جهالت موهندیسلیگینه غلبه 224
https://youtube.com/live/hLZChXa1biE
بيتیک آدی: قهرمان
یازار: بللی دئییل
دیل: تورکجه
الیفباء: تورکو - عربی
یازی: دوزیازی - اوزون حیکایه (رمان)
چاغ: 1123 هیجری قمری ایلی
جیلد: بیرینجی جیلد (دورد جیلیدن بیراینجیسی)
صحیفه سایی: 450 صحیفه
ساخلانئلان یئر: گالیکا (فرانسه میللی کیتابخاناسی)
بو گون، تورک اینسانینین یارادتدیقی اویقارلیقلاردان باشقا بیر اویقارلیقلا تانیش اولماق شرفی ایله شرفلندیک. بو اویقارلیق ساحه سی "اوزون حیکایه" یا اوزون ناغیل دیر کی فیرنگیلر اونا "رومان" آدین وئرمیشلر.
بو گونه دک (بو اویقارلیقلا تانیش اولانا دک)، بئله دوشونوردوک کی تورکلر، اوزون حیکایه لری، قوشمالاردا، آشیق-ساز-سوزله رینده یارادیب، ساخلیرمیشلار.
بو گون ایسه، بیر ادبیات عاله میندن یئنی بیر تورک همیده اوزون ایللر ائونجه یازیلمیش ادبی اثرله تانیش اولدوق. اورگندیک کی بیلدیگیمیز ایله بیلمه دیکله ریمیزی هامیسی بیزه اورگندیلیلن له رین ترسه سینه ایمیش.
بودا بیزه یئنی دن گوسته ردی کی دوشمانلاریمیز، یانی دیلیمیزی، عاغلئمیزی همیده وطنیمیزی ایشغال ادن گوجلر، تکجه دونیانی یوخ بلکه اوزموزوده اوزوموزه ترسه تانیتمیشلار.
بلکه بو بیتیکدن ائونجه ده، اونلار، یوزلر، مین لر اوزون حیکایه لر تورک اینسانلیقی قلمی ایله یارانمیش دیر آمما بیزله رین بئینی ایله دیلی دوشمان ایشغالیندا اولدوقوندان، دوشمانین یاراتدیقی همیده ایداره اتدیگی دوشونجه، تعلیم-تربیه هابئله اوکول سیستیمله ری ایذین ورئمه میشلر بیز یاراتدیقلاریمیز اویقارلیقلارلا تانیش اولالیم. اونلاری اوخویالیم. بیله لیم. آنلایالیم.
اونلارلا تانیش اولور ایسک، یارادیجیلیق گوجوموزله، دوشونجه میزله، فلسه فه میزله، دونیایا وئردیگیمیز آنلام-آنلایئشلادا تانیش اولاریق.
نییه ایذین وئرمه میشلر؟
چون اوزوموزون تورکجه اویقارلیقلاریمیز ایله تانیش اولسایدیق، اوزوموزدن، همیده دوشمانلاردان سوراردیق کی نه دن، هانکی سببلردن، نییه بیز بوگون،، گئچمیشله ره تای دونیادا باش دئییلیز؟
سوراردیق؛ نه دن بیز تورکلرین دیلی، آغلی، وطنی، ائکونومیسی، تعلیم-تربیه سی، میدیالاری، اوکولو، بیلیم یوردلاری، … دوشمانین دووشونجه له رین یایئرلار، اویره دیرلر؟
اوندا دا، بو اونوموزده کی بو سورولارا تای یوزلر سورولارا جاواب آختارماق زوروندا قالاردیق.
جاوابلاری بولدوقجا، همن اویقارلیقلاریمیزی تانیدیقجا، کندیمیزه، میللی همیده اولوسال بیرلیگیمیزه، گوه نردیک. یئنی دن بیرله شه رک، میللی همیده اولوسال دووله تیمیزی قوراردیق.
چوخ حایئف اولسون کی بو اوزون حیکایه نین (رومانین) یازارینین آدی، بیر اینجی جیلدده گورونمور. رومانین آدی اسیه "قهرمان" دیر کی بو جیلدین ان باشیندا، همیده یئدّینجی صحیفه سینده یازیلمیش دیر.
لاکین، فرانسه جه، بو بیتیکه یازیلان تانیتیمدا، اونا "قاتیل قهرمان" آدین وئرمیش، تانئتمیشلار.
هابئله بو جیلدین ان سون جومله له رینده ن بللی اولور کی یازار بو حیکایه نی دورد جیلدده یازمیش یادا یازماقی آماجلامیش دیر.
بوندان دولایی، بو جیلد، بیتیکین بیر اینجی جیلدی سایئلیر. یازار، بو جیلدده یاشانانلاری 450 صحیفه ده جانلاندیرئب.
یازارین سون ایکی صحیفه ده کی یازیلارینا باخارساق، "تاریخ ملوک قولینجه هوشنگ نام دورت معتبر کتابدر قصه قهرمان دورت معتبر کتابدر چلد اولی بودر کم بو قدر بیان اولدی" اوزله شیریک.
بوردان دا بو آنلام اله گلیر کی یا یازار بو سکگیز جیلیدلیک کیتابلاری یازمیش یادا همن سکگیز جیلید کیتابلارین اوزوندن یازاراق، اونلاردان نسّاخلیق ادیر.
بیز، بو گون، بو بیتیکدن بیر نئچه یاپراقی اوخومایا چالیشدیق. دوز-اسکیک، اوخودق.
اوخودوقلاریمیزدان بونو آنلادیق کی "قهرمان" آدلی حیکایه نی، یازارین اوزو یازمیش آمما یازارکن، حیکایه نی اعتبارلی-دایاناقلی گوسته رمک اوچون، دفعه لرجه، اونون حیکایه له رین، تاریخچیله ره یادا راویله ره باغلامیشدیر.
یازارین بو جیلدین ان سون سوزونده قویدوقو تاریخ، یوز ایگیرمی اوچ (123) دور. بو تاریخ بیزه دوغرو گلمه دی.
نییه کی بیز هر نه دن دولایی، بو بیتیکی، سبب سیز، ده لیل سیز، عوثمانلی چاغینا باغلادیق. اوندان دولایی، بو بیتیگین، مین یوز ایگیرمی اوجونجو (1123) هیجری قمری ایلینده یازیلماسینا قرارلاندیق.
بیزیم توتوم دوغرو اولورسا، بیتیکین عومرو 324 قمری ایلیدیر آمما دوغرو اولمازسا، 123 هیجری قمری دوغرو اولورسا، اوندا بو بیتیکین عومورو مین اوچ یوز ایگیرمی دورد (1324) ایل اولار.
حیکایه نی اوخورکن، نه دنسه، بیزیم عاغلیمیزا "صفوی" دووله تینین قوروجوسو؛ صفویلی شاه ایسماییل همیده اونلا باغلی اولان حیکایه لر گلدی.
آمما یازار، حیکایه نی ایله قورور، ایله آپاریر کی اونون کوکله رین، درین همیده قارانلیق چاغلاردان گه لن آدلاردا باغلی گوروروک.
بیتیکده، ایکی گوج، بیر بیرله ری ایله قارشی قارشیا دوروب، بیر بیرله رین آرادان آپارماق ایستیرلر. بیری شئیطانا باغلی گوچ صاحیبله ری، بیرده اینسانلیقا باغلی گوجلوله ر دیر.
شئیطان، اوز یان یوره سینده کی له ره عاغئل وئریر: “اینسانی سیندیرماق یولو، اونلارلا ساواشماقدان گئچمه ز. بلکه اینسانلارین بئینین، دیلین، دویقولارینین ایشغالیندان گئچه ر”. دییه سویله ر.
شئیطانین وئردیگی نصیحتدن، گوستردیگی یولدان، شئیطان گوجله ری بئش یاشئندا بیر اینسان ائولادین اوغورلایئب، اونون بئینین یوماغا، دوشونجه له رین دئییشدیرمه گه، دویقولارین دونده رمه گه، دونیادان اولان آنلایئشینا یون وئرمه گه، دوستو-دوشمانی یئنیدن تانیتمایا، ... چالئشیرلار.
شئیطان گوجله رینین اینسان اوزه رینده بو بئیین یئخاما چابالاری سونوج وئریر.
اوشاق بویویورکن، اینسان قاتیلینه چئوریلیر. اوز اولوسونا، خالقئنا، اینسانئنا همیده اینسانلیقا قنیم که سیلیر.
حایئف اولسون کی بیز تورکلرین بیر چوخو، ده رین فلسه فه اوزه ره یازیلمیش بو کیتابی اوخومامیشیق.
بیزه بئله گلیر کی “قهرمانین یازاری، قئرقئز یازاری "چینگیز آیتاموف”-ون یاراتدیقی "گون اولور عصره بدل" آدلی یازدیقی بیتیکدن چوخ ائونجه یارادیلمیش گورونور.
آیتاموف-ون بیتیکینده، دوشمن نئجه اینسانین عاغلین، هوشون، دوشونجه سین، دوستدان، دوشماندان، اولوسدان اولان آنلایئشلارین دئییشدیرمگی آچیقلایئب.
عجبا چینگیز آیتاموف، یوزلر ایل ائونجه یازیلمیش قهرمان آدلی کیتابین اوخویاندان سونرا "گون اولور عصره بدل" آدلی حیکایه نی یازمیش می؟
انصافعلی هدایت
٠٤ جمادی الثانیه ١٤٤٧
No comments:
Post a Comment