دامجیلانماق؛ بونون آدی شوعور
دامجیلانماق؛ بونون آدی شوعور
آیدینلیقا چاتسالاردا
چاتماسالاردا
ذره‌لر دوشوب یولا
بیرلشمه‌یه.
بیرلشمزلرسه ذره‌لر
دامجی، سئل، چای، دنیز، اوقیانوس‌دا اولماز.
دامجی دا ذره
سئل ده ذره
چای دا ذره
و دنیز ذره‌لریندن اوقیانوس دوغور.
یاخینلاشدیقجا، آرالیقدان بوشالدیقجا ذره‌لر آیدینلاشما پارتلایار هره‌نین ان درینلیگینده.
دامجیلارین سوکوتونا داملامیسان
او زامان کی توپلانیرلار
ذره‌لر بیربیرینه دایاناراق
و قوپوشولاری
بیر دوغوش
یاپئشدیقلاری یئردن قئرئلارکن
و داملانین، حئزلا اوزاقلاشماسینا،
دنیز اولماسینداکی هوه‌سینه
بو یولدا کی اینانیمینا
یئره چارپماسینا، داغیلماسینا، مین پارچالانماسینا
بو دئییشیمده‌ن نه‌لر دوغاجاق، همده بیلمه‌دن.
هئچ او داملالارین باغیرتیلارین دینله‌میسین؟
نه دریرلر؟
نه دئمیش‌لر ایللر بویو؟
داملالار یولوندا یاغارکن؟
یاغیشدا
سئوگیلیمیزین الیندن توتوب، ایسلانارکن؟
گولرکن؟
اوپوشرکن؟
گوز گوزه وورولارکن
درین و کسیلمه‌دن اینقیلابین گورموسن می؟
داملار نه‌دن عوصیان ادر؟
سوزموسان می؟
هوژمله گویدن یئره چارپیلما
بیر داها،
مین یئره پارچالانما،
ذره‌لره دونوشمه
سو، سئل، چای، دنیز، اوقیانوس هوسینده
یئنی دن توپلانمانین،
دامجیلاشمایا چالیشمانین هوه‌سی؟
هر بیر ذره‌نین، دامجینین ایچینده ایمیش،
سئل،چای، دنیز هوسی.
یئنیدن دوغوبان، ذره‌دن دامجی دوغدو
دامجی دان سو آخدی،
آخئبان، آخئریندا شکیللندی،
سئل اولوب یئخدی،
چای اولوب تیکدی،
دنیز اولوبان یاراتدی.
بو داملالارین حیکایه‌سینه یولداشلیق اتمیسن می؟
یوخسا، داملا دئییبن گئچمیسن؟
بیرلشن ذره‌لرین گوجونه
داملالارین گوجونه اینانمیسان می؟
یوخسا دانمیسان می؟
دردینه یانمیسان می؟
یوخسا قاندیرمیسان می کندینی؟
هئچ سورقو سوروبان آختارمیسان ایتیردیگین کندینی؟
بیر دامجی،
مین‌بیر ذره‌دن اولوشموش
قوپمازسا داملالاربولوندوغو یئردن
ذره‌لر قول بویون اولمازسا
داملا بوتونله‌شه‌بیلر می؟
قوپابیلرمی؟
عوصیانلاشار می؟
اینقیلابا باتارمی؟
یاغمورلاشار می؟
دونوشمه‌سه، گئتمه‌سه آماجین
مین پارچایا بولونمه‌سه، سو اولارمی؟
دامجیلار، دامجیلار، دامجیلار
دامجیلار سئل، سو، دنیز، اوقیانوس
سایئلماز، گورونمز، وئجه گلمزلردن
دامجیلار دامجیلار.
شئدیرقی ایله جومار دامجیلار
بیر اولورسا دامجیلار
بیرله شیرسه دامجیلار
آخار گوجلو سئللر، سولار، دنیزلر دامجیدان
داغلاری، داشلاری، قازار
یول آچار دامجیلار
یولسوزلوقلاردا یول آچار دامجیلار.
داملا اولماق
داملاماق اوچون
برکم‌برک یاپیشدیقلاریندان قوپمان گرکیر
گئچمیشدن، گئچمیشینده‌کی کیملیکلریندن سویونماق گرکیر
یئنی دن یارانماق، یاراتماق گرکیر.
یئخئلمازسانسا، قورولمازسان هله.
سینمازسانسا، سازلانمازسان هله.
یئنی دامجی، یئنی عوصیان، یئنی آماج، یئنی یول. یئنه یول.
داملا
آیئلمازسا، آیدینلانمازسا،
دئییشمزسه، یئنیلنمزسه،
دملالاشیبان، سئل اولابیلمزسه
سئل اولوبان یئخا بیلمز
یولسوزلوقلاردان یول آچابیلمزسه.
باتلاقا باتیب، موندار اولار، کور اولابیلمز.
داملالیقدا قالیرسا،
سئل اوئلمازسا،
دنیزایله اوقیانوس دا اولابیلمز.
اوقیانوس شهوتی،
ذره‌لرده، دامجیلاردا، سئل‌لنمه‌لی، دنیزلنمه‌لی
آخاجاقسان، دیرماشاجاقسان یاماجلاری
بو دامجیلاردا
اوقیانوس اولما شهوتی یاشار
آزادلیقین اُدلو هوسینه قاندال کیم ووروب، وورابیلر؟
داملالار اوچون اوقیانوسلاشماق،
آزادلیقا قاووشماق، اوقیانوسو یاشاماق دیر.
هئش بیر داملا
اسارتی یاشامیش می؟
هانکی اسارتدن داملا اوچاماز کی؟
سن، سن ...
آزادلیق هوسینه وورقونسانسا
اوقیانوسلاشمایا وارسا ایچینده شهوتین
دامجی اولوب، داماجاقسان
مین بیر پارچادان اولوشاجاقسان،
گئچمیشیندن، یالان کیملیکلریندن
قوپاچاقسان
قئوراناجاقسان،
یاناجاقسان،
کول اولاجاقسان،
دوغاجاقسان یئنیدن
بو یول دور
ایچیندکی یارادیلمیش اسارتین بارماقجیقلاریندان آزادلاشاجاقسان
بیرله‌شیب، داملالارین اوقیانوسلوقون یاشایاجاقسان
اوقیانوسلاشیب ذره‌لر
آنلئرسان اقیانوسونون ذره‌لرین؟
بو یول، سنله باشلار، منله باشلار.
دامجیلاماق گرکیر هر آن.
انصافعلی هدایت
گئجه یاریسی ساحات 1:42
2024-08-28
Comments
Post a Comment