جهالت موهندیسلیگینه غلبه 206
1:
بیتیک آدی: خلاصه الابدان
یازار: بیتیکین اصلین یازان تورک؛ عمر افندی بروسوی
بیتیک کامیل دیرمی: یوخ، بویوک کیتابدان خولاصه دیر
یازی دیلی: تورکجه
یازی طورو: دوزیازی- الیازما
الیفباء: تورکو-عربی الیفباء
قونو: طیب، مزاجلار، یئمکلر، یئمه مکلر، داوالار-درمانلار
چاغ: 1183 هیجری قمری (264 ایل ائونجه یازیلمایش)
نوسخه می: خولاصه اولان بیر نوسخه دیر
نوسخه یازاری: بللی دئییل
صحیفه سایی: 26 صحیفه
ساخلانئلان یئر: ایران ایسلامی شورا مجلیسی
جهالت موهندیسلیگینه غلبه نین 206 اینجی بولومونده، ایکی درین، آنلاملی، اوزمانجاسینا، تورکجه ده یازیلمیش، نئچه یوز ایللیک الیازما کیتابلار ایله تانیش اولماق شره فین قازاندیق.
بونلارین بیری "خلاصه الابدان" آدلی کیچیک بیر کیتاب دیر. بو بیتیک ایران آدلانان سیاسال وارلیقین ایسلامی شورا مجلیس کیتابخاناسیندا ساخلانیلیر.
کیتابین آدیندان بللی اولدوقوندان، ایگیرمی آلتی (26) صحیفه سی وار. بو نوسخه نی یازانین آدی بللی دئییل آمما اصیل کیتابین یازیرینین آدی ایسه "عمر افندی بروسوی" دیر. نسساخ، بو کیچیک کیتابی، ایکی یوز آلتمیش دورد ایل ائونجه، (1183 هیجری قمری ایلینده) یازمیش دیر.
نسساخ یا نوسخه نی یازان، عمر افندینین یازدیقی بویوک طیب اثریندن، بو خولاصه نی قلمه آلمیش.
کیتابین ایچی، ایکی یئره بولونور. اصلی بولوم کی "خلاصه الابدان" آدلانیب، کیتابین اورتاسیندا وبیر قاب ایچینده یئر آلمیش آمما "قراق" یا حاشیه آدلاندیریلان یئرده یازیلان یازیلار ایله ده داوالار حاقدا یازیلانلارین بویو، اصلی کیتابدان چوخ اوزون دوز.
کیتاب اوزمانجاسینا، اوزمانلار اوچون، آمما چوخ ساده و راحات اوخونا بیلیر بیر تورکجه ایله قلمه آلینمیش گورونور.
بوندان بئله کی کیتاب، اوخوجولار الینده چوخ ایشله نیب و یازیلارین بیر چوخونون یازیسی گئتمیش، سیلینمیش کیمی یادا کوهنلمیش کیمی گورونور، آمما الیازماسی چوخ گوزل یازیلیب. بودا، بیتیکین اوخونماسین، داها چوخ قولایلادیب دیر.
کیتابین ان باشیندا کی صحیفه لرینده، اینسانین مزاجیندان سوز ادیر. اینسانین مزاجی ایله آیلارایله ده هاوالار آراسیندا ایلگی قوراراق، هر بیر آیدا، نه لر یئمه لی دیر و اینسانانین ساغلیقینا فایدالی دیرر، اونلاردان سوز آچیر.
البتته، او یمه لیلردن و او ایشلردن ده کی همن آیدا چکینمه لی دیرلر، اونلاری دا هر بولومده گوسته ریر.
نسساخ، کیتابین تورکجه اولماسینا چوخ اوزه نیر. بوندان دولایی دا چالیشیر تا هر بیر عربجه ایله فارسجا اولان سوزجوکله ره، تورکجه اولان سوزجوکلردن آد آپارسین.
بونون اوچون ده آیلارین آدلارین تورکجه یازمیش؛ "اول بهار"، "اورتا بهار"، "آخر بهار"، "اول یاز"، "اورتا یاز"، "سون یاز"، "اول کوز"، "اورتا کور"، "آخر کور"، "اول قیش"، "اورته قسش"، "آخر قیش" دییه یازمیش دیر.
2:
بیکین آدی: دیوان امیر علیشیر نوایی (بدایع الوسیط)
یازار: امیر علیشیر نوایی
قلمه الان: محمود کاتیب
یازیلان یئر: هرات - بو گونکو افغانیستان آدلانان یئر
یازی چاغی: 900 هیجری قمری (547 ایل ائونجه)
دیل: تورکجه
لهجه: افغانیستان تورکجه سی؛ جغتای تورکجه سی
الیفباء: توکو-عربی
ساخلانئلان یئر: بللی دئییل
کیتاب چوخ گوزل و گوزه چارپان رسملر همده بویالارلا نخیشله نیب دیر. آمما بو نوسخه، زمان باسدیقجا، یازیلاریندا اسکیلمیش، بویالارین رنگی قاچمیش، سولموش گورونور.
بوندان دولایی، همده جغتای اولدوقوندان دولایی، همده یازینین ایله الیفبانین دولاشیم ایله رسمیندن دولایی اونو اوخویابیلمه دیک.
بلکه امیر علیشیر نوایی دن تانیمایا چالیشدیقیمیز اونجه کی بیتیکله ره تای، بو بیتیکین ده چاپین تاپابیلیرسک، اوخوماسینا گوزوجوز چاتار.
انصافعلی هدایت
١٤ جمادی الاول ١٤٤٧
No comments:
Post a Comment