جهالت موهندیسلیگینه غلبه 221
بیتیک آدی: قوس نامه
یازار: محمد بن شیخ مصطفا سیلی
دیل: تورکجه
یازی طورو: الیازما - دوزیازما
الیفباء: تورکو - عربی
قونو: آراشدیرما - اوخ لا یای - ساواش سیلاحی
چاغ: امیر سولیمان چلبی بن بایزید خان بن مرادخان (808 هیجری قمری ایللر جیواریندا)
ساخلانئلان یئر: فرانسه
نوسخه می: نوسخه گورونور
ترجومه: ترجومه ایله آراشدیرمانین بیرله شمه سی
جهالت موهنیسلیگینه غلبه نین 221 اینجی بولومونده، تورک اینسانینین یاراتدیقی دیل-یازی اویقارلیقلاریندان داها بیر خزینه ایله تانیش اولدوق.
بو بیتیکین آدی "قوس نامه" دیر. یازارین آدی ایسه "محمد بن شیخ مصطفا سیلی" دیر. بونون یازاری بیر سیاحیمیش. دونیا ائولکه له رین دولانا دولانا، گه لیب، "انقد شهرینه" یئرله شرکن، بو بولگه حاکیمینه قوناق اولوب. اونلا دئیب دانئشارکن، عرب دیلینده اولان "قوس نامه" حاقدا سوز دوشموش.
اورانین حاکیمی “امیر سولئیمان چلبی بن بایزید خان بن مرادخان” ایمیش. امیر سولئیمان 779 اینجی هیجری قمری ایلینده دوغولموش. آنقارا (آنکارا) موحاریبه سیندن سونرا، عوثمانلی فیطرت دوره سی باشلاندیقی چاغدا، امیر سولئیمان، 804 هیجری قمری ایلینده، “رومئلی” ده، اوزونون حاکیمیّه تین قورموش. آمما 813 هیجری قمری ایلنده، "ادرنه"ده اولدورولموش.
یازارلا امیر سولیمانین تانیشیقلیقی 804 ایله 813 هیجری قمری ایللر آراسینا دنگ گه لیر. اونلارین گوروشله رینین بیرینده، امیر سولئیمان، بو دونیانی گیزمیش، ساوادلی آدامدان ایستیر کی اونا، هابئله ایسلام یولوندا ساواشان غازیله ره "قوس نامه" کیتابین عربجه دن تورکجه یه چئویرسین تا هر ایکیسی ده ثاواب قازانسینلار.
یازار بو تکلیفی قبول ادیر. آراشدیرمایا باشلیر. بیر چوخ ساواش-سیلاح اوزمانلاری ایله گوروشور. اونلارین "اوخ" لا "یای" حاقدا اولان تجروبه له رین دینلیر. اونلاردان اوخلا یای حاقدا بیر چوخ شئیلر اورگه نیر. سونرا بو بیتیکی یازماغا باشلیر.
اونو، عربجه دن ترجومه یه اده رکن، کندی دوروشمالاری ایله تجروبه لرینده بیتیکه آرتیریر. بئله لیکله، بو بیتیک، عربجه “قوس نامه” دن داها آرتیق تجروبه یه دایانان بیر بیتیکه چئوریلیر.
دوز دور کی یازار بیر اوزمانلیق آلانی اولان بیتیکی عربجه دن تورکجه یه چتویره جک آمما اگر او اوزمانلیق آلانی ایله تانیش اولماز ایسه، سیلاحین ایشله ییشی ایله تانیش اولماز ایسه، سیلاحی ایشلتمه نی بیلمز ایسه، یانی، قونونو هم دوشونجه اولاراق، همده ایشله ییکده آراشدیرمامیشسا، بیلمیرسه، اوندا دئنه ییمه ال تاپمامیشسا، او قونو حاقدا نئجه بیر بیتیکی یازیب، او قونودا اوزمان آداملارا بیلگی همده ایشله ییک بیلگی وئره بیلر کی؟
یانی، آراشدیرما، هر بیر کیتابی یازماق یا هر بیر قونو حاقدا قلم سورمک ایچین، ان چوخ گره کن قاورام همیده قونو دور.
کیتابین سون صحیفه سنده، بیر تاریخ گورونور. تاریخ هیجری قمری 953 ایلینین سون چاغلارین گوسته ریر آمما بو تاریخ دوز-دوغرو گورونمور.
نییه کی یازار، امیر سولئیمانلا 804 له 813 اینجی هیجری قمری ایللر آراسی گوروشوب، یازی سیفاریشین آلمیش ایسه کی دوغروسودا بو گورونور، اوندا بو الیازمانین عومورو 640 ایل جیواریندا اولمالی دیر.
آمما اگر بیتیکین سونوندا کی چاغی گوز اونونده توتارساق، حسابلاساق، بیتیکن یازیلماسیندان 494 ایل گئچمه لی دیر.
بو ایکی تاریخ آراسیندا، 140 ایل جیواریندا آیریلیق گورونور.
بو آیریلیقی نئجه چوزمک اولابیلر دییه دوشونمه لی یدر.
بیزه بئله گلیر کی کیتابین ایچینده کی گوروش تاریخی دوغرو اولابیلیر. یالانا یئر یوخدور. نییه یالان یازسین کی.
اوندا ایسه، بیتیکین سونوندا کی چاغ حاقدا ایکی گومان اورتایا چئخیر. بیریسی بو دور کی یازار، چاغی یازارکن یانلیشلیقا دوشموش. بو اولاسیلیقین اولاسیلیقی آز دیر. چون بئله آراشدیرماجی بیر تورک اینسانی، تاریخی ده آراشدیرمیش اولابیلیر.
اوندا ایکینجی اولاسیلیقا یول آچیلیر. اودا بو دور کی بو الیازما، شیخ موصطبا اوغلو محمدین یازدیقی"قوس نامه" دن یازیلمیش بیر نوسخه دیر. اوندان دولایی، نوسخه یازاری، بو تاریخی قویموش گورونور.
هر حالدا، بیتیک، تورکجه، سسلی سوزلرله، الیازما-دوز یازما، آراشدیرما، اوزمانلیق آلانی، اوزمانلار اوچون، تجروبه یه دایاناراق، تئوریک - گوروشسل بیر بیتیک دیر. بونلاردان دولایی دا تورک اویقارلیقینین اونملی تکنولوژیک-آراشدیرما بیتیکله ریندن بیری دیر.
انصافعلی هدایت
٠١ جمادی الثانیه ١٤٤٧
