی تورکلرین گله جه یینده، تکنولوژی، علیم و بیلگی، مونتاژ، ایکینچیلیک، حئیوانچیلیق، توریزیم و ... لردن هانکیسی یا هانکیلارین داها اوستون و اونده توتاجاقسینیز؟
تورم نه دیر؟
ایران داغیلان همن، بیر قئطلیق و آغیر بیر تورروم گله بیلیر. او تورومو نئجه موهار اتمه نی دوشونورسونوز؟
ائکونومی حاقدا دوشونجه نیز وارمی دیر؟
ائکونومی حاقدا، ائکونومی عالیم لریندن، سیزین تشکیلاتلا، سیزله امکداشلیق ادن وارمی؟
ایرانداکی سومورگه ائکونومیسی حاقدا، تورکلرین ائکونومیک دورومو حاقدا، دوئغرو دوروست بیلگینیز وارمی؟
ایشسیزلیکدن خبرینیز وارمی؟
دوروملاردان آمار ایستاتیکانیز وارمی؟
سرمایه صاحیبلری ایله دوشونجه آل وئرینیز وارمی؟
سرمایه صاحیبلرینین ماراقلاریندان، ایستکلریندن، شیکایتلریندن خبرینیز وارمی؟
بیمه یا سیغورتانی نئجه دوشونورسونوز؟
ایران یانلیلارینین مال و دارایاتینین موصادیره سی حاقدا دوشونجه نیز وارمی؟
اوردونو قورماق و سیلاحلاندیرماق حاقدا نه لر دوشونورسونوز؟
اینقیلاب تجروبه سی
ایران-ایسلام آدلی اینقیلابدا گوردوک کی بعضی محلله لرده و شهرلرده، میللتین بیر کسیملری توکولوب، کلانتری مامورلارین قتلی عام اتدیلر. بونو گوز ائونونده توتاراق، پولیس لری و اونلارین عاییله لرین قوروماق اوچون هانکی پئلانینیز وار؟
پولیسلرین بیر چوخو «امیر قولو» دورلار. پولیس لر و اونلارین تشکیلاتی ایله نئجه داوراناجاقسینیز؟
پولیسلرین باشینا نه لر گله بیلیر؟
ایسراییل - آمریکا
ایسرائیل آدلی بیر سیاسی وارلیق حاقدا هانکی دوشونجه لره مالیک سینیز؟
عجبا سیز ایسرائیلی دوشمن تانیرسینیز می؟
ایسراییلدن تعریفینیز نه دیر؟
آمریکایا نئجه باخیرسینیز؟
آمریکانی ایستیکبار، ایستعمار، ایمپریالیسم و ... گورورسونوز مو؟
آمریکا نی دوست کیمی، دوشمن کیمی، رقیب کیمی یا نئجه گورورسونوز؟
آمریکا ایله نئجه بیر ایلگینی قورمانی دوشونورسونوز؟
آمریکانی گوز آردینا وورماق اولار می؟
آمریکا ایله بشر حاقلارین یان یانا قویارکنف نه لر دوشونورسونوز؟
آمریکا، روس و چین آراسیندا نئجه دنگه سیاستین قوروماق اولابیلیر؟
فلیسطین - عربلر
فیلیسطین و عربلرین، سیزین ائوچون هانکی آنلامی وار؟
فیلیسطین و عرب ائولکه لری ایله ایلگیلی هانکی سیاست لری گوتورمه نی دوشونورسونوز؟
عرب و ایسلام ائولکه لرینه یاخینلاشمانی یوخسا ایسرائیل و یهودیلره یاخینلاشمانی گودورسونوز؟
عربلر له ایسراییل آراسیندا دنگه سیاستین نئجه ایره لی آپاراجاق سینیز؟
روسییه؟
تاریخ باخیمیندان، روسییه گونئی آزربایجانی اوزونون آرخا باغچاسی کیمی گورور. سیزین تشکیلات روسیه حاقدا نه دوشونور؟
روسییه سیز بیر سیاست آپارماق اولار می؟
روسییه نین ماراقلاری نه لر دیر؟
روسیه و بویوک قودرتلرین ایمکان وئرمه دیگی حالدا، ایستیقلال آلماقی نئجه گورورسونوز؟
روسیه ایله ایلگیلی، هانکی سیاستلری گوز اونونده تورتورسونوز؟
آزربایجان و تورک حرکاتیندا، روسا یاخین اولان بیر سیاسی قاناد، پارتی، تشکیلات و ... وار می کی آزربایجانی قوروماق آماجلی روسلارا یاخین لاشسین؟
روسلاردان اوزاق دورماق، روسلارین سیاستلرین و عکس العمللرین کوممک آنلامینا گلیر می؟
بویوک قوردتلر آراسیندا دنگه نی ساخلاماق آماجلی، اونلارین هر بیرینه یاخین، تشکیلاتلارین ایچینده یا موستقیل بیر سیاسی قورومون یارانماسینا نئجه یاخینلاشیرسینیز؟
بولگه نین سیاسی حساباتیندان روسییه نی سیلمک مومکون مو دور؟
چین
چینی نئجه گورورسونوز؟
چین - تورک قونوسونا نئجه باخیرسینیز؟
چین - تورک قونوسو، سیزین چین ایله اولان علاقه لری و سیاستلری نئجه اتکیلییه جکدیر؟
چین - تورک قونوسون گوز اونونده توتاراق، چین یاله اوینامامانین ریسکین و ضررلرین قبول ادرمی سینیز؟
چین - تورک له ایلگیلی، میللی منافعی، نئجه قورویاجاقسینیز؟
یوخسا، تورک لردن حیمایتده، چینی سیاست و تیجارتده بیر قئراقا بوراخاجاقسینیز؟
چینین دونیا ائکونومیسی اوزرینده کی اتکیسین نه قدر گورورسونوز؟
چینین دونیا سیاستینده کی یئرین نئجه آنلاییرسینیز؟
هیندوستان
هیندوستان، فارسلارا یاخین، تورکلره اوزاق دیر. هیندوستان موعادیله سی حاقدا نه لر دوشونور سونوز؟
هیندوستان اوزرینده، هانکی سیاسی و ایستیراتئژیلری اونده توتورسونوز؟
دین
ایسلام و دین قونوسو ایله باغلی دوشونجه لریز نه لر دیر؟
ایسلاما باغلانان سیاسی و ایداری دوشونجه لر حاقدا هانکی سیاستلری گوتورمک ایستیرسینیز؟؟
موللالیقین و موللالارین گله جه یی ایله علاقه لی نه لر پئلانلئرسینیز؟
ایسلام لا موخالیف می اولاجاق سینیز؟
سئکولاریزمه گورا نئجه باخیرسینیز؟
ایسلام ایران - فارس یوز ایللیک رئژیملرینین سیاستچی لرین الینده، بیر سیلاح اولموش. دین دن، ایران فارس منفعتی یولوندا جیددی فایدالار گوتورموشلر. سیز، بیر سیاسی دوشنجه اولاراق، دین قونوسوندان فایدالانمانی نئجه گورورسونوز؟
دینسیز، میللتی وطن و میللت یولوندا ساواشا آپارمانی نئجه آنلیرسینیز؟
میللتین گنج نسلی، دینسیزله شیب، هئش بیر اصله، اوصولا، اردم-اخلاقا، بویوک - کیچییه، حورمه ته، عنعنه یه، و ... تسلیم اولمور. بو دورومو، فورصت می گورورسونوز یوخسا بیر تهدید می؟
قانونلاردان دینی سیلمک می ایستیرسینیز؟
میللتین بیر چوخوف توم ظولوملری موللالارین گوزوندن و الیندن گورولر. اونلارا قارشی اینتیقام دویغولاری درین دیر. سیز بو حاقدا نئجه دوشونورسونوز؟
ایستیقلالدان ائونجه
ایستیقلال آلمادان ائونجه کی چاغذا، هانکی ایشلر، سیاست لر و ایستیراتئژی لر سیزین اوچون داها چوخ اونملی دیر؟
ایستیقلالا هانکی حاضیرلیقلار لازیم دیر؟
پارتیلریمیزده ایستیقلالا حاضیرلیق وارمی؟
اگر ایراندا بیر آنی گلیشمه ائوز وئریرسه، سیاسی دئییشیم اولورسا، بو فورصتی فی الفور الده ادیب، ایستیقلالی اعلان اتمه یه حاضیرلیق وار می دیر؟
سیاسی، ایدئولوژیک، عسگری، ساواش، و ... تعلیملری گئدیر می؟
مرامنامه نین اوزرینده موباحیثه لر گئده جک دیر. بیر نوسخه سی لازیم اولاجاق.
کورد قونوسو
کوردلرله تورکلرین آراسیندا قانلی ساواش چیخارمی؟
کوردلرده بو قدر عاغیللی سیاستچی لر وار کی تورک-کورد ساواشینا قارشی دوروب، فارسلارین مئیدانیندا اویناماسینلار؟
کوردلرله، کورد سیاستچی لر له، کورد سیاسی تشکیلاتلارلا دوشونجه آل - وئرینه گیریرمی سینیز؟
نه دن بعضی تورکلر، سیاسی کوردلر یا سیاسی کورد تشکیلاتلاری ایله علاقه قورماقدان چکینیرلر؟
اگر کوردلر، تورکلر ایله ساواشا گیرسه لر، سیزین تشکیلاتین، کوردلر ایله بیر ساواشا حاضیرلیقی وارمی؟
کوردلر ایله ساواش احتیمالین دوردورماق احتیمالی نه قدر دیر؟
عجبا فارسلاری، کوردلری یا ایران حاکیمیتین، بونلاردان هانکیسین اساس دوشمن تعریف اتمیسینیز؟
قانلی بوحرانلار
ایران بولونرکن، فارسلارلا آزربایجان تورکلری، قشقایی لر، تورکمن لر، عربلر، بلوچلار و ... آراسیندا قانلی ساواشلارین چیخماسینا نئجه باخیرسینیز؟
اگر فارسلار، تورکلر ایله ساواشا گیرسه لر، سیزین تشکیلاتین، فارسلار ایله بیر ساواشا حاضیرلیقی وارمی؟
فارسلار ایله ساواش احتیمالین دوردورماق احتیمالی نه قدر دیر؟
آزربایجانین ایستیقلالینا چالئشئرسینیزسا، ایرانین باشقا یئرلرینده یاشایان تورکلرین سیاسی گله جه یینه نئجه باخیرسینیز؟
عجبا قشقایی لر، تورکمن لر و باشقا یئرلرده یاشایان تورکلر، تورکو دوشمن تعریف ادنلرین الی ایله قتلی عام اولابیلرلرمی؟
سوی قئرئملارین انون آلماق آماج ایله هانکی پئلانلارینیز وار؟
وار اولان سیاسی پارتیلرین اینسان گوجو ساواشمایا یئلرلیمی؟
وار اولان سیاسی پارتیلرین گوجو اینقیلابا یئترلیمی؟
وار اولان سیاسی پارتیلرین گوجو، کورد و فارسلارین قارشئسیندا دورمایا یئترلیمی؟
عجبا سیزین تشکیلات، ایراندا بیر آنی دونوشه و قودرتی اله گئچیرمه یه حاضیرمی دیر؟
ایختیلافلار
سیاسی پارتیلرین اینسان گوجو و تجروبه سی، دوولت قورمایا یئترلی می؟
لازیم و کیفایت قدر سیاسی، حوقوقی، ایجرایی تجروبه، علم و عالیم، موجود سیاسی پارتیلر ده وارمی دیر؟
وار اولان سیاسی پارتیلرین ائوز گوجلریندن، دوغرو تحلیل لری و حساباتلاری وارمی؟
وار اولان سیاسی پارتیلر، نه دن بیر بیرلری ایله امکداشلیق اده بیلمیرلر؟
وار اولان سیاسی پارتیلرین بیربیرلری ایله اولان ایختیلافلاری هانکی قونولار دیر؟
نه دن وار اولان سیاسی پارتیلر ایختیلافلی قونولاری چوزه بیلمیرلر؟
عجبا ایختیلافلی قونولار، بیر پارتینین باشقا باشقا قوللاری یا بیر جیبهه نین فراکسیونلاری و قوللاری اولابیلمزلرمی؟
وار اولان سیاسی پارتیلرین آراسیندا ریقابت وارمی یدر؟
ریقابت لرین قونولاری نه لردیر، نه لر اولابیلیر؟
عجبا وار اولان سیاسی پارتیلر، بیر جیبهه و بیر لیدرلیک سیستیمی یاراتماقدان عاجیزلرمی؟
سیزین پارتینین، وار اولان سیاسی پارتیلرله بیرلشمه سی و امکداشلیقلاری اوچون هانکی پئلانلاری وار؟
هانکی شرطلر اساسیندا، سیزین پارتی، باشقا پارتی لر ایله بیرلشر یا امکداشلیق ادر؟
بیرلشمک یا امکداشلیق ایچین هانکی شرطلرینیز وار؟
امکداشلیق و بیرلیک یولوندا هانکی شرطلرنیزدن واز گئچرسینیز؟
عجبا سورگونده دوولت، مجلیس، محکمه، کابینه و ... سیستیمی یاراتماقی دوشونورسونوز مو؟
دونیا دوولتلری و میللت لری سیزی رسمیّته تانیسین دییه، لابی قورمایا چالیشیبسینیز یا چالیشیرسینیز؟
سون
عجبا کوردلر، خالق موجاهیدلری، سولچولار و ... ایله ایلگیلی سیاسی ادبیات، قارایاخا و بعضی سیاستچیلرین ایچینده، ایران-فارس رئژیمینین یاراتدیقی و یایدیقی و تبلیغاتی دوشونجه لر و دیل . ادبیات دئییل می؟
سیزجه، نه دن همدان، قزوین، زنجان، اراک، تهران، کرج و ... حتتا قشقایی لر ائوزلرین تورک بیلیرلر، آذری یوخ آمما آزربایجانلیلارین بیر چوخو ائوزلرین آذری تانیتمایا چالیشیرلار؟
سیزین اوچون استعمار نه دئمک دیر؟
داخیلی استعمارا نه دیر و بو قاوراما اینانیمیسینیز؟
ایمپریالیسم حاقدا نه دوشونورسونوز؟
کاپیتالیسم له ایلگیلی دوشنجه لرینیز نه لردیر؟
سوسیالیسم نه دیر و سیزین دوشونجه و سیاستلرینیزده بیر سهمی وار می؟
لیبرالیسمدن نه آنلیرسینیز و سیاستلرینیزده لیبرالیسمه نه قدر یئر وئرمه نی دوشونورسونوز؟
حق تعیین سرنوشت قونوسونا گورا نئجه دوشونورسونوز؟
آزربایجان و تورک دونیاسیندان کناردا، باشقا میللت لر و تشکیلاتلارلا علاقه نیز وارمی دیر؟
دونیا سیاستینه نه قدر علاقه و ماراقینیز وار؟
یئر کوره سینده، هانکی بولگه نین خبرلری، گلیشمه لری، اینکیشافلاری، حرکاتی، اکونومیسی و ... سیزین تشکیلاتین ماراقین چکیر؟
درین حُرمتلر و سایقیلاریملار
انصافعلی هدایت
مای 04-2024
Comments
Post a Comment