آزادلیقی اوچون هر شئی موباح دیر

وطن آزادلیقی اوچون هر شئی موباح دیر

بو گئجه بیر یوخو گوروردوم. چوخ قورخونج، چوخ هیه‌جانلی، چوخ آجی، چوخ شهامتلی و چوخ جسارتلی. دویغولار بیر بیرینه سارمالاشمیش، قارماقاریشیق حالا گلمیش دی. هر بیر شیرین دویغو، آجی دویغونون قارنیندا یاشیردی. نئجه کی آجی دویغولاردا شیرین دویغولارین ایچینده جوجریر، یاشیردی.

بیر میللت، بیر وطن، هر بیر اینسان ایشغال اولموش، آجیلارین تومون یاشیردی. باشقا بیر ائل ظفر قازانمیش، توپراق آلمیش، قان دنیزینده اوزموش، آددیم آددیم ایره‌له‌میش، هر شئیره، حتتا اینسانلارین ایراده‌لرینه، آرزئلارئنا، کونوللهرینه حاکیم اولموش فرمان یازیب، امیر ساوورموشلار.

بیر طرفدن، ایشغال اولموشلارین زحمتی و اللهرینین گوجو ایله کئفین ایچین چیغاردانلار وار ایدی. بیر طرفدن کئف نه دیر دییه‌ن ایشغال اولموشلار. هر کس بیر تیکه چورک اسیری. 

دوشمن اونلاری آجلیقا، ایشسیزلیقا، یوخسوللوقا، دیلینچیلیگه، گوز یاشلارین آخماسینا عادت وئرمیش. مغلوبلار ایسه، هر بیر چتینلیگه‌ دوزمه‌یه چالیشیر.

شه‌هرده ایکی یاشام گوزه چالیر. آج، چیلپاق اینسانلار زدرلا یئریرلر. عسگرلر ایسه مسا ادیب، گوله گوله، دسته دسته کوچه‌لرده، قادینلارا ال آتیرلار. اونلارا لاغ اده‌ره‌ک، زاما گئچینیرلر. گولمه‌کدن عسگرلرین گوزلرینده آغاپباغ دور و مرجان آخیر، قادینلارین گوزلریندن ایسه کدردن قان آخئر.

ارککلر ایسه بو شهرده یا اولوب یادا گیزله‌نیب، یوخلار. اوردا بوردا تک تک وارسادا، دوشمن اوردوسونا قوللوقچو دور. 

آجلیق، یوخسوزلوق چوخ آغیر باسقی باسیر. بیر کیمسه او باسقیدان قاچاق یولو تاپانمیر.

قادینلارین بیر چوخو، یاریم چیلپاق، قئرمئزی دوداق، سورمه‌لی گوز، ساری ساچ دولاشیب، موشه‌ری آختاریر جانیندا بیر پارچایا.

هر بیر قادین اوزون پارچالارا بورویوب گیزلتمه‌یه چالیشمیر. هئش بیری حه‌یا، آبری، ناموس گودمور. هم اوزو هم لوت-آج اتجی بالالاری یاشاتمایا باشلاری قاتئشیب. ان آبرئلی ایش، آج قارئنی، آج گوزو دویورماق.

بو شهرده هر شئی کوهنه دیر، کوهنه‌لیک قوخور. هر یئر نملی دیر، نم قوخور. هر بور بوجاق حه‌یله‌نیب، جه‌ی قوخور.

عسگرلر یاشایان یئرلر یئرلر ایسه ائشئم ائشئم ائشئلدیر. یئمک باشدان آشئر. پالتارلار ته‌پ‌ ته‌میز، گوز قاماشدیریر. توفنگلر، گوزگو کیمی گوز قاماشدیریر. عسگرلر فئز و چابوک دورلار. 

عسگرلیک قازانمیش، ایسانلارسا اودوزموش روحو داشئر، یاشئرلار. شهر ده، دیوارلاردا یا کوهنه‌لیک، شئه چکیب، توکولو یادا پار پار پالئردیر.

…

بایرام دیر، نه دیر؟ بللی دئییل. شه‌هرده حرکتلیک چوخالیر. یاری چیلپاق، دوداقلاری قئرمیزی، گوزله‌ری سورمه‌لی ساچلاری ساری قادینلار موقدّس ایشله‌رینده، عسگرله‌ره یاخینلاشیر، اونلارلا اوپوشور، اونلارلا عالم آشکارا اویناشیرلار. هامی پئچئلدیر. پئچئتی سه‌سی توم سه‌سله‌ری اورتوب باسیب. ان یوکسک سه‌س، پیچئلتی، گیزلی دولاشان سه‌سلردیر. شهرلرده، دیوارلار، کرپیجلر، سئنئق سالخاق قاپئلار، پئجه‌ره‌لر، قاپی ره‌زه‌له‌ری ده‌دن پیچیلتی گه‌لیر.

شهرده، هر بیر عسگر ایچیب، کئفله‌نیب، اوزوندن چئخیب، اوجادان گولور، سرمستلیکله، ککلیک کیمی کئفی ساز، قاقّئلدایئر.

گورونمز کورلگه‌لر شهرده، دامدان داما، دیوارلاردان آشئر. کولگه‌لر سه‌سیزلیکده چوخ احتیاطلا، بیر گوز آرخادا، بیری ساغ یاندا، بیر سول یاندا، بیرده اونده، دورد گوزلو، اورتولو، آچیق قاپیلاردان، ائولردن گئچیر.

شهرده سه‌س‌لر یاتئر. ائشیق یوخ. قارانلیق چوکوب. عسگرلرین آیاق سه‌سیندن باشقا سه‌س یوخ. کولگه‌لر، عسگرله‌ری دوره‌لیر. سیلاحلارین آلئر. اونلاری پیچاقلیر.  ده‌لیک ده‌لیک ادیر. قارا قان، کولگه‌له‌رین آرخاسیجا سوزوبور. یواش یاواش، درین سه‌س‌سیزلیکده، کولگه‌لر سیلاح داشیر. توفنکلر اونلارین بئلینده حمایل اولوب، اوزون توختاق یوخویا گئتمیش گورونور.

کولگه‌لر کوچه‌لردن، کوهنه‌  جه‌یلنمیش، نملی کوفلنمیش دیوارلاردان، داملاردان سوزوب، آولارین آولاماق اوچون عسگه‌رییه‌لره توکولور. دولاشان عسگرلر، کولگه‌لرین بئلینده‌کی توفنگله یوخ، اللهرینده‌کی کسرلرله دوعرانیر. دروازالاردان، داملاردان، دیوارلاردان یوزلر، مینلر کولگه، سه‌س‌سیز صداسئز ایچه‌لری سیزئرلار. جین‌شه‌هه‌ری اولموش کیمی،گورونمز کولگه‌لر یوزلر عسگری ده‌لیک دئشیک ادیب، تخت‌لر، یاتاقلار، دوشک‌لر، ه‌له‌فه‌لر، یورقانلار، قاپ‌قارا قان ایچیب، ایللر بویو سوسوزلوقلارینا دویمایا چالیشیرلر. ایچ‌له‌ری دویدوقجا، آغئرلاشیب، اوزانیرلار.

شه‌هر داغلاریندان صاباح گوز آچارکن، قارانلیق شه‌هردن قاچارکن، کولگه‌لر اوز گوزو، صور صوفتی باغلی، قارا گئیینمیش یوزلرمین یاری چئلپاق، آیاق یالین ارکک- دیشی‌له‌ره اویانیر.

شه‌هر یئنیدن جانلانیر، پئچئلتیلار اوجالئر. پئچئلتی‌لار گونش هئزی ایله دامدان داما، دیواردان دبوارا، قاپیدان قاپئیا، کولگه‌دن کولگه‌یه، دولاشیر: شه‌‌ری گیری آلدیق. بورا گئنه‌ده بیزیم وطن اولدو‌ وطن آزاد اولدو. سس‌لر چئخا بیلر‌."

بیردن، اوزله‌لر، یاریم یامالاق گئییملی کولگه‌لره، رنگله‌ بیرگه سس گلیر. کولگه‌لرین الی قالخئر، اوز اورتوله‌لری، کولگه‌لرین کلله‌لریندن آلیر‌. 

کلله‌لر آلئنیرکن، اورتاسا "وطن آزا اولدو… وطن آزاد اولدو . وطن آزاد اولدو … دوشمن‌‌لر وطه‌نین آلتیندا، بیز ایسه اوستونده یئر تاپدیق"

بو شهرده، هر بیر چالیشماق موقددس دیر. حتتا اوزون ساتان یاری چیلپاق، دوداقلاری قئرمئزی، گوزلری سورمه‌لی، ساچلاری سازی قادینلارین فاحیشه‌لیگی، وطن آزادلیقی، دوشمه‌ندن خیلاص اولماق اوچون، ان سون، سیلاح و اونملی ساواشین بیر تیکه‌سی ایمیش.

 بو ساواش، یوز ایل چه‌کسه‌ده، مین‌لر- میلیونلار اولو آلسادا، وطنی قانلا سولاسادا، دوشمندن تمیزله‌شدی آمما سونا چاتمادی. وطنین خیلاص ساواشی بیتسه ده، ساواش هله بوگون گوزون وطنه آچدی. 

اونده، اوزون ایللر ظفر اوچون جاندان باشدان گئچمک، با قادینلاری، اوشاقلاری، ارککلری، قوجالاری دویورماق، گئیدیرمک، کوهنه‌لیک‌له‌ری سیلمک، یئنیلیکلری یاراتماق، کیفلنمیش لری آتماق، یئخئلانلاری یئخماق، تیکیلمه‌لی‌له‌ری تیکمک، یوز ایلده پاسلانمیش بئیین‌لره برق سالماق، دونیادان نئچه عومور گیری قالمالاری جوبران اتمک اوچون اوزون و داواملی قانلی، قانسیز ساواش لازیم.

بیلمیرم یوخودان دورموشام، یا هه‌له‌ده یوخودایام. وطنین آزادلیقی شووقو، سئوینجی، سئودانی، گوله‌شی یاشیرام.

سئوینجیمدن، اونوتدوم یوخودا یاشادیقیم دوشونجه‌لرین یازماسین.

انصافعلی هدایت

13 September 2024