جهالت موهندیسلیگینه غلبه 200
https://youtube.com/live/hHlm8JGqpCQبیتیکین آدی: مناجات پیغمبری
یازار: بللی دئییل
دیل: تورکجه
الیفباء: تورکجه - عربجه
یازی گورونتوسو: دوزیازی
چاغ: بللی دئییل
نوسخه: بللی دئییل
ساخلانئلان یئر: ایستانبول اونیوئرسیته کیتابخاناسی - تورکیه
صحیفه سایی: 28
قونو: دوعایا دوشونوشله (فسفه اوزه ره باخیش) باخماق
بوگون، تورکیه جومهورلوقونون 102 اینجی قورولوش ایلی، "جهالت موهندیسلیگینه غلبه" نینده "200" اینجی بولومون قوتلادیق.
بو گونه دک، آللاهین لوطفو و کرمی ایله، 350 ساحاتات چوخ، کندیمیزی گلیشدیرمک اوچون عوموروموزو بو یولدا سوردوک.
بیزجه، هئچ بیر شئی الدن وئرمه میشیک کی هئچ، بلکه بیر دیلی؛ آنا دیلیمیزی، میللی دیلیمیزی، همده قاداغا اولموش، قاچاق بیر دیلی، کندی کندیمیزه اورگنمه یه باشلامیشیق.
ایندی ایسه، بیر آزدا اولموش اولسا بئله، تورک دیلینین اوخوماسیندا، ال یازمالارین آنلاماسیندا، ایره لیله میشیک.
البتته کی بو باشاری، تورک دیلینین اوخوماسی، یازماسی، آنلاماسی، دوشونمه سی، تانیماسی، اینانماسی، …، بو باشلادیقیمیز تورکچولوگ یولونون سونو دئییل.
بو یولا، اورگندیکله ریمیزین گوجو ایله داها گوجلو و ماراقلا و اورگنمک دیله گی ایله داوام اتمه لیییک تا کیم تورک دیلینین یازماسیندا، اوخو ماسئندا، آنلاماسئندا، دووشونوشله ری ایله بیرلشمه ده، …، قبول اولونابیلیر بیر یئره چاتاراق، گوجلو اولوب، سوز- ساو صاحیبی اولاق.
بو ایکی یوز گئچیردیگیمیز اوتوروشلارین سونوندا، تورک اویقارلیغینین یازی، دوشونجه هابئله آنلایئشیندان داها بیر اعجوبه بیتیک ایله تانیش اولدوق.
بو بیتیکین آدی "مناجات پیغمبری" یازیلمیش دیر. بو آد، پی.دی.اف.ین آلنیندا یازیلان آدلا، آزدا اولسا، آیری دیر. اورادا "مناجات پیامبری" یازیلمیش دیر.
یازارین اون سوزوندن گورونور کی بیر تورک اینسانی همده حاکیم و دولت آدامی؛ "اسماعیل بک بن ملک اسفندیار" آدلی بیریسی، ائوز شاگیردلرینده ایستیر تا ایسلام دینینین رسولی اولان محمد حضرتلرینین بیر "دعا"سین آچق-آیدین، تورکجه چئویریب، یازسینلار.
یازاردا، بو دوعانی آچیقلاماق آماجلا، بو بیتیکی یازمایا باشلیر. دوعا بئله باشلیر: الهی اعوذ بک من عقابک و اعوذ بک برضاک من سخطک و اعوذ ...
بو تورک یازار، دوشونور، بیز تورکله رین بو چاغداکی تجروبه میزلریندن و بکلنتیله ریندن، چوخ ایره لی گئچمیش، آلئشدیقیمیز کیمی، بیزی، همده بیله رک آلئشدیردیقلاری کیمی دوعانی، دوعانین آچیقلاماسین دوشونمور.
اوق بیر دوشونور و تعصصوبسوز تورک اینسانی اولدوقو اوچون، همده دوعانی ده رین و گئنیش دوشونمک اوچون، موسلمان دوشونورلرین یاراتدیقی اورتاق دوشونوش اوزره قورولان، توم تورک و موسلمان عالیم و بیلیجیله رینین قبولونا گیرمیش قاوراملاری ایله سوزله ری، دوشونمه لی و او دوشونورله ره تای، قاوراملاری آنلامالی، اونلارا تای کیتابلاری هابئله دوعالاری دا اوخویوب، اونلارا تای باخمالی دیر تا کیم عاغیل آدلی گوجو ایشه چکسین.
یازار، او دوعانین ترجومه سی و آچیقلاماسی یئرینه، موسلمان عالیم و بیلگینلر آراسیندا یایقین و قبول اولونموش فلسفه سوزله رین، همده بیربیر، آچیقلایئر تا کی اوخوجوولار، یازار، کیتاب، مقال آراسیندا عاینی دوشونجه نی داشییاراق، دارتیشسینلار، آنلاشسئنلار.
نییه کی اگر اوول کی دوشونورلر، یازار و یازینین داشیدیقی مفهوم و قاوراملار آراسیندا، اوخوجو ایله فرق و ایختیلاف اولورایسه، هابئله هر کس اوز دوشونجه سی ایله یورورسه، اورتاق قاورام و آنلایئش اوزه رینه دانیشیق ایره لیله مز. آنلایئش اورتایا چئخماز. دوشونجه لری سه په له نیر. هئش کیمف او بیریسین دوشونوب، آنلاماز. دهرین دوشونوشده و علم اوزه ره باخیشدا، بیر قاوراملار اوزه رینه، اورتاق آنلایئش یارانمالی دیر. البتته کی سونرا، هر کس، اوزونون باشقا جوره آنلادیقیندا یازاراق دوشونوشله دارتیشما آلانئنا آتابیلیر.
بوندان دولایی، او آدی بللی اولمایان تورک دوشونورو، بیر دوعانی بئله، او چاغدا، بیزیم بو چاغدا عادت اتدیگیمیزتورکجه یه چئویرمه مک اوچون، لازیم گورور تا تاریخده کی تورک هابئله موسلمان فیلسوفلار و دوشونورلرین دوشونجه سی و یازدیقلاری آنلاملارا وستونده بیر یئره واردیقلاری قاوراملاری اوخوجولار اوچون یئنی دن تعریف اتسین، آنلاتسین تا سونرا دوعانین چئویرمه سینه گیرسین.
یعنی؛ یازار، او چاغدا بئله، باشقا آنلایئشلا، باخئشلا فرقیلی بیر باخیشیلا دوشونجه نی اورتایا قویور. سونرادا دوععانی، او دوشونجه یه دایاناراق، خاریقی عادت اوزه ره، چئویره رک آچیقلیر. بودا بیزله رین عادت اتدیگیمیز یول یولاقا و باخیش دئییل.
بوندان دولایی، دوعانی چئویرمه دن ائونجه، آچیقلامانی گتیرمه دن ائونجه، "ماهیت"، "جزئی"، "ذات"، "مفهوم"، "کلی"، "صفت"، "اسم"، "وجود"، "عدم"، "هویت"، "تعیّن"، "علت"، "معلول"، "واجب الوجود"، "ممکن"، "محال"، "ممتنع"، "قدیم"، "ازلی"، "ابدی"، "سرمدی"، "حادث"، "عالم"، "ممکنات"، "جوهر"، "عرض" کیمی قاوراملاری و دوشونجه مرکزلی سوزجوکله رین اورتاق و دوشونوش آنلامین تعریف ادیر، آچیقلیر.
دین و دوعا قونوسونو بو جوره گیریش، هابئله دوعایا بئله باخماق، بیزیم اوچون چوخ تازه و غیرعادی بیر یول یونتم دیر.
بیز، عمورموزده، دوعایا بئله باخمامیشیق. بئله باخمانی بیزدن اسیرگه میش لر. بیزه یاساق اتمیشلر. بو جوره و عاغیل، فلسفه اوزره باخمانی، بیزله ره اورگندیرمه میش لر.
بیزیم دیلیمیزی، باخیشیمیزی، گوروشوموزو، دوشونجه میزی، بیزیم وطنیمیزه تای ایشغال اتمیشلر.
ایشغالچیلار، اوز چئخارلارین قورویاراق، بیزه دئمیشلر کی گوزله رینیزی یومون! آغزینیزی آچین! هر نه دئییرلر، دئسینلر، سیز، اونلارین آنلاملارین دوشونمه دن، ده ریندن آنلامادان، دئییلنله ری تیکرار ادین! ان سونوندا دا "آمین" دییه رک، نوقطالایئن.
بو تاریخده یاتمیش تورک یازاری، بیز تورکله رین، بیر باشقا چاغدا، ایشغال آلتیندا اولدووقوموزو گورموش کیمی، بیر اولگو و آنلایئش قلاووز یاراتمیش دیر.
بونون اوچون ده، او، دینه، دینچیلیگه، دوعالارا چوخ باشقا و فرقیلی باخاراق، بیزی فرقیلی باخمایا چاغیرمیش.
او، دولایئسی ایله، بیزه دئییر کی گلین فلسفه ایله منطیق اوزه رینه قورولموش بیر بئیین دن، دوشونجه دن، عاغئلدان فایدالانئن.
بودا، اونو گوسته ریر کی تورک دوشونورلرینین بئیین لرینده، سوزجوکلهرینده، دیلله رینده، سوزجوکلرینده، دوشمه نین ایشغالئنا گیرمه میشدن اونجه، تورک توپلومونون دوشونورلری، یازارلاری، عاغئللئلاری، ضئیالئلاری، دوشونجه اونجوللری، هر بیر شئی یه، آغئللا، منطیقله باخارمیشلار، آنلامایا چالئشارمئشلار.
بو اوزدن ده ایمیش کی اونلار، ایشغال اولمامیشلار بلکه آزادلیق گوجونو و ایداره مقامینا چاتماقلا برابر، دونیانین بیر چوخ یانئن ایداره اتمک و ساخلاماق عاغلئنا وارمئشمئشلار ایمیش.
بیتیک، دینی و دین ایچره اولان هر بیر شئیی فرقیلی دوشونمک اوچون، بئینیمیزه بیر ده میر چیو تاخیر.
بو چیو، بیزیم دین و دین آدی ایله بیزله ره وئریلن هر بیر تعلیم و تربییه یه قارشی بیر ائولچو طورو دور. عاغئل اولچوسو.
بو یازی و دوشونورون یازئسیندان بئله گورنور کی تورکلر یومولو گوزله بئله آللاها عیبادت اتمزمیشلر. اوندان دولایئ دا، تورک دوشونجه ایله تورک توره سینده، یومولو-باغلی آغئلئن یئری اولمامالی ایمیش.
انصافعلی هدایت
٠٨ جمادی الاول ١٤٤٧
No comments:
Post a Comment