جهالت موهندیسلیگینه غلبه 205
1
بیتیک: عیرفانلا بدن
یازار: بللی دئییل
دیل: تورکجه
الیفباء: تورکو-عربی
چاغ: بللی دئییل
ساخلانئلان یئر: بللی دئییل
قونو: عیرفانین بدنده کی یئرلری
یازی طورو: الیازما - دوز یازما
جهالت موهندیسلیگینه غلبه (چالماق) برنامه سی نین 205 اینجی بولومونده، تورک میلله تینین یارادیجیلیقلاریندان، اویقارلیقلاریندان داها ایکی ینی الیازما-دوزیازما، هابئله ایکی تورکجه بیتیک ایله قارشیلاشدیق. بو قارشیلاشماق، بیزیم اوزه ریمیزده درین اتکی بوراخاراق، گنجیلیگیمیزده کی بو ساحه ده اوخودوقوموزلاری هابئله اوخومادیقلاریمیزی، حسرت ایله خاطیرلاتدی.
دوز دور کی بورادا ایکی تورکجه و اوزمانجاسینا یازیلمیش کیتابلا اوزلشمه میز گورونور آمما اصلینده، آلتی "ریساله" ایله ال اله وئرمک مجالین قازاندیق.
کئشگه، اونلاری بیر اوستاد یانئندا اوخویاراق، ایچ دونیامیزین بیر پارچاسینا چئویره بیلسه ایدیک.
عجبا، هر بیر شئیین، اوزل واختی وارمی؟ یوخسا بو قاورام اوزوموزون تنبللیگیمیزی قبوللانماق اوچون یاراتدیقیمیز بیر یانلیش قاورام دیرمی؟
کیتابین تومونون هر جومله سی، ساده، آنلاشابیلیر، اوخونابیلیر، دوشونه بیلیر، عاینی حالدا اوزمانلیق تورک دیلی ایله یازیلمیش دیر.
بیراینجی بیتیک، تورکجه-عربجه الیفباسی ایله یازیلمیشسادا، تورکجه میزین اویغور لهجه سینده یازیلمیش دیر. اویغور لهجه سینده اولماسینا باخمایاراق، بو بیتیک، چوخ ساده، اوخونابیلیر، آیدین الیازما-دوزیازما دیر.
بو اوقیانوسو اون بیر صحیفه یه سیغیشدیران تورکون آدی بللی اولماسادا، یازار چالئشیر تا موسلمانلارین توپلولوقلاریندا کوک سالمیش ایسلامدان کوکلنمیش عیرفانی، اینسان بدنینده همده چیزدیگی ساده رسم لر اوزه ره آچیقلاسین.
یازار، دوشونجه اوقیانوسونون آچیقلامالارین، اون بیر صحیفه ده خولاصه اولاراق یئرله شدیرمه گه چالیشمیش دیر.
آمما بو، اون بیر صحیفه دن عیبارت دئییلدیر بلکه هر بیر کلمه ده، بیر اوقیانوسجا تورک اینانجین، دوشونجه سین، دویقوسون، آنلایئشین، دئنه ییمین (تجروبه سین) یاتیرمیش گورونور.
هر کیم کی بو اون بیر صحیفه لیک اوقانوسو "پی.دی.اف" گورونتولو تاسارلامیشسا، اونا "ترسیم عرفان اسلامی در قالب بدن انسانی" آدی وئرمیش.
بو او حالدا دیر کی کیتاب، باشدان آیاقا تورکجه همده ایغور تورجه سینده قلملممیش دیر.
شاید آد قویمانین عیللتی بو اولا کی یازار بو اون بیر صحیفه لیک اوقیانوسو، گئچن ایکی یوز اللی ایلده و بیر مدرسه-مکتب دفتری اوزه رینده یاراتمیشدیر.
اوندان دولاییدا، گومانیمیزجا، یازینین عومورو 250 ایلی گئچمه مه لی دیر.
2
بیتیک آدی: مجموعه الرسائل فی التصوف
یازار: بئش یازار وار
چاغ: عوثمانلی چاغی
دیل: تورکجه
قونو: عیرفانلا دوشونجه ایله برگه دیندن درین آنلایئش
یازی طورو: الیازما - دوزیازی
نوسخه می: نوسخه دیر
ساخلانیلان یئر: ایستانبول بیلیم یوردو کیتابخانه سی- ایستانبول
بو گونون “جهالت موهندیسلیگینه غلبه”نین ایکینجی بولومونده، داها بیر باضا بیتیک ایله کی عیرفان حاقدا یازیلمیش، قلمه آلینمیشلا تانیش اولدوق کی بئش دوشونورون دوشونجه لرین، آنلایئشلارین، تجروبه لرین، دویقولارین هابئله یاشام اوقیانوسلارین تانماق ایله ایفتیخارلاندیق و بو شرفه ایرشمگه لاییق گوروندوک.
عاریفلر، بو بئش ریساله لرده، عیرفان اوقیانوسلارنین آنلاملارین بیر ایسته کنه سئغدیراراق، یوزلر، مینلر ایل سونراکی نسیللره توحفه اتمیشلر تا اومودسوزلوق، پریشانلیق، سئنیقلیق، یوخسوللوق، مغلوبیت هابئله بئیین لری، دیللری، دوشونجه لری، دونیایا باخیشلاری، وطن لری ایشغال دئورانلاریندا، همن اوقیانوسنلاری سوزجوک کپسوللارین ایچیندن آزاد بوراخاراق، یئنیدن عنقا کیمی کوللریندن دوغاراق، قاناتلانسینلار، قالخسنلار، دوشونجه ایله گوروش، آنلایئش شهپرلرین آچسینلار. میللتله ری جهالتدن، قارانلیقلاردان، آزقینلیقلاردان داها دوز یولا چکسینلر چیخارسینلار.
حایئف اولسون کی گئچن ایکی یوز اللی ایلده، بیزیم سوزله ریمیز، دیلیمیز، بئینیمیز، وطنیمیز، …، مللی دوشمنله ریمیزین ایشغالی آلتیندا قالاراق، بیزلر، بو ایکی یوز ایلده اوزوموزون یاراتدیقیمیز اویقارلیقلاردان اوزاق دوشه رک، اونلاردان آیریلمیشیق. اونلاردان اوزگه لشمیشیک. دوشمه نین یایدیقی یالانلارا، "خوشباختلیق" دئئه رک اویموشوق. اوزوموزو خور گوره رک، کیملیگیمیزی، تاریخیمیزی، اویقارلیقلاریمیزی، آنلایئشلاریمیزی، دوشونجه لریمیزی، میللی تجروبه لریمیزی، مییلی دویقولاریمیزی، میللی اویقارلیقلاریمیزی، دین-اخلاقدان اولان آنلایئشیمیزی الدن وئره رک، ماشینلارا وورغونلاشمیشیق.
ماشینلارین بیزه وئردیگی راحاتلیقلارا، قولایلیقلارا اویاراق، هر طورلو وارلیقلاریمیزیدا خور همده قیمتسیز تاپمیشیق. ایش اورا چاتیب کی اونلاری اصلا و ابدا گورمه میشیک. همده دوشمنلر و اونلارین بیزدن اولان جاسوسلاری، بئیین لریمیزی مکتبلرده، بیلیم یوردلاریندا یئخایاراق، ایذین وئرمه میشلر کی اوزوموز ایله، اوزوموز کیمی اوزبه اوز اولوب، تانیش اولاق. اوندان دولایی بیزده ده بئله اوزوموزو تانیماق و اوزموز ایله تانیشلیق ایچ ایسته گی تاپیلمامیش.
اوزوموزون توکم وارلیقلاریمیزی، یاراتدیقلاریمییزی ایتیرمیشیک. دوشمه نین وئردیگین ده، کامیل شکیلده الده اده مه میشیک.
بو بیتیک، بیر موجللدده گورونورسه ده، اوندا بئش ریساله یا کیتاب وار. هر بئشیده عیرفان اوقیانوسلارین، دویقولارین، یاشارم یول تونته مین، ...، نئچه حرفلی سوزجوکلرین ایچینده گیزلتمیش، رمز و روموزلا، اوقیانوسلارین بیر پارچاسی اولمانین دادین، بیزله ره دادیزدیرماق ایسته میشلر.
بیر اینجی ریساله نین آدی "برهان العارفین و نجات الغافلین" دیر. بونون یازاری، عیرفاندا-آلله دا ایله محو و یوخ اولوب کی دیوانه لیق مقامینا چاتمیش. اوندان دولایی دا "سلیم دیوانه" آدی ایله تانینمیش.
ایکینجی ریساله ایسه "ترجمه حوض الحیات" دییه آدلانیب. بو عیرفان اوقیانوسونون یازاری رحمتلیک "محی الدین عربی" دیر کی اونو هیندوستان قایناقلارینا و عاینی آدلا اورادا بولونان کیتابدان آلاراق، ایسلام عیرفانی آلانئنا گتیرمیش.
اوچونجو ریساله ایسه "قادریه" دوشونجه سی ایله یاشامی هابئله دین آنلایئشی پئنجه ره سیندن عیرفانی آچیقلامایا هابئله اوقیانوسو، بیر قورتوم یاشاما چالیشیر.
بونون یازاری ایسه اونا "فیض قدسیه" آدین وئرمیش. یازارین آدی "شیخ موسی قادری قنوی" دیر. (عجبا کونیا اهالی سیندن دیر می؟) بو یازار، اوز اوستادینا و مورشودونه ایله بیر عشق و وفادارلیق بسله میش کی، اونون مدحین حضرتی رسولدان داحا چوخ گتیرمیش دیر.
البتته درین دوشونجه له رین نین، اصلین بیر باشقا کیتاب اولاراق، اوستادینین الینده اولدوقون سویله ییر. آنجاق، بو بیتیک، اصیل کیتابین کولگه سی کیمی دیر.
دورد اینجی بیتیک "ترجمه رساله انسان کامل" دیر کی “شیخ عبدالکریم جیلی قادری” الی ایله قلمدن دامجیلایاراق، درین-گئنیش بیر دوشونجه و یاشام اوقانوسون بیر نئچه صحیفه یه یئرلشدیریب دیر.
بیتیکین ان سون ریساله سی، "طریقتنامه قطب العارفین" آدلی ریساله یی، عیرفاندا اوزجکلر اوچون حاضئرلامیش. آمما بونلارین درینلیگینه دالماق، همده اوستاسیز، جاهازسیز، یولبلدسیز، البتته کی بیر چابادیر آمما دوزمو یوخسا چابالار هئچه گئده بیلرمی؟ بیللی دئییل آمما یاشاماسینا و دئنه ییمینه ده یه ر.
بلکه بو بئش اوقیانوسون هر بیری، عاینی قاوراملارین فرقیلی درینلیکله ریندن سوز ادیرلر. اونلاری یاشاماق اوچون، دنیزلری، ساحیللری، شهرلری، اسکی بینالاری، و ... دولانماق یئرینه، دولانماق، آختارماق، یاشامایا جیدد و جهت اتمک ایسته مزمی؟
انصافعلی هدایت
١٣ جمادی الاول ١٤٤٧
No comments:
Post a Comment