جهالت موهندیسلیگینه غلبه 202
بیتیکین آدی: مجموعه طب تورکی
قونو: طب و علاجلار
دیل: تورکجه
الیفباء: تورکجه - عربجه
یازان: قیسون زاده
یازی طورو: الیازما
یازی شیوه سی: قوشما - دوزیازی
اصل یا نوسخه: بللی دئییل
چاغ: 975 هیجری قمری
هارادا ساخلانئر: ایران آدلانان یئرین میللی شورا مجلیسینده
کیتاب یازان "قیسون زاده: آدلی بیر تورک دور کی بیتیکی یازاراق، عوثمانلی سولطانی؛ سیلم خان حضرتله رینه تقدیم اتمیش دیر.
یازارین یازدیغئنا گورا، او، اونجه لرده طب و داوا ساحه سینده بیر بویوک بیتیک توپلامیش. بیزه بئله گلیر کی اونجه کی “مهندسی جهل” برنامه لریمیزین بیرینده، او تورکجه کیتابلا دا تانیش اولموشودوق.
بو قئسسا بیتیک، او اوزون بیتیکین اوزتی یا سئخئلمئشی دیر. یازار، بیر آدلیم طبیب دیر کی قوشمایا دا (شعره ده) حاکیم دیر. همن چئخاریندان دولایی، بو کیتابین بیر بولومون هم قوشما طرزینده، بیر پاراسئنددا دوزیازی طرزینده یازمیش دیر.
حکیمین یازدیغئنا گورا، بیتیکینی 975 ایجی ایلده یازیب. یعنی بو کیتاب 472 ایل اونجه و عوثمانلی چاغئندا قلمه آلئنمیش دیر.
دئمه لی دیر کی بو یازاردا، او زامانین توم موسلمانلارینا تای لوز اوزمانلیق یازئلارینا اساس، قرآن و رسول حضرتینین سوزلهری دیر. بو طبیب ده، یازئلارینین باشلیقین، قرآنین آیتله ری و رسول حضرتینه ایستیناد اولونان سوزلری توتموش دوردیرلر.
اسکی طیب و داوا درمانین بونووره سی دوورد عونصور اوزه رینه قورولموش. بو دورد عونصوره "سو"، "اود"، "توپراق"، "یئل" دئنیلیر. بونلارا اساس، اینسانین اتین قانئن، هابئله مزاجین دورد یئره بولموش لر تا همن دورد عونصورله رین خاصییتلری ایله جوررنسینلر. اینساندا اولان او دورد خاصییت یا دوروم؛ "صفری"، "سودا"، "بلغم"، "قان" دئرلار.
بیتیک چوخ ساده تورکجه ایله یازیلمیش. الیازمالاری دا چوخ گوزل و اوخونابیلیر خط ایله رسم اولوب دور. اونا گورادا هر کیمسه، الیفبانی باجارار ایسه، چوخ گوجلنمه دن، بو کیتابی اوخویابیلیر. آمما کیتاب مرضلر و داوا درمان اوزه رینه یازیلدیقی اوچون، اوزمانلیق دیلی دیر کی اوزمانلیق ایستر تا اونون نه اولدوقون دوغرو دوزگون آنلاسین.
انصافعلی هدایت
٠٩ جمادی الاول ١٤٤٧
No comments:
Post a Comment