تورک میللتی، سیز قازاندینیز! ایران-فارس اودوزدو!
تورک میللتی، سیز قازاندینیز!
ایران-فارس اودوزدو!
تورکلر، ظفرینیز قوتلو اولسون!
اورادا بیر میللت وار. او، بوتونلویونده، بیزیم میللت دیر.
بیزیم میلت، بیر دوغرو، گرچک وارلیق دیر.
اینانساخدا، اینانماساخدا، بیزیم میللتین بیر چوخ دوشمنی وار.
دوشمن، بیزیم میللتین وطنین ایشغال ادیب. تکجه وطنین یوخ، بئینین‌ده ایشغال ادیب.
بیزیم میللت آمما بیر اوشاق کیمی ساده، صمیمی دیر. تئز آلدانیر. چون، اومساق میللتی، یالانچی‌لار آلدادار.
دوشمن، بیزیم میللتی، بیزی، بیر بیریمیزدن آیئرئب، قولایجا ایداره اتمک ایستیر. ایشغالا داوام، غارته داوام، سومورگه‌یه داوام ایستیر.
دوشمن، ایللر دیر وطنی بولور. وطنین آدین دئییشیر. وطنی- وطنداشلاری وطنسیزلشدیریر.
دوشمنیمیز، میللتیمیزه، وطنیمزه قوندارما آدلار قویور. آدلاری دئییشیر. آد قویمالاریمیزا بئله اذین وئرمیر.
دوشمن، بیزیم وطنیمیزدن باشقالارا پای وئریر. کین‌له دوشمنلیک اکیر بولگه ده، آرامیزدا.
میللتین آیئق بالالاری، ایللر زحمت، زیندان، ایشکنجه، سورگوندن سونرا، میللتده بیر آیئقلیق، بیرده آزادلیقا، هوس یاراتمیش. وطندن اوزاقلاردا اولانلارین جانلارین دا بئله میللتچیلیکله دوولتچیلیک هوسی یاراتمیشلار.
بئله‌لیکله، دئمک، دوشمنه، ایشغالا، سومورگه‌یه ان بویوک تهلوکه و خطر یاراتمیش دیر.
دوشمن ایسه یئنه بیزی بولمک، ایداره اتمک ایستردی.
دوشمن، سئچگی آدیندا بیر فورصت یارادیب، اوز آداملارین اویونا سالیب.
دوشمن چالیر، اویونجاقلار اوینور. دوشمن چالیر، بیزیم ساده میللت و میللتچی‌لر اویونا اینانیب، ایچدن بولونورلر.
همده اوز الیمیز ایله بولوروک اوزوموزو دوشمن اوچون، دوشمن اویونو اوچون.
هر کیم اورادا، او وطنده، یاشیرسا، وطنین بوتونلویون، آزادلیقین، موستقیل دوولتچیلیگین قبول ادیرسه، بیزیم میللتدن، بیزیم وطنداشیمیز دیر.
وطنداشلاریمیزین، تئز اینانانی، آلدادیلمیشی، سئچگیده بیر حاقلاری الده اتمه‌نی اومانی‌دا وار.
ان آز بیر حاقی الده اتمک طاماحچیسیدا وار. ان آز حاق اوچون سئچگیلرده چالیشانی‌دا وار. تحریمچیسی‌ده وار، ایشتیراک ادنی‌ده وار، ایشتیراکا چاغئرانی‌دا وار. آمما هامیمیز وطنداشیق و میللتیک.
دوشمن بیزی ایچ، دئش، خایین، حاق اوچون سیچگی‌مئیدانینا گیرنلر، تورکچو، تورک بالاسین دستکلیین‌لر، فارسچیلار، فارسچینی دستکلیین‌لره و ... بولموش گورونور ایندی.
بیز ایسه، ایچده، دئشدا، دوشمنین مئیدانیندا، دوشمنین چیخارلاری اوچون اوینامامالییق.
بیر بیریمیزه دوشمان آغزی ایله قارا یاخمایا چابالامامالییق.
دوشمن بیزی بولمک اوچون بیر سئچگی اورتایا آتیب، بیزی بولمه‌یه چالیشسا دا، وطنداشیمیز دا بیر چوخ شئی‌لر الده اتدی.
همن بئش-اون گونده، تاریخده گورونمه‌میش قدرده تورکچولش دی. "تورک بالاسینا دستک اولاق" دییه، بیرلشمه‌یه و بیر تورک بالاسینا سس وئرمه‌یه چالیشدی. بیر تورک بالاسین، بیر اومود اوچون سئچمه‌یه، تورکلوک اوزرینده بیرلشمه‌یه، چالیشدی.
تاریخیمیزده بئله تورکچولوک چوخ همده چوخ چوخ آز گورونموش دور. بو بیرلیکدن، دوشمن یوخ، بیز فایدالانمالی و بو روحو، بو حالی ایداره اتمه‌لی، یونتمه‌لییک.
پزشکیان، دوشمنین آدامی اولابیلیر، دوشمن، پزشکیان‌لا بیزی بولموش گورونه‌بیلیر آمما داها دقیق اولساق، آیدینلارین ایللر اونجه اکدیگی تورکلوک توخومو، بار وئرمه‌یه باشلامیش بئله.
بیزیم میللت، گئچن یوز ایلده، بیر اینجی دفعه اولاراق، ایرانا یوخ، فارسا یوخ، فارسچیلیقا یوخ، ایرانچیلیقا یوخ، بلکه یانلیشدا اولسا، بیر تورک اولدوقونا ایناندیقینا گورا، تورکچو گوروندویونه، میللتچی، وطنچی، آزربایجانچی، تورکچو گورویونه طرفدار اولدو.
یعنی، توم وطنداشلاریمیز ایرانا اولان اینانجین الدن ویرمیش. آزربایجانا، تورکه، میللی چیخارلارا یونلمیش دیر.
هر حالدا، پزشکیان خایین چیخارسا، بیزیم میللته بیر شوک گلیر. میللت دوغرو و گرچک تورکو، یالانچی ایله آیئرت ادر.
بیزیم میللت بو دفعه، وطن بالاسی دئدیگینه، تورک دیدیگی بیرینه، تعصّوب گوستردی.
حتّا بو تورکچولوک، او قدر گئنیش و درین اولدو کی "تورکم"، " تورک بالاسی‌یم"، "اتام تورک- آنام تورک" دیمه‌ین اویونجاق بئله آناسین تورکجه اوینادیر کی جان-جیگر اردبیلیمیزین سسین فارسلیقا، ایرانچیلیقا اُغورلاسین.
بو سئچگینی و فورصتی ایران-فارس و ایشغالچیلار یاراتدیلار آمما و عجبا، بو سئچگینی ایران-فارس قازاندی، یوخسا تورکلوک، آزربایجانچیلیق و میللتچیلیق، همده تک آزربایجان دا یوخ، توم ایران آدلانان وارلیقدا قازاندی؟
اگر بیز میللتچی‌لر، ایگیرمی-اوتوز ایل زحمتلریمیزین، زیندانلاریمیزین، سورگونلویوموزون، دانئشمالاریمیزین، یازمالاریمیزین و ... میللتیمیزده اولان اتکیسین اولچمک ایسته‌‌سئیدیک، بو سیچگیلردن داها یاخجی بیر زاماندا او اتگیلری ائولچه بیلرمی دیک؟ چالیشمالاریمیزین سونوجون گوره‌بیلمی دیک؟
منجه، بیز بولونموش گورونسک‌ده، بولونمه‌میش، بلکه بیرلشمیشیک.
نییه؟
چون؛ دوشمنین وئردیگی رقملره گورا، میللتیمیزین یوزده آلتمیشی سئچیملری فعال اولاراق تحریم ادیب (وطنده و سورگونده، تورکچولوک، آزربایجانچیلیق، میللتچیلیق، وطنچیلیق، حاقلار، دوشمن، دوشمنین حیله‌لری حاقدا و ... دانیشیب، یازیب، دوشمنین اویونون ایفشا ادیب)، یوزده قئرخی تورکلوک اوزرینده پزشکیان-ا وحتّا جیلیلی-یه (آناسی اردبیللی دیر دیه) سس وئریب.
بلکه پزشکیان سس گتیریرسه، آزربایجانا بیر خئیریده اولار. آمما آز خئیری بو اولدو کی ایران آدلانان قورندارما وارلیق دا تورک-فارس، ایران-توران تاریخی ساواش حتّا سیاستده بئله رسمی اولاراق، یئنه‌ده یئرین آلدی و ایران ایکی یئره بولوندو.
لازیم دئییل کی بولونمه‌نی تک اوز ایچیمیزده گورک، کدرله‌نک. بلکه بیزده، بیر اینجی دفعه، گئچن یوز ایلده ایرانی-فارسی همده چوخ گئنیش و درین اولچوده بولموشوک.
ایران-فارس بیزی بولمک اوچون بیر فورصت یاراتدی. قازانمیش گورونسه‌ده، بیزیم میللت سئچگیلردن بیر نیچه گون سونرا بیرله‌شه‌جک آمما ایران آدلانان یئرده آچیلان دره و کور گوزله گورونن تورک-فارس، ایران- توران ساواشینین اوستون اورت باس اتمک مومکون اولارمی؟
منجه، پزشکیان چیخا، چیخمایا، آزربایجان و تورکه بیر شئی‌لر قازاندیرا قازاندیرمایا، تورکلر یئنی جیبهه آچمیش و ایراندا توم میللت‌لری فارسلیقا قارشی یانینا آلمیش و ساواشی قازانمایا آیاقلانمیش دیر ایندیلیک.
سون سوز: بو قازانج گوستردی کی بیز تورکلر، بوتونلوکده، بیر وار اولان دوولتین دوشونور بئینی کیمی دوشونوب، ماموریّتلریمیزه گورا بولونوب، هر بولوم اوز ایشین دوغرو دوزگون یئرینه قویدو. ایچیمیزده ساواش گوروندو آمما دوشمنی تاولایلابیلدیک. بیز اونو اویناتدیق و سیندیردیق.
بو ظفر، تورک و توران میللتینه قوتلو اولسون.
تبریک‌لرله
انصافعلی هدایت
Comments
Post a Comment