ساتقینلار بیرلیگی -میللتچیلر آیریلیقی
سالام دوستوم
مقاله نیزی اوخودوم. چوخ سئویندیم.
ایللردیر کی بیزلر، بو دوشونجهلریه تای دوشونجهلری دوشونوب داشئنیب، توپلوما یوکلهمهگه چالیشمئشئق، چالیشیریق.
ایراندا کی تورکلرین توپلوملاری، سیز بویوران ایکی بولوم (جان آزربایجانچیلار و مرز پر گوهرچیلر)ین یانیسئرا رئژیمچی، دینچی، حتتا سولچو کسیملریده ایچینه آلیر.
اونلاریدا گورمهلییک. آمما حایئف اولسون کی ان اونملی هابئله درین اتکیسی اولان بیر کسیمی گورسکده، اونلارین میدیا-سوشیال میدیا گوجلرین گورمهدیم توتوروق، توتموشوق.
بو قوروپون سایی ۳-۴ مين نفر اولا اولمایا آمما چوخ گوجلو حرکت ادیرلر. حتتا میللی حرکتچیلرین یازارلاریندان دا بئله گوجلودولر.
بوقوروپ، "ساتقینلار" قوروپو دور. بونلار، اوزلرین، وطنلرین، میللتلرین، تورکلرین میللی چئخارلارین، وطنین میللی قایناقلارین ... هابئله توم تاریخسل، توپراقسل، اینسانسل وارلیقلاریمیزی، ایران-فارس دوولتیندن آلیدیقلاری بیز آز ایمکانلا پولا ساتیرلار.
بونلارین نوخداسی، ایران-فارس دوولتینه باغلی اولان گیزلین هابئله آشکار قوروملا قورولوشلارین الینده دیر.
بونلارین ۳-۴مین اولمالارینا باخمایین. بونلار، بیر مرکزدن یونهتیلیرلر.
اوندان دولایی، بیر اوردو کیمی میدیادا-سوشیال میدیادا بیرلیکده، بیر زاماندا، بیر بللی آماجلار اوزهرینده حرکت ادیب، تبلیغ ادیرلر.
تاسسوفله بونلارین بیرلیکدهکی سسلری، چوخ گوجلو گورونور. گور چیخیر. میللتیمیزده بو اوردوسال ۳-۴مین نفرین سسین داها چوخ ایشیدیر.
بونلارین آماجی بللی دیر. اونلار، چوخلو "آزربایجان"لا "تورک" سوزلری ایله باغلی آدلارلا باشلیقلارآلتیندا یازیرلار، دانیشیرلار، خبر یایئرلار، گولمهجه، ویدیولار یایئرلار.
بونلارین ایکی آشامالی تاکتیکلری وار. بیری، گوندهلیک دیر. یعنی، بوحرانسیزلیق گونلرده، هر شئی دن یازیرلار، دانیشیر، یائیرلار آمما اونلارین قئرمئزی جیزگیلری ایران-فارساچئلیق اولدوقوندان، ایرانا، ایرانچیلیقا چوخدا توخونمورلار.
البته آرادا برهده نقد، اینتیقاد کیمی سوزلرده آپارابیلیرلر. اورموگولو، کورد مسئلهسی، آدلارین دئییشیلمهسی، .... کیمی قونولارادا موستقیم یادا غیری موستقیم توخونابیلیرلر.
رئژیمه قارشی آزاجیق دورمالاریدا اولسا، میللتیمیزین ایچینده آبئری، حورمت همیده یئر قارانماق اوچون دور کی اگر بیر زامان ایران-فارس ممالیکین ایچهریسینده یادا ایشیگینده درین-گئنیش بوحرانلارلا قارشئلاسیرسا، مئیدانا گیرسینلر.
بونلار، بوحران ایله قارماقاریشیقلیق چاغلاریندا، بونلار، ان سیستیماتیک، اوردوسل، رئژیم همیده ایرانچی توتوملاری ایله اوزه چیخیرلار.
بونلارین آلدیقلاری امیر، هر نهتهر اولور اولسون، میللتی سوسدورماق، حرکتسیز اتمک، قورخوتماق، ائولرده ساخلاماق دیر، بوحرانی درینلشدیرمکدن، گئنیشلشدیرمکدن اوزاق توتماق، رئژیمی بوحرانین ال ایاغین یغماقا زامانلا ایمکان یاراتماق دیر.
بونلارین بیر نیچه اوستو آچیق تاکتیکلهری وار کی بوحران چاغلاریندا اونلاری جامتاییلاریندان چئغادیرلار.
الیف - پهلوی گلیر. پهلوی-دن چوخ قورخون. پهلوی چوخ پیسدیر. اوندان دولایی، اعتیراضلارا قوشولمایین. اونو درین، گئنیش اتمهیین. آائودن ائشیگه چیخمایین. حرکت اتمهیین. اینقیلاب اتمهیین. چون، اگر سیزده اعتیراضلارا قوشولارسیز، ایران-فارس ضعیفلر، اوندا دا پهلویچیلر گلر.
اونلارا گورا، تورکله.رین، پهلویه قارش سئچیملهری یوخ دور. چارهز یوخدور ایللا کی پهلوی-نی قبول اده سیز. پهلویده، پیشه وری چاغیندان داها قددار داوراناجاق.
ب - کورد قونوسو. کوردلرین قونوسو، تورک-کورد اولابیلیر-اولابیلمز ساواشی، کورد-تورک آراسیندا کی توپراق چوزولهبیلیر-چوزولهبیلمز قونولاری، کوردلهرین سیلاحلی اولمالاری ... اورتایا آتئب، اعتیراضلارا آلتیرناتیو یارادیرلار تا اگر تورکلرین اعتیراضلاری اولورسادا، اونلارین گوجلری، باشقا اعتیراضچیلارلا بیرلشمهسین بلکه اعتیراضچی میللتلرین گوجلری آیریلاسینلار، حتتا قارشی دوروب، بیربیرلرینین گوجون آرادان آپارسینلار تا ایران-فارسا نفس ایمکانی یارانشین تا یارانمیش هر بیر ایچ- دئش بوحراندانلاردان باشی اوجا چیخسین.
اونلار، کوردلری ایران-فارسدان داها قورخمالی گوستهریرلر. کوردلری، تورکلرین ان قورخمالی دوشمنی کیمی گوستهریرلر.
اونلارا گورا، ایران-فارس (حتتا سپاه) اولمازسا، "کوردلرین قارشیسیندا کیم دوراجاق" کیمی دوشونجهلری یایارلار.
هر هانکی بیر قونودا کی کوردلرله یاناشی، فارسلار، عربلر، بلوچلار دا اورتایا چئخسالار و ایران-فارسلیقا بوحران یاراتسالار، اونلار، پهلوی قورخوسو، کورد قورخوسو ایله، تورکلری دالی اوتورتمایا چابالارلار.
تاسسوف ایله، میللی فعاللارین بیرلیک مرکزینین اولمادیقیندان، ساتقینلارین چابالاری سونوج وئریر. ایران-فارسلار، ان گوجسوز زامانلاریندا بیله، ایاقدا قالمانی داوام اتدیرهبیلیرلر.
میللی دوشونجهلی یازارلارین بیر مرکزی اولمادیقیندان، بیر گوج مرکزینه باغلی اولمادیقلاریندان دولایی، ههرهسیندن بیر سس چیخیر. اونلارین هرهسی فرقیلی زاماندا، جوربهجور تحلیللرله آماجلارا گورا یازیرلار. حتتا بیربیرلرینین گوجون پوزقونا ایتهلیرلر.
یعنی میللی حرکتلی دوشونجهلیلرده، دارماداغینلیق، قارماقاریشیقلیق گورونور. میللت بیلمیر کی بو قارماقاریشیقلیقدا کیمین یانیندا دورسون. نئجه داورانسین.
دوشمن (ایران-فارسلا ساتقینلار لشگری) بیلیر، ایچینده، جبهه سیندن تکجه بیر سس چیغارتمالی تا کی توپلوما درین، گئنیش اتکی بوراخا بیلسین تا ائلییه بیلسین کی بوحرانی، آز خسارتله ماهار اتسین (نوحرانین ال آیاغین توپلاسین).
ج - ساتقینلار لشگری، داییما تورکلری توتوقلانماقدان، ائولومدن، ساواشماقدان، ائولدورمکدن قورخودورلار.
اونلار، داییما غیری موستقیم اولاراق تورک توپلوموندان سوروشورلار کی پهلوی یا کوردلر میللتی آیاغا قالدیریب، اولومه وئردیرلر، نه اولدو؟
بئلهلیکله ده تورک توپلومونا تلقین ادیرلر؛ نه یاخجی کی "عاغئللی" آزربایجانلیلار (تورکلر) آیاغا قالخئب، پهلوی یا کوردلر اوچون ائولومه گئتمهدیلر.
ساتقینلار تورکلرین ایچینده بو دویغونو یارادیرلار کی؛ بو اعتیراضلار، بو عوصیانلار، بو قانلار نهیه یارادی. اگر بیزده اونلارلا بیر زاماندا آیاقلانسایدیق، باشیمیزا همن موصیبتلر گلردی.
ساتقینلار، همیشه آزربایجانین سوکوتون، حرکتسیزلیگین، قئراخدان باخماسین، قاریشماماسین هابئله ... چوخ تعریف ادیب، عاغئللی داورانیش گوستهریرلر. ایفتیخار اتمهلی کیمی بویوک بیر قونو گوستهریرلر.
ساتقینلار دئمیزلر کی تورکلر، آزربایجانچیلار، ایستیقلالا گیدن یولو هابئله موستقیل و میللی دوولت قورما فورصتین نئجه الدن وئردیلر. دیمیزلر کی قازانان ایران-فارس دوولتی اولدو. اودوزان ایسه تورک میللتی.
چ - ساتقینلار داییما دییرلر کی آزربایجان و تورکلر، تهرانا، فارسا، کورده، ... قوشولمییجک. نییه کی آزربایجان هر دفعه بیر حرکته قوشولوب، شهیدلر وئریب، هئش بیر چئخار الده اتمئییب.
ایندی گرک هئش بیر حرکته قوشولمایا، گوزلویه گوره نه اولور.
ساتقینلار آرتیریرلار؛ فارس، کورد، ... گئتسینلر، قئرئلسینلار. اگر اونلار، ظفر الده ادرلرسه، رئژیم یئخئلارسا، اوندا، بیزده آیاغا قالخئب، ایشیمیزی گورهریک.
س - ساتقینلار داییما "ستارخان"، "باقیرخان"، "باکری" کیمی کیشیلهرین آدلارین سسلندیریرلر. ساتقینلار او آدلاری، آزربایجان میللی قهرمانی کیمی گوستهریرلر.
آمما بیلینمهلیدیر کی ستارخان، باقیرخان، باکری-لره تای آداملار، ایرانچیایمیشلر. ایرانچیلیق یولوندا جاندان باشدان گیچیب، فداکارلیقلار اتمیشلر.
اونلارین توم چابالاری ایرانین گوجلنمهسی، فارسلیقین زوربالانماسئنا سونوجلانمیشدیر.
ساتقینلار، هئش بیر زامان، پیشهوری، خیابانی، ایگیرمی بئش مین آزربایجان اوچون شهید اولان فدایی لردن، اونلار مین فداییلرین دیدرگین دوشملهریندن آد چکمزلر.
چون بو شهیدلرله او مینلر فداییلر، ایستیقلالدان، میللی-موستقیل گونئی آزربایجان، تورک میللتی ایرادهسیندن، تورک میللتی دوولتیندن، تورک دونیاسیندان، تورکیه ایله آزربایجان جومهورلوقلاریندان آد چکمزلر.
ساتقینلار، مینلرجه ایستیقلالچیلاردان کی وطن ایله میللت یولوندا وطندن دیدرگین دوشوبلر، ایستیقلالچی پارتیلردن (حیزبلردن) آد چکیب، اونلاری آزربایحانین میللی قهرمانلاری هابئله میللی اونجوللری کیمی گوسترمزلر.
نییه، چون بونلارین دوشونجهلری، آنلاییشلاری، داورانیشلاری، ایرانچیلیق ایله فارسچیلیق اوچون دئییلده تورکچولوک، آزربایجانچیلیق اوچوندور.
ش - ایران-فارس سیستیملهری بوحرانا دوشرکن، ساتقینلار داها چوخ تورکجه موسیقی، رقص، ... یایارلار. داها چوخ دیل حاققی، اورمو گولو حاققی کیمی قونولارین اوزهرینه توپلانارلار.
بوحران چاغلاریندا، ساتقینلار داها چوخ بعضی ایرانچی، رئژیمچی نومایندهلرین، یا ریژیم باشچیلارینین بیر نئچه تورکجه جوملهلهرین، دالبادالا یایارلار.
ائلهبیل کی میللت تورک دئییل. میللتین دیلی تورکجه دیییل. ایلهبیل کی ایراندا، آزربایجاندا، قشقاییستاندا، گونئی تورکمنستاندا هئش تورکچو، تورک دانیشیب-یازان یوخ دور.
ائیله بیل کی تورک دیلی ایرانین باشاباشیندا رسمی-ایداری دیل اولموش.
ائیله بیل کی میللی دوشونجهلی فعاللار تورکجه یازمیرلار، تورکجه دانیشمیرلار.
ائیله بیل کی تورک میللتی، ایران-فارسچیلارین بیر نئچه جومله تورکجه دانیشمالارینا تامارزیدیرلار.
ساتقینلار، بو تاکتیکلرله هم بعضی ساده تورک کسیملرینده طاماح یارادیرلار، همیده اومود ساتیرلار کی "تئزلیکده تورکو دیلی مدرهسهلرده "ایکی ساحات" درس اوخوناجاق." یا رهبر بیله دئییب، پزشکیان فلان یئرده جسارتله بیر تورکو ضرب المثل دئمیش یادا باکیدا تورکجه دانیشمیش ....
ساتقینلار ایچی بوش اومود ساتیرلار. اومودون یانیندا ایسه، قورخو پالیرلار.
ص- ساتقینلار، بوحران چاغلاریندا، ایرانین مرزلهرین ساوونان، تیرورچو کوردلر قوروپلاری الی ایله ائولنلری، "شهید" ، "آزربایجان شهیدی"، "تورک شهیدی"، "تیرور قوروپلارینا قارشی ساواشان شهید"، ... کیمی خبرلری یایئرلار.
اونلارا گورا، تورک میللتی، ایران اوچون ائولن عسگرلره (اوزللیکله ده تورک اولورسالار) میننت بیلدیرمهلی و اونلارا احترام قویمالیلار. اونلارا گورادا ایران-فارسلارین یانیندا دورمالی دیرلار. اعتیراض اتمهمه لیدیرلر. اعتیراض ادن میللتلرین اعتیراض گوجلرین، گوجلندیرمهمهلیدیرلر
اوردوسال ساتقینلارا قارشی، میللی دوشونجهلی فعاللارین بیرلیگی، بیر فرماندهی (کوماندانلیق) مرکزی یوخ دور کی اونلارا اونجهدن ایستیراتئژی، واختیندا دا تاکتیک، آماج، دوشونجه ایله حرکت یاراتماق اوچون، دوولت قورماق، ایستیقلال آلماق اوچون یول یولاغا گوستهره. تا بو کسیم، بیرگه، ال اله وئریب، ایران-فارس میللتلهرین، اوزللیکله فارس، کورد، عرب، بلوچ و … حرکتلری زامانی بوحرانلاردان فایدالانیب، ایدارهلرین، قوروملارین، قورولوشلارین، وطنین، آزاد ادیب، دوولتین قورسون.
تورکلر ایران-فارسیستاندا یارانان بوحرانلارین ایچینده، موستقیل گونئی آزربایجان، گونئی تورکمنستان، قشقائیستان دوولتین قورسالار، قوروسالار، باغیمسیز مملکت ایله دوولتده پهلویه یئر وئرن اولورسا گلسین. کوردلره یئر وئرن اولورسا گلسینلر. تورکلر اوز میللتلهرین قوروماقا-دوولتلهرین قورمایا مسئولودورلار. باشقا میللتلردن تورکلهره نه.
انصافعلی هدایت
ژانویهٔ 24- 2026
No comments:
Post a Comment