جهالت موهندیسلیگینه غلبه 220
بیتیکین آدی: درة العقاید فی ابطال عقاید الفواسد
یازار: سید مصطفی وانی بن داماد محقق ثانی بن شیخ محمد وانی
دیل: تورکجه
الیفباء: تورکو - عربی
یازی: دوزیازی، الیازما
قونو: ایلاهیّات - دین ایچی فلسفه (کلام)
ساخلانئلان یئر: سولئیمانیّه کتابخاناسی - ایستانبول - تورکییّه
اصل یازی: اصل یازی گورونور
جهالت موهندیسليگينه غلبه نین بو گونکو برنامه سینده، بیر کیتابلا تانیش اولدوق. اونون یازاری، دین ایچی فلسفه سینده کی اونا "علم کلام" دئییلیر، اوز زامانینین اوستادلاریندان ایمیش.
بیتیکین آدی "درة العقاید فی ابطال عقاید الفواسد" دیر. یازارین آدی ایسه "سید مصطفی وانی" دیر. یازار، اوزون همیده آتاسی ایله باباسین، بیتیکین بیراینجی هابئله اوجونجو ورقله رینده تانیتدیریر.
او بو حاقدا یازیر: "زیرا تمدح دکل بلکه تحدیث نعمتدر هر نقدر که تحقیق مسائل اولنمشدر قُحِّ علماء روم اولان فاضل صمدانی جدّم شیخ محمد وانی عالم ربانی بابام داماد محقق ثانی استادم علیّ العریانی رحمه الله علیهم" دییه قلمه آلمیش دیر.
قونونون داوامیندا، بیتیکین تورک دیلینده اولماسی ایله یازیلماسی حاقدا دا بئله یازمیش: " حل کلی اتدیکلری مقام فحول علمادن اخذیله لسان تورکیه مترجم اولمشدر بقدر الطّاقه البشریه مز لقه اقدام اولوب معرکه آرای بحثلری بر خوشجه اداء ایلدم تفهیم ده اسهل طریق اوزره بیلدوربده مقدور بر صرف قلدم و بر وجه وجیهه دخی درّ نفیسه صرف ایچنده واحده اولدیغی و جمله انجولردن بها جهتندن اورندیلندگی کبی کذلک ترحمه اولنان رسالمک جمیع مسائلی عمیقه سی کتب کلامیّه دن کرم و الهی ایله دُرّ و لطیف مثال دُروُلمشدر تا کم سائر تورکیه ترجمه اولنان رسائل ایچنده خواص و عوامه نفعی جهتندن بر اوله زیرا هر شئیک لبّی و مسائل مشکله نک حلّلی متاداول و معتبر اولان کتابلری تتبّع ایله ثبت و کتب اولندی کرچه ترکی رساله سی چوق حدّ و پایانی یوق" دییه یازمیش دیر.
یازار، بو کیتابی بیر گیزلی سورو ایله باشلیر کی فرض نه دور؟ واجیب نه دور؟ دییه سوروشور.
اوزوده اونا جاواب وئرمه گه چالئشیر. اونا گورا، اگر بیر کیمسه "فرض"ین نه اولدوغون بیلمز ایسه، تکلیکده قئلدیقی صلاتین ثاوابی یوق دور. فرضین آنلامینین نه اولدوقون بیلمه سی اوچون، هابئله ثاواب قازانماسی اوچون، او جاهیل آدام، عالیم محضرینه گئده رک، اورگنمه لی دیر.
اونون داوامیندا بیر حدیثه بارماق باسیر. حدیثده بویورموش "انّ طلب العلم فریضه علی کل مسلم و مسلمة". بئله لیکله ده "علمی" هر بیرارکک هابئله هر بیر خانیم موسلمانا فریضه بیلیر.
سونرا کلام علمیندن، تاریخدن، سوز آچیر.
یازارین الیازماسی، اوزونه تای، چوخ اوزل دیر. بیرینجی ال یازما اولدوقوندان، سوزله رین نئجه یازیلماسی، سهو یازیلانلارین سیلیب، یئنیدن یازیلماسی یادا سهو یازینی دوزلتمک اوچون، اونون اوستون نئچه دفعه یازاراق، دئییشدیرمه گه چالیشماسی، جوهه رین داغیلماسینا، صفحه نین قارالماسینا، اوخوجونون زورا دوشمه سینه نه دن اولوب دور.
بونلارلا بئله، بو بیتیکین اوخوماسی چوخ دا زور اولماسین گرک. هر بیتیگه تای، بوندان دا بئش- اون صحیفه، دوغرو اولوب اولماماسینا باخمادان اوخونورسا، اوخوجونون گوزله ری ایله بئینی قلمه، قلمین داورانیشینا، حرفیله رین بیر بیرینه یاپیشدیرماسینا عادت ادر. اوندان سونرا، اونو اوخوماق، هابئله اونو آنلاماق داها قولای اولار.
بو بیتیکین یازاری، یازیلاریندا بیر نئچه ایش گوروب دور. بیری بو کی تورک دیلینین بیر لهجه سی اوزه رینه یازیب دیر. ایکینجیسی بو کی حرفله رین اوستونده اونلارین سسلرین یئرلشدیریب دیر. اوچونجو بو کی بیر چوخ عرب سوزونون یئرینه اونلارین تورکجه سین یازیب.
بونلارا گورا، بو بیتیک، همده تاریخه باخیشی، آنلایئشی، تورک اینسانی همیده تورک دین عالیمینین دوشونجه لرین گوسته ریر. بودا، تورک اویقارلیقلارینین نئجه تاپئلماسین همیده اویقارلیقلارین، دوشونجه له رین، آنلایئشلارینین اینکیشافین گووسته ریر.
انصافعلی هدایت
٠١ جمادی الثانیه ١٤٤٧
No comments:
Post a Comment