قورخو شه‌هری، امن شه‌هری
قورخو شه‌هری، امن شه‌هری
جللادلار
شه‌هرده
قئلینجلا، توفنگله، قامچه ایله
گیزمه لیک ادیر
امنیت یایئر
آزادلیق پایلایئر.
باشلیلارین باشلاری یئرینه
لاله‌دن گول اکیر.
جللادمیز
مدنیتین آرخاسی
هونرین بکچیسی
یاخشیلیقی هر یاندا سولایئر.
توم شه‌هر عاشیق دیر جللادینین
توفنگینه، قئلینجینا، قامچیسینا
صف باغلایب، ایذینله
قئلینجا، توفنگه، قامچیسینا بئله
اوپوجوک ووروب، بیعت ادیرلر.
دولانیر شه‌هرده قورخو کولگه سی
باشلار گیزله‌نیر گیزمه گورنده
قاپیلاردان قورخو گیریر
پئنجه‌ره‌لردن قورخو باخیرکوچه‌لرده
دولاشان صولح آدلی جللاداین آددیملارینا.
شه‌هر شاخ دوروب
هئش گولداندا چیچک آچمیر
باغچادا بولبول اوخومور
کپنکلر دولاشمیر گولون باشینا
قوشلارین سسی کسیلمیش
قئزلار بزنمیر آداخلیسینا
شهر بوم بوش،
آدام یوخ
اولولر قبریستاندا شیللاق آتیر
چاققاللار شیرنی پایلیر، بایراملاریدیر.
کولگه‌لر
کوچه‌له‌رین بوربوجاقلاریندا
قورخودان گیزله‌نیر
اوزاقدان گلن سس "یاتین! شه‌هر امنی دیر!" دئییر.
مچیدلرده
قئلینجا ایقتیدا ادیر میللت
ایماملار، قانلا دستماز آلیر
یاسا باتمیش توم شه‌هر
گلین سیز شه‌هر، باشسیز شه‌هر
آشیق یوخ، توی یوخ
کیشی سیز شه‌هر، قادین‌سیز شه‌هر
تکجه جللادین وار حورمتی، حوررییتی
بورا جللادلار شه‌هری
جللادین سسی گوردور.
اینصافعلی هیدایت
04/October/2024
Comments
Post a Comment