هانکی شعره هوسیم
شعرین،
شاعیر
دئمک اوچون
اتکی بوراخماق گره کیر
یولو گوسترمک
یولا سالماق،
یولا دوشمک،
یوللاشماق گره کیر
یول اولوبان یورومک گره کیر.
دوزو، یانلیشی
گورمک
.یاشانمیشلاردان درس آلماق گره کیر
دوغرویا، دوغرو دئییب، یورومک
یانلیشدان چئویرمک گره کیر
توپلومو، بیر آدامی، عاییله نی
دوغرونو، جسارتی
آهارلامق گره کیر
یانلیشی ییخئب، چئویرمک گره کیر
یالانی یاخیب، یاندیرماق گره کیر
شاعیرین اوزو، سوزو اولمالی.
شاعیرین،
شعرین
یوخدورسا بیر سوزو،
یارادانمیرسا بیر دوشونجه
آیاقلاندیرانمیرسا
دویقولاری
جوشدوروب، داشدیرانمیرسا
ایچی بوش، تاولایئجی، یوخولاتماق
اوچون تسبیح کیمی
دالبادال دوزولموش
کار، کور، لال سوزجوکلرین
قورقوسوندان باشقا می دیر؟
شعرده، سوزون قاطارلاماسی
موسیقیسی، هاواسی،
شعرین وزنی، پایاسی
هانکی درده درمان اولابیلیر کی؟
سوزسوز، حرکتسیز،
یولسوز، آماجسیز
شعر،
تریاکا، معتادا
منقله، کوموره،
یولداش اولماز می؟
شعرین سوزو،
دیلی اولمالی
دیلسیز شعر، نه دیر؟
اتکیسی یوخ، شعرمی دیر؟
حرکتسیز، یولسوز
شعرمی اولار؟
قورآندا بیر قیمتلی سوز
آللاهین دیلیندن
عملسیز، اینانجسیز سوزلره،
"اششک بئلینده کی کیتابلار یوکو"
اونلاری یازانلارا، اوخویانلارا ایسه
اششک دئمیش.
صورت الحمار دئمیش.
اششک،
یاسین داشیسین
صاباحدان آخشاما
سحره دک
دینله سین آیاتی
موللادان
اتکسیز قورآن
یولسوز آیت
بورسوز - بوجاقسیز اولسا بئله
هانکی درده درمان اولسون.
بیر شعر کی آیئلتمایا یاتانلاری
بیر شعر کی دورقوزمایا اولولری
بیر شعر کی یول آچمایا
قارانلیقلارا ایشیق ساچمایا
باغلی قوللاری، باغلی اینسانلار
آچمایا، بوراخمایا
عوصیانا، قاچمایا
و ... یولا
هوسکار تمزسه
شعر دیر می؟
مين ایل شعری اولان توپلومون
سونونا،
بو آنینا
یاشامینا
دوروشونا،
باخئشینا
یئریشینه
توپلومونون دورومونا
اینسانلیقین سوییه سینه
باخاندا
نه گورونور دییه
سورمالی دیر،
شعرین نه لیگیندن
آماجیندا
ایشله ییشیندن
یارادئشیندان
سور
سورقولاماقدان قورخما
قورخو اولومون قارداشی.
شعرین
هانکی اتکیسی یاشار
یاشادار
یول آچار قارانلیقلاردا ایندی؟
مين ایل شعرین وار؟
مین ایل دیلین وار
یازین
کیتابین وار؟
ایندی ایسه هانکی اویونو قورور؟
هانتکیسین یارادیر؟
هانکسی سوکونو
حرکته گوتورور؟
نه یارادیر؟
نه یئخیر؟
هانکی یولا گوتورور خالقی؟
هانکی یانلیشلاردان قایتاریر؟
هانکی اومودو اکیر اورکلرده
هانکی بوزلوقدا بیر قارچیچهگی بیتیریر؟
هانکی دردلره درمان یاخیر؟
هانکی یارانی باغلیر؟
شعر، بیر اویونمودور؟
من،
معناسیز اویوندا
یوخام
اولمام دا
هدره ویرمم قیمتلی عومرو.
سوز،
سوز داغارجیقی
جیریق اولورسا
یا کی بینیمی دولدورماق
اسیر اتمک
منه،
کیملیگیمه
مالیک چیخماق
ایستیر بو شعرده ایله.
من ایسه
ساتیلیق
مال دئییلم
قول
اولماق ایسته میرم.
شعره قول اولماق ابدا.
دوشونجه، حرکت،
جریان، آیدینلاشماق
آیئلتماق، پوسگورتمک
منیم شعره هوسیم دیر.
انصافعلی هدایت
17 مارچ 2025
No comments:
Post a Comment