من آشاغادا لینکی (لینکی یانلیش قویموشدوم. سیلدیم اگر تاپارسام، قویارام) اولان مقاله نی اوخودم و سئودیم آمما منجه بو مقاله گونئی آزربایجان تورکلرین دیلین و دیل شرطلرین، بیزیم
ایجتیماعی شرط لریمیزی گوزده توتمایئب دیر.
بیزیم آزربایجان دیلچی لریمیز بو مقاله نی اوخومالی و بیزیم دیلین سیاسی، ایجتیماعی، ایقتیصادی، دینی، روحی و روانی، ایکینجی وطنداشلیق، فارث دیکتاتورلوغو، فارث استعمار و استحماری، ایداره و رسمی دیلی، میللی حرکتی و اونون یئرین و نقشین، اویانیش، دیلی گئری دونمک و اونو اینقیلابی شکیلده و خالیص حالدا گوندهمده توتماق و فایدا گوتورمک، یعنی چاغ شعری و ادبییاتی، وطن سئوگیسی و عشقی، آنا دیل و اونا باخیم، فارث دیلینه باخیم و دئیشمه لر، بورج آلماق و بورج وئرمگین فرقی "زور و ایجبارلا"، و ... کیمی باشلیق لار، آراشدیریلمالی و تحلیل اولمالی دیر و یئنی مقاله لر یازیلمالی دیر.
بو مقاله فارث دیلی حاقدا و اونون بورج آل وئریندن بحث ادیر. من چوخ تاسسوفلندیم کی دیلچی دئییلم. آمما دیلچی عالیمی اولماماق، منیم جسارتیمی و باخیشیمی الیمدن آلمامالی دیر. چوخ فیکیرلری و ایختیراع لاری، موتخصصیص اولمایانلار خلق ادیب لر. موتخصصیص لر او فیکیرلری و ایختیراع لاری گئوشئییب و
نوشخارلئییب لار. سیز، موتخصصیص اولمازساز بئله، یارادیجی و خالیق اولابیلرسیز.
موتخصصیص اولسانیز، مومکوندور هئش زامان بیر خللاق اولمایاسیز. خللاق و خالیق اولماغا چالیشین، موتخصصیص اولماغا یوخ.
بو مقاله نی اوخودوقجا، منیم ذهنیمه آزربایجان دیلی حاقدا یئنی مسئله لر گلیردی کی هره سی ائوز یئرینده بیر مقاله اولابیلر. من بوردا ساده جه بو فیکیرلریمین بیر نئچه سنین باشلیغینا ایشارت اتدیم.
دوستلاریمدان خاهیش ادیرم دیل مسئله سینه یئنی دن و
هم ده "اینقیلاب جسارتی" ایله باخسینلار، اوخوسونلار و یازسینلار.
دیله باخیش، دئییشمزسه، جامعه و اونون باخیشی دا دئییشمز. "دیل" خالیص "سوزلر" دئییل. دیل، "فیکیر" و "اینانج" دیر. دیلده اینقیلاب اولمازسا، فیکیرده و اینانجدا دا اینقیلابدا اولماز.
دییل دئییشمزسه، جامعه نین باخیشی، اینانجی، حرکتی و
یولودا دئییشمز. بیزیم یاشادیغیمیز ایجتیماع دا دئییشمز. دئییشیم
"اینقیلاب" دیر. اگر ایجتیماع و اینسانلار دئییشمزسه و اینقیلابچی
اولمازسا، بیر حاووضا بنزر کی اورا هئچ سو گلمیر. بو حالدا، یا قورویه ر یادا اییله نر (قوخویار).
جامعه میز قوروماسین و اییله نمه سین دییه، گرک باخیشلاریمیزی دئییشدیرک. باخیشی دئییشدیرمک، اینقیلابی اولماق دئمک دیر.
اینقیلابدا، گئچه جه گه دایانیب قالارسان، مورتجع و گئری قالیجی فیکیرینه بورونرسن. گئچه جکده قالارسان و اوندان ائوزونو قورتارماغا بئله جسارت ایلیه بیلمزسن. یادا ضیددی اینقیلاب و ضیددی تازا فیکیرلر، حرکت لر و تازالیقلار (هر ساحه ده) اولارسان.
اینقیلاب، داییمی و حرکتلی بیر جریان دیر. اینسان، هر گون یوخودان آیئلارکن، بیر اینقیلاب و دئییشیم اوچون آیئلمالی دیر. دونن کی فیکریندن چیخماغا چابا گوسترمک اینقیلابیندا اولمالی دیر. اگر گئچن گونکو فیکیرین، هله سنده ثابیت قالیبسا و اونو دئییشدیرمک ده جسارتین اولئییب، سن، کسسکله نیب، داشا دونمک حالینداسان.
سن اینسان اولدوغون اوچون، کسسگه و داشا دونمه مه لیسن. داشا دونورسن، دوشدوگون یئردن قالخانمازسان. دوشدوغون یئرده قالارسان. توتدوغون فیکیرین اسیری و قولو اولارسان. فیکیرلر و اینانجیلار سنی یولا آپارمازلار بلکه سنی اوزلرینه قوربان و اسیر قیلارلار. سن، هر فیکیردن و اینانجیدان آزاد اولمالیسان. هئش بیر دینین، فیکیرین و شئیین قولو اولمامالیسان.
"کسسک" اولورسانسا، بیر یئرده قالارسان آمما لوندا داشدا بئله اولمانمازسان. داش گئنه ده ائوزونه عایید بیر کیملیک صاحیبی
و فخر ادیجی دورومدا دیر. بیر درده ده ییر آمما "کسسک" بیر نئچه دامجی یاغیشلا، بوشالار و داغیلیب، گئدر. ارییر. باتار. ایتر.
نه اولمالیسان؟
"سو" کیمی اولمالیسان. همیشه دونماقدان قاچاجاقسان. داییما حرکت ده و دئییشیم ده اولاجاقسان. دورماق، سنه اولوم دور. جره
یاندان دورمییجاقسان. داییما و هر ثانیه دئییشه جاقسان.
حرکت ده اولورسان، موندار فیکیرلری و تعصصوبلری بوراخارسان. دورولارسان. آزاد اولارسان.
بلکه بیر موددت "فارث" (استعمار) بندی سنین حرکتینه مانع اولموش. سن، اگر داش اولورسان، او بندین آرخاسیندان قورتولمازسان. بیر یئرده و چاره سیز دوشوب، قالارسان آمما سو اولورسانسا، یا او سددی یئخارسان، گئچرسن، یادا اوندان داشیب، آشیب، گئدرسن.
"گئتمک" و "حرکت"، اینقیلاب دیر، دیریلیک دیر و دیریلیگین آنلامی دیر. دایانماق، اوتورماق و یاتماق، اولوم دور. اولومون قارداشی و یولداشی دیر. اولومه و خبرسیزلیگه گئدن یول دور یا اونلاری
راحاتلادان و ساده ادن یولاردیر.
گل "سو" اول کی هر آن، تازالاناسان. کیشی و خانیم او دئییل کی دئدیگی فیکیرین، اینانجین و خطانین اوستونده داش اولوب قالا، دئییشمه یه.
هر کشی و خانیم او زامانکی بیلدی، سهو ادیب و یا تعصصوب گوسته ریب و یا دایانیب، بون بسته دوشوب، چیخیش یولون باغلایئب، ائوز فیکیری و اینجانجی و یولونون ضیددینه اینقیلاب و عوصیان اده بیلمه لی دیر.
ائوز فیکیری، اینجانجی و یولون داغیتماق گوجونه صاحیب اولمالی دیر. ائوز فیکیرین، اینجانجین داغیتماق هر شئیدن چتین دیر. چون او
قیکیرلر و اینانجلار، ساحاتلار، گونلر، آیلار و ایللر سنین بیر پارچان اولوبلار. اونلاری کسیب آتماق، الی، قولو کسمکدن داها چتین دیر. چون اونلار سنین ال قولونا آنلام وئرمیشلر. اونلاری آتارسان، ائوز ائوزونو محو ادرسن. اینکار ادرسن. چکدیگین زحمت لرین هامیسی هده ره گئدر. اینقیلاب بو دئمک دیر. حرکت بو دئمک دیر. جسارت بو دئمک دیر. دیریلیک بو دئمک دیر. حیاتین آنلامین، آنلاماق و دئییشدیرمک دئمک دیر!
بونون اوچون ان یاخجی سی هئش کیمه "قول=سوز" وئرمه تا سوزونو توتماق مجبورییتینده قالمییه سن. همیشه "احتیمال"، "مومکون"، "اگر" و "شرط" لر چارچیوه سینده سوز وئر و دانیش تا ائوز حرکتیوه و دئییشیمیوه یئر قویاسان.
"کیشی دئدیگیندن دونمز" یا "کیشی توپوردوغون یالاماز" سوزلری، اینقیلابچی و حرکتچی سوزدن اوزاق دیر و اونلارین ضیددینه
دیر. او جور سوزلر، اینسانی داش ادر. کسسک ادر. آزادلیغین الیندن آلار. ایراده سین اولدورر. تازالیغین الیندن آلار. اینسانی دنیز و دریا و حتتا اوقیانوس اولماقدان ساخلار.
سن بیر اینسان اولدوغون اوچون، آخار اولاجاقسان و دئییشه جکسن تا دونیان دئییشسین و دونیانی دئییشدیره سن.
دونیانی و ائوزونو دئییشدیرمک مومکون دئییل ایللا کی اینقیلابی اولاسان و بیر اینقیلابی حرکت و فیکیرله، گئچه جگی و هر جوره تعصصوبو داناسان و اونلارین ضیددینه آیاغا قالخاسان.
یعنی سنین فیکیرین یوخ دور؟
فیکیرین دئییشمیر؟
دونموسان؟
حرکتین یوخ دور؟
یعنی گئچن گونلرده، آیلاردا، ایللرده سنین دین، دیل، وطن، وطنداش، توپراق، آزربایجان، عیران، فارث، دوست، دوشمان، یاخین، اوزاق، گل، گئت، اوتور، دور، اوخو، یازما، پوزما، باخ، باخما، گور، گورمه، دئ، دئمه، اشیت، اشیتمه، دانیش، دانیشما و ... فیکیرلرین و داورانیشلارین دئییشمه ییب؟
دیل، دئییشیمین اصلی آراجی (وسیله سی) دیر. فیکیر ایله کی بیر اوقیانوسداسان. اینسانلاردان اولان بیر اوقیانوسدا. سنین نجات گمین، ائوز دیلین دیر. اگر اونو یاخجی تانیرسان، اگر اونو یاخجی قورورسان، اگر دیلینی، یئنیلرسن، اگر ... سنی آپارار و امن یئره یئتیرر. آمما نه اونوو تانیرسان، نه ده تانیماغا چالیشیرسان، اوندا یئنیلیکلر گتیرمیزسن، سن بوغولوب اولمه گه محکوم سان.
بیزلر اینسانیق و سئچیم حاققیمیز وار. سئچیم بیزیم دیر و بیز سئچیمیک!
اینقیلابی و جرکتده اولمانی سئچه لیم.
اینقیلابی اولماق، اولدورمک دئییل. دئییشمک دیر! دئییشدیرمک
دیر! هم من و سن، هم اوئوزموزو دئییشدیره جاغیق هم ده دونیامیزی. دوره به ریمیزده اولان هر شئیی دئییشدیرمه لییک!
بو، بیزیم و اینسانلیغین، گه له جک اوچون گئتمه لی یولوموز دور. بو یولون یولچولاری، سنی و منی گوزله میه جک لر. یولو توتوب گئده جک لر. دالییه قالان، سن له من اولاریق.
دالییه قالمییک!
