اونوتدوغوم آزادلیق شعریم
من
"آزادلیقی" چکدیم شعره
بو گون.
اینانمادی بیر کس آزادلیقا
اوچ-دوره جوت
یئتیم یئسیر جوجوکلاردان باشقاسی.
آزادلیق نه دیر؟
دئدیم ...
ایندی ایسه ...
اونوتموشام نه دئدیگیم آزادلیق شعریمی
اعدام قورخوسوندان.
توتدولار آزادلیقا اینانان یئتیملری
آپاردیلار ایسارتین مودافعه چیلر محکه مه سینه
هامیسی،
ایسارتی یاشایان و عادت ادن یاشلیلار.
محکوم اتدیر
او یئتیملری قورو آغاجلاردان آسیلماغا
آمما ندن ایسه
هئشکیمین یوخودور من ایله ایشی
محکه مه ده دورموشام باخیرام نوماییشه
یئتیملردن هئش بیر جینقیر سس چیخمادی
نئجه کی اشیتمیرم موحاکیمه نین سسین.
سونوندا!
فریاد ایله دیم
او آزادلیقی یازان منم
من!
"وارسا گوناهکار اگر" دئدیم،
"وارسا آزادلیقی یازان اینسان
او، منم!" دئدیم
"چکین داره منی!
بوراخین یئتیملریمی آزادلیقا!"
فریاد ایله دیم.
هامیسی دور و دایندی
بوز کیمی دوندولار
محکمه آندیرسام اگر.
"یوخ!
آزلدلیقا اینانلار موجازات اولمالی
یوخسا فیکیر
یاساق دئییل
بوردا آزادلیق وار فیکیره
فیکیره اینانماق یاساق دیر قانونا گورا"
دیدی بیریسی بوزلوقدان.
آزادلیقین دوغدوغو یئتیملری دوزدولر دوزومه
دارلارین قوروموش آغاجلارینا سو وئردیلر
اعدام یولونا سوردولر آزادلیقین اوشاقلارین.
من ایسه رویامدا
فریاد اتدیم:
اونلاری یوخ!
آیئلدیم یوخودان
بیلمیرم
بلکه ده بیر دوور
دوورومه فیرلاندیم، یئریمده
گئنه رویانین آرخاسی گلدی
اونوتدوم آزادلیق شعریمی
نه یازمیشدیم چیخ دی باشیمدان
آما
بو سفر
فیکریمین یئتیملرین آلماقدان باشقا
نه بیر سوزوم، نه ده بیر فیکیریم وار باشیمدا.
"من تاولادیم اونلاری!
تاولایان منم!" دئدیم
"بوراخین اوشاقلاری!
اکین داره منی!"
دییرکن
ایلتیماس اوچون
شور بولاقلاری
آیاق توتدولار گوزله ریمدن
سس سیز یئتیملریم اوچون.
بیر سوکوت اولاشدی
دینمزجه
موحاکیمه سیزجه
آپاردیلار داره منی
بوراخدیلار آزادلیقا
آمما
دینمز، سس سیز، دیفاسیز
فیکیره
جومان حئیرانلیقلا
ایسارتده، بنده لیگه اینانمیش بویوکله ره
باخان جوجوقلار.
یئتیملر،
سس سیزلیگه جومموش
و آزادلیق دوشه رگه سینه
سفر اتمیشلر دیر.
منی یئل اسدیرر کن دار باشیندا
یئتیملر
دوغوردور آزادلیق بالالارین
سس سیزلیکده.
من اونوت دوقوم آزادلیق شعرینی
اونلار جانلاندیرمیش
یاشیر، یاشادیردیرلار!
آزادلیق،
دین اولموش یاشیرمیش
مندن سونراکی نسیللرده!
انصافعلی هدایت
تورونتو – کانادا
25 سپتامبر 2016
No comments:
Post a Comment