چوخ گوزل خاطیرلر دیر آزیتا خانیم وحدت دوست.
منی اوشاقلیغیما آپاردی آمما کئشگه تورکجه یازاسیز. بیزیم اوز ادبیاتیمیزا گوج وئرین.
مثلن بو "بئشلیخ" سوزو، نه گوزل سوز دور. یا مثلن بیز موراببا شوشه لرینه "بانکا" دییردیخ. بو رسم (نقاشی) ده چوخ اعلا دیر. منیم یادیما "شوشه گرخانا بازارئن سالئر. همیشه اوردا قئزیل گول ساتاردیرلار. آنام آلیب گتیریب و ائویمیزده سرر دیر. ائو بیر قئزیل گول سئرگیسی اولار دیر. قورودار دیر و سونرالار قوروسوندان جوربه جور موراببالار، یئمک لر دوزل در دیر.
منیم گولتاج نه نم، همه شه گول مورابباسی، آلما مورابباسی، هیوا مورابباسی، بیشیرر دیر. سونرالاردا منیم ده بو ایشلردن خوشوم گلدی و چون هر شئی ییه بیله رم و ایرگنمه رم، هر شئیی بیر بیرینه قاتیب، تازا بیر شئی دوزلتمک دن خوش اولارام. آنام منیم تاپیشیرغیملا، بو سونرالاردا گیردکان لپه سی یا پوسته یا دا هر ایکی سیندن موراببالارینا قاتار دیر.
هله ایندی ده وارکی منیم بو موراببالاردا گوزوم وار. دئمه مال یاغین یا کره نی اردیب و ساری یاغا چئویرمکدن. من ساری یاغی هر شئی دن چوخ سئورم. حتی بو کانادا دا یاشارکن بئله، آنان منه تبریز دن ساری یاغ آلیب گوندرر.
بونلارین هامیسی بیر یانا، آذربایجان "توت دوشابی" بیر یانا. چوخ اوشاقکن، توت دوشابین بیشیرمه نی گورموشم و باشاریرام. بو کانادا دا هر میوه دن دئسن، وار ها اما نه دن دیر بیلمیرم بونلار توت دان قورخورلار و اونو یئمیرلر. بیلمیرلر توت نه دیر. بونون اوچون بو میوه نی چوخ ساخلامیرلار.
کوچه باجادا، اوردا بوردا بیر توت آغاجی تاپیرام و قارنمی دویورورام. هامی گلیب گئدن لر منه باخیر. باخیشلاریندان و سورولاریندان، اوتانیرام. اگر اوتانماسایدیم، توتلارین هامیسین دریب، دوشاب بیشیرردیم.
بوردا جوربه جور دوشاب وار و اونلارا "سیراپ" دئییرلر آمما آذربایجان توت و اوزوم دوشابی منه فرقیلی گلیر. گئچن اون ایلده آنام بویوک دایی قیزی سیندان: گیله خانیم دان (قیبت یا قئبتسی آدلی کندلی دیر و یایدان یایا اوز کندلرینه گئدر) 10 کیلوو توت دوشابی آلیب و منه گونده ریب دیر.
هر دن بیر آذربایجان تامئنا تامارزئلانان دا، یئمک قاشیغی قدر آغیزما آذربایجانین قئبتسی توت دوشابی قویاردیم. چئینه مزدیم. اودمازدیم. آغزیما قویار قویماز، تامام ووجودوم باش دان آیاق دیرناغیما دک، ائسینار. ایله بیل ووجودوم دا ایستی سئلی آخئر هم ده هر یانا. آغزیم پوسگورن داغین (آتشفیشان داغی) مرکزی اولور و ایستی هم ده اوزل و تایسیز ایستی و دویغو (احساس) جانیمئن هر یئرینه آخئر.
اینان میرام بو دویغونون تجروبه سیندن دویام. چوخ شئیلری تجروبه اتمیشم آمما بو دویغونو منده تکجه آذربایجان توت دوشابی یارادئر!
یادیما گلیر دوره بر کندلردن تبریزین کوچه لرینه دوشاب گتیرردیرلرو سسلنردیلر: اوسکووو دوششابئ! آی اوسکووو دوششابئئئئئئئ!!
وای نه نه وای، آغزیمین سویو آچیل دی. من دوروم گئدیم بیر شئی یئییم. بئله اولماز!
No comments:
Post a Comment