حاکیم دوشمان، خایینلرین سسین گورلاندیرار، فداییلرین سسین سوسدورار

حاکیم دوشمان، خایینلرین سسین گورلاندیرار، فداییلرین سسین سوسدورار

بیر سئرا ساوادلی، پوللو، خاریجه گورموش، ایداره

 ایشچیله لری، و … تورک میللتینه، تورکلرین وطن هابئله میللی چیخارلارینا خایین دیرلر. 

بو خایین لر، ثروت توپلاماق و دوشمانین قانلی قدرت‌ینده شریک اولماق اوچون، هر رنگه بویانار و توم میللتین میلی چیخارلارینا، همده بیله بیله خیانت ادرلر. 

حتتی بو خایین لر، بونا گورا کی ثروت توپلاسینلار، دوشمانین قانلی قدرتینده اللری اولسون، تکجه اوزله رینه ثروت توپلاماقا کیفایت اتمزلر.

 بلکه مرکزده کیلری (دوشمانلاری) راضی ساخلاماق اوچون، بو خایینلر، اوز میللتلرین آشاغالارلار، اوز میللتلرینه توهین ادرلر، اوز میللت لرینین میللت اولماسین دانارلار. اوز میللی وارلیقلارین آشاغالارلار. 

بو خایینلر، اوز ایستکلری ایله دوشمانین ماشاسینا چئوریلرلر. دوشمان، اونلاردان، تورک میللتینه قارشی فایدالانسین دییه، چابالارلار. 

دوشمان، بو خایینلردن بورک ایسترسه، اونلار بیر باهانا تاپیب، تورک باشی آپارارلار کی اوزله رینین وفادارلیقلارین دوشمانا گوسترسینلر. دوشمانین گوجونده، اوزلرینه یئر قازانسینلار.

بیر چوخ تورک اینسانی، چوخ چتین گونلرده و زور شرطلر آلتیندا یاشارلار، آمما اوزلرین، دوشونجه لرین، دویغولارین، قلملرین، ثروتلرین، قوللارینین گوجون، فیکیر گوجلرین، … توپلومدا کی یئرلرین، میللتله وطنین دوشمانینا ساتمازلار.

او حالدا کی دوشمان، بونلاری آلماق اوچون هر بیر یول یونتمه ال وورار آمما اونلارین سئچه نگی، وطن هابئله میللتین میللی چیخارلاری اولور. اونلار، زورلوقلاری، چتینلیکلری، کاسیبلیقی، زیندانی، اولومو و … سئچرلر آمما اوز میللتلرینه خیانتی سئچمزلر.

خایینلرین، بلکه ده کوکلری و توخوملاری وئرانا اولوب. اصیل توخومدان، کوکلو عاییله دن و قارنیندان دوغولمامیش، بلکه ده حارام تیکه لرله قارینلاری دولموش کی خیانتی و خایین لیگی سئچرلر. خایینلرین چوخو، خیانته و خایینلیگه زورلانمازلار. 

بو خایینلرین سایی چوخ آز دیر آمما ثروته و قودرته یاپیشدیقلاری اوچون، اوز میللت‌لرین خور گوردوکلری اوچون، اوز میللت‌لرین آشاغالادیقلاری اوچون، مرکزده اولان دوشمان، اونلارین سسین گورلاندیرار و توم میللتین سینین یئرینه قورمایا چالیشار.

گئچن یوز ایلین توم تورک کوکلو خایینلرین توپلاسانیز، مین خایین اولمازلار. 

بو خایینلره قارشی، میلیونلار وطن خادیمی، میلیونلار میللت فداییسی، شاعیری، یازاری، اینجه صنعتچیسی، ایشچیسی، سرمایه صاحیبی، ایش-گوج صاحیبی، و … وارایمیش و ایندی ده وار.

آمما چون میللته خایین دئییرلر، چون دوشمنه ساتیلمامیشلار، چون ثروت توپلوما و دوشمانین قانلی قدرت‌ینده شریک اولماق آماجی داشیمیرمیشلار، اونلارین سسسی، دوشونجه لری، دویغولاری، … حاکیم دوشمانین میدیاسی، تعلیم و تربیه سیستیمی الی ایله یایئلماز، سسلندریلمز، گوسته ریلمز.

اونا گورادا، دوشمان اونلارین وارلیقین گورمزدن توتار. اونلارین وارلیقین، هابئله دوشونجه لرین، یازیلارین، دویغولارین گورمزدن گئچر.

چون دوشمان، ایران آدلانان یئرده، تورکلره حاکیمدیر، دوشمانا یارایانلارین دوشونجه، دویغونو و ایشلرین گوسته رر، یایار و گوجلندیریر.

اگر تورکلرین جانلاری، یازیلاری، شعرلری، موسیقیلری، کیتابلاری، دوشونجه لری، سیاستلری، ثروتلری، و … دوشمانا یارامازسا، دوشمان بو یاراماز آداملاری "یوخ" کیمی گوسته رر. دوشمان ایله بیر سیاست توتار کی بو یاراماز تورکلر، تورک توپلومدا بئله یوخ کیمی گورونور و آنلاشئلئرلار.

دوشمان طرفیندن، دوشمانا یارامایان آداملارین ایشلری، دوشونجه لری، آنلایئشلاری و … یوخ توتولمالی و توم میللت‌لرین توپلوملاری، بو میللت و وطن فداییلرینین ایشلریندن، دوشونجه لریندن، هابئله دویغولاریندان خبرسیز قالمالاری و توتولمالاری لازیم گرکیر.

اینصافعلی هیدایت 

نوامبر 21/ 2024